જામનગરમાં ઉછીના નાણાં ન આપતા યુવકની ધોકા અને ઢીકાપાટુનો માર મારી હત્યા: ૪ સામે ગુનો નોંધાયો

• ​દરેડ ગામના સ્મશાન પાસે બની ઘટના; પંચ બી ડિવિઝન પોલીસે તપાસ હાથ ધરી

​દેશ દેવી ન્યુઝ જામનગર તા. ૨૭ સપ્ટેમ્બર ૨૬:જામનગર તાલુકાના દરેડ ગામમાં ઉછીના પૈસા આપવાની ના પાડતા એક યુવક પર લાકડીના ધોકા અને ઢીકાપાટુ વડે પ્રાણઘાતક હુમલો કરી તેની ક્રૂર હત્યા કરવામાં આવી હોવાનો બનાવ સામે આવ્યો છે. આ બનાવ અંગે પંચ બી ડિવિઝન પોલીસ સ્ટેશનમાં ચાર શખ્સો સામે હત્યા સહિતની કલમો હેઠળ ગુનો નોંધવામાં આવ્યો છે.મળતી માહિતી મુજબ, દરેડ ગામમાં ખોડિયાર મંદિર પાસે ભાડાની ખોલીમાં રહેતા અને મંજૂરી કામ કરતા સુગ્રીમકુમાર વર્મા (ઉ.વ. ૩૭, મૂળ રહે. બિહાર) ના સાળા સૂર્યકાન્ત ઉર્ફે સૂર્યા (ઉ.વ. ૨૮) ગત તા. ૨૪/૦૯/૨૦૨૬ના રોજ રાત્રિના સુમારે દરેડ ગામ વાછરા દાદાના મંદિર પહેલા આવેલા સ્મશાન પાસે પોતાના મિત્રો સાથે બેઠા હતા.​તે સમયે આરોપી વિમલ પરમારે સૂર્યકાન્ત પાસે વાપરવા માટે ઉછીના રૂપિયા માગ્યા હતા. જોકે સૂર્યકાન્તે નાણાં આપવાની ના પાડતા ઉશ્કેરાયેલા વિમલ પરમાર, ખોડાભાઈ ઉર્ફે ખોળુ અને વિરમ ઉર્ફે રાધે ભેગા મળીને સૂર્યકાન્ત પર લાકડીના ધોકા તથા ઢીકાપાટુ વડે તૂટી પડ્યા હતા. ત્યારબાદ રવિરાજસિંહ કંચવા નામના શખ્સે આવીને પણ તેને ઢીકાપાટુનો માર માર્યો હતો.​આ ચારેય આરોપીઓએ સૂર્યકાન્તને શરીરે ગંભીર ઈજાઓ પહોંચાડી સ્થળ પરથી નાસી છૂટ્યા હતા. ઈજાગ્રસ્ત યુવકને તાત્કાલિક સારવાર અર્થે ખસેડવામાં આવતા તે દરમિયાન તેનું મોત નીપજ્યું હતું.​આ ઘટના અંગે મૃતકના બહેનોઈ સુગ્રીમકુમાર વર્માની ફરિયાદના આધારે પંચ બી ડિવિઝન પોલીસ સ્ટેશનના પોલીસ ઈન્સ્પેક્ટર વી.જે. રાઠોડ અને ટીમ દ્વારા ચારેય આરોપીઓ—(૧) વિમલ પરમાર, (૨) ખોડાભાઈ ઉર્ફે ખોળુ, (૩) વિરમ ઉર્ફે રાધે, અને (૪) રવિરાજસિંહ કંચવા (તમામ રહે. દરેડ)—સામે BNS કલમ ૧૦૩(૧), ૩(૫) તથા જી.પી. એક્ટ કલમ ૧૩૫(૧) મુજબ ગુનો નોંધી આરોપીઓને ઝડપી પાડવા ચક્રો ગતિમાન કર્યા છે.

જામનગરમાં યોગી પાર્ક માં બ્યુટી પાર્લર સંચાલક મહિલાના નિવાસસ્થાનમાં રૂ.૩.૦૭ લાખની ચોરી

• મકાનને તાળું મારી બહાર ગયેલી મહિલાના ઘરમાં તસ્કર ત્રાટક્યો, લોકર તોડી રૂ.૨ લાખ રોકડા અને સોનાચાંદીના દાગીના ઉઠાવી ગયો

