જામનગર જિલ્લાના કાલાવડ ના એક યુવાનને પોતાના મોબાઈલ ફોનમાં ફ્રી મૂવી એપ ડાઉનલોડ કરવી ભારે પડી

• સાયબર ચંચિયાઓએ મોબાઈલફોન હેક કરી લઈ યુવકના ખાતામાંથી રૂ. ૨.૦૯ લાખની ઓનલાઈન ઠગાઈ કર્યા ની પોલીસ ફરિયાદ

દેશ દેવી ન્યુઝ જામનગર તા ૩૦ મે ૨૬, જામનગર જિલ્લાના કાલાવડ શહેરમાં ઓનલાઈન છેતરપિંડીનો વધુ એક ચોંકાવનારો બનાવ સામે આવ્યો છે. ફ્રીમાં મૂવી જોવા માટે એક એપ્લિકેશન ડાઉનલોડ કરનાર યુવક સાયબર ઠગોના જાળમાં ફસાઈ ગયો હતો. અજાણ્યા સાયબર ઠગોએ યુવકનો મોબાઈલ ફોન હેક કરી તેના બે અલગ-અલગ બેંક ખાતાઓમાંથી કુલ રૂ. ૨,૦૯,૫૩૦ની રકમ ગેરકાયદેસર રીતે ટ્રાન્સફર કરી ઠગાઈ આચરી હોવાનું બહાર આવ્યું છે. સમગ્ર મામલે કાલાવડ ટાઉન પોલીસ સ્ટેશનમાં ગુનો નોંધાતા પોલીસે તપાસ શરૂ કરી છે.

પ્રાપ્ત વિગતો મુજબ કાલાવડના ખોડીયારપરા વિસ્તારમાં રહેતા અને ફોટોગ્રાફી સ્ટુડિયોનો વ્યવસાય કરતા સાહિલભાઈ મનસુખભાઈ તરપદા નામના પટેલ યુવાને પોતાના ઇન્સ્ટાગ્રામ એકાઉન્ટ પર ફ્રી મૂવી જોવા માટેની એક જાહેરાત જોઈ હતી. જાહેરાતમાં દર્શાવાયેલી “ક્યુબી” નામની એપ્લિકેશન ડાઉનલોડ કર્યા બાદ તેમના મોબાઈલ ફોનમાં ટેકનિકલ સમસ્યાઓ શરૂ થઈ હતી. એપ ઇન્સ્ટોલ થતાં જ મોબાઈલ વારંવાર હેંગ થવા લાગ્યો હતો. શરૂઆતમાં સામાન્ય ટેકનિકલ ખામી હોવાનું માની સાહિલભાઈએ એપ્લિકેશન અનઇન્સ્ટોલ કરી નાખી હતી. તેમ છતાં મોબાઈલમાં સમસ્યા યથાવત રહેતાં થોડા જ સમયમાં ફોનમાં રહેલો મહત્વનો ડેટા અને વિવિધ એપ્લિકેશનો ડિલીટ થવા લાગ્યા હતા. આ દરમિયાન અજાણ્યા સાયબર ઠગોએ મોબાઈલ અને બેંકિંગ સિસ્ટમ પર કબજો મેળવી લીધો હોવાનું સામે આવ્યું છે.

પોલીસ ફરિયાદ મુજબ ઠગોએ સૌપ્રથમ બેંક ઓફ બરોડાના ખાતામાંથી નાણાકીય વ્યવહારો કર્યા હતા. ત્યારબાદ અન્ય બેંક ખાતામાંથી પણ અનેક ટ્રાન્ઝેક્શન કરી રકમ પોતાના નિયંત્રણ હેઠળના ખાતાઓમાં ટ્રાન્સફર કરી હતી. સમગ્ર ઘટનામાં કુલ રૂ. ૨,૦૯,૫૩૦ની રકમ ઉપડી ગઈ હોવાનું જાણવા મળ્યું છે.બેંક ખાતામાંથી રકમ ઉપડી જવાના મેસેજ મળતાં સાહિલભાઈને છેતરપિંડીનું ભાન થયું હતું. ત્યારબાદ તેમણે બેંક અને સાયબર હેલ્પલાઈનનો સંપર્ક કરી ખાતાઓ સુરક્ષિત કરવાની કાર્યવાહી હાથ ધરી હતી અને અંતે કાલાવડ ટાઉન પોલીસ સ્ટેશનમાં ફરિયાદ નોંધાવી હતી.

