જામનગર જિલ્લામાં ગુંડા તત્વો અંગેની માહિતી આપવા પોલીસ તંત્રનો અનુરોધ

દેશ દેવી ન્યૂઝ જામનગર તા ૨૦, માર્ચ ૨૫ જામનગર શહેર અને જિલ્લામાં કોઈ પણ ગુંડા તત્વો નાગરિકોને પરેશ કરતા હોય તો જામનગર શહેર -જિલ્લાના કોઈપણ નાગરિકે વિના સંકોચે જામનગરના પોલીસ કંટ્રોલરૂમનો સંપર્ક કરવા જિલ્લા પોલીસવડા પ્રેમસુખ ડેલુ દ્વારા પ્રજાજનોને અનુરોધ કરાયો છે.જામનગર જિલ્લા પોલીસ તંત્ર દ્વારા નાગરિકોને સુરક્ષા આપવા ની સાથે અનુરોધ કરાયો છે, કે નાગરિકોએ પોતાના રહેણાંક વિસ્તાર, આપના વ્યવસાય/નોકરીના સ્થળની આજુબાજુમાં કે અન્ય કોઈપણ જાહેર સ્થળોએ લુખ્ખાગીરી કરનારા, ભય ફેલાવાનારા કે અન્ય કોઈપણ પ્રકારના ગેરકાયદેસર કૃત્ય કરનારા અસામાજિક તત્વો ની રંજાડ હોય તો આવા તત્વો વિરુદ્ધ પોલીસે ખાસ ઝૂંબેશ શરૂ કરી છે.આથી જિલ્લાની તમામ જાહેર જનતાને આવી ગુંડાગીરી અને અસામાજિક તત્વો બાબતેની કોઈપણ જાણકારી હોય તો વિના સંકોચે ભય મુક્ત બનીને પોલીસને જાણ કરી શકે છે.આવી કોઈપણ જાણકારી અથવા ફરિયાદ હોય તો જામનગર જિલ્લા પોલીસ કંટ્રોલ રૂમના ફોન નંબર : (૦ર૮૮) ૨૫૫૦૨૦૦ તેમજ જામનગર જિલ્લા પોલીસ કંટ્રોલ રૂમના વોટ્સએપ નંબર : ૬૩૫૯૬ ૨૭૮૦૦ નો સંપર્ક કરવા અનુરોધ કરાયો છે.જામનગર શહેર – જિલ્લાના કોઈ પણ નાગરિકો આવા અસામાજિક તત્વોના નામ, સરનામું કે અન્ય માહિતી વગેરે કોઈ પણ નાગરિકો પોલીસ ને મોકલી શકે છે. જે માહિતી શેર કરનાર વ્યક્તિની ઓળખ સુરક્ષિત રાખવામાં આવશે.

જામનગર ના શહેરી વિસ્તારમાં ઘાસચારો પહોંચાડવા માટે કાલાવડ નાકા બહાર ખડકી દેવાયેલા સાત ઘાસચારા ના વાડા પર જામ્યુકો નું બુલડોઝર ફેરવાયું

• ભારે પોલીસ બન્દોબસ્ત સાથે મનપાની બે ટુકડી દ્વારા મેગા ડિમોલેશન હાથ ધરી તમામ સાત વાડાઓ દૂર કર્યા

• ચાર મોટી ટ્રેક્ટર ટ્રોલીમાં ૨૦૦ મણ જેટલું ઘાસ કબજે કરી લઇ મહાનગર પાલિકા સંચાલિત ઢોરવાડામાં પહોંચાડાયું