દેશ દેવી ન્યુઝ જામનગર તા ૨૫ સપ્ટેમ્બર ૨૬, જામનગરના ઢીચડા રોડ પર આવેલી તીરૂપતિ સોસાયટીના યોગી પાર્કમાં બ્યુટી પાર્લર સંચાલક મહિલાના નિવાસસ્થાનમાં ચોરીનો બનાવ સામે આવ્યો છે. મકાનને તાળું મારી બહાર ગયેલી મહિલાના ઘરમાં અજાણ્યો તસ્કર પ્રવેશી પતરાના કબાટમાં રાખેલા લોકરનું તાળું તોડી સોના-ચાંદીના દાગીના તથા રૂ.૨ લાખ રોકડા મળી કુલ રૂ.૩.૦૭ લાખની ચોરી કરી ગયો હોવાની પોલીસ ફરિયાદ નોંધાઈ છે.યોગી પાર્ક, શેરી નં.૭માં ભાડાના મકાનમાં રહેતા અને શ્રીનિશ બ્યુટી પાર્લર ચલાવતા ૩૯ વર્ષીય નીકીતાબેન ઉર્ફે નીશાબેન અરવિંદભાઈ વાગડીયાએ આ અંગે ફરિયાદ નોંધાવી છે. ફરિયાદ મુજબ તા.૨૨ સપ્ટેમ્બરના સાંજે સાડા છ વાગ્યાના અરસામાં તેઓ અને તેમના મકાનના નીચેના માળે રહેતી કિરણબા પૃથ્વીરાજસિંહ પરમાર બંને કામસર પટેલ કોલોની ગયા હતા. બંનેએ પોતાના મકાનને તાળાં માર્યાં હતાં.રાત્રે સાડા નવ વાગ્યાના અરસામાં નીકીતાબેન પરત ઘરે આવ્યા હતા અને મકાનનું તાળું ખોલી અંદર ગયા હતા. ત્યારબાદ તેઓ કપડાં ધોવા માટે નીચે ગયા હતા. પોણા બાર વાગ્યાના અરસામાં કપડાં ધોઈને પોતાના રૂમમાં પરત ગયા ત્યારે પતરાના કબાટમાં રાખેલા લોકરનું તાળું તૂટેલી હાલતમાં જોવા મળ્યું હતું.લોકરની તપાસ કરતાં તેમાં રાખેલું આશરે એક તોલાનું સોનાનું મંગળસૂત્ર કિંમત રૂ.૭૦ હજાર, આશરે ૬ ગ્રામની સોનાની લકી કિંમત રૂ.૩૫ હજાર, ચાંદીની નંગવાળી વીંટી કિંમત રૂ.૧ હજાર તથા ચાંદીના દાણા અને ચાંદીની નથણીઓ આશરે રૂ.૧ હજાર મળી કુલ રૂ.૧.૦૭ લાખના દાગીના ઉપરાંત લોકરમાં રાખેલા રૂ.૨ લાખ રોકડા ગાયબ હોવાનું જણાયું હતું.આમ, અજાણ્યો તસ્કર મકાનનું તાળું ખોલી અંદર પ્રવેશ્યા બાદ રૂમમાં રહેલા પતરાના કબાટનું લોકર તોડી સોના-ચાંદીના દાગીના અને રોકડ મળી કુલ રૂ.૩.૦૭ લાખની મત્તા ચોરી કરી ગયો હોવાનું ફરિયાદમાં જણાવાયું છે.ચોરીની જાણ થતાં નીકીતાબેને નીચે રહેતી તેમની બહેનપણી કિરણબા પરમારને વાત કરી હતી. ત્યારબાદ બંનેએ આસપાસના વિસ્તારમાં તપાસ કરી હતી, પરંતુ કોઈ માહિતી મળી નહોતી. દાગીનાના બિલ મેળવી લીધા બાદ તા.૨૪ સપ્ટેમ્બરે પોલીસ મથકે પહોંચી અજાણ્યા તસ્કર વિરુદ્ધ ફરિયાદ નોંધાવી હતી. ફરિયાદીએ ચોરી અંગે કોઈ વ્યક્તિ ઉપર શંકા કે વહેમ ન હોવાનું પણ પોલીસને જણાવ્યું છે. પોલીસે ગુનો નોંધી અજાણ્યા તસ્કરની શોધખોળ શરૂ કરી છે.

જામનગરના ગુજસીટોક કેસમાં કોર્પોરેટર અલ્તાફ ખફી સહિત ચારને શરતી જામીન

• ગુજરાત હાઇકોર્ટનો હુકમ : ઓસમાણ ખફી, સુફિયાન પટણી અને શાહિદ ઇમ્તિયાઝ ખફીને પણ રાહત

દેશ દેવી ન્યુઝ જામનગ તા ૨૩, સપ્ટેમ્બર ૨૬ જામનગરમાં નોંધાયેલા ગુજસીટોક (ગુજસીટોક)ના કેસમાં ગુજરાત હાઇકોર્ટે કોર્પોરેટર અલ્તાફ ખફી સહિત ચાર આરોપીઓને શરતી જામીન મંજૂર કર્યા છે. હાઇકોર્ટના આ હુકમથી આરોપી પક્ષને રાહત મળી છે.હાઇકોર્ટે જામીન મંજૂર કરેલા આરોપીઓમાં અલ્તાફ ખફી ઉપરાંત ઓસમાણ ખફી, સુફિયાન પટણી અને શાહિદ ઇમ્તિયાઝ ખફીનો સમાવેશ થાય છે.જામનગર પોલીસે અગાઉ સંગઠિત ગુનાખોરી નિયંત્રણ ધારા (ગુજસીટોક) હેઠળ ગુનો નોંધી આરોપીઓ સામે કાર્યવાહી હાથ ધરી હતી. ત્યારબાદ આરોપીઓ દ્વારા જામીન મેળવવા માટે અદાલતમાં અરજી કરવામાં આવી હતી.નીચલી અદાલતમાં રાહત નહીં મળતાં ચારેય આરોપીઓએ ગુજરાત હાઇકોર્ટમાં જામીન અરજી કરી હતી. હાઇકોર્ટ સમક્ષ બચાવ પક્ષના વકીલો દ્વારા કરવામાં આવેલી રજૂઆતો અને દલીલોને ધ્યાને લઈ અદાલતે ચારેય આરોપીઓને શરતી જામીન પર મુક્ત કરવાનો હુકમ કર્યો હોવાનું જાણવા મળે છે.

જામનગર મહાનગર પાલિકાની નગર પ્રાથમિક શિક્ષણ સમિતિની નવી બોડી માટે ૧૨ નામો સામે આવ્યા

• ચેરમેનપદ માટે એડવોકેટ હેમલભાઈ ચોટાઈનું નામ ચર્ચામાં : બાકીના ૧૧ નામોમાં પણ ફોર્મ ભરનાર દાવેદારો

દેશ દેવી ન્યુઝ જામનગર તા ૨૩ સપ્ટેમ્બર ૨૬: જામનગર મહાનગરપાલિકા સંચાલિત નગર પ્રાથમિક શિક્ષણ સમિતિની નવી બોડીની રચનાને લઈને ભાજપમાં રાજકીય ગતિવિધિઓ તેજ બની છે. સમિતિની નવી ટીમ માટે ૧૨ દાવેદારોએ ફોર્મ ભર્યા હોવાનું સામે આવ્યું છે. હવે આ ૧૨ નામોમાંથી નવી બોડીની રચના કરવામાં આવનાર છે ત્યારે ચેરમેનપદ કોને મળે છે? તેને લઈને પણ ચર્ચાએ જોર પકડ્યું છે.શિક્ષણ સમિતિની નવી બોડી માટે માધવીબેન રોશિયા, રિદ્ધિબેન ડાભી, હિરેનભાઈ તખ્તાણી, જયભાઈ કડીવાર, નરભેરામભાઈ ડાકા, દુષ્યંતભાઈ સોલંકી, નીતિનભાઈ સોલાણી, એડવોકેટ હેમલભાઈ ચોટાઈ, હરેશભાઈ નંદા, બકુલભાઈ ડાભી, ધારાબેન ભટ્ટ અને રાહુલભાઈ મકવાણાએ ફોર્મ ભર્યા હોવાનું જાણવા મળે છે.આ ૧૨ નામો સામે આવ્યા બાદ હવે સમિતિની નવી ટીમ અંગે ભાજપના વર્તુળોમાં ચર્ચા શરૂ થઈ છે. ખાસ કરીને ચેરમેનપદને લઈને એડવોકેટ હેમલભાઈ ચોટાઈનું નામ ચર્ચામાં હોવાનું જાણવા મળે છે. જોકે ચેરમેન સહિત સમિતિની અંતિમ રચના અંગે સત્તાવાર નિર્ણય થયા બાદ જ સ્થિતિ સ્પષ્ટ થશે.દરમિયાન, ૧૨ નામો સામે આવતાં અને દાવેદારોની સંખ્યા પણ ૧૨ની આસપાસ જ રહેતાં સમિતિની રચના અંગે આંતરિક સ્તરે સંમતિ સધાઈ હોવાની ચર્ચાએ પણ રાજકીય વર્તુળોમાં જોર પકડ્યું છે. જોકે આ અંગે ભાજપ તરફથી સત્તાવાર રીતે કોઈ જાહેરાત કરવામાં આવી નથી.હવે આગામી તબક્કામાં આ નામો પૈકી કયા સભ્યોને શિક્ષણ સમિતિમાં સ્થાન મળે છે અને ચેરમેનપદની જવાબદારી કોને સોંપવામાં આવે છે તેના પર સૌની નજર મંડાઈ છે.શિક્ષણ સમિતિની નવી બોડી માટે ફોર્મ ભરનાર ૧૨ નામો: માધવીબેન રોશિયા • રિદ્ધિબેન ડાભી • હિરેનભાઈ તખ્તાણી • જયભાઈ કડીવાર • નરભેરામભાઈ ડાકા • દુષ્યંતભાઈ સોલંકી • નીતિનભાઈ સોલાણી • હેમલભાઈ ચોટાઈ • હરેશભાઈ નંદા • બકુલભાઈ ડાભી • ધારાબેન ભટ્ટ • રાહુલભાઈ મકવાણા

જામનગરમાં સફાઈના પ્રશ્નો અંગે મ્યુનિસિપલ કમિશનર મોડી રાત્રે એક્શન મોડમાં: ૩ કલાક સુધી વિવિધ વિસ્તારોનું રૂબરૂ નિરીક્ષણ કર્યું

• ​રાત્રે ૯:૩૦ થી ૧૨:૩૦ સુધી કમિશનરે ટીમ સાથે રસ્તા પર ઉતરી ગંદકી અને ગેરકાયદે દબાણો અંગે સ્થળ પર જ કડક સૂચનાઓ આપી

​દેશ દેવી ન્યુઝ જામનગર તા.સપ્ટેમ્બર ૨૬ જામનગર શહેરને સ્વચ્છ અને સુંદર બનાવવાના દાવાઓ વચ્ચે રસ્તાઓ પર સફાઈ અને દબાણો અંગેની વ્યાપક ફરિયાદો ઉઠતાં જામનગર મહાનગરપાલિકાના મ્યુનિસિપલ કમિશનર દીપેશ કેડિયા ગઈકાલે મોડી રાત્રે અચાનક જ એક્શન મોડમાં આવ્યા હતા. સાંજે પત્રકાર પરિષદમાં સફાઈ અને પાણી સહિતના વિવિધ પ્રશ્નો અંગે થયેલી ચર્ચા બાદ, કમિશનરે માત્ર કાગળ પર સૂચનાઓ આપવાને બદલે મોડી રાત્રે ૯:૩૦ થી ૧૨:૩૦ વાગ્યા સુધીના ૩ કલાક દરમિયાન શહેરના મુખ્ય વિસ્તારોમાં રૂબરૂ પહોંચી નિરીક્ષણ હાથ ધર્યું હતું.અધિકારીઓની ટીમ સાથે સ્થળ પર પહોંચ્યા : આ રાત્રિ નિરીક્ષણ દરમિયાન મ્યુનિસિપલ કમિશનર દીપેશ કેડિયા સાથે ડેપ્યુટી કમિશનર દેવેન્દ્રસિંહ ઝાલા, આસિસ્ટન્ટ કમિશનર મુકેશભાઈ વરણવા ઉપરાંત એસ્ટેટ શાખા તથા ઘન કચરા વ્યવસ્થાપન શાખાના અધિકારીઓ અને સફાઈ સ્ટાફનો કાફલો જોડાયો હતો.​જયશ્રી સિનેમા ગલીથી હવાઈ ચોક સુધી કડક સૂચના : ટીમે સૌપ્રથમ જયશ્રી સિનેમા વાળી ગલીમાં નિરીક્ષણ કર્યું હતું, જ્યાં ગંદકી અને કચરા અંગે મળેલી ફરિયાદોને ધ્યાને લઈ તુરંત સફાઈ હાથ ધરવા આદેશ કરાયા હતા. આ વિસ્તારમાં રસ્તા પરની રેકડીઓ અને પથારાવાળાઓને જાહેર સ્થળે ગંદકી ન કરવા તથા પોતાના વેપાર સ્થળની આસપાસ સ્વચ્છતા જાળવવા સૂચના આપવામાં આવી હતી. એસ્ટેટ શાખાને ગેરકાયદે દબાણો દૂર કરવા તાકીદ કરાઈ હતી.ત્યારબાદ ઇન્દ્રપ્રસ્થ કોમ્પ્લેક્સ, પંચેશ્વર ટાવર, ભંગારબજાર રોડ અને હવાઈ ચોક વિસ્તારમાં કચરા નિકાલ અને દબાણો અંગે ચકાસણી હાથ ધરી વેપારીઓને કડક સૂચનાઓ પાઠવી હતી.​ખોડિયાર કોલોની અને નાઇટ માર્કેટમાં સૂચનાઓ : નિરીક્ષણના અંતિમ તબક્કામાં બાલા હનુમાન મંદિર, તળાવ રોડ અને ખોડિયાર કોલોની સુધી રાઉન્ડ લેવામાં આવ્યો હતો. ખોડિયાર કોલોની વિસ્તારમાં રાત્રિ બજારના માહોલ વચ્ચે રેકડી-પથારાવાળાઓ, દુકાનદારો તેમજ હોટલ સંચાલકોને વેપાર પૂર્ણ થયા બાદ કચરો નિર્ધારિત જગ્યાએ જ નાખવા અને ગંદકી ન ફેલાવવા જણાવાયું હતું.મ્યુનિસિપલ કમિશનરના આ અચાનક રાત્રિ રાઉન્ડથી તંત્રમાં દોડધામ મચી ગઈ છે અને આગામી દિવસોમાં સફાઈ તથા દબાણ હટાવ ઝુંબેશ વધુ કડક બને તેવા સંકેતો સાંપડ્યા છે.

જામનગરમાં વોર્ડ નં. ૬ના માર્ગ પર સી.સી. રોડની કામગીરી: ત્રણ મહિના રસ્તો બંધ રહેશે

• ઢીંચડા ગામથી વાયુનગર-મુરલીધરનગર મેઈન રોડ સુધીનો માર્ગ બંધ રાખી વૈકલ્પિક રસ્તાનો ઉપયોગ કરવા મનપાની સૂચના

દેશ દેવી ન્યુઝ જામનગર તા ૨૨ સપ્ટેમ્બર ૨૬, જામનગર મહાનગરપાલિકા દ્વારા વોર્ડ નં. ૬માં ઢીંચડા ગામ તરફ જતાં માર્ગ પર સી.સી. રોડની કામગીરી હાથ ધરવામાં આવનાર હોવાથી આ માર્ગ ત્રણ મહિના માટે વાહનવ્યવહાર માટે બંધ રાખવામાં આવશે. મહાનગરપાલિકાના કમિશનર દીપેશ કેડિયાની જાહેર નોટિસ મુજબ, એરફોર્ષ ગેઇટ થી ઢીંચડા ગામ તરફ જતા રસ્તા પર સી.સી. રોડનું કામ ચાલુ કરવાનું હોવાથી તા. ૧૬ સપ્ટેમ્બરથી તા. ૧૮ ડિસેમ્બર, ૨૦૨૬ સુધી આ માર્ગ બંધ રહેશે.આ સમયગાળા દરમિયાન વાહનચાલકો અને સ્થાનિક રહેવાસીઓ માટે વૈકલ્પિક માર્ગની વ્યવસ્થા કરવામાં આવી છે. જેમાં ઢીંચડા ગામથી દ્વારકાધીશ સોસાયટી થઈ બેડી બંદર રીંગ રોડ, ઢીંચડા ગામથી દરગાહવાળો રોડ તરફ થઈ બેડી બંદર રીંગ રોડ તથા વાયુનગર-મુરલીધરનગર મેઈન રોડ પરથી તિરુપતિ-૧ સોસાયટી થઈ રીંગ રોડનો ઉપયોગ કરી શકાશે.મનપાએ સ્થાનિક રહેવાસીઓ તેમજ આ માર્ગનો ઉપયોગ કરતા વાહનચાલકોને કામગીરી પૂર્ણ ન થાય ત્યાં સુધી વૈકલ્પિક માર્ગનો ઉપયોગ કરવા અનુરોધ કર્યો છે. જાહેરનામાનો ભંગ કરનાર સામે બી.પી.એમ.સી. એક્ટની જોગવાઈ મુજબ કાર્યવાહી કરવાની પણ ચેતવણી આપવામાં આવી છે.

જામનગર મનપા શિક્ષણ સમિતિની ચૂંટણી જાહેર: ૧૨ સભ્યો માટે ૧૦૦થી વધુ દાવેદારો મેદાનમાં

• ​૨૩ સપ્ટેમ્બરે નિયુક્તિપત્રો સ્વીકારાશે, ૯ ઓક્ટોબરે જનરલ બોર્ડ હોલમાં મતદાન અને મતગણતરી થશે

​દેશ દેવી ન્યુઝ જામનગર : તા ૨૨ સપ્ટેમ્બર ૨૬ જામનગર મહાનગરપાલિકા હસ્તકની નગર પ્રાથમિક શિક્ષણ સમિતિના ૧૨ સભ્યોની ચૂંટણી માટેની સત્તાવાર પ્રક્રિયાનો પ્રારંભ થઈ ચૂક્યો છે. અગાઉના બોર્ડના કોર્પોરેટરોની મુદ્દત પૂરી થતાં શિક્ષણ સમિતિ પણ વિસર્જિત થઈ હતી. હવે નવી સમિતિની રચના માટે આગામી ૯ ઓક્ટોબરના રોજ ચૂંટણી યોજવાનું વિધિવત રીતે નક્કી કરવામાં આવ્યું છે. આ ચૂંટણીમાં સભ્યપદ મેળવવા માટે ભાજપના સ્થાનિક સંગઠન તેમજ દાવેદારોમાં ભારે ઉત્સાહ જોવા મળી રહ્યો છે અને ૧૦૦થી વધુ દાવેદારોએ પોતાની ઇચ્છા દર્શાવી છે.​મેયર મોનિકાબેન વ્યાસે જાહેર કર્યો ચૂંટણી કાર્યક્રમ ચૂંટણી અધિકારી તરીકે જવાબદારી સંભાળી રહેલા મેયર મોનિકાબેન વ્યાસ દ્વારા ચૂંટણી કાર્યક્રમની સત્તાવાર જાહેરાત કરવામાં આવી છે. જે મુજબ:

• ​૨૩ સપ્ટેમ્બર: સવારે ૧૧:૦૦થી બપોરે ૩:૦૦ વાગ્યા સુધી મેયર કાર્યાલય ખાતે નિયુક્તિપત્રો સ્વીકારાશે.
• ​૨૫ સપ્ટેમ્બર: સવારે ૧૧:૦૦ વાગ્યે ફોર્મની ચકાસણી હાથ ધરાશે અને બપોરે ૩:૩૦ વાગ્યે માન્ય ઉમેદવારોની યાદી જાહેર કરાશે.
• ​૨ ઓક્ટોબર: સવારે ૧૧:૦૦થી બપોરે ૨:૦૦ વાગ્યા સુધી કોર્પોરેશનના જનરલ બોર્ડ હોલ ખાતેથી ઉમેદવારીપત્રો પરત ખેંચી શકાશે.

​૯ ઓક્ટોબર: સવારે ૧૧:૩૦થી બપોરે ૩:૩૦ વાગ્યા સુધી જનરલ બોર્ડ હોલમાં મતદાન પ્રક્રિયા હાથ ધરાશે. મતદાન પૂર્ણ થયા બાદ તુરંત જ તે જ સ્થળે મતગણતરી હાથ ધરી પરિણામ જાહેર કરવામાં આવશે. બિનહરીફ વરણી થવાની પ્રબળ શક્યતા : જામનગર મહાનગરપાલિકામાં છેલ્લા બે દાયકા કરતાં પણ વધુ સમયથી ભારતીય જનતા પાર્ટીનું એકહથ્થુ શાસન છે. ભૂતકાળના ઇતિહાસને જોતાં નગર પ્રાથમિક શિક્ષણ સમિતિની ચૂંટણી મોટે ભાગે બિનહરીફ જ સંપન્ન થતી આવી છે. આ વખતે પણ પ્રદેશ અને સ્થાનિક પક્ષના નેતૃત્વ દ્વારા નામ આખરી કરાયા બાદ તમામ ૧૨ સભ્યોની બિનહરીફ વરણી થાય તેવી પૂરેપૂરી સંભાવનાઓ સેવાઈ રહી છે.શિક્ષણ સમિતિનું માળખું: નગર પ્રાથમિક શિક્ષણ સમિતિમાં કુલ ૧૫ સભ્યોની બોડી હોય છે. જેમાં ૧૨ સભ્યો મહાનગરપાલિકાના કોર્પોરેટરો દ્વારા ચૂંટવામાં આવે છે, જ્યારે ૨ સભ્યો વિવિધ સંસ્થાઓના પ્રતિનિધિ તરીકે અને ૧ સભ્ય સરકારી પ્રતિનિધિ તરીકે નિયુક્ત કરવામાં આવે છે.