આ બનાવ બાદ પોલીસે ભારતીય ન્યાય સંહિતા તેમજ ઇન્ફોર્મેશન ટેકનોલોજી એક્ટની વિવિધ કલમો હેઠળ ગુનો નોંધી તપાસ શરૂ કરી છે. મોબાઈલમાં પ્રવેશ મેળવવા માટે કઈ પદ્ધતિનો ઉપયોગ કરવામાં આવ્યો હતો, રકમ કયા ખાતાઓમાં ટ્રાન્સફર થઈ હતી અને તેની પાછળ કઈ સાયબર ગેંગ કાર્યરત છે તે દિશામાં તપાસ ચાલી રહી છે.સાયબર નિષ્ણાતો લોકો માટે ચેતવણીરૂપે જણાવે છે કે સોશિયલ મીડિયા પર દેખાતી અજાણી લિંક, ફ્રી મૂવી એપ્લિકેશન અથવા આકર્ષક ઓફરવાળી એપ્સ ડાઉનલોડ કરતા પહેલાં તેની સત્તાવારતા ચકાસવી જરૂરી છે. અજાણી એપ્લિકેશન મોબાઈલમાં ઇન્સ્ટોલ કરવાથી વ્યક્તિગત માહિતી, બેંકિંગ વિગતો અને નાણાકીય સુરક્ષા જોખમમાં મુકાઈ શકે છે. પોલીસે પણ નાગરિકોને સાવચેત રહેવા અપીલ કરી છે.

જામનગરમાં હવસખોરે હદ વટાવી : માતા-પિતાની છત્રછાયા ગુમાવી ચૂકેલી અનાથ યુવતીને વાસનાનો શિકાર બનાવી ગુજાર્યો અત્યાચાર

• લગ્નની લાલચ આપી પ્રેમજાળમાં ફસાવી, અલગ અલગ જગ્યાએ ગોંધી રાખી મરજી વિરુદ્ધ વારંવાર દુષ્કર્મ આચર્યું

• પિતાના અવસાન બાદ મળેલા ક્લેઇમના રૂપિયાથી લીધેલું સોનું પણ નરાધમ શખ્સે પડાવી લીધાનો સનસનીખેજ આરોપ.

દેશ દેવી ન્યુઝ જામનગર તા ૨૯ મે ૨૬, જામનગર શહેરમાં એક અત્યંત ચોંકાવનારી અને હચમચાવી મૂકે તેવી ઘટના સામે આવી છે, જેમાં માતા-પિતાની છત્રછાયા ગુમાવી ચૂકેલી અને નિરાધાર બનેલી એક ૨૬ વર્ષીય યુવતીને એક નરાધમ શખ્સે પોતાની હવસનો શિકાર બનાવી હોવાની પોલીસ ફરિયાદ નોંધાઈ છે. પ્રાપ્ત વિગતો અનુસાર, જામનગરના સિટી એ-ડિવિઝન પોલીસ મથકમાં ગઈકાલે નોંધાયેલી એફઆઈઆર મુજબ, ગુલાબનગર વિસ્તારમાં રહેતા શાહરૂખ અબ્દુલભાઈ હમીરાણી નામના શખ્સે આ યુવતીની મજબૂરીનો ફાયદો ઉઠાવી, તેને લગ્નની લાલચ આપીને ફસાવી હતી. પીડિતાના માતા-પિતા આશરે ત્રણ વર્ષ પહેલાં અંકલેશ્વર પાસે એક માર્ગ અકસ્માતમાં મૃત્યુ પામ્યા હતા, અને ત્યારબાદ સગાસંબંધીઓએ પણ મોઢું ફેરવી લેતા તે એકદમ નિરાધાર બની ગઈ હતી. પોતાનું અને પોતાના નાના ભાઈના અભ્યાસનું ગુજરાન ચલાવવા માટે તે ઉદયપુર અને ત્યારબાદ મોરબી ખાતે નોકરી કરતી હતી. આ જ સંઘર્ષના સમયગાળા દરમિયાન, એક પરિચિત યુવતી મારફતે તેનો સંપર્ક શાહરુખ સાથે થયો હતો, જેણે તેણીની પરિસ્થિતિ જાણીને હમદર્દીનું નાટક કરી તેને પોતાની પ્રેમજાળમાં ફસાવી હતી.આ નરાધમ શખ્સે યુવતીને સારો સાથ આપવાની અને લગ્ન કરવાની મોટી મોટી લાલચો આપીને જામનગર બોલાવી લીધી હતી. પોલીસ ફરિયાદમાં જણાવ્યા અનુસાર, ઓક્ટોબર ૨૦૨૩થી એપ્રિલ ૨૦૨૬ સુધીના લાંબા સમયગાળા દરમિયાન આરોપી શાહરુખે પીડિતાને જામનગરના જુદા જુદા વિસ્તારોમાં જેમ કે રાજપાર્ક સોસાયટી, મોહન નગર આવાસ અને છેલ્લે લાલવાડી વિસ્તારમાં આવેલ સંવેદના એપાર્ટમેન્ટમાં ભાડાના મકાનમાં રાખી હતી. આ સમયગાળામાં તેણે યુવતીને પત્નીની જેમ રાખી હોવાનો ડોળ કરી, તેણીની મરજી વિરુદ્ધ બળજબરીથી અવારનવાર દુષ્કર્મ આચર્યું હતું. જ્યારે પણ યુવતી વિરોધ કરતી ત્યારે આરોપી તેણીને ગાળો ભાંડી, ઢીકાપાટુનો માર મારી શારીરિક અને માનસિક ત્રાસ ગુજારતો હતો. સમાજમાં અને સોસાયટીના રહીશો સામે પણ તેને અપમાનિત કરવામાં આવતી હતી. શારીરિક શોષણની હદ તો ત્યારે વટાવી ગઈ જ્યારે છેલ્લે એપ્રિલ મહિનામાં પણ સવારના સમયે આરોપીએ બળજબરીથી બળાત્કાર ગુજારીને પીડિતાને માર માર્યો હતો, જેનાથી કંટાળીને અને ડરીને યુવતી મોરબી રહેવા જતી રહી હતી.શારીરિક અને માનસિક અત્યાચાર ઉપરાંત આ હવસખોર શખ્સે આર્થિક લૂંટ પણ ચલાવી હોવાનો ગંભીર આક્ષેપ ફરિયાદમાં કરવામાં આવ્યો છે. અકસ્માતમાં મૃત્યુ પામેલા પિતાના વીમા/ક્લેઇમના જે રૂપિયા યુવતીને મળ્યા હતા, તેમાંથી ભવિષ્ય માટે ખરીદેલું સોનું (બે સોનાના બિસ્કિટ, બે વીંટી અને અડધા ગ્રામની કડલી) આરોપી શાહરુખે પોતાના નામે બિલ બનાવીને બળજબરીથી પડાવી લીધું હતું અને પરત આપવાનો ઇનકાર કરી દીધો હતો. પરિવારનો કોઈ ટેકો ન હોવાથી અને આરોપીના ડરના કારણે પીડિતા લાંબા સમય સુધી પોલીસ ફરિયાદ કરી શકી ન હતી. જોકે, છેવટે તેમના પિતાના એક મિત્ર નો સંપર્ક થતાં અને તેમણે હિંમત આપતા, આખરે આ પીડિત યુવતીએ સમાજનો ડર છોડીને જામનગરના સિટી એ-ડિવિઝન પોલીસ મથકમાં શાહરુખ વિરુદ્ધ બી.એન.એસ.ની કલમ ૬૪(૧) અને ૧૧૫(૨) હેઠળ વિધિવત ફરિયાદ નોંધાવી છે. નિરાધાર દીકરી પર થયેલા આ ઘોર અત્યાચારની ઘટનાથી સમગ્ર પંથકમાં ભારે ચકચાર મચી જવા પામી છે, અને પોલીસે ગુનો નોંધી આરોપીને કાયદાના સકંજામાં લેવા તપાસનો ધમધમાટ શરૂ કર્યો છે.