દેશ દેવી ન્યૂઝ જામનગર તા ૨૦ માર્ચ ૨૫, જામનગર શહેરમાં ગેરકાયદે રીતે ઘાસ ચારાનો વેચાણ કરવામાં આવે છે, અને તેમાંય ખાસ કરીને કાલાવડ નાકા બહાર નદીને દબાવીને ત્યાં કેટલાક ઘાસ વિક્રેતાઓ દ્વારા મોટા પાયે દબાણ સર્જીને ઘાસના વાડાઓ ઊભા કરી દેવાયા હોવાથી તે આશરે ૩૦ હજાર ફૂટ જેટલી જગ્યા ખુલ્લી કરાવવા માટે આજે સવારે મહાનગરપાલિકા દ્વારા મેગા ડીમોલેશન હાથ ધરવામાં આવ્યું હતું.જામનગર મહાનગરપાલિકાની એસ્ટેટ શાખા તેમજ સોલિડ વેસ્ટ શાખાની બંને ટીમોના આશરે ૪૦ જેટલા કર્મચારીઓની મદદથી વહેલી સવારે ૮.૩૦ વાગ્યાથી મેગા ડીમોલેશન હાથ ધરવામાં આવ્યું હતું. જેના માટે સિટી એ. ડિવિઝનના પી.આઇ. એન.એ.ચાવડા સહિતના પોલીસ અધિકારી કર્મચારીઓનો ચુસ્ત બંદોબસ્ત મુકવામાં આવ્યો હતો.ઉપરોક્ત સ્થળે અલગ અલગ સાત જેટલા ઘાસના વાડા ખડકી દેવાયા હતા, જેના પતરા, સેડ, ફેન્સીંગ સહિતનું તમામ દબાણ દૂર કરી લેવાયું હતું. અને આશરે ૩૦,૦૦૦ ચોરસ ફૂટ જગ્યા ખુલ્લી કરાવવામાં આવી છે. ઉપરોક્ત સ્થળે વેચાણ માટે મૂકવામાં આવેલું આશરે ૨૦૦ મણ જેટલું ઘાસ, કે જે મહાનગરપાલિકાની અલગ અલગ ચાર મોટી ટ્રોલીમાં જમા કરી લેવાયું હતું, અને તમામ ઘાસને મહાનગરપાલિકા સંચાલીત ઢોરના ડબ્બામાં મોકલી દેવામાં આવ્યું છે.જામનગર શહેરને રસ્તે રઝળતા પશુઓથી મુક્ત કરાવવાના ભાગરૂપે આ પગલું ભરવામાં આવ્યું હતું. ઉપરાંત શહેરની મધ્યમાં પણ કેટલાક ઘાસના વિક્રેતાઓ કોઈપણ પ્રકારની મંજૂરી વિના ઘાસનું વેચાણ કરે છે, તે મુજબ જામનગરમાં ઇન્દ્રપ્રસ્થ કોમ્પલેક્ષની સામે તેમ જ પંચેશ્વર ટાવર નજીક ગૌરીશંકર મહાદેવના મંદિરની સામેના ભાગમાં બે ઘાસના વિક્રેતાઓને ત્યાં પણ મહાનગરપાલિકાની ટુકડી ત્રાટકી હતી, અને ત્યાં હાજર રહેલો ઘાસનો જથ્થો કબજે કરી લઇ બંને સ્થળો પરથી જાહેરમાં ઘાસનું વેચાણ બંધ કરાવી દેવામાં આવ્યું છે.

જામનગર ના પોલીસ તંત્ર દ્વારા અ-સામાજિક તત્વો સામે કડક હાથે કાર્યવાહી: ૨૮૫ શખ્સો નો સર્વે કરાયો

• જામનગર શહેરમાંથી ૪૬ ટપોરીઓને ઉપાડી લઈ એલસીબીની કચેરીએ એસ.પી. દ્વારા આગવી ઢબે પૂછપરછ કરાઇ

• જામનગર શહેર તથા આસપાસના વિસ્તારમાં અસામાજિક તત્વો દ્વારા ખડકી દેવાયેલા ગેરકાયદે દબાણો પણ દૂર કરાશે

