જામનગરના હંગામી બસ ડેપોમાં સમસ્યાઓની ભરમાર : મુસાફરો થાય છે પરેશાન

• બેસવાની પૂર્તિ વ્યવસ્થા ન હોવાથી તડકામાં ઉભવાનો વારો આવે છે : પાણીની ટાંકીમાં પણ તિરાડ પડી

દેશ દેવી ન્યૂઝ જામનગર તા ૨૮ માર્ચ ૨૫ , જામનગરના જુના એસટી ડેપો ના સ્થળે નવો બસ ડેપો બનાવવામાં આવી રહ્યો છે, અને તેનું ખાતમુહૂર્ત થઈ ચૂક્યું છે, ત્યારે હાલમાં હંગામી બસ ડેપો તરીકે જામનગરના પ્રદર્શન મેદાનમાં વ્યવસ્થા કરવામાં આવી છે, પરંતુ ત્યાં હાલ પૂરતી વ્યવસ્થા ના હોવાના કારણે કાળઝાળ ગરમીમાં મુસાફરો હેરાન પરેશાન થઈ રહ્યા છે. ઉપરાંત બસ ડેપોમાં અનેક પ્રકારની સમસ્યાઓના કારણે પણ મુસાફરોને ભારે હાલાકી વેઠવી પડી રહી છે.હંગામી બસ ડેપોમાં બેસવાની પૂરતી વ્યવસ્થા ન હોવાના કારણે મુસાફરોને તડકામાં ઊભા રહેવાનો વારો આવે છે, અને જે હંગામી બસ ડેપો કાર્યરત થયો છે. તેમાં બેસવાના સ્થળે પૂરતી બેઠક નથી જ્યારે પંખા સહિતની પૂરતી સુવિધા પણ નથી, જેથી ગરમીમાં મુસાફરોની પરેશાની વધી છે. અને પ્લેટફોર્મ ની આસપાસ અને આ વિસ્તારમાં જમીન પર લોકોને બેસવાનો વારો આવે છે, અથવા તો તડકામાં ઊભા રહેવું પડે છે. જેથી પણ અનેક મુસાફરોમાં કચવાટ જોવા મળી રહ્યો છે. આ ઉપરાંત કેટલીક બસ કે જે સમય મર્યાદામાં આવતી નથી, અને લોકોને વધુ સમય માટે બસની રાહ જોઈને ઉભા રહેવું પડે છે. તેમજ અમુક મુસાફરો ને હજુ નવા હંગામી બસ ડેપો ના સ્થળની જાણકારી ન હોવાથી જૂના બસ ડેપો ના સ્થળે પહોંચીને પછી પ્રદર્શન ગ્રાઉન્ડ સુધી ચાલવાનો વારો આવે છે, અથવા તો રિક્ષા ભાડા ખર્ચવાની પરિસ્થિતિ ઊભી થાય છે. ત્યારે રિક્ષાવાળાઓ પણ બેફામ ભાડા વસૂલતા જોવા મળે છે.એસટી બસ સ્ટેશનના હંગામી સ્થળ પર પ્રદર્શન મેદાનમાં એક પાણીનો ટાંકો બનાવાયો છે, જેને શરૂ થયાને હજુ પુરા ૧૦ દિવસ નથી થયા, ત્યાં જ તેમાં તિરાડ પડી ગયેલી જોવા મળે છે. અને નવા સ્થળે ટાંકો ઉભો કરવામાં પણ ભ્રષ્ટાચાર થયો હોય તેવી પરિસ્થિતિ સર્જાઇ છે, તેમ જ પીવાના પાણી માટે ગ્લાસ અથવા તો અન્ય કોઈ વ્યવસ્થા ન હોવાના કારણે પણ પાણી ઢોળાય છે, અને પાણીના રેલા છેક મેઇન રોડ સુધી પહોંચી જાય છે. જેથી મુસાફરોને પ્રવેશતાની સાથે ગારા કીચડનો પણ સામનો કરવો પડે છે.નવા હંગામી બસ ડેપોમાં સમસ્યાઓની ભરમાર હોવાથી એસટી તંત્ર દ્વારા વહેલી તકે મુસાફરોની સમસ્યાઓ હલ થાય, તે દિશામાં કાર્ય કરવામાં આવે તેવી માંગ ઉઠી રહી છે.