જામનગર નજીક મસીતીયા ગામમાં આવેલી કન્સ્ટ્રકશન ની સાઇટ મામલે સામસામે ફરિયાદો : પંચ-બી ડિવિઝન પોલીસમાં ક્રોસ ગુના નોંધાયા

• મસીતીયા ગામની ન્યુએરા કન્સ્ટ્રક્શન સાઇટ અને દરેડ વિસ્તારની ઓફિસ ખાતે બનેલા બનાવ બાદ બંને પક્ષે નોંધાવી ફરિયાદ

દેશ દેવી ન્યુઝ જામનગર તા.૨૯ મે ૨૬, જામનગર શહેરના પંચ-બી ડિવિઝન પોલીસ સ્ટેશન વિસ્તારમાં આવેલી ન્યુએરા કન્સ્ટ્રક્શન સાઇટ મામલે બે પક્ષો વચ્ચે ઉગ્ર બોલાચાલી અને ધમકીના બનાવ બાદ બંને પક્ષ દ્વારા સામસામે ફરિયાદો નોંધાવવામાં આવતા પોલીસે ક્રોસ ગુનાઓ દાખલ કર્યા છે.પોલીસમાં નોંધાયેલી ફરિયાદ મુજબ પ્રથમ બનાવ તા.૧૮ મે, ૨૦૨૬ ના રોજ સાંજના સમયે દરેડ ફેઝ-૩ વિસ્તારમાં આવેલી અપના ઇમ્પેક્સ ઓફિસ તેમજ મસીતીયા ગામની સીમમાં આવેલી ન્યુએરા કન્સ્ટ્રક્શન સાઇટ ખાતે બન્યો હતો. ફરિયાદી અશોકભાઈ દેવશીભાઈ અકબરીએ આરોપી અહેમદ ઇકબાલભાઈ ખફી તથા અન્ય સામે ન્યુએરા સાઇટ પર ન આવવા ધમકી આપવી, બોલાચાલી કરવી તેમજ ઉશ્કેરણી કરવાનો આક્ષેપ કરી ફરિયાદ નોંધાવી હતી.