દેશ દેવી ન્યૂઝ જામનગર તા ૧૯ માર્ચ ૨૫, ગુજરાત રાજ્યના પોલીસ મહા નિર્દેશકના આદેશ અનુસાર જામનગર શહેર- જિલ્લામાં વસવાટ કરતા અ-સામાજિક તત્વો ને શોધી કાઢી તેઓ સામે કડક હાથે કામ લેવાનો આદેશ કરાયો છે, જેના ભાગરૂપે છેલ્લા બે દિવસથી સમગ્ર જિલ્લાનું પોલીસ તંત્ર ઊંધા માથે થયું છે. જિલ્લા પોલીસ વડા સમગ્ર પ્રક્રિયાનું મોનિટરિંગ કરી રહ્યા છે. એસ.પી. પ્રેમસુખ ડેલુ ની આગેવાનીમાં શહેર વિભાગના ડીવાયએસપી જે. એન. ઝાલા તેમજ ગ્રામ્ય વિભાગના ડીવાયએસપી આર. બી. દેવધાની રાહબરીમાં સમગ્ર કાર્યવાહી ચલાવવામાં આવી રહી છે.છેલ્લા બે દિવસ દરમિયાનમાં શહેર અને જિલ્લામાં વસવાટ કરતા કુલ ૨૮૫ અસામાજિક તત્વોને આઈડેન્ટીફાઇ કરાયા છે. તેઓની આગળ પાછળની તમામ હિસ્ટ્રી એકત્ર કરી લેવામાં આવી છે, અને તેનું સંપૂર્ણ સર્વે કરી અને તમામ તત્વોની બાયોગ્રાફી તૈયાર કરી લેવામાં આવી છે. જેનો એસ.પી. પ્રેમસુખ ડેલુ અભ્યાસ કરી રહ્યા છે.આ ઉપરાંત જામનગર શહેરમાં છેલ્લા કેટલાક સમયથી ટપોરીગીરી કરતા તત્વોને પણ શોધી કાઢવા માટેની વિશેષ ઝુંબેશ હાથ ધરવામાં આવી હતી, અને તેના માટે એલસીબીના પી.આઈ. વી.એમ.લગારીયા અને તેઓની સમગ્ર ટીમ તથા અન્ય પોલીસ સ્ટેશનની પોલીસ ટુકડીને દોડતી કરાવાઈ હતી, જેના ભાગરૂપે માત્ર ૨૪ કલાકમાં જ શહેરમાંથી કુલ ૪૬ ટપોરીઓને ઉપાડી લેવામાં આવ્યા હતા, અને તમામને એલસીબી ની કચેરી સમક્ષ હાજર કરાવાયા હતા.જયાં આજે બપોરે ખુદ જિલ્લા પોલીસવડા પ્રેમસુખ ડેલુ ઉપસ્થિત રહ્યા હતા, અને તમામ ટપોરીઓની આગવી ઢબે પૂછપરછ કરી હતી. ઉપરાંત આકરા શબ્દોમાં કેટલીક જરૂરી સુચનાઓ પણ આપી દેવામાં આવી છે. શહેરમાં કોઈપણ ટપોરીગીરી કરતા જોવા મળશે, તો આવા તત્વો સામે કડક હાથે કામગીરી કરવામાં આવશે, તેમ એસપીએ જણાવ્યું હતું.જામનગર શહેર અને આસપાસના વિસ્તારોમાં માથાભારે શખ્સો દ્વારા ગેરકાયદે રીતે સરકારી જમીનમાં દબાણ કર્યું હશે, અથવા તો અન્ય કોઈ વ્યક્તિની જમીનમાં ગેરકાયદે પેશકદમી કરી લીધી હશે, આવા તમામ દબાણોને દૂર કરવા માટેની વિશેષ ઝુંબેશ ચલાવવામાં આવશે.તે માટેનો પણ ખાસ એક્શન પ્લાન આજે એલસીબીની કચેરીમાં જ ઘડી કાઢવા આવ્યો હતો. જેની નજીકના ભવિષ્યમાં જ અમલવારી કરવામાં આવશે.

જામનગર જિલ્લાના ધ્રોલમાં લુહારી કામ કરતા એક યુવાનનો આર્થિક સંકળામણના કારણે ગળાફાંસા દ્વારા આપઘાત

• પુત્રના મૃતદેહ ને પંખામાં લટકતો જોઈને પિતા પણ બેશુદ્ધ બન્યા બાદ સારવારમાં ખસેડાયા : પરિવારમાં ગમગીની