જામનગરમાં વરસાદ વચ્ચે ભક્તિનો રંગ : સાંસદ પૂનમબેન માડમ આયોજિત ‘નમો નાદ’ને જબ્બર પ્રતિસાદ

• પ્રદર્શન મેદાનમાં ઇશાની દવે, હાર્દિક દવે અને રાજ ગઢવીના ભક્તિ સંગીતે જમાવ્યું આકર્ષણ; યુવાનો સાથે ઝૂમ્યાં સાંસદ, નવરાત્રિ પહેલાં ફરી કાર્યક્રમ યોજવાની જાહેરાત

દેશ દેવી ન્યુઝ જામનગર, તા. ૨૧સપ્ટેમ્બર ૨૬: જામનગરનાં સાંસદ પૂનમબેન માડમના સાનિધ્યમાં શહેરના પ્રદર્શન મેદાન ખાતે યોજાયેલા ‘નમો નાદ’ ભક્તિસંગીત કાર્યક્રમને જબરદસ્ત પ્રતિસાદ મળ્યો હતો. વરસાદી માહોલ વચ્ચે પણ જામનગર શહેર, આસપાસના વિસ્તારો તેમજ દેવભૂમિ દ્વારકા જિલ્લામાંથી મોટી સંખ્યામાં લોકો ઉપસ્થિત રહ્યા હતા. ભક્તિ, સંગીત અને ઉત્સાહથી સમગ્ર પ્રદર્શન મેદાન ગુંજી ઊઠ્યું હતું. કાર્યક્રમના પ્રારંભ સમયે વરસાદ શરૂ થતાં થોડા સમય માટે વિક્ષેપ સર્જાયો હતો. જોકે, આયોજકો દ્વારા કરવામાં આવેલી આગોતરી વ્યવસ્થાના કારણે વરસાદ બંધ થતાં જ મેદાનમાં તાત્કાલિક સફાઈ સહિતની કામગીરી હાથ ધરવામાં આવી હતી. ત્યારબાદ નિર્ધારિત આયોજન મુજબ કાર્યક્રમનો રંગારંગ પ્રારંભ થયો હતો.વરસાદનો ઉલ્લેખ કરતાં સાંસદ પૂનમબેન માડમે મંચ પરથી લાગણીસભર ટકોર કરી હતી કે, “હું આયોજન કરું અને વરસાદ આવે તો આવાં ૧૦૦ આયોજન કુરબાન છે.” મેઘરાજાની પધરામણી વચ્ચે પણ મોટી સંખ્યામાં લોકો કાર્યક્રમમાં જોડાયેલા રહેતાં તેમણે જનમેદનીના ઉત્સાહ અને સાથ બદલ લાગણી વ્યક્ત કરી હતી.‘નમો નાદ’માં જાણીતા કલાકારો ઇશાની દવે, હાર્દિક દવે અને રાજ ગઢવીએ ભજન તથા સંગીતની રમઝટ બોલાવી હતી. ભક્તિ સંગીતના તાલે શ્રોતાઓ ઝૂમી ઊઠ્યા હતા. સાંસદ પૂનમબેન માડમ પણ લોકોની વચ્ચે પહોંચી ભજનના તાલે ઝૂમ્યાં હતાં. તેમને લોકો સાથે આ રીતે જોડાતાં જોઈ ઉપસ્થિત જનમેદનીએ તાળીઓના ગડગડાટથી વધાવી લીધાં હતાં.ખાસ કરીને જામનગરના યુવાનો અને યુવતીઓમાં કાર્યક્રમને લઈને ભારે ઉત્સાહ જોવા મળ્યો હતો. મોટી સંખ્યામાં યુવાઓ ભક્તિસંગીતના તાલે ઝૂમ્યાં હતાં અને સાંસદ સાથે આનંદભેર કાર્યક્રમનો માણ્યો હતો.કાર્યક્રમને મળેલા જબરદસ્ત પ્રતિસાદથી ઉત્સાહિત સાંસદ પૂનમબેન માડમે નવરાત્રિ પહેલાં ફરી એક વખત આવો કાર્યક્રમ યોજવાની જાહેરાત કરી હતી. તેમની આ જાહેરાતને ઉપસ્થિત જનમેદનીએ તાળીઓના ગડગડાટ સાથે વધાવી લીધી હતી.ઝેન-ઝી સાથે ઝૂમ્યાં, સેલ્ફીનો પણ જમ્યો ક્રેઝ
‘નમો નાદ’ દરમિયાન સાંસદ પૂનમબેન માડમે જામનગરના યુવાનો સાથે હળવાશભર્યો સમય વિતાવ્યો હતો. તેઓ યુવા-યુવતીઓ સાથે ઝૂમ્યાં હતાં અને અનેક યુવાઓ સાથે સેલ્ફી પણ લીધી હતી. સાંસદે યુવાનોની વચ્ચે જઈ તેમની સાથે વાતચીત કરી આનંદમાં સહભાગી થતાં સમગ્ર વાતાવરણમાં ઉત્સાહ છવાઈ ગયો હતો.ખાસ કરીને યુવા-યુવતીઓમાં સાંસદ સાથે સેલ્ફી લેવા અને તેમની સાથે સમય વિતાવવાનો ભારે ક્રેઝ જોવા મળ્યો હતો. પૂનમબેન માડમનો ભક્તિસભર અને નૃત્યમય અંદાજ જોઈ અનેક યુવાઓ આશ્ચર્યચકિત થઈ ગયા હતા.