જામનગર રાજપૂત સમાજની દિકરીની અનેરી સિદ્ધિ : Gold medal સાથે MBBS ડિગ્રી મેળવી

દેશ દેવી ન્યુઝ તા ૨૭ માર્ચ ૨૫  જામનગર નાં અને મૂળ ગામ દલતુંગી ગામ નાં રાજપૂત સમાજ નાં સુપુત્રી કૃપાક્ષીબા પ્રવિણસિંહ જાડેજા એ જામનગર એમ .પી. શાહ સરકારી મેડિકલ કોલેજ માં MBSS નો અભ્યાસ પૂર્ણ કરી ને ગોલ્ડ મેડલ સાથે ડોક્ટર બની ને ગામ અને પરિવાર માટે ગૌરવ પૂર્ણ ક્ષણ બની છે. કૃપાક્ષીબા એ પોતાના અભ્યાસ, મહેનત અને સંકલ્પબળના આધારે તેઓએ આ સિદ્ધિ મેળવી છે. તેમની સફળતાથી જાડેજા પરિવાર અને ગામલોકોમાં આનંદ અને ઉત્સાહ છવાયો છે.કૃપાક્ષીબાએ બાળપણથી જ શિક્ષણ પ્રત્યે જુસ્સો રાખ્યો હતો. ઉચ્ચ અભ્યાસ દરમિયાન તેમણે અનેક પડકારોનો સામનો કર્યો, પણ ક્યારેય હાર નહીં માની સતત મહેનત અને અભ્યાસની પ્રતિબદ્ધતા દ્વારા તેઓએ આજે ડોક્ટર બનવાની સિદ્ધિ મેળવી છે. તેમના આચરણથી સમાજમાં એક પ્રેરણાદાયી ઉદાહરણ ઉભું થયું છે કે મહેનત અને સમર્પણથી દરેક સપનું સાકાર થઈ શકે.કૃપાક્ષીબાની આ સિદ્ધિ પર પરિવારજનો અત્યંત ગૌરવ અનુભવતા જોવા મળી રહ્યા છે. તેમના માતા-પિતાએ જણાવ્યું કે તે બાળપણથી જ શિક્ષણમાં પ્રખર હતા અને આજે તેમના સપનાને હકીકતમાં પલટાવ્યું છે. સમગ્ર જાડેજા પરિવાર માટે આ એક અવિસ્મરણીય ક્ષણ છે.કૃપાક્ષીબાની આ સિદ્ધિથી આજના યુવા પેઢી માટે એક પ્રેરણા છે. શૈક્ષણિક યાત્રા કદી સરળ હોતી નથી, પણ મહેનત અને દ્વઢ નિશ્ચયથી અશક્ય કંઈ નથી. તેમના સફળતાની સફર દર્શાવે છે કે એક નાના ગામમાંથી પણ મહાન સિદ્ધિ પ્રાપ્ત કરી શકાય.કૃપાક્ષીબા જાડેજા હવે એક નિષ્ણાત ડોક્ટર તરીકે સેવા આપવા માટે તૈયાર છે. તેમના ભવિષ્ય માટે ગામલોકો, પરિવાર અને સ્નેહીજનો તરફથી શુભેચ્છાઓ મળી રહી છે. તેઓના ઉત્કૃષ્ટ કાર્ય દ્વારા લોકોના જીવનમાં બદલાવ લાવશે તેવી આશા છે.

જામનગરના હીરજી મિસ્ત્રી રોડ પર ઘોળે દહાડે એક વૃદ્ધ મહિલા ના ગળામાંથી રૂપિયા દોઢ લાખના સોના ના ચેઇન ની ચીલ ઝડપ

• નંબર પ્લેટ વગરના એક્સેસ સ્કૂટરમાં આવેલા બે ગઠિયાઓ ગળામાંથી ચેઇન ઝુંટવી છુંમંતર થયા : પોલીસ દ્વારા શોધખોળ