દેશ દેવી ન્યુઝ જામનગર તા ૧૯ માર્ચ ૨૫, જામનગર જિલ્લાના ધ્રોલમાં વૃંદાવન સોસાયટીમાં ભારે કરુણાજનક કિસ્સો સામે આવ્યો છે. લુહારી કામ કરતા ૨૨ વર્ષીય યુવકે પોતાનો કામ ધંધો બરાબર ચાલતો ન હોવાથી આર્થિક સંકળામણ ના કારણે ગળા ફાંસો ખાઈ લીધો હતો. જેને લટકતો જોઈને તેના પિતા પણ બેશુદ્ધ બન્યા હતા, અને હોસ્પિટલમાં ખસેડાયા હતા. આ બનાવને લઈને પરિવારમાં ગમગીની છવાઈ છે.આ બનાવની વિગત એવી છે કે ધ્રોલમાં વૃંદાવન સોસાયટીમાં રહેતા અને જોડિયા રોડ પર લુહારિકામ અને વેલ્ડીંગ કામની દુકાન ચલાવતા નિલેશ ભાલચંદ્રભાઇ કવૈયા નામના ૨૨ વર્ષના લુહાર જ્ઞાતિના યુવાને ગઈકાલે પોતાના ઘેર પંખા ના હુકમાં ચાદર બાંધી ગળા ફાંસા દ્વારા આપઘાત કરી લીધો હતો.જે દ્રશ્ય જોઈને તેના પિતા ભાલચંદ્રભાઇ હેબતાઈ ગયા હતા, અને તેઓ પણ બેશુદ્ધ થઈને ઢળી પડ્યા હતા. જેમને આડોશી પાડોશી એ સારવાર માટે ધ્રોલમાં પહોંચાડ્યા હતા અને સમગ્ર પરિવાર અને આસપાસના વિસ્તારમાં ગમગીની છવાઈ હતી.જોકે મોડેથી ભાલચંદ્રભાઇ ભાનમાં આવી ગયા બાદ ધ્રોલના પોલીસ હેડ કોન્સ્ટેબલ હરદેવસિંહ જાડેજા બનાવના સ્થળે તેમજ હોસ્પિટલે દોડી ગયા હતા, અને તેઓનું નિવેદન નોંધ્યું હતું.જેમાં પોતાના પુત્ર નિલેશ કે જેનો છેલ્લા કેટલાક સમયથી કામ ધંધો બરાબર ચાલતો ન હોવાના કારણે આર્થિક સંકળામણ અનુભવતો હતો, અને તેના કારણે આ પગલું ભરી લીધું હોવાનું જણાવ્યું હતું. જે સમગ્ર બાબતે પોલીસ વધુ તપાસ ચલાવે છે.

જામનગર નજીક ચંગા ગામ પાસે ખાનગી લક્ઝરી બસ અને બોલેરો પીકપ વેન વચ્ચે ગોઝારો અકસ્માત સર્જાયો

• બોલેરોના ચાલકનું અંતરિયાળ મૃત્યુ : જ્યારે બસમાં બેઠેલા અન્ય ૧૫ મુસાફરો ઘાયલ : સારવાર માટે હોસ્પિટલમાં ખસેડાયા

દેશ દેવી ન્યુઝ જામનગર તા ૧૮, માર્ચ ૨૫ જામનગર નજીક ચંગા ગામની પાસે આજે બપોરે બારેક વાગ્યાના અરસામાં પુરપાટ ઝડપે આવી રહેલી ખાનગી ટ્રાવેલ્સ ની લક્ઝરી બસ સામેથી આવી રહેલા બોલેરો પીકપ વેન સાથે ડિવાઈડર કૂદીને ટકરાઈ ગઈ હતી, અને બોલેરો પલટી મારી ગયો હતો, તેમ જ લક્ઝરી બસ ટકરાઈને અકસ્માતનો ભોગ બની હતી. જે અકસ્માતમાં બોલેરો ના ચાલક મોટા થાવરીયા ગામના જસ્મીન મનસુખભાઈ તાળા (ઉમર વર્ષ૩૦) ને ગંભીર ઈજા થઈ હોવાથી તેનું ઘટના સ્થળે જ કરુણ મૃત્યુ નીપજ્યું હતું.આ ઉપરાંત લકઝરી બસની અંદર ૧૫ જેટલા મુસાફરો બેઠા હતા, જે તમામને પણ નાની મોટી ઈજા થઈ હોવાથી અલગ અલગ ચાર ૧૦૮ નંબરની એમ્બ્યુલન્સ મારફતે સારવાર માટે જામનગરની સરકારી જી.જી. હોસ્પિટલમાં ખસેડવામાં આવ્યા છે. જેમાં બે ઈજાજ રસ્તો ની હાલત ગંભીર ગણાવાઇ રહી છે.આ અકસ્માતના બનાવની જાણ થતા પંચકોસી બી. ડિવિઝન નો પોલીસ કાફલો તેમજ ટ્રાફિક શાખાની ટુકડી ઘટના સ્થળે દોડી ગઈ હતી, અને સૌ પ્રથમ વાહન વ્યવહારને પૂર્વવત બનાવ્યો છે, જયારે સમગ્ર બનાવ મામલે પોલીસ દ્વારા વધુ તપાસ ચલાવાઇ રહી છે.