બીજી તરફ, મસીતીયા ગામના રહેવાસી અહેમદ ઇકબાલભાઈ ખફીએ પણ પંચ-બી ડિવિઝન પોલીસમાં વળતી ફરિયાદ નોંધાવી હતી. જેમાં તેમણે આક્ષેપ કર્યો હતો કે તેઓ પોતાના મોટા બાપુજીની ન્યુએરા સાઇટ પર ચોકીદારને પગાર આપવા ગયા હતા ત્યારે અશોકભાઈ અકબરીએ તેમને સ્થળ પરથી જવા માટે ધમકી આપી હતી. ઉપરાંત પોલીસ સ્ટેશન ખાતે પણ અપમાનજનક શબ્દો બોલી ઉશ્કેરણી કરવામાં આવી હોવાનું ફરિયાદમાં જણાવાયું છે.બંને ફરિયાદોના આધારે પંચ-બી ડિવિઝન પોલીસે ભારતીય ન્યાય સંહિતાની કલમ ૩૫૧(૨) અને ૩૫૨ મુજબ અલગ અલગ ગુનાઓ નોંધી વધુ તપાસ હાથ ધરી છે.

જામનગર : કાલાવડ તાલુકાના સતીયા ગામમાં પ્રેમ સંબંધના મામલે મધરાતે જીવલેણ હુમલો કરવાના ઇરાદે ટોળું ત્રાટક્યું

• યુવતીને ભગાડી જવાના મનદુખમાં ૭ જેટલી ગાડીઓમાં અનેક શખ્સો ધસી આવ્યા: એક મહિલા પર લોખંડના પાઈપ વડે જીવલેણ હુમલો

• (૧) ભરતભાઇ કરણાભાઇ ઝાપડા (૨) ઉકાભાઇ ગોબરભાઇ ગોલતર (૩) ચકુભાઇ રવજીભાઇ ગોલતર (૪) સાહીલ રાતડીયા (૫) મુન્નો ભરવાડ (૬) મચ્છાભાઇ સામતભાઇ ફાંગલીયા (૭) જયદીપ થોભણભાઇ વરુ રહે. રાજકોટ તથા અન્ય અજાણ્યા આશરે ૧૫ માણસો

દેશ દેવી ન્યુઝ જામનગર તા ૨૯, મે ૨૬  જામનગર જિલ્લાના કાલાવડ તાલુકાના સતીયા ગામમાં પ્રેમ સંબંધના મુદ્દે ભારે તણાવ અને હુમલાની ઘટના સામે આવી છે. યુવક અને યુવતી ઘરેથી સાથે જતા રહેવાના મનદુખમાં કેટલાક શખ્સો સાત જેટલી ગાડીઓમાં ધસી આવી સતીયા ગામમાં હુલ્લડ મચાવી હુમલો કર્યો હોવાની ફરિયાદ પોલીસમાં નોંધાઈ છે. ફરિયાદી મથુરભાઈ લાલજીભાઈ માલા (આહીર)એ નોંધાવેલી ફરિયાદ મુજબ, તેમના કુટુંબી મહેશભાઈ મોહનભાઈ ગરચરને વીરવાવ ગામની ઋષિકાબેન સાથે પ્રેમ સંબંધ હતો અને બંને પોતપોતાના ઘરેથી સાથે જતા રહ્યા હતા. આ મુદ્દે સમાજના આગેવાનો વચ્ચે બેઠક યોજાઈ હતી, જ્યાં ચર્ચા દરમિયાન બોલાચાલી અને ઝપાઝપી સર્જાઈ હતી.ફરિયાદ મુજબ, બાદમાં રાત્રિના સમયે આરોપી ભરતભાઈ કરણાભાઈ ઝાપડાએ ફોન કરી ધમકી આપી હતી કે “અમે લોકો ગામમાં આવીએ છીએ, તૈયાર રહેજો.” ત્યારબાદ મધરાત્રિએ સફેદ બ્રેઝા, વેન, સ્કોર્પિયો, બોલેરો, આઈ-ટ્વેન્ટી અને સ્વિફ્ટ સહિતની સાત જેટલી ગાડીઓમાં આશરે પંદરથી વીસ લોકો લોખંડના પાઈપ અને લાકડાના ધોકા સાથે ગામમાં ઘૂસી આવ્યા હતા.ટોળાએ ગામમાં બેફામ ગાળો બોલી લોકોના ઘરના દરવાજા ખખડાવ્યા હતા અને લોકોને બહાર નીકળવા ધમકાવ્યા હતા. થોડા સમય બાદ ટોળું ફરી પરત આવ્યું હતું. દરમિયાન ફરિયાદીની બહેન કુંજલબેને ગાળો બોલવાની ના પાડતા આરોપી ભરતભાઈ ઝાપડાએ લોખંડના પાઈપથી હુમલો કરવાનો પ્રયાસ કર્યો હતો. બચવા જતા પાઈપ કપાળ ઉપર વાગતા તેણીને ગંભીર ઇજા પહોંચી હતી અને લોહીલુહાણ હાલતમાં સારવાર માટે પ્રથમ કાલાવડ સરકારી દવાખાને અને ત્યારબાદ જામનગરની ગુરુ ગોવિંદસિંહ સરકારી હોસ્પિટલ ખાતે ખસેડવામાં આવી હતી.ઘટના દરમિયાન પોલીસની ગાડી આવતી દેખાતા હુમલાખોરો ગાડીઓ મૂકી ફરાર થઈ ગયા હોવાનું પણ ફરિયાદમાં જણાવાયું છે. પોલીસે સ્થળ પરથી બે ગાડીઓ કબ્જે લીધી હોવાનું જાણવા મળે છે.આ સમગ્ર બનાવ અંગે પોલીસે  ગુ.ર.નં ૧૧૨૦૨૦૫૬૨૬૦૪૭૩/ ૨૦૨૬ બી.એન.એસ કલમ ૧૦૯(૧) ,૧૧૫ (૨) ,૧૮૯ (૨) (૩),૧૯૦,૧૮૯(૨)(૩),૧૯૦ ,૧૯૧(૧) (૩) ,૩૫૧(૨)(૩)(૪),૩૫૨,૬૧ જી.પી.એક્ટ ૧૩૫ (૧) મુજબ હુલ્લડ, હુમલો, જાનથી મારી નાખવાની ધમકી તેમજ હથિયારબંધીના જાહેરનામાના ભંગ સહિતની કલમો હેઠળ ગુનો નોંધી વધુ તપાસ હાથ ધરી છે.