દેશ દેવી ન્યૂઝ જામનગર તા ૨૬, માર્ચ ૨૫ જામનગરમાં હિરજી મિસ્ત્રી રોડ પર એક એપાર્ટમેન્ટના ગેઇટ પાસે પોતાના પૌત્રને રમાડી રહેલા ૬૫ વર્ષના વૃદ્ધ મહિલાના ગળામાંથી ધોળે દહાડે નંબર પ્લેટ વગરના સ્કૂટરમાં આવેલા બે અજાણ્યા શખ્સો રૂપિયા દોઢ લાખ ની કિંમતના સોનાના ચેઇન ની ચીલ ઝડપ કરી ભાગી છૂટ્યા હતા. જે મામલે પોલીસ ફરિયાદ નોંધાવવામાં આવી છે. બંને ગઠીયાઓ સીસીટીવી માં કેદ થયા હોવાથી તેના ફુટેજ ના આધારે શોધખોળ ચલાવાઇ રહી છે.આ બનાવની વિગત એવી છે કે જામનગરમાં હીરજી મિસ્ત્રી રોડ પર જે.કે. ટાવર પાછળ અરિહંત એપાર્ટમેન્ટ ના બ્લેક નંબર ૧૩ માં રહેતા દક્ષાબેન જીવરાજભાઈ નંદાણીયા નામના ૬૫ વર્ષના વૃદ્ધ મહિલા કે જેઓ ગત ૧૧મી તારીખે બપોરે પોણા બાર વાગ્યાના આરસામાં પોતાના એપાર્ટમેન્ટના પાર્કિંગમાં દરવાજા પાસે બે વર્ષના પૌત્ર નંદને ખોળામાં બેસાડીને રમાડી રહ્યા હતા.જે દરમિયાન એક્સેસ સ્કૂટરમાં મોઢે રૂમાલ બાંધીને બે ગઠિયાઓ આવ્યા હતા, અને એડ્રેસ પૂછવાનાવાને બહાને નજીક આવ્યા પછી પોતાની સાથે વાતચીત કર્યા બાદ ગળામાં પહેરેલો સોનાનો ચેઇન ખેચી લઈ નંબર પ્લેટ વગરના સ્કૂટરમાં બંને ગઠિયાઓ રફુચક્કર થઈ ગયા હતા.ત્યારબાદ તેઓએ બુમાબુમ કરી હતી, પરંતુ તે પહેલા બંને ગઠિયાઓ ભાગી છૂટવામાં સફળ થયા હોવાથી આખરે મામલો સીટી એ. ડિવિઝન પોલીસમાં મથકમાં લઈ જવાયો હતો, અને દક્ષાબેન ની ફરિયાદના આધારે બે અજાણ્યા શખ્સો સામે ગુનો નોંધ્યો છે.પોલીસ દ્વારા હિરજી મિસ્ત્રી રોડ પરના કેટલાક સીસીટીવી કેમેરાના ફૂટેજ નિહાળ્યા હતા. જેમાં ઉપરોક્ત બંને ગઠીયાઓ સ્કૂટરમાં ચિલ ઝડપ કરીને ભાગી રહેલા જોવા મળ્યા હતા. જે ફૂટેજ ના આધારે બંનેને શોધવાની પોલીસ દ્વારા કવાયત કરવામાં આવી રહી છે.

જામનગરમાં પીસ્તોલ , કાર્ટીઝ કબ્જામાંથી મળી આવ્યાના કેસમાં આરોપીઓને નિદોર્ષ મુકત કરતી નામદાર અદાલત

• પાડીયાદ પોલીસ સ્ટેશનના રીમાંડના કામે આવેલ પોલીસે રીમાંડના કામે રેઈડ કરતા પીસ્તોલ અને કાર્ટીજ મળી આવેલ હતી

• સરકારી સ્ટાફ સિવાય અન્ય કોઈ સ્વતંત્ર સાક્ષીના નિવેદન લીધા નથી તેમજ પંચોનું સર્મથન નથી : ધારાશાસ્ત્રી રાજેશ ગોસાઈ

