જામનગર જિલ્લાના ધ્રોળ અને જોડીયામાં કથીત પત્રકારોની ટોળકી સામે ખોટી ઓળખ આપી નાણા પડાવી લેવા અંગેની વધુ ત્રણ ફરિયાદ નોંધાવાઇ

• જોડીયા તાલુકાના કૂંન્નડ અને હડિયાણા ગામમાંથી બે જેસીબી ચાલકો પાસેથી રૂ. ૧૫,૦૦૦ નો તોડ કરી લીધા ની પોલીસ ફરિયાદ

• લૈંયારા ગામના જેસીબી ચાલક પાસેથી ખાણ ખનિજખાતા ના અધિકારીની ખોટી ઓળખ આપી ૧૦,૦૦૦ પડાવી લેવા અંગે ગુનો નોંધાયો

દેશ દેવી ન્યૂઝ જામનગર તા ૧૨ એપ્રિલ ૨૫ જામનગર જિલ્લાના લાલપુર અને ફલ્લા માં ગઈકાલે પ્રેસના નામે તોડ કરતી ટોળકી સામે અલગ અલગ બે ગુના નોંધવામાં આવ્યા હતા, જે પ્રકારના વધુ ત્રણ ગુન્હા ધ્રોળ અને જોડીયા પોલીસ મથકમાં નોંધાયા છે.ધ્રોલમાં લૈંયારા ગામમાં એક જેસીબી ચાલક પાસેથી ખાણ ખનીજ ખાતાના અધિકારીની ઓળખ આપી રૂ.૧૦,૦૦૦ પડાવી લીધા નું જાહેર થયું છે, તેમજ જોડિયા તાલુકાના કૂન્નડ અને હડિયાણા ગામમાં બે વ્યક્તિ પાસેથી રૂ.૧૫,૦૦૦ નો તોડ કર્યાનું પણ સામે આવ્યું છે. જે અંગે બે ગુન્હા દાખલ કરાયા છે.ધ્રોળ તાલુકાના લૈંયારા ગામમાં રહેતા અને જેસીબી મશીન ચલાવતા ધર્મેન્દ્રસિંહ પ્રતાપસિંહ જાડેજા એ ધ્રોળ પોલીસ મથકમાં મુખ્ય સૂત્રધાર એવા પ્રવીણ કરસનભાઈ પરમાર ઉપરાંત વીરુબેન સવજીભાઈ પરમાર, ગીતાબેન પ્રવીણભાઈ ચાવડા, રાજેશ્રીબેન દીપકભાઈ ચૌહાણ અને જગદીશ હસમુખભાઈ સાંથેલા સામે પોતાની પાસેથી ખાણ ખનીજ ખાતાના અધિકારી ના નામે ખોટી ઓળખ આપી બળજબરીપૂર્વક ૧૦,૦૦૦ રૂપિયા પડાવી લીધાની ફરિયાદ નોંધાવી છે.આ ઉપરાંત જોડિયા માં દલનોવાસ વિસ્તારમાં રહેતા મોતીભાઈ દેવાભાઈ ધ્રાંગીયા એ હડિયાણા ગામમાં તળાવમાં જેસીબી મારફતે માટી કાઢી રહ્યા હતા, જે દરમિયાન કરસનભાઈ પરમાર ઉપરાંત વૈશાલીબેન મનીષભાઈ ધામેચા જ્યોતિબેન હિંમતભાઈ મારકણા અને વીરુબેન સવજીભાઈ પરમાર એક કારમાં ધસી આવ્યા હતા, અને પોતાના મોબાઈલમાં વિડીયો ઉતારી લીધા બાદ તેને વાયરલ કરી યદેવાની ધમકી આપી પોતાની પાસેથી રૂપિયા દસ હજાર પડાવી લેવા અંગેની ફરિયાદ નોંધાવી છે.ત્યારબાદ જોડિયા તાલુકા ના કુંન્નડ ગામમાં માટી કાઢવાનું કામ કરી રહેલા મંછાભાઈ જીવાભાઇ ધ્રાંગીયા નામના ભરવાડ યુવાને પણ પોતાની પાસેથી પત્રકારના નામે માટીના ખોદકામના વિડીયો ઉતારી, વાયરલ કરવાની ધમકી આપીને રૂપિયા ૫,૦૦૦ પડાવી લેવા અંગે પ્રવીણ કરસનભાઈ પરમાર ઉપરાંત સવજીભાઈ પરમાર સામે ફરિયાદ નોંધાવી છે.