જામનગર : ચાર વર્ષ જૂના લાંચ પ્રકરણમાં સિક્કા નગરપાલિકાના બે કર્મચારી સામે ACBનો ગુનો

• મકાનના દસ્તાવેજમાં નામ ટ્રાન્સફર કરી NOC આપવા રૂ. ૧,૦૦૦ની લાંચ માગ્યાનો આરોપ: નિષ્ફળ છટકા બાદ ખુલ્લી તપાસના અંતે કાર્યવાહી

દેશ દેવી ન્યુઝ જામનગર તા. ૨૦સપ્ટેમ્બર ૨૬: સિક્કા નગરપાલિકાની ટેક્સ શાખામાં મકાનના દસ્તાવેજમાં નામ ટ્રાન્સફર કરી એન.ઓ.સી. આપવા માટે રૂ. ૧,૦૦૦ની લાંચ માગવામાં આવી હોવાના ચાર વર્ષ જૂના પ્રકરણમાં જામનગર એસીબીએ બે કર્મચારી સામે ગુનો નોંધ્યો છે. વર્ષ ૨૦૨૨માં બે વખત ગોઠવાયેલો લાંચનો છટકો નિષ્ફળ રહ્યો હતો. ત્યારબાદ હાથ ધરાયેલી ખુલ્લી તપાસના અંતે તા. ૧૯ સપ્ટેમ્બર, ૨૦૨૬ના રોજ ગુનો દાખલ કરવામાં આવ્યો છે.એસીબીની વિગતો અનુસાર, સાહેદે વર્ષ ૨૦૧૮માં સિક્કા ખાતે મકાન ખરીદ્યું હતું. મકાનનો ટેક્સ ભરી દસ્તાવેજમાં પોતાનું અને પત્નીનું નામ ટ્રાન્સફર કરાવી એન.ઓ.સી. મેળવવા માટે તેમણે સિક્કા નગરપાલિકામાં કાર્યવાહી હાથ ધરી હતી. આ કામગીરી કરી આપવા બદલ ટેક્સ શાખાના તત્કાલીન સિનિયર ક્લાર્ક કમ ટેક્સ ઇન્સ્પેક્ટર અતુલકુમાર રમણીકલાલ પંડ્યા અને કરાર આધારિત કમ્પ્યુટર ઓપરેટર કમ ક્લાર્ક નીલેશકુમાર ભુદરદાસ મેસવાણિયા દ્વારા રૂ. ૧,૦૦૦ની લાંચ માગવામાં આવી હોવાનો આરોપ છે.ફરિયાદના આધારે એસીબીએ તા. ૭ અને ૮ માર્ચ, ૨૦૨૨ના રોજ સિક્કા નગરપાલિકા કચેરી ખાતે છટકો ગોઠવ્યો હતો. જોકે, બંને વખત છટકો નિષ્ફળ રહેતાં લાંચની કોઈ રકમ સ્વીકારવામાં કે રિકવર કરવામાં આવી નહોતી. આથી સમગ્ર મામલે ખુલ્લી તપાસ હાથ ધરવામાં આવી હતી.ખુલ્લી તપાસ દરમિયાન એકત્રિત કરવામાં આવેલા પુરાવાના આધારે બંને આરોપીઓએ પોતાના અંગત લાભ માટે સરકારી હોદાનો દુરુપયોગ કરી એકબીજાને મદદરૂપ થઈ રૂ. ૧,૦૦૦નો અનુચિત લાભ મેળવવા લાંચની માગણી કરી હોવાનું પ્રાથમિક રીતે સામે આવ્યાનો એસીબીનો દાવો છે. આથી બંને સામે લાંચ માગણીનો ગુનો નોંધવામાં આવ્યો છે. આરોપી અતુલકુમાર પંડ્યા હાલ નિવૃત્ત હોવાનું જણાવાયું છે.આ ગુનો એસીબી પોલીસ સ્ટેશન, જામનગરના પોલીસ ઇન્સ્પેક્ટર એ.આર. ગોહિલે સરકાર તરફે દાખલ કરી વધુ તપાસ હાથ ધરી છે. સમગ્ર કાર્યવાહી રાજકોટ એસીબી એકમના મદદનીશ નિયામક જે.ડી. મેવાડાના સુપરવિઝન અને નાયબ નિયામક બલદેવસિંહ વાઘેલાના માર્ગદર્શન હેઠળ કરવામાં આવી રહી છે.