દેશ દેવી  ન્યૂઝ તા ૨૬ માર્ચ ૨૫  કેશની હકિકત એવી છે કે, પાળીયાદ પોલીસ સ્ટેશનના PSI  આર.એન.વરાણીનાઓએ અશોકગીરી જેન્તીગીરી બાવાજી વાળાને પીસ્તોલ સાથે સુરત ખાતે અટક કરવામાં આવેલ અને તેમની રીમાંડની માંગણી નામ.અદાલતમાં કરવામાં આવેલ અને આ પકડાયેલા આરોપીની રીમાંડ દરમ્યાન પુછપરછ કરતા આ પીસ્તોલ તેમને આરીફ નામના જામનગર વાળા વ્યકિત પાસેથી ખરીદ કરેલ હોવાની માહીતી જણાવેલ હતી.જેથી પી.એસ.આઈ. દ્વારા જામનગર ખાતે આવી અને આ આરીફ ખફીના વાડામાં રેઇડ કરેલ અને રેઇડ દરમ્યાન આ આરીફ ખફીએ તેમના વાડામાંથી ડાટેલી પીસ્તોલ અને કાર્ટીજ કાઢી આપેલ જેથી PSI દ્વારા જામનગર ખાતે આ આરીફ જુમા ખફી ત્યા ફીરોજ ખેરાણી તેમજ અશોકગીરી ગૌસ્વામી તેમજ ગોવિંદ પરમાર વિગેરે વાળાઓ સામે હથિયાર વેંચાણ કરવા અને ગેરકાયદેસર રીતે પોતાના કબજામાં હથીયારો રાખવાનો ગુન્હો નોંધેલ આ ગુન્હામાં ચાર્જશીટ થઈ ગયેલ અને કેશ ચાલી જતાં આ કેશમાં તમામ સાક્ષી સાહેદો પોલીસ કર્મચારીઓની તપાસ કરવામાં આવેલ અને આ કેશમાં આર્મ્સ ચકાસનાર આમર્રની પણ તપાસ કરવામાં આવી હતીતમામ સાહેદ સાક્ષીઓએ ફરીયાદને સમર્થન કરતી જુબાની આપેલ, ત્યારબાદ કેસ દલીલ ઉપર આવતા આ કેશમાં ફરીયાદ પક્ષે એવી દલીલો કરવામાં આવેલ કે, રીમાંડમાં જે આરોપી પકડાયેલ હતો તેમને પણ આ આરીફ જુમાભાઈ ખફી પાસેથી હથિયાર લેવાની હકિકતો જણાવેલ અને નામ.અદાલતના ઓર્ડર મુજબ પી.એસ.આઈ. જામનગર તપાસમાં આવેલ અને તે તપાસ દરમ્યાન આ આરોપીઓએ પોતાના કબજામાંથી જીવંત કાર્ટીજ અને પીસ્તોલ મળી આવેલ છે, તેથી આરોપી સામે કેશ ફરીયાદીએ સાબીત કરેલ છે, જેથી આરોપીઓને સજા થવી જોઈએ, જેની સામે આરોપી પક્ષે દલીલો કરવામાં આવેલ કે, PSI દ્વારા માત્ર ફરીયાદ આપેલ હોય, અને રીમાંડ દરમ્યાન આ હથીયાર આરોપીના કબજામાંથી મળી આવેલ છે અને તમામ સાહેદ સાક્ષીઓએ તેનું સમર્થન આપેલ છે, તેટલા માત્રથી આરોપીને સજા કરવી જોઈએ અને ફરીયાદ પક્ષે કેસ સાબીત કરેલ છે, તેવું માની શકાય નહી,પરંતુ જે વિસ્તારમાંથી આ હથીયાર મળી આવેલ છે, તે વિસ્તાર ખુબજ ભરચક રહેણાંકના ઘર ધરાવતો વિસ્તાર છે અને જયાથી હથીયાર મળી આવેલ છે, તે હથીયારની માલીકીના કોઈ દસ્તાવેજો કબજે કરેલ નથી, અને માત્ર અને માત્ર પોલીસ સ્ટાફ સિવાય અને સરકારી કર્મચારી સિવાય કોઈ જ અન્ય સાક્ષીઓ કે, જે સ્વતંત્ર સાક્ષી કહી શકાય તેવા કોઈ જ નિવેદનો નોંધવામાં આવેલ નથી અને તેની તપાસ પણ કરવામાં આવેલ નથી, અને આ જે હથીયાર કબજે કરવામાં આવેલ છે, તેના પંચોએ પણ ફરીયાદને સમર્થન આપેલ નથી, જેથી આ ફરીયાદમાં સજા થઈ શકે તેમ ન હોય, અને ફરીયાદ પક્ષ નિ:શંક ફરીયાદ પુરવાર કરેલ નથી, તેથી આરોપીને નિદોષ ઠરાવી છોડી મુકવા જોઈએ આમ, નામ.અદાલતે સમક્ષ હકિકતો રેકર્ડ ધ્યાને લઈ અને આરોપી આરીફ જુમાભાઈ ખફી , ગોવિંદભાઈ તળશીભાઈ પરમારને નિદોર્ષ ઠરાવી છોડી મુકવાનો હુકમ કરેલ આ કેસમાં આરોપીઓ તરફે  વિદ્વાન ધારાશાસ્ત્રી  રાજેશ ડી. ગોસાઈ, વિશાલ વાય. જાની , હરદેવસિંહ આર.ગોહીલ , રજનીકાંત આર. નાખવા , નિતેષ જી.મુછડીયા રોકાયેલા હતા.