જામનગરમાં આજે ભારતના ખ્યાતનામ ક્રિકેટર વિનુ માંકડ ની જન્મ જયંતી ની ઉજવણી કરાઈ

દેશ દેવી ન્યૂઝ  જામનગર તા ૧૨ એપ્રિલ ૨૫ આંતરરાષ્ટ્રીય ક્રિકેટ ક્ષેત્રે જામનગર નો ડંકો વગાડનારા જામનગરના પૂર્વ ખ્યાતના ક્રિકેટર વિનુ માંકડ કે જેઓની આજે જન્મ જયંતી છે, જેની પણ વિશેષ રૂપે ઉજવણી કરવામાં આવી હતી.જામનગર જિલ્લા પંચાયત સર્કલમાં વિનું માંકડ ની પ્રતિમા ને આજે સવારે મહાનગરપાલિકાના પદાધિકારીઓ દ્વારા ફુલહાર કરવામાં આવ્યા હતા. નગર ના ડેપ્યુટી મેયર ક્રિષ્નાબેન સોઢા, સ્ટેન્ડિંગ કમિટીના ચેરમેન નિલેશભાઈ કગથરા, ઉપરાંત જામનગર મહાનગર પાલિકાના અલગ અલગ વોર્ડના કોર્પોરેટરો તથા અન્ય મહાનુભાવો વગેરેએ ઉપસ્થિત અને ફૂલહાર કરીને તેઓની સ્મૃતિ ને યાદ કરી હતી.

જામનગર જિલ્લામાં આગામી તા.૨૨ એપ્રિલ સુધી “પોષણ પખવાડીયા” ની ઉજવણી કરાશે

• પોષણ પખવાડીયા અંતર્ગત બાળ તુલા, ગૃહ મુલાકાત, તંદુરસ્ત આહાર પ્રથાઓ વિશે જાગૃતિ શિબિર, બાળકોમાં સ્થૂળતા દુર કરવા અંગેની વિવિધ પ્રવૃતિઓ સહિતના કાર્યક્રમો યોજાશે

• જિલ્લા કલેક્ટર કેતન ઠક્કરના અધ્યક્ષ સ્થાને કાર્યક્રમના સુચારૂ આયોજન અંગે બેઠક યોજાઈ

દેશ દેવી ન્યૂઝ જામનગર તા.૧૨ એપ્રિલ ૨૫, વડાપ્રધાન નરેન્દ્રભાઈ મોદી દ્વારા તા.૮ માર્ચ ૨૦૧૮ ના રોજ પોષણ અભિયાનનો રાષ્ટ્રવ્યાપી શુભારંભ કરવામાં આવેલ.જે અંતર્ગત મહિલા અને બાળ વિકાસ મંત્રાલય, ભારત સરકાર દ્વારા દર વર્ષે માર્ચ માસમાં જનજાગૃતિ માટે ‘‘પોષણ પખવાડીયા”ની ઉજવણી કરવામાં આવે છે. જેના ભાગરૂપે જામનગર જિલ્લામાં પણ આગામી તા.૨૨ એપ્રિલ ૨૦૨૫ સુધી “પોષણ પખવાડીયા” ની ઉજવણી કરવામાં આવનાર છે. જેના સુચારૂ આયોજન માટે જિલ્લા કલેક્ટર શ્રી કેતન ઠક્કરના અધ્યક્ષ સ્થાને બેઠકનું આયોજન કરાયું હતુ.સાથે જ બેઠકમાં સૌએ પોષણ પખવાડિયા અંગેના શપથ ગ્રહણ કર્યા હતા.ચાલુ વર્ષે ‘પોષણ પખવાડા-૨૦૨૫’ દરમ્યાન વિવિધ પ્રવૃતિઓનું આયોજન વિવિધ થીમ પર કરવામાં આવનાર છે. જેમાં જીવનના પ્રથમ ૧૦૦૦ દિવસો પર ધ્યાન કેન્દ્રિત કરવું, પોષણ ટ્રેકરમાંના લાભાર્થી મોડ્યુલનો પ્રચાર-પ્રસાર, સી.એમ.એ.એમ. મોડ્યુલ દ્વારા કુપોષણનું વ્યવસ્થાપન તેમજ બાળકોમાં સ્થુળતાને દુર કરવા માટે સ્વસ્થ જીવન શૈલી થીમનો સમાવેશ થાય છે. વધુમાં કાર્યક્રમ અંતર્ગત સમગ્ર પખવાડીયા દરમિયાન બાળ તુલા દિવસની ઉજવણી, ગૃહ મુલાકાત, મમતા દિવસની ઉજવણી, સ્વચ્છતાના અંગેનો પ્રચાર-પ્રસાર, બાળકોમાં સ્થૂળતાને દુર કરવા પર નિબંધ સ્પર્ધા/વકતૃત્વ સ્પર્ધા, પોષ્ટિક આહાર તથા ટી.એચ.આર.નો પ્રચાર-પ્રસાર, તંદુરસ્ત આહાર પ્રથાઓ અંગે જાગૃતિ શિબિર, વરસાદી પાણીના સંગ્રહને લગતી પ્રવૃતિ, ગર્ભાવસ્થા દરમિયાન એ.એન.સી.પર જાગૃતિ સેશન, સ્તનપાન પર શિબિર તથા ઘર મુલાકાત, બાળકોમાં સ્થૂળતાને દુર કરવા માટે દોડ સ્પર્ધા/રમતો, વાનગી, રંગોળી, નિબંધ સ્પર્ધા તથા પૂર્ણા દિવસની ઉજવણી સહિતના કાર્યક્રમો યોજાશે.બેઠકમાં કલેક્ટર એ આંગણવાડી તથા શાળાએ જતા બાળકોની સમયાંતરે આરોગ્ય ચકાસણી કરી એકપણ કુપોષિત બાળક રહી ન જાય તેની કાળજી લેવા ઉપસ્થિત અધિકારીઓને સુચન કર્યું હતુ. તેમજ આરોગ્ય વિભાગ અને આઈ.સી.ડી.એસ.ને સંકલનમાં કામગીરી કરી જામનગર જિલ્લાને કુપોષણ મુક્ત જિલ્લો બનાવવા માર્ગદર્શન પુરૂ પાડ્યું હતુ. વધુમાં દવાઓ તથા પોષક આહાર દરેક બાળક સુધી નિયમીત રીતે પહોંચે તે પ્રમાણે કામગીરી હાથ ધરવા જણાવ્યું હતુ. આ બેઠકમાં જિલ્લા વિકાસ અધિકારી વિકલ્પ ભારદ્વાજ, જિલ્લા પુરવઠા અધિકારી  બારડ, મુખ્ય જિલ્લા આરોગ્ય અધિકારી  ડો.નુપુર પ્રસાદ, પ્રોગ્રામ ઓફિસર પ્રજ્ઞાબેન રાવલ તેમજ તાલુકા કક્ષાના અધિકારીશ્રીઓ ઉપસ્થિત રહ્યા હતા.