જામનગર એરપોર્ટ પર વધુ એક ધર્મ ધુરંધર બાગેશ્વર બાબાનું આગમન

• વનતારા’ નિહાળવા જામનગર આવી પહોંચ્યા પંડિત ધીરેન્દ્ર શાસ્ત્રી

દેશ દેવી ન્યૂઝ જામનગર તા ૧૮ માર્ચ ૨૫ , જામનગરમાં રિલાયન્સનાં અનંત અંબાણી દ્વારા સ્થાપિત વન્યજીવોનાં વિશ્વનાં સૌથી મોટા રેસ્ક્યુ સેન્ટર તથા કૃત્રિમ નિવાસ સ્થાન ‘વનતાર’ નિહાળવા માટે એક પછી એક દેશના મહાનુભાવો, ધર્મગુરુઓ વગેરે જામનગર આવી રહ્યા છે. જેનો સિલસિલો અવિરત ચાલુ રહ્યો છે. અને જામનગરના એરપોર્ટ પર વીવીઆઈપી અવરજવર ચાલુ રહી છે.પરમ દિવસે શ્રી શ્રી રવિશંકર વનતારા આવ્યા પછી ગત મોડી રાત્રે શ્રી બાગેશ્વર ધામનાં મહંત અને ચમત્કારીક શક્તિઓવાળા બાગેશ્વર બાબા તરીકે પ્રસિદ્ધ પંડિત ધીરેન્દ્ર શાસ્ત્રી પણ વનતારા નિહાળવા જામનગર આવી પહોંચ્યા હતા.જામનગર એરપોર્ટ પર મોડી રાત્રે તેઓનું આગમન થયું હતું, જેને પગલે તેમનાં અનુયાયીઓ અને સનાતન ધર્મપ્રેમીઓમાં ઉત્કંઠા વ્યાપી ગઇ હતી. અને રાત્રે જામનગરના એરપોર્ટ પર કેટલાક સમર્થકો જોવા મળ્યા હતા તેઓએ એરપોર્ટ પર ઉતરાણ કર્યા બાદ રિલાયન્સ દ્વારા તેઓનું ભવ્ય સ્વાગત કરવામાં આવ્યું હતું ત્યારબાદ તેઓ મોટર માર્ગે વનતારા પહોંચ્યા હતા, જ્યાં આજે દિવસ દરમિયાન તેઓની વનતારા ની મુલાકાત ચાલી રહી છે.

જામનગરના રણજીત નગર વિસ્તારમાં હોળીની રાતે પુષ્પા સ્ટાઇલમાં એક શખ્સનો હંગામો

• એક તબીબ સહિત બે વ્યક્તિ પર હુમલો કરી દઈ ત્યાં પાર્ક કરેલા બે વાહનોમાં તોડફોડ કરી નાખ્યા ની પોલીસ ફરિયાદ

• એકત્ર થયેલા લોકોના ટોળા ની વચ્ચે જાહેરમાં પોતાનો શર્ટ ઉતારી ઉઘાડા ડીલે નિર્લજ્જ વર્તન કર્યાની પણ ફરિયાદ