જામનગરના રણજીતસાગર ડેમમાંથી ગેરકાયદે રીતે માછીમારી કરવાનું કારસ્તાન મનપાની સિક્યુરિટી વિભાગ ની ટીમે ઝડપી પાડ્યું

• ફાયર શાખાની મદદથી રણજીત સાગર ડેમમાં બિછાવેલી ખૂબ જ લાંબી માછીમારી ઝાળ પાણીમાંથી બહાર કાઢીને કબજે લેવાઇ

• માછી મારી ઝાળ એટલી લાંબી હતી, કે તેને કાપીને ચાર વખત ટુકડા કર્યા પછી ચાર ફેરામાં જામનગર પહોંચાડાઈ

દેશ દેવી ન્યૂઝ જામનગર તા ૨૫, માર્ચ ૨૫ જામનગર મહાનગરપાલિકા હસ્તકના રણજીત સાગર ડેમમાં ગેરકાયદે રીતે માછીમારી કરવામાં આવતી હોવાનું મહાનગરપાલિકાની સિક્યુરિટી વિભાગની ટીમને ધ્યાનમાં આવ્યું હતું, અને ગઈકાલે બપોરે ફાયર વિભાગની ટીમને સાથે રાખીને પાણીમાંથી મસ મોટી માછીમારી ઝાળ પકડી પાડી છે, અને તેમાં ફસાયેલા માછલાંઓને પાણીમાં મુક્ત કરી દઇ, માછીમારી ઝાળ કબજે કરી લેવાઇ છે. જે એટલી મોટી હતી કે તેના ચાર ટુકડા કરીને ૪ ફેરામાં જામનગર પહોંચાડવામાં આવી હતી.જામનગર મહાનગરપાલિકા હતકના રંજીતસાગર ડેમમાં રાત્રિના અંધારામાં કેટલાક શખ્સો દ્વારા ગેરકાયદે રીતે માછીમારી કરવામાં આવે છે, તેવી માહિતી જામનગર મહાનગર પાલિકા ના સિક્યુરિટી વિભાગના અધિકારી સુનિલ ભાનુશાળીને મળી હતી.જેથી તેઓ પોતાની ટીમ સાથે ગઈકાલે બપોરે ૧૨.૦૦ વાગ્યાના અરસામાં રણજીત સાગર ડેમ પર પહોંચ્યા હતા. તેઓએ ફાયર બ્રિગેડ ની ટીમ ની મદદ લીધી હતી.જેથી ફાયર શાખાના જવાનો રેસ્ક્યુ બોટ સાથે રણજીત સાગર ડેમ પર આવી પહોંચ્યા હતા, અને ડેમના પાણીની અંદર જઈને ચકાસણી કરતા અંદર બિછાવેલી માછી મારી જાળ મળી આવી હતી.આશરે બે કિલોમીટર જેટલી લંબાઇની માછીમારી જાળ કે જે પાણી અંદર આવેલી હતી, અને તેમાં અનેક માછલાઓ ફસાયેલા આવ્યા હોવાનું ધ્યાનમાં આવ્યું હતું, જેથી મહાનગરપાલિકાની સિક્યુરિટી વિભાગની ટીમ તથા ફાયર શાખાની ટુકડીએ માછીમારી ઝાડ કે જેના અલગ અલગ ચાર ટુકડા કરી નાખ્યા હતા, અને તેમાં ફસાયેલી માછલીઓને એક પછી એક બહાર કાઢી ખાલી પછી મારી જાન ને પાણીમાંથી બહાર કાઢીને કબજે કરી લેવામાં આવી હતી.જે ચાર ટુકડાઓને અલગ અલગ ચાર ફેરામાં જામનગર મહાનગ૨ નગરપાલિકાની કચેરીમાં પહોંચાડવામાં આવ્યા છે, અને જમા કરાવી દેવાયા છે. જે માછીમારી ઝાળ કોના દ્વારા બિછાવામાં આવી, આ ગેરકાયદે માછીમારી કરવાના કારસ્તાનમાં કોણ કોણ સંડોવાયેલું છે, તે જાણવા માટે મહાનગરપાલિકાની ટીમ ઊંડાણપૂર્વકની તપાસ કરી રહી છે.