છોટી કાશી ના ઉપનામથી પ્રચલિત જામનગર શહેરમાં આજે હનુમાન જયંતીના પર્વે અનેક હનુમાનજીના મંદિરે ધુન- ભજન મહા આરતી બટુક ભોજન સહિતના કાર્યક્રમ યોજાયા

દેશ દેવી ન્યૂઝ તા. ૧૨ એપ્રિલ, ૨૫ જામનગર શહેર કે જે છોટી કાશી ના ઉપનામ થી પ્રચલિત છે, અને શહેરમાં સૌથી વધુ મહાદેવજી ના મંદિરો ની સાથે સાથે હનુમાનજીના પણ અનેક નાના મોટા મંદિરોઅને ડેરીઓ આવેલી છે, જ્યાં આજે હનુમાન જયંતીની વિશેષરૂપે ઉજવણી કરવામાં આવી હતી, અને શહેરના પ્રત્યેક હનુમાન મંદિરોને ઝળહળતી રોશની તેમજ પધજાપતાકાથી શણગારવામાં આવ્યા હતા, તેમજ જુદા જુદા ધાર્મિક કાર્યક્રમોનું આયોજન કરવામાં આવ્યું હતું. શહેરના તળાવની પાળે આવેલા સુપ્રસિદ્ધ બાલા હનુમાનજી મંદિરે સૌપ્રથમ વહેલી સવારે મહા આરતી કરવામાં આવી હતી, અને અખંડ રામધૂનના જાપ, તેમજ ૧૦૮ ની દીપમાળા, સહિતના અનેક કાર્યક્રમો યોજવામાં આવ્યા હતા. વહેલી સવારથી જ બાલા હનુમાનજીના મંદિરે દર્શનાર્થોની ભીડ જોવા મળતી હતી.આ ઉપરાંત જી.જી. હોસ્પિટલ સામે આવેલા દાંડિયા હનુમાનજી મંદિર, ડીકેવી સર્કલ પાસે આવેલા સૂર્યમુખી હનુમાનજી મંદિર, પંચેશ્વર ટાવર પાસે આવેલા રામદૂત હનુમાનજી મંદિર કિસાન ચોક વિસ્તારમાં આવેલા સૂર્યમુખી હનુમાનજી મંદિર તેમજ જામનગર શહેરના અનેક નાના-મોટા હનુમાનજીના મંદિરો તથા ડેરીઓમાં ધૂન, ભજન, મહા આરતી, પ્રસાદ સહિતના કાર્યક્રમો યોજાયા હતા, તેમજ ઠેર ઠેર બટુક ભોજન તેમજ મહાપ્રસાદ વગેરેના પણ આયોજન થયા હતા. અને હનુમાન જયંતીની છોટી કાશીમાં વિશેષ રૂપે ઉજવણી થઈ હતી.

જામનગર તાલુકાના ફલ્લા ગામમાં ખેતરમાંથી માટી કાઢી રહેલા એક ખેડૂતને બોગસ પત્રકારોની ઓળખ આપી રૂ.૩,૦૦૦ નો તોડ કર્યો

• પંચકોશી એ. ડિવિઝન પોલીસ મથકમાં ત્રણ મહિલા સહિત પાંચ બોગસ પત્રકાર સામે ફરિયાદ બાદ પોલીસ દ્વારા પાંચેયની અટકાયત