જામનગરમાં મનપા ના સ્પોર્ટ્સ સંકુલ પાસેથી એક કિશોરને ત્રણ શખ્સો એ રોકી ઘડિયાળ લૂંટ્યાનો ગુનો નોંધાયો

દેશ દેવી ન્યુઝ જામનગર તા ૨૮ મે ૨૬, જામનગર શહેરમાં વધુ એક લૂંટની ઘટના સામે આવી છે. શહેરના સ્પોર્ટ્સ સંકુલ નજીક ત્રણ અજાણ્યા શખ્સોએ કિશોરને રોકી તેની સાથે મારકૂટ કરી ધમકી આપી ઘડિયાળ લૂંટી ફરાર થઈ જતા પોલીસ ફરિયાદ નોંધાઈ છે.પોલીસમાં નોંધાયેલી વિગતો મુજબ શહેરના વાલ્કેશ્વરી વિસ્તાર ખાતે રહેતા વેપારીએ સીટી “એ” ડિવિઝન પોલીસ સ્ટેશનમાં ફરિયાદ નોંધાવી હતી. ફરિયાદ અનુસાર તેમનો સત્તર વર્ષીય પુત્ર પોતાના મિત્ર સાથે સ્કૂટર ઉપર લાલબંગલા વિસ્તારથી જામનગર મહાનગરપાલિકાના સ્પોર્ટ્સ સંકુલ તરફ જઈ રહ્યો હતો.તે દરમિયાન રસ્તામાં એક્ટિવા ઉપર આવેલા ત્રણ અજાણ્યા શખ્સોએ કિશોરને અટકાવી સ્કૂટરની ડેકી તેમજ કપડાના ખિસ્સાની તપાસ કરી હતી. તપાસ દરમિયાન કંઈ ન મળતાં આરોપીઓએ કિશોરને બે ઝાપટા મારી તેની પાસે રહેલી ઘડિયાળ માંગતા ધમકી આપી હતી. ભયના કારણે કિશોરે પોતાની ઘડિયાળ કાઢી આપતા આરોપીઓ તે લઈ ફરાર થઈ ગયા હતા.આ બનાવ અંગે સીટી “એ” ડિવિઝન પોલીસ સ્ટેશનમાં ભારતીય ન્યાય સંહિતાની વિવિધ કલમો હેઠળ ગુનો નોંધાઈ પોલીસે અજાણ્યા આરોપીઓને ઝડપી પાડવા તપાસ હાથ ધરી છે.

જામનગર તાલુકાના ખીમરાણા ગામમાં દારૂ ભરેલી ઈનોવામાંથી બોટલો લૂંટવાનો પ્રયાસ : પોલીસ સાથે ઝપાઝપી , એક સામે ગુનો નોંધાયો