દેશ દેવી ન્યૂઝ જામનગર તા ૧૬ માર્ચ ૨૫, જામનગરના રણજીત નગર વિસ્તારમાં રહેતા અને ત્યાં જ ફૂટવેર ની દુકાન ચલાવતા જયદીપ અરવિંદભાઈ સોલંકી નામના શખ્સે જાહેરમાં ભારે હંગામો મચાવ્યો હતો. હોળીની રાત્રે પોતાની દુકાન પાસે એક વ્યક્તિએ પોતાનું સ્કૂટર પાર્ક કર્યું હતું, જે સ્કૂટરમાં તોડફોડ કરી નાખી હતી. તે ઉપરાંત બાજુમાં જ હોળી નો કાર્યક્રમ હોવાથી ત્યાં વિડીયો શુટીંગ કરવા માટે આવેલા એક વિડીયો શુટરનું વાહન પણ તોડી નાખ્યું હતું.જેથી સ્કુટરના માલિક દાનિશ ભાઈ ચૌહાણ તેને સમજાવવા જતાં દાનીશભાઈ અને એનિમલ હેલ્પલાઇન વાળા ડો. કરણ મકવાણા વગેરે સાથે જયદીપ સોલંકી એ ઝપાઝપી કરી અપશબ્દો ઉચ્ચાર્યા હતા, અને હંગામા મચાવી દીધો હતો.જેથી લોકોના ટોળા એકત્ર થઈ ગયા. ત્યારબાદ જયદીપ સોલંકી લોકોના ટોળા ની વચ્ચે પોતાનો શર્ટ કાઢીને ઉઘાડા ડીલે પુષ્પા સ્ટાઇલમાં હંગામો મચાવી દીધો હતો.આખરે આ મામલો સીટી સી ડિવિઝન પોલીસ મથકમાં લઈ જવાયો છે, અને દાનિશ ભાઈ ચૌહાણ ની ફરિયાદના આધારે જયદીપ સોલંકી સામે સીટી સી ડીવી પોસ્ટે બી.એન.એસ. કલમ – ૩૫૧ (૩), ૩૫૨, ૨૯૬, ૩૨૪(૪) તથા જી.પી.એકટ કલમ-૧૧૦, ૧૧૭ મુજબ જુદી જુદી કલમ હેઠળ ગુનો નોંધવામાં આવ્યો છે, અને હાલ આરોપી ભાગી છૂટ્યો હોવાથી પોલીસ તેને શોધી રહી છે.

જામનગરમાં દારૂબંધી ના ધજાગરા ઉડાવતો વધુ એક વિડિયો સોશિયલ મીડિયામાં વાયરલ થતાં ચકચાર

દેશ દેવી ન્યૂઝ જામનગર તા ૧૬, માર્ચ ૨૪ જામનગર શહેરમાં દારૂ બંધી ના ધજાગરા ઉડાવતો વધુ એક વિડિયો સામે આવ્યો છે. બ્લુ કલરની સાડી પહેરેલી એક મહિલા નવા બંધાઈ રહેલા બ્રિજની નીચે જાહેરમાં દારૂ પીને હોળી ની ધમાલ મસ્તી મચાવી રહેલી નજરે પડી રહી છે.તેની સાથે જ અન્ય બે પુરુષો પણ એકજ બોટલમાંથી કોઈ પ્રવાહી પી રહ્યા હોય તે પ્રકારનો કોઈ વ્યક્તિ દ્વારા પોતાના મોબાઈલ ફોનમાં વિડીયો બનાવી લેવાયો છે. ઉપરાંત મહિલા દ્વારા પણ બિન્દાસ પણે વિડીયો ઉતારવામાં સહમતી દર્શાવાઇ છે અને ચડે ચોક ધુળે દિવસે એક બોટલ માંથી કોઈ પ્રવાહી પી રહેલા કેમેરામાં કેદ થયા છે.જે વિડિયો હાલ જામનગરના સોશિયલ મીડિયામાં ખાસ કરીને ઇન્સ્ટાગ્રામ ઉપરાંત અલગ અલગ વોટ્સએપ ગ્રુપના માધ્યમથી સોશિયલ મીડિયામાં વાયરલ થઈ રહ્યો છે.જોકે આ વિડીયો ક્યાંનો છે, તે સ્પષ્ટતા થયું નથી, પરંતુ હાલ જામનગરમાં સાત રસ્તા સર્કલ નજીકના વિસ્તારમાં નવા બ્રિજનું કામ ચાલી રહ્યું છે, અને તે બ્રિજની આસપાસ બ્લુ કલરના પતરા લગાવી દીધા છે, જે પતરા તેમજ બ્રિજ વગેરે વીડિયોમાં નજરે પડી રહ્યા છે. તેથી આ વિડિયો જામનગર નો હોય, અને હોળી ધુળેટીના કલર પણ દેખાતા હોવાથી ધૂળેટીના દિવસનો આ વિડીયો હોય તેવું અનુમાન લગાવાઇ રહ્યું છે.ઉપરાંત આ વીડિયોમાં જે મહિલા દેખાઈ રહી છે, તે મહિલા પણ જામનગરમાં બાવરીવાસ વિસ્તારમાં રહેતી બાવરી મહિલા નો વિડીયો હોય તેવું પણ ચર્ચાઈ રહ્યું છે. જે મહિલા દારુ અંગેની પ્રવૃત્તિમાં તેમજ ચોરી ચપાટી ના રવાડે ચડી ગઈ હોવાનું ચર્ચાઇ રહ્યું છે. જામનગર પોલીસ દ્વારા પણ આ મામલે ખરાઈ કરવામાં આવી રહી હોવાનું જાણવા મળી રહ્યું છે.

જામનગર જીલ્લા તથા રાજકોટ શહેરમાં ચોરી કરનાર બે શખ્સો સામે ગેંગ કેસ નોંધાયો

દેશ દેવી ન્યૂઝ જામનગર તા. ૧૬ માર્ચ ૨૫, જામનગર અને રાજકોટ માં ચોરી ને અંજામ આપનાર બે શખ્સો સામે જામનગર પોલીસે ગેંગ કેસ અને નો ગુનો નોંધ્યો છે.જામનગર પોલીસ ની એલ.સી.બી.શાખા ના સ્ટાફ ને બાતમી મળેલ કે અગાઉ જામનગર જીલ્લા માં તથા રાજકોટ શહેર માં વાહન ચોરી, તથા ઘરફોડ ચોરીઓ ના ગુનાઓ ને અંજામ આપનાર ઉપેન્દ્રભાઇ કાનાભાઇ મુખરજી (જાતે બંગાળી ઉ.વ.ર૧ રહે.ગુરુદ્વારા ચોકડી જલારામનગર ઝૂૂંપડપટ્ટી  જામનગર) તથા. મનિષ ઉર્ફ મકો દેવાભાઇ ગાંડાભાઇ જોગસવા ( ઉ.વ.૨૩ , રહે. નવાગામ ઘેડ શેરી નં-૧ મહાદેવના મંદિર પાછળ હનુમાન ચોક જામનગર) કે જે બન્ને ગુનાહિત કૃત્ય રચી,ગેંગ બનાવી, ચોરીઓને અંજામ આપવાના ઇરાદે, જામનગર શહેરમાં ટાઉન હોલ સીટી બસ સ્ટેન્ડ પાસે ચોરી કરવા ની પેરવી કરી રહયા છે.જે બાતમી આધારે બન્ને ઇસમોને પકડી લઇ મજકુર ઇસમોની ગુન્હાહિત પ્રવૃતિ ઉપર નિયંત્રણમાં લાવવા માટે બન્ને વિરૂધ્ધ પોલીસ કર્મચારી એ જ ફરીયાદ આપતા બંને આરોપીઓ વિરૂધ્ધ પોલીસ સબ ઇન્સ સી.એમ. કાંટેલીયા એ ગેંગકેસ હેઠળ કાયદેસર કાર્યવાહી કરવામાં આવી છે. આરોપી ઉપેન્દ્ર મુખર્જી સામે જામનગર માં ત્રણ કેસ.અને મનીષ જોગસવા સામે જામનગર અને રાજકોટ માં પાંચ ફરિયાદ નોંધાઈ ચૂકી છે.