• (૧) પ્રવિણભાઇ કરશાનભાઇ પરમાર રહે.જામખંભાળીયા જી.દેવભુમી દ્રારકા (૨) પુંજાભાઇ કમાભાઇ ચાવડા રહે.શંકર ટેકરી (૩) વૈશાલી મનીષભાઇ ધામેચા રહે.માટેલ ચોક, બાપા સીતારામ મઢુલી પાસે, રામેશ્વર (૪) જયોતિબેન હેમંતભાઇ મારકણા રહે.મધુરમરેસીડન્સી-૦૧ (૫) વિરૂબેન સવજીભાઇ પરમાર રહે.હનુમાન ટેકરી ,દિગ્જામ સર્કલ આગળ, જામનગર

દેશ દેવી ન્યૂઝ જામનગર તા ૧૧ એપ્રિલ ૨૫ જામનગર તાલુકાના ફલ્લા ગામમાં રહેતા એક ખેડૂતને બોગસ પત્રકારોનો ભેટો થઈ ગયો હતો, અને ખેતરમાંથી માટિવકાઢતી સમયે તેનો વિડીયો બનાવી લીધા બાદ પત્રકારના નામે રૃપિયા ૩,૦૦૦ નો તોડ કર્યો હતો. જે મામલો આખરે પંચકોશી બી. ડિવિઝન પોલીસ મથકમાં લઈ જવાયો હતો, અને ત્રણ મહિલા સહિત પાંચ શખ્સો સામે ગુનો નોંધાવાયા બાદ પોલીસે પાંચેય આરોપીઓને અટકાયતમાં લઈ લીધા છે, અને રોકડ રકમ કબજે કરી છે.આ ફરિયાદ અંગેના બનાવની વિગત એવી છે કે જામનગર તાલુકાના ફલ્લા ગામમાં રહેતા અને કન્સ્ટ્રકશનનું કામ કરતા તેમજ હોટલ ચલાવતા બકાભાઇ જહાભાઈ બાંભવા નામના ૩૪ વર્ષના ભરવાડ યુવાને પોતાની પાસેથી પત્રકારના નામે રૂપિયા ૩,૦૦૦ નો તોડ કરવા અંગે દેવભૂમિ દ્વારકા જિલ્લાના ખંભાળિયામાં રહેતા પ્રવીણભાઈ કરસનભાઈ પરમાર, જામનગરમાં શંકર ટેકરીમાં રહેતા પુંજાભાઈ કમાભાઈ ચાવડા, જામનગરમાં રામેશ્વર નગરમાં રહેતી વૈશાલીબેન મનીષભાઈ ધામેચા, તેમજ જામનગરમાં મધુરમ રેસીડેન્સીમાં રહેતી જ્યોતિબેન હેમંતભાઈ મારકણા અને જામનગરમાં હનુમાન ટેકરી વિસ્તારમાં રહેતી વીરુબેન સવજીભાઈ પરમાર સામે ફરિયાદ નોંધાવી છે.પોલીસ ફરિયાદમાં જાહેર કરાયા અનુસાર ગત ૨૨.૩.૨૦૨૫ ના બપોરના સમયગાળા દરમિયાન ફરીયાદી બકાભાઇ તેના માણસો દ્વારા જેસીબી ની મદદથી ફલ્લા ગામના તળાવમાંથી માટી કઢાવીને ફલ્લા ગામમાં રહેતા ખેડૂત ભરતભાઈ દલસાણીયા ના ખેતરમાં માટી નખાવી રહ્યા હતા.જે દરમિયાન ઉપરોક્ત પાંચેય આરોપીઓ એક કારમાં બેસીને આવ્યા હતા, અને માટી કાઢવા અંગેનો પોતાના મોબાઈલ ફોનમાં વિડીયો બનાવી લીધો હતો, અને પોતે ગેરકાયદે રીતે માટી ચોરી કરી રહ્યા છે, તેવો વીડિયો સોશિયલ મીડિયામાં વાયરલ કરી દેશે, જે વાયરલ ન કરવો હોય તો ૩,૦૦૦૦ રૂપિયા ની માંગણી કરી હતી.ઉપરોક્ત પાંચેય આરોપીઓએ પોતાની પત્રકાર તરીકેની ઓળખ આપી હતી અને ૩,૦૦૦ રૂપિયા કઢાવી અને તમામ આરોપીઓ ભાગી છૂટ્યા હતા. આખરે બકાભાઇ ભરવાડ દ્વારા સમગ્ર મામલાને પંચકોશી એ. ડિવિઝન પોલીસ મથકમાં લઈ જવાયો હતો, અને પાંચેય કહેવાતા ખોટા પત્રકારો સામે ફરિયાદ નોંધાવતાં ધ્રોલ પોલીસ સ્ટેશન બી.એન.એસ. કલમ ૩૦૮(૨) અને ૫૪ મુજબ ગુન્હો નોંધ્યો છે, અને તમામ પાંચેય આરોપીઓ પાસેથી રૂપિયા ૩,૦૦૦ ની રોકડ રકમ કબજે કરી છે જેઓની વધુ પૂછપરછ ચલાવાઇ રહી છે.