દેશ દેવી ન્યુઝ જામનગર તા ૨૭ મે ૨૬, જામનગર તાલુકાના ખીમરાણા ગામ પાસે પોલીસે ઇંગ્લીશ દારૂ ભરેલી ઈનોવા કારનો પીછો કરીને રોકી કાર્યવાહી હાથ ધરી હતી. દરમિયાન સ્થાનિક રહેવાસી દેવરાજભાઈ દિનેશભાઈ ગોહીલે કારમાંથી દારૂની બોટલો લૂંટવાનો પ્રયાસ કર્યો હોવાનો આક્ષેપ કરવામાં આવ્યો છે. ફરિયાદ મુજબ પોલીસે રોકતા દેવરાજભાઈએ પોલીસ સાથે ઝપાઝપી કરી એએસઆઈ નિર્મળસિંહ જાડેજાને છાતીના ભાગે કોણી મારી ઇજા પહોંચાડી હતી. ત્યારબાદ તેઓએ અન્ય લોકોને મોબાઈલમાં વીડિયો ઉતારવા કહ્યું હોવાનું પણ ફરિયાદમાં જણાવાયું છે.આ બનાવ અંગે પંચકોશી એ. ડિવિઝન પોલીસ મથકમાં દેવરાજભાઈ દિનેશભાઈ ગોહીલ (રહે. ખીમરાણા) સામે સરકારી કામગીરીમાં અડચણ, હુમલો અને લૂંટના પ્રયાસ સહિતના ગુનાઓ હેઠળ ફરિયાદ નોંધવામાં આવી છે. અત્યારે ઉલ્લેખનીય છે કે આરોપી દેવરાજ ગઈકાલે રાત્રે ખીમરાણા ગામમાં ઇંગલિશ દારૂ સાથેની કાર ના અકસ્માત સમયે એક વીડિયો વાયરલ કર્યો હતો. ત્યારબાદ પોલીસ ટુકડી આવી જતાં પોલીસ સાથે ઘર્ષણ થયું હતું. પોલીસ દ્વારા આરોપી સામે પંચ એ ડીવી પો.સ્ટે. ગુ.ર.નં.૦૪૭૮/૨૦૨૬ ભારતીય ન્યાય સંહીતા ૨૦૨૩ ની કલમ-૧૨૧ (૧), ૩૦૯ (૫) ગુન્હો નોંધી તેની અટકાયત કરવામાં આવી હતી, ત્યાર બાદ તેણે ફરીથી નવો વીડિયો બનાવી ને પોતાની ભૂલ સ્વીકારી હતી. અને ભવિષ્યમાં આવી ભૂલ નહીં કરે, અને અન્ય કોઈ વ્યક્તિ પણ આવી ભૂલ ના કરે તેવી વાત કહે તો બીજો વિડીયો બનાવ્યો હતો.

જામનગરના ગોકુલ નગર વિસ્તારમાંથી એક સગીરાનું અપહરણ કરી જનાર આરોપી સગીરા સાથે ઢસા પાસેથી ઝડપાયો

• મંગેતરના કુટુંબિક કાકા સામે સગીરાને ભગાડી જવા અંગે પોલીસે ગુન્હો નોંધી ભારે રઝળપાટ બાદ ભાવનગર પંથકમાંથી શોધી કાઢ્યો

દેશ દેવી ન્યુઝ જામનગર તા ૨૮ મે ૨૬, જામનગર શહેરના ગોકૂલનગર વિસ્તારમાં રહેતી સત્તર વર્ષની એક સગીરાના અપહરણની ફરિયાદ નોંધાવાતાં પોલીસ તંત્ર હરકતમાં આવ્યું હતું. અને ભારે શોધખોળ કર્યા બાદ સગીરાના મંગેતરના કુટુંબીકાકા એવા આરોપીને ભાવનગર નજીક ઢસા પાસેથી સગીરા સાથે ઝડપી લીધો છે, અને તેને જામનગર લાવ્યા બાદ વધુ પૂછપરછ હાથ ધરી છે. જ્યારે સગીરાની મેડિકલ તપાસણી કરાવાઈ રહી છે.
જામનગરના ગોકૂલનગર વિસ્તારમાં રહેતી સગીરા કે જેનું થોડા દિવસો પહેલાં જામનગરના એક યુવક સાથે સગપણ થયું હતું. ત્યારબાદ મંગેતરના કુટુંબિક કાકા તરીકે ઓળખાતા કલ્યાણપુર તાલુકાના ભાટીયા ગામના જીગર કરશનભાઇ રામકબીર સાથે સગીરા મોબાઈલ ફોન તેમજ ઇન્સ્ટાગ્રામ જેવા સામાજિક માધ્યમો દ્વારા સંપર્કમાં આવી હતી.પરિવારજનોના જણાવ્યા મુજબ ગત ૨૧મી તારીખે સગીરા અચાનક ઘરેથી લાપતા બની ગઈ હતી. આસપાસ શોધખોળ હાથ ધર્યા છતાં કોઈ પત્તો ન મળતાં આખરે મંગેતરના કુટુંબિક કાકા દ્વારા જ સગીરાને ભગાડી જવામાં આવી હોવાની શંકા સાથે સિટી “સી” ડિવિઝન પોલીસ મથકે ફરિયાદ નોંધાવવામાં આવી હતી. જે ફરિયાદના આધારે સિટી સી. ડિવિઝન પોલીસે ગુનો નોંધી આરોપીની શોધખોળ શરૂ કરી છે. મોબાઈલ ફોનની વિગતો, સામાજિક માધ્યમો પરના સંપર્કો તેમજ સંભવિત સ્થળોના આધારે પોલીસ ટીમો તપાસમાં લાગી ગઈ હતી, અને છેક ભાવનગર પંથકના ઢસા ગામ સુધી તપાસનો દોર લંબાવી ત્યાંથી આરોપી જીગર અને તેની સાથે સગીરા બંનેને શોધી કાઢ્યા હતા. જે બંનેને આજે સવારે જામનગર લાવવામાં આવ્યા છે, અને આરોપીની ધરપકડ કરી લેવામાં આવી છે. જયારે સગીરાને તબીબી ચકાસણી સાથે જામનગરની સરકારી જી.જી. હોસ્પિટલમાં મોકલી આપી છે. આરોપીએ સગીરા સાથે દુષ્કર્મ આચર્યું હોવાનું જાણવા મળી રહ્યું હોવાથી તેની સામે પોકસો ઉપરાંત દુષ્કર્મની કલમનો પણ ઉમેરો કરવામાં આવી રહ્યો છે.