કાલાવડ ના બસ સ્ટેન્ડ પરથી લાપતા બનેલી પરપ્રાંતિય પરિવારની બાળકીને શોધીને કાલાવડ પોલીસે પૂન : મિલન કરાવ્યું

દેશ દેવી ન્યૂઝ જામનગર ૨૪ માર્ચ ૨૫, જામનગર જિલ્લાના કાલાવડ બસ સ્ટેન્ડ પરથી પરપ્રાંતિય પરિવારની એક બાળકી એકાએક લાપત્તા બની ગઈ હતી, અને પરિવારજનો શોધખોળ ચલાવી રહ્યા હતા. દરમિયાન કાલાવડ પોલીસે બાળકીને શોધી કાઢી હતી, અને પરિવારજનો સાથે પૂન:મિલન કરાવી દીધું હતું, જેથી પરિવારજનોએ પોલીસનો આભાર વ્યક્ત કર્યો હતો.મૂળ મધ્યપ્રદેશના વતની અને હાલ કાલાવડ પંથકમાં મજૂરી કામ કરવા માટે આવેલા બાલુભાઈ ચમારભાઇ પંચાલ કે જેઓ ગઈકાલે કાલાવડ ના બસ સ્ટેન્ડ પર પોતાના પત્ની અને પોતાની પાંચ વર્ષની બાળકી આલીશા સાથે આવ્યા હતા. જે દરમિયાન તેની પાંચ વર્ષની બાળકી આલીશા એકાએકની વિખુટી પડી ગઈ હતી, અને દંપતી દ્વારા અનેક સ્થળે શોધખોળ કરી હતી, પરંતુ પોતાની બાળકી મળી ન હતી.દરમિયાન કાલાવડ પોલીસને જાણ કરતાં કાલાવડની પોલીસ ટુકડીએ હ્યુમન સોર્સની મદદથી અને ટેકનિકલ સોર્સ ના આધારે બાળકીને શોધી કાઢી હતી, અને તેના માતા-પિતા સાથે પૂન: મિલન કરાવી દીધું હતું. જેથી પરિવારજનોએ હાશકારો અનુભવ્યો હતો. તેમ જ પોલીસ તંત્ર નો આભાર વ્યક્ત કર્યો હતો.

જામનગરમાં કિસાન ચોક વિસ્તારમાં રહેતા સુમરા યુવાન પર જુની અદાવતના કારણે છરી-ધોકા વડે હુમલો : ૪ સામે ફરિયાદ

દેશ દેવી ન્યૂઝ જામનગર તા ૨૩, માર્ચ ૨૫ જામનગર માં કિસાન ચોક વિસ્તારમાં રહેતા અને ડ્રાઇવિંગ કામ કરતા હુસેનભાઇ ગફારભાઈ ખફી નામના ૩૫ વર્ષના સુમરા યુવાને પોતાના ઉપર જૂની અદાવત ના કારણે છરી અને ધોકા પડે હુમલો કરી લોહી નીતરતી ઇજા પહોંચાડવા અંગે રમેશ ભીખાભાઈ ચોરસીયા, ભરત રમેશભાઈ ચોરસીયા, વિશાલ ચોરસીયા અને રમેશભાઈનો અન્ય પુત્ર વગેરે સહિત ચાર સામે ફરિયાદ નોંધાવી છે.પોલીસ ફરિયાદમાં જાહેર કરાયા અનુસાર ફરિયાદી અને આરોપીને અગાઉ મનદુઃખ થયું હતું, જેના અનુસંધાને ગઈકાલે ચારેય આરોપીઓએ લોખંડનો પાઇપ છરી જેવા હથીયાર સાથે ધસી આવ્યા હતા, અને હુમલો કરી દીધો હતો. જેથી ફરિયાદી યુવાનને ઇજાગ્રસ્ત હાલતમાં સારવાર માટે જી.જી. હોસ્પિટલમાં ખસેડાયો છે. જે મામલામાં પોલીસ વધુ તપાસ ચલાવી રહી છે.

જામનગરમાં હાથી કોલોની વિસ્તારમાં ફ્લેટ ધરાવતા એક તબિબ દ્વારા પોતાની પત્ની અને તેના પુરુષ મિત્ર સામે ધમકી અંગેની ફરિયાદ નોંધાવી

• પતિ પત્નીના સંયુક્ત માલિકી ના ફ્લેટના દસ્તાવેજમાં સહી કરી દેવા માટે પત્ની અને તેના સાથીદારે ધમકી આપી

દેશ દેવી ન્યુઝ જામનગર તા ૨૩ માર્ચ ૨૫, જામનગરના એક ડેન્ટિસ્ટ તબીબ બને તેની પત્ની વચ્ચે ના ઝગડા નો મામલો પોલીસ મથક સુધી પહોંચ્યો છે, અને સંયુક્ત માલિકીના ફ્લેટના દસ્તાવેજમાં સહી કરી દેવા માટે તબિબને તેની પત્ની તથા તેની સાથે ના પુરુષ મિત્રએ ધમકી આપ્યા ની ફરિયાદ સિટી એ. ડિવિઝન પોલીસ નો મથકમાં નોંધાવાઇ છે. જે મામલે પોલીસ તપાસ ચલાવે છે.આ ફરિયાદ અંગેના બનાવની વિગત એવી છે કે મૂળ જામનગરના વતની અને હાલ વડોદરામાં ડેન્ટિસ્ટ તરીકે તબીબી પ્રેક્ટિસ કરતા વિશાલભાઈ માધવદાસ પંચમતીયા (૩૭) કે જે તબીબની માલિકીનો જામનગરમાં હાથી કોલોની વિસ્તારમાં મુકુંદ વિલા એપાર્ટમેન્ટમાં ૩૦૧ નંબરનો ફ્લેટ આવેલો છે. જે ફલેટ ની માલિકી તબીબ વિશાલભાઈ અને તેની પત્ની રીધી બેન ની સંયુક્ત માલિકીની છે, અને તે પ્રકારની રજિસ્ટર દસ્તાવેજની નોંધણી કરાવેલી છે.હાલમાં તબિબ અને તેની પત્ની વચ્ચે ઝઘડો થતાં બંને વચ્ચે કોર્ટ કેસ ચાલી રહ્યો છે, અને અદાલતમાં છુટાછેડા સુધી વાત પહોંચી હતી, અને જે કેસ પેન્ડિંગ છે.  પોતે જે ફ્લેટમાં રહે છે તે ફ્લેટ સંયુક્ત માલિકી નો હોવાથી રિધ્ધીબેન અને તેના મિત્ર નયને ફ્લેટના કાગળમાં સહી કરી દેવા માટે વિશાલ પંચમતીયાને દબાણ કર્યું હતું, અને ધાક ધમકીઓ આપી હતી, જેથી તબિબ દ્વારા આ મામલાને સીટી એ. ડિવિઝન પોલીસમાં મથકમાં લઈ જવાયો હતો, અને પોતાની પત્ની તથા તેના પુરુષ મિત્ર સામે બી.એન.એસ. કલમ ૩૫૨,૩૫૧(૩),૫૪ મુજબ ફરિયાદ નોંધાવતાં પોલીસ હેડ કોન્સ્ટેબલ આર.ડી. ગાંભવા સમગ્ર મામલામાં ઊંડાણ પૂર્વકની તપાસ શરૂ કરી છે, અને ફ્લેટના દસ્તાવેજ સહિતના કાગળ મેળવવા માટેની અને તેની ખરાઈ કરવા માટેની કાર્યવાહી હાથ કરી છે.

જામનગર ની જી.જી સરકારી હોસ્પિટલ માં લિફ્ટ ખોટકાતાં દર્દી ફસાયા : લોકો મદદે આવ્યા

દેશ દેવી ન્યૂઝ જામનગર તા. ૨૨, માર્ચ ૨૫ જામનગર ની સરકારી જી જી. હોસ્પિટલ ની જૂની બિલ્ડિંગ માં આજે એક જૂની લિફ્ટ. માં ટેકનિકલ ખામી સર્જાતાં એક દર્દી તેમાં ફસાયા હતા.જેમને લોકો એ મદદ કરી સલામત રીતે બહાર કાઢ્યા હતા.જામનગર ની ગુરુ ગોવિંદસિંહ હોસ્પિટલ ના ઓપીડી.વિભાગ ની એક જૂની લિફ્ટ માં ક્ષતિ સર્જાતા લિફ્ટ અધ વચ્ચે ફસાઈ હતી. આ લિફ્ટ માં ઓપરેશન કરવામાં આવેલ દર્દી ને સ્ટ્રેચર માં લાવવામાં આવી રહયા હતા.આખરે ત્યાં હાજર લોકો મદદ માટે દોડી આવ્યા હતા. અને મહા મહેનતે ફસાયેલ દર્દી ને લિફ્ટ ની ઝાળી ખેંચી., ખોલી ને બહાર કાઢ્યા હતા. અને ત્યાર પછી દર્દી ને ઊંચકી ને સિડી.મારફત નીચે લાવવા માં આવ્યા હતાજીજી હોસ્પિટલની ઇમારત વર્ષો જૂની છે આથી જ તેમાં રહેલી તમામ લિફ્ટ પણ જૂનીપુરાણી છે. પરિણામે આ લિફ્ટ અવારનવાર બંધ થતી રહે છે. આથી તેનું મેન્ટેનન્સ કરવું જરૂરી છે. જોકે હોસ્પિટલના તબીબી અધિક્ષક ના જણાવ્યા મુજબ આ લિફ્ટ ની બાજુ માં આવેલી અન્ય લિફ્ટ ને રીપેરીંગ માટે પીઆઈયુ ડિપાર્ટમેન્ટ ને જાણ કરવામાં આવી છે.

ધ્રોલ તાલુકાના દેડકદડ ગામમાં કડબ વાઢી રહેલા એક ખેડૂત બુઝુર્ગનું હૃદય બંધ પડી જતાં અપમૃત્યુ

દેશ દેવી ન્યૂઝ જામનગર તા ૨૧, માર્ચ ૨૫ જામનગર જિલ્લાના ધ્રોળ તાલુકાના દેડકદડ ગામમાં રહેતા અને ખેતી કામ કરતા ખેડૂતનું પોતાની વાડીમાં ગદબ વાઢતી વખતે એકાએક હાર્ટ એટેક આવી જતાં મૃત્યુ નીપજયું છે.આ બનાવની વિગત એવી છે કે ધ્રોળના દેડકદડ ગામમાં રહેતા અને ખેતી કામ કરતા પરસોત્તમભાઈ ચકુભાઈ પાદરીયા નામના ૬૨ વર્ષના ખેડૂત બુઝુર્ગ કે જેઓ ગઈકાલે બપોરે ૨.૩૦ વાગ્યાના અરસામાં પોતાની વાડીમાં ગદબ વાઢવાનું કામ કરતા હતા, જે દરમિયાન તેઓને એકાએક હાર્ટ એટેક આવી જતાં બે શુદ્ધ બન્યા હતા. જેઓને સારવાર માટે હોસ્પિટલમાં લઈ જવાતાં ફરજ પરના તબીબે તેઓનું મૃત્યુ નિપજ્યું હોવાનું જાહેર કરાયું હતું. જે બનાવ અંગે મૃતકના પુત્ર પરેશ પરસોત્તમભાઈ પાદરીયા એ પોલીસને જાણ કરતાં ધ્રોળના પોલીસ હેડ કોન્સ્ટેબલ કે. એસ. દલસાણીયા હોસ્પિટલમાં દોડી ગયા હતા, અને મૃતદેહનો કબજો સંભાળી વધુ તપાસ હાથ ધરી છે.