જામનગરમાં સૌરાષ્ટ્ર કચ્છ સમસ્ત બ્રહ્મ સમાજ દ્વારા પરશુરામ જયંતિ નિમિત્તે આયોજિત પરશુરામ શોભાયાત્રા દરમિયાન ‘નારી સશક્તિકરણ’ ના દર્શન થશે

• છોટીકાશી માં આયોજિત ભગવાન પરશુરામજી ની શોભાયાત્રા નું કન્વીનર પદ મહિલા અગ્રણી મનિષાબેન સુંબડ ને સોંપાયું

દેશ દેવી ન્યૂઝ જામનગર તા ૧૦ એપ્રિલ, ૨૫ છોટી કાશીમાં સૌરાષ્ટ્ર કચ્છ સમસ્ત બ્રહ્મ સમાજ ના નેજા હેઠળ ભગવાન પરશુરામ જયંતિ ની પ્રતિવર્ષ ઉજવણી થાય છે, અને શોભાયાત્રા સહિતના વિવિધ ધાર્મિક કાર્યક્રમોનું આયોજન થાય છે, ત્યારે આ વખતની શોભાયાત્રા દરમિયાન નારી શક્તિના દર્શન થાય તે પ્રકારે નું આયોજન કરવામાં આવ્યું છે, અને શોભાયાત્રા ના કન્વીનરનું પદ જિલ્લાના મહિલા બ્રહ્મ અગ્રણી મનીષાબેન સુંબડ ને સોંપાયું છે. તેઓની સાથે સહ કન્વીનર પદે પણ અન્ય મહિલા બ્રહ્મ અગ્રણીઓની નિમણૂક કરવામાં આવી છે.જામનગર શહેરમાં ગત પાંચમી તારીખે બ્રાહ્મણો નાં આરાધ્ય દેવતા શ્રી પરશુરામ ભગવાન ના જન્મોત્સવ અંતર્ગત મિટિંગ નું આયોજન કરવામાં આવ્યુ હતુ. આ મહત્વની બેઠકમાં સૌરાષ્ટ્ર કચ્છ સમસ્ત બ્રહ્મસમાજ ના ટ્રસ્ટી નરેન્દ્ર ભાઈ ત્રિવેદી તેમજ શહેર અધ્યક્ષ આશિષભાઈ જોશી અને સર્વે હોદ્દેદારો અને કારોબારી સભ્યો દ્વારા સર્વાનુમતે સ્ત્રી સશક્તિકરણ ને પ્રાધાન્ય આપી ને સૌરાષ્ટ્ર કચ્છ સમસ્ત બ્રહ્મસમાજ ના ઇતિહાસ માં સૌ પ્રથમ વખત જિલ્લા મહિલા અધ્યક્ષ મનીષા બેન સુંબડ ની પરશુરામ ભગવાન ની શોભાયાત્રા (૨૦૨૫) ના કન્વીનર તરીકે નિમણૂક કરવામાં આવી છે.ઉપરાંત સહ કન્વીનર તરીકે જાગૃતિ બેન ત્રિવેદી , મીના બેન જ્યોતિષ તેમજ વૈશાલી બેન જોશી ની નિમણૂક કરવામાં આવી છે. જે તમામ બહેનો દ્વારા જ સમગ્ર પરશુરામ શોભાયાત્રા નું સંચાલન તેમજ વ્યવસ્થા ગોઠવવામાં આવશે, અને તેઓની રાહબરી હેઠળ તમામ તૈયારીઓ કરવામાં આવી રહી છે.

જામનગર નજીક વિજરખી પાસે બુલેટચાલકને કારની ઠોકરે કચડી નાખનાર આરોપી અને મૃતક ની બેવફા પત્ની ની અટકાયત

• પ્રેમમાં અંધ બનેલી પત્નીએ પોતાના પ્રેમી મારફતે પતિનું કાસળ કઢાવી નાખ્યાની કબૂલાત : હત્યા માટે ઉપયોગમાં લીધેલી કંપાસ જીપ કબજે

• પતિ રવિનું વાહન અકસ્માત માં કાસળ કઢાવી નાખવાનું કાવતરું પત્ની રીંકલેજ ઘડ્યું હતું

• કાલાવડ થી જામનગર આવી રહેલા પતિનું લોકેશન પત્ની જ આરોપીને આપતી હતી

દેશ દેવી ન્યૂઝ જામનગર તા ૮ એપ્રિલ ૨૫ જામનગર- કાલાવડ ધોરી માર્ગ પર વિજરખી ગામ પાસે બુલેટ મોટરસાયકલ ચાલક યુવાન ને કંપાસ જીપ ની ઠોકરે કચડી નાખી હત્યા નીપજાવનાર આરોપી જીપચાલક તેમજ મૃતકની પ્રેમમાં અંધ બનેલી પત્ની બંનેની પોલીસ દ્વારા અટકાયત કરી લેવામાં આવી છે, અને હત્યા માટે ઉપયોગમાં લેવાયેલી જીપ તેમજ બંને આરોપીઓના મોબાઇલ ફોન કબજે કરી લેવાયા છે.આ ચકચાર જનક બનાવની વિગત એવી છે, કે મૂળ કાલાવડ તાલુકાના પીઠડીયા ગામના વતની અને હાલ જામનગરમાં રણજીત સાગર રોડ પર રહેતો રવિ ધીરજલાલ મારકણા નામનો ૩૦ વર્ષ નો યુવાન રામનવમી ના દિવસે સાંજે છ વાગ્યાના અરસામાં પોતાનું જીજે ૨૭ ડી.જે ૯૩૧૦ નંબરનું બુલેટ મોટર સાયકલ લઈને કાલાવડ થી જામનગર તરફ આવી રહ્યો હતો. જે દરમિયાન તેનો હત્યા કરવાના ઈરાદાએ પીછો કરી રહેલા જી.જે.૨૦ એ.ક્યુ. ૮૨૬૨ નંબરની કંપાસ જીપના ચાલકે ઠોકર મારી દઇ કચડી નાખ્યો હતો, અને હત્યા નીપજાવી હતી.મૃતક રવિ મારકણા ની પત્ની રીંકલ કે જેના પ્રેમમાં પડેલા જીપચાલક અક્ષય છગનભાઇ ડાંગરિયા એ રીંકલ સાથે પૂર્વયોજિત કાવતરૂં ઘડીને વિજરખી પાસે રવિ ને ઠોકરે ચડાવી હત્યા નીપજાવી હતી.

જે સમગ્ર મામલો આખરે પંચકોશી એ. ડિવિઝન પોલીસ સમક્ષ આવી ગયો હતો, અને પોલીસે રવિ મારકણા ના પિતા ધીરજલાલ મારકણાંની ફરિયાદના આધારે મૃતક ની પત્ની રીંકલ તેમજ જીપ ચાલક અક્ષય ડાંગરિયા સામે જુદી જુદી કલમો હેઠળ ગુનો નોંધ્યો હતો. જે ગુનામાં પોલીસ દ્વારા બંને આરોપીઓ અક્ષય તેમજ મૃતક રવિ ની પત્ની રીંકલ મારકણા ની અટકાયત કરી લેવામાં આવી છે.પોલીસે આ હત્યા પ્રકરણમાં બંને આરોપીઓના મોબાઇલ ફોન તેમજ હત્યા માટે ઉપયોગમાં લેવાયેલી કંપાસ જીપ વગેરે કબજે કરી લીધા છે, અને બંનેની ઘનિષ્ઠ પૂછપરછ હાથ ધરવામાં આવી છે.પ્રેમમાં અંધ બનેલી પત્ની રીંકલ, કે જેણે જાતે જ પોતાના પ્રેમી અક્ષય ડાંગરિયા મારફતે પતિ રવિનો બુલેટ પાછળ પીછો કરાવી હત્યા કરી નાખવાનું ષડયંત્ર રચ્યું હતું.પતિ રવિ હંમેશા કાર લઈને જ અવરજવર કરે છે, પરંતુ બનાવનાર દિવસે બુલેટ મોટર સાયકલ લઈ જવાનો વારો આવ્યો હતો, તે તકનો મોકો પત્ની રીંકલે ગોતી લીધો હતો, અને પોતાના પ્રેમી એવા અક્ષય ડાંગરિયા ને મોબાઈલ ફોન કરીને માહિતી આપી દીધી હતી, અને પીછો કરાવ્યો હતો.જેનું લોકેશન રિંકલ પોતે જ ફોન કરીને પોતાના પ્રેમીને આપતી હતી, અને તેના આધારે વિજરખી પાસે મોકો ગોતીને બુલેટ ની પાછળથી ટક્કર મારી, કચડી નાખી હત્યા નીપજાવાઇ હતી, પરંતુ આખરે પોલીસે સમગ્ર મામલામાં ઊંડાણપૂર્વકની તપાસ કરીને કાવતરા નો પર્દાફાશ કરી લીધો હતો.

જામનગર-જૂનાગઢ ,પોરબંદર – જામખંભાળીયા અને રાજકોટ- પોરબંદર ને જોડતા સાકાર પામનારા રાષ્ટ્રીય ધોરીમાર્ગ માં આઠ મોટા પુલ અને દસ બાયપાસ બનશે

દેશ દેવી ન્યૂઝ જામનગર તા ૮ એપ્રિલ ૨૫, જામનગર અને દેવભૂમિ દ્વારકા જિલ્લા માં પોરબંદર સાથે કનેક્ટેડ નેશનલ હાઇવે નો પ્રોજેક્ટ રૂપીયા ૧૨૭૧.૦૨ કરોડ ના ખર્ચે બનશે,જે અંગે કેન્દ્ર સરકાર ના માર્ગ પરીવહન મંત્રી નિતિન ગડકરી એ ટ્વીટર ના માધ્યમ થી વિગતો આપી હતી, જેમાં તેઓએ જામનગર ના સંસદસભ્ય પૂનમબેન માડમ ને ટેગ કર્યા હતા.કેન્દ્રીય માર્ગ પરીવહન મંત્રી નિતિન ગડકરી એ ટ્વીટર માં આપેલી વિગતો મુજબ ગુજરાત ના પોરબંદર, જામનગર અને દેવભૂમિ દ્વારકા જિલ્લામાં નેશનલ હાઈવે-૧૫૧ કે ના સમગ્ર ૧૧૯.૫૦ કિમી પોરબંદર- ભાણવડ- જામજોધપુર-કાલાવડ સેક્શનને રૂ. ૧૨૭૧.૦૨ કરોડ ના ખર્ચે પેવ્ડ શોલ્ડર સાથે ૨-લેન માં અપગ્રેડ કરવા ની મંજૂરી આપવામાં આવી છે.આ રોડ નો પ્રોજેક્ટ પોરબંદર નજીક નેશનલ હાઈવે-૫૧ સાથે તેના જંકશન થી શરૂ થાય છે .અને ભાણવડ, જામ જોધપુરને જોડે છે અને કાલાવડ નજીક નેશનલ હાઈવે-૯૨૭ ડી સાથે તેના જંકશન પર સમાપ્ત થાય છે. રાષ્ટ્રીય ધોરીમાર્ગ-૧૫૧ કે , ત્રણ મહત્વ ના ધોરીમાર્ગો એટલે કે પોરબંદર-ખંભાળિયા (એન એચ -૯૨૭ કે ), જૂનાગઢ-જામનગર (એન એચ ૯૨૭ ડી) અને રાજકોટ-પોરબંદર (એન.એચ -૨૭) વચ્ચે કનેક્ટર તરીકે કામ કરે છે.આ નેશનલ હાઇવેમાં ગ્રેડ-સેપરેટેડ સ્ટ્રક્ચર્સ, ૮ મોટા પુલ અને ૧૦ બાયપાસ સાથે નું અપગ્રેડેશન ગુજરાત ના સૌરાષ્ટ્ર વિસ્તાર ને વધુ સારી કનેક્ટિવિટી પ્રદાન કરશે તેમ પણ શ્રી ગડકરી એ ઉમેર્યું હતુ.

જામનગર અને દેવભૂમિ દ્વારકા જીલ્લાઓને આ રીતે કેન્દ્ર સરકાર ની રાષ્ટ્રીય ધોરીમાર્ગ યોજના અંતર્ગત નેશનલ હાઇવે મળનારા હોઇ, ૧૨-જામનગર લોકસભાના સંસદસભ્ય પૂનમબેન માડમે પ્રધાનમંત્રી નરેન્દ્રભાઇ મોદી અને કેન્દ્રીય માર્ગ પરીવહન મંત્રી નિતિન ગડકરી નો આભાર વ્યક્ત કર્યો છે. હાલાર-પોરબંદર-રાજકોટ – જુનાગઢ ને જોડતા નેશનલ હાઇવે થી યાતાયાતને ઘણો ફાયદો થશે અને જામનગર તેમજ દેવભૂમિ દ્વારકા જિલ્લા ના લગત જિલ્લા ને જોડતા પરીવહન વધુ સુગમ બનશે એમ પણ સંસદસભ્ય પૂનમબેન માડમ એ ઉમેર્યું છે.

જામનગર પોલીસ બેડામાં ફરજ બજાવતા ૧૧ ASI ને PSI તરીકે બઢતી મળતાં એસ.પી. પ્રેમસુખ ડેલૂ દ્વારા પિપિંગ સેરેમની યોજાઈ

દેશ દેવી ન્યૂઝ જામનગર તા ૮ એપ્રિલ ર૫, જામનગર જિલ્લાના વિવિધ પોલીસ સ્ટેશનમાં ફરજ બજાવતા કુલ ૧૧ આસિસ્ટન્ટ સબ-ઇન્સ્પેક્ટર (એ.એસ.આઈ.)ને પોલીસ સબ-ઇન્સ્પેક્ટર (પી.એસ.આઈ.) તરીકે ખાતાકીય બઢતી મળતાં પોલીસ બેડામાં ઉત્સાહની લહેર ફેલાઈ ગઈ છે. આ પ્રસંગને વધુ યાદગાર બનાવવા માટે પોલીસ અધિક્ષક પ્રેમસુખ ડેલૂ દ્વારા “પિપિંગ સેરેમની”નું આયોજન કરવામાં આવ્યું હતું. જેમાં તમામ બઢતી પામેલા અધિકારીઓને તેમના નવા હોદ્દાની બેજ લગાવીને સન્માનિત કરવામાં આવ્યા હતા.બઢતી પામેલા પોલીસ કર્મચારીઓમાં (૧) સીટી એ પો.સ્ટે.ના કરણસિંહ પ્રવિણસિંહ જાડેજા, (૨) સીટી બી પો.સ્ટે.ના અજયભાઇ ભીમજીભાઇ ચાવડા, (૩) સીટી બી પો.સ્ટે.ના વિરલભાઈ ધનાભાઈ રાવલીયા, (૪) સીટી બી પો.સ્ટે.ના સરમણભાઈ રામાભાઈ ચાવડા, (૫) લાલપુર પો.સ્ટે.ના ચંપાબેન ધિરેન્દ્રભાઇ વાઘેલા, (૬) સીટી સી પો.સ્ટે.ના ધારાબેન જિતેન્દ્રભાઈ જોષી, (૭) સીટી એ પો.સ્ટે.ના હિતેશભાઇ મેરામણભાઈ ચાવડા, (૮) જોડીયા પો.સ્ટે.ના રવિરાજસિંહ મહેન્દ્રસિંહ જાડેજા, (૯) પંચ બી પો.સ્ટે.ના મનોજભાઈ પ્રતાપભાઇ મોરી, (૧૦) સીટી સી પો.સ્ટે.ના રાજસીભાઇ માંડણભાઇ ડુવા અને (૧૧) જામજોધપુર પો.સ્ટે.ના ઉષાબા પ્રવિણસિંહ પરમારનો સમાવેશ થાય છે.પોલીસ અધિક્ષક પ્રેમસુખ ડેલૂએ તમામ બઢતી પામેલા અધિકારીઓને અભિનંદન પાઠવ્યા હતા, અને તેમની નવી ફરજો માટે શુભેચ્છાઓ આપી હતી.  આ પ્રસંગે અન્ય પોલીસ અધિકારીઓ પણ ઉપસ્થિત રહ્યા હતા અને બઢતી પામેલા પોલીસ કર્મીઓને શુભેચ્છાઓ પાઠવી હતી.