જામનગર-રાજકોટ ધોરી માર્ગ પર ધ્રોળ નજીક ચાલુ કારમાં અચાનક આગ લાગતાં અફડાતફડી

• જાયવા ગામના પાટિયા પાસે સર્જાયો બનાવ: સ્થાનિકો અને પોલીસે આગ બુઝાવવાના કર્યા પ્રયાસ: કોઈ જાનહાની નહીં

દેશ દેવી ન્યુઝ જામનગર તા ૨૭, મે ૨૬ જામનગર-રાજકોટ ધોરી માર્ગ પર જાયવા ગામના પાટિયા નજીક ગઈકાલે સાંજે દોડતી એક કારમાં અચાનક આગ લાગી જતાં ભારે દોડધામ મચી ગઈ હતી. સદનસીબે બનાવમાં કોઈ જાનહાનિ થઈ નહોતી, પરંતુ કારને ભારે નુકસાન પહોંચ્યું હોવાનું જાણવા મળે છે.મળતી માહિતી મુજબ જાયવા ગામના સ્થાનિક રહેવાસી પોતાની કાર લઈને નજીક ના વિસ્તારમાં ગેસ ભરાવવા માટે જઈ રહ્યા હતા, દરમિયાન કારમાં એકાએક બોનેટના ભાગમાંથી ધુમાડા સાથે આગની જ્વાળાઓ નીકળવા લાગી હતી.આકસ્મિક રીતે આગ ભભૂકી ઉઠતાં આસપાસના લોકો દોડી આવ્યા હતા અને આગ બુઝાવવાના પ્રયાસો હાથ ધર્યા હતા. જોકે થોડી જ વારમાં આગે સમગ્ર કારને પોતાની ઝપેટમાં લઈ લીધી હતી. બનાવની જાણ થતાં ધ્રોળ પોલીસ મથકના પોલીસ હેડ કોન્સ્ટેબલ ડી.પી. વધોરા પણ તાત્કાલિક સ્થળ પર દોડી ગયા હતા, અને સ્થિતિ સંભાળી હતી. આગના બનાવ સમયે કારને રોડ પરથી નીચે ઉતારી લીધી હતી. જેથી મુખ્ય રોડ પર વાહન વ્યવહારને કોઈ અસર થઈ ન હતી.સદનસીબે બનાવ સમયે માર્ગ પર વધુ વાહનવ્યવહાર ન હોવાથી કોઈ મોટો અકસ્માત સર્જાયો નહોતો. આગ લાગવાનું ચોક્કસ કારણ જાણવા તપાસ હાથ ધરવામાં આવી હોવાનું જાણવા મળે છે.

જામનગર તાલુકા પંચાયત ના પ્રમુખ – ઉપ પ્રમુખ સહિતના હોદેદારો નિમાયા

દેશ દેવી ન્યુઝ જામનગર તા ૨૬ , મે ૨૬ જામનગર તાલુકા પંચાયત ની આજે મળેલી સામાન્ય સભા માં પ્રમુખ – ઉપ પ્રમુખ સહિત ના હોદેદારો ની વરણી થવા પામી હતી.. ગત તા. ૨૩ માં જામનગર તાલુકા પંચાયતના પ્રમુખ તરીકે સરસ્વતીબેન મહેન્દ્રભાઈ ખાણધર તેમજ ઉપ પ્રમુખપદે તરૂણભાઈ કાન્તિભાઈ વસોયા ના નામની ભાજપ દ્વારા જાહેરાત કરવામાં આવી હતી.આ સમયે પૂર્વ કેબિનેટ મંત્રી અને ધારાસભ્ય રાઘવજીભાઈ પટેલ,હાપા યાર્ડ ના ચેરમેન મુકુંદભાઈ સભાયા અને જિલ્લા પંચાયત સદસ્ય મહેન્દ્રસિંહ જાડેજા , કાનાભાઇ ,જિલ્લા ભાજપ ઉપાધ્યક્ષ નાથાભાઈ વારસકિયા, તાલુકા સદસ્ય પ્રવીણભાઈ ચૌહાણ, કિશોરભાઇ બોરીચા તાલુકા સદસ્ય,જિલ્લા ભાજપ મંત્રી ભરતભાઈ ગાગીયા તેમજ જિલ્લા ભાજપ અનુસૂચિત જાતિ મોરચા ના મહામંત્રી એમ.ડી.મકવાણા તેમજ આગેવાનો ઉપસ્થિત રહી ફુલહાર અને બુકે આપી શુભેચ્છાઓ પાઠવી હતી.આ પછી આજે મળેલી સામાન્ય સભા માં વિધિવત રીતે તમામ હોદેદારો એ હોદા નો ચાર્જ ગ્રહણ કર્યો.હતો.જેમાં પ્રમુખ તરીકે સરસ્વતીબેન ખાણધર અને ઉપપ્રમુખ તરીકે તરુણ વસોયા , કારોબારી.ચેરમેન તરીકે જયપાલસિંહ જાડેજા , શાસક જૂથ ના નેતા તરીકે મનીષ પરમાર અને દંડક તરીકે રાજેશ ભેસદડીયા નો સમાવેશ થાય છે.

જામનગરમાં કરોડો રૂપિયાનું ફુલેકો ફેરવીને નાસી છૂટેલા સુપર માર્કેટના વેપારી સામે પોલીસ સમક્ષ અરજી થયા બાદ પોલીસ તંત્ર એક્શનમાં આવ્યું

• વેપારીએ રોકાણ અને કમિશનની લાલચ આપી રૂ. ૧.૩૩ કરોડથી વધુની છેતરપિંડી આચરી હોવાનું પોલીસ તપાસમાં સામે આવ્યું

• સુપરમાર્કેટના કાપડના ફરરારી થયેલા વેપારી સામે સિટી ‘એ’ ડિવિઝન પોલીસ મથકમાં ચિટિંગ અંગે ગુનો નોંધાયો: પોલીસ દ્વારા શોધખોળ

દેશ દેવી ન્યુઝ જામનગર તા ૨૫, મે ૨૬ જામનગર શહેરમાં વેપારી વર્તુળોમાં ભારે ચર્ચાસ્પદ બનેલા કરોડોના આર્થિક ફૂલેકા મામલે આખરે સિટી ‘એ’ ડિવિઝન પોલીસ સ્ટેશનમાં ગુનો નોંધવામાં આવ્યો છે. પ્રાથમિક તબક્કે વેપારી દ્વારા રૂ. ૧ કરોડ ૩૩ લાખ ૪૦ હજારની છેતરપિંડી આચરવામાં આવી હોવાનું સામે આવ્યું છે.આ મામલે મુસ્તાકભાઈ ઇબ્રાહીમભાઈ સાબુવાલા (ઉ.વ.૫૮), રહે. સોઢાવાડી, વહેવારિયા મદ્રેસા રોડ, જામનગર દ્વારા ફરિયાદ નોંધાવવામાં આવી હતી. જે ફરિયાદના આધારે પોલીસે હિતેષભાઈ લક્ષ્મીકાંત ગોહીલ, રહે. વાલકેશ્વરી નગરી, શાશ્વત એપાર્ટમેન્ટ, જામનગર સામે ભારતીય ન્યાય સંહિતા-૨૦૨૩ની કલમ ૩૧૬(૫) હેઠળ ગુનો નોંધ્યો છે.ફરિયાદ મુજબ આરોપી હિતેષભાઈ ગોહીલે પોતે કાપડના વેપાર સાથે જુદી જુદી બેંકોના ક્રેડિટ કાર્ડ એજન્ટ તરીકે કામ કરતો હોવાનું જણાવી વેપારીઓ અને ઓળખીતાઓનો વિશ્વાસ જીત્યો હતો. ત્યારબાદ કાપડના વેપાર તેમજ ક્રેડિટ કાર્ડના ધંધામાં રોકાણ કરવાથી ઊંચું કમિશન અને સારો નફો મળશે તેવી લાલચ આપી હતી.આરોપીએ ફરીયાદી સહિત અનેક લોકોને વિશ્વાસમાં લઈ બેંક ચેક, ગુગલ-પે, રોકડ રકમ તેમજ ક્રેડિટ કાર્ડ મારફતે કુલ રૂ. ૧,૩૩,૪૦,૦૦૦ મેળવ્યા હોવાનું ફરિયાદમાં જણાવાયું છે. જોકે બાદમાં રોકાણકારોને ન તો કમિશન અપાયું, અને મૂળ રકમ પરત કરવામાં આવી હોવાનું સામે આવ્યું છે.ફરિયાદમાં વધુમાં જણાવાયું છે કે આરોપી પોતાના પરિવાર સાથે અચાનક ફરાર થઈ ગયો હતો. જેના કારણે વેપારીઓ અને રોકાણકારોમાં ભારે ચિંતા ફેલાઈ હતી. આખરે ૨૫ થી વધુ પીડિત વેપારીઓ જિલ્લા પોલીસ તંત્ર સમક્ષ પહોંચ્યા બાદ સમગ્ર મામલાની તપાસ શરૂ કરવામાં આવી હતી.આ મામલે સિટી ‘એ’ ડિવિઝન પોલીસ સ્ટેશનમાં પોલીસ ઇન્સ્પેક્ટર વી બી ડોડીયા અને તેઓની ટીમ દ્વારા અનેક વેપારીઓના નિવેદનો નોંધવામાં આવ્યા હતા અને તેના આધારે ચીટીંગના ગુનો નોંધી વધુ તપાસ પીએસઆઈ વી.આર. ગામેતી ચલાવી રહ્યા છે.