જામનગર-ધ્રોલ રોડ પર ખનિજ વિભાગની કાર્યવાહી : ગેરકાયદે ખનિજ વહન કરતી ૬ ટ્રક જપ્ત, રૂ. ૨.૧૦ કરોડનો મુદ્દામાલ કબજે
-
ભૂસ્તરશાસ્ત્રીની સૂચનાથી હાથ ધરાયેલી આકસ્મિક તપાસમાં બ્લેકટ્રેપ અને સાદી રેતીના ગેરકાયદે પરિવહનનો પર્દાફાશ
-
કબજે કરાયેલા તમામ ટ્રકો દરેડ પંચ ‘બી’ પોલીસ સ્ટેશન ખાતે કસ્ટડીમાં સોંપાઈ
દેશ દેવી ન્યુઝ જામનગર, તા. ૧૩ જુલાઈ ૨૬ જામનગર જિલ્લાના ભૂસ્તરશાસ્ત્રીની સૂચનાના આધારે જામનગર-ધ્રોલ રોડ પર ખનિજ વિભાગ દ્વારા આકસ્મિક તપાસ હાથ ધરવામાં આવી હતી. તપાસ દરમિયાન બ્લેકટ્રેપ અને સાદી રેતીનું ગેરકાયદે પરિવહન કરતી કુલ ૬ ટ્રકો ઝડપી પાડી કાયદેસરની કાર્યવાહી હાથ ધરવામાં આવી છે.તપાસ દરમિયાન એક ટ્રકમાં બ્લેકટ્રેપ ખનિજનું રોયલ્ટી પાસ કરતાં વધુ જથ્થામાં પરિવહન થતું હોવાનું તેમજ અન્ય પાંચ ટ્રકોમાં સાદી રેતીનું ગેરકાયદે પરિવહન થતું હોવાનું સામે આવ્યું હતું. જપ્ત કરાયેલી ટ્રકોમાં જીજે-૧૦-ટીવાય-૫૨૨૨,જીજે-૧૦-ટીવાય-૯૪૬૩, જીજે-૧૦-ટીવાય-૯૨૭૦, એમએચ-૪૮-ડીસી-૨૬૨૯, જીજે-૧૦-ટીવાય-૫૩૧૦ અને જીજે-૧૦-ટીવાય-૭૪૬૮નો સમાવેશ થાય છે.
ઉપરોક્ત તમામ ટ્રકો નિયમ મુજબ જપ્ત કરી આગળની કાર્યવાહી માટે દરેડ સ્થિત પંચ ‘બી’ પોલીસ સ્ટેશન ખાતે કસ્ટડીમાં સોંપવામાં આવી છે.આ કાર્યવાહીમાં અંદાજે રૂ. ૨.૧૦ કરોડનો મુદ્દામાલ જપ્ત કરવામાં આવ્યો હોવાનું ખનિજ વિભાગે જણાવ્યું છે.આ સમગ્ર કાર્યવાહી ખનિજ વિભાગની તપાસ ટીમ દ્વારા હાથ ધરવામાં આવી હતી, જેમાં શ્રી નૈતિક કણજારિયાએ તપાસનું નેતૃત્વ કર્યું હતું.