જામનગર નજીક વિજરખી પાસે બુલેટ પર નીકળેલા એક યુવાનની કારની ઠોકરે હત્યા નીપજાવ્યાની ઘટના સામે આવતાં ભારે ચકચાર

• પ્રેમમાં અંધ બનેલી પત્નીએ પોતાના પ્રેમી મારફતે જ પતિનું કાસળ કઢાવી નાખ્યાનું પોલીસ તપાસમાં સામે આવતાં સનસનાટી

દેશ દેવી ન્યૂઝ જામનગર તા ૭ એપ્રિલ ૨૫ જામનગર- કાલાવડ ધોરી માર્ગ પર વિજરખી ગામ પાસે ગઈકાલે એક કાર અને બુલેટ મોટરસાયકલ વચ્ચે અકસ્માત સર્જાયો હતો, અને બુલેટ ચાલક યુવાનનું મૃત્યુ નીપજ્યું હતું. પોલીસની ઊંડાણપૂર્વકની તપાસમાં કાર ચાલકે ઈરાદાપૂર્વક બુલેટ ચાલકને કચડી નાખ્યો હોવાનું અને તેમાં પ્રેમ પ્રકરણ કારણભૂત હોવાનું તેમજ પ્રેમમાં અંધ બનેલી પત્નીએ પોતાના પ્રેમી મારફતે પતિનું કાસળ કઢાવી નાખ્યા નું સામે આવતાં પોલીસ તંત્ર ચોકી ઉઠ્યું છે, અને પતિની હત્યા અંગે પત્ની અને પ્રેમી સામે ગુનો નોંધ્યો છે.આ ચકચાર જનક બનાવની વિગત એવી છે, કે મૂળ કાલાવડ તાલુકાના પીઠડીયા ગામના વતની અને હાલ જામનગરમાં રણજીત સાગર રોડ પર રહેતા રવિ ધીરજલાલ મારકણા નામનો ૩૦ વર્ષ નો યુવાન ગઈકાલે સાંજે છ વાગ્યાના અરસામાં પોતાનું જીજે ૨૭ ડી.જે ૯૩૧૦ નંબરનું બુલેટ મોટર સાયકલ લઈને કાલાવડ થી જામનગર તરફ આવી રહ્યો હતો. જે દરમિયાન આશરે છ વાગ્યાના અરસામાં તેની પાછળ આવી રહેલી જી.જે.૨૦ એ.ક્યુ. ૮૨૬૨ નંબરની થાર જીપના ચાલકે તેઓને ઠોકર મારી દેતાં અકસ્માત સર્જાયો હતો, અને તેમાં બુલેટ ચાલક રવિ મારકણા નું ગંભીર ઇજા થયા બાદ મૃત્યુ નીપજ્યું હોવાનું જાહેર કરાયું હતું.સૌપ્રથમ પંચકોશી એ. ડિવિઝનનો પોલીસ કાફલો ઘટના સ્થળે દોડી ગયો હતો, અને ઘટના સ્થળનું નિરીક્ષણ કરતાં આ અકસ્માતના બનાવમાં શંકા લાગતી હતી, અને બુલેટ ચાલક યુવાનને ઢસડ્યો હોવાના નિશાનો પણ જોવા મળ્યા હતા.તેથી સમગ્ર બનાવમાં પોલીસ દ્વારા ઊંડાણપૂર્વકની તપાસ કરવામાં આવી હતી, અને કારના ચાલક અક્ષય છગનભાઇ ડાંગરિયા ને શોધી લેવાયો હતો, અને તેની ઘનિષ્ઠ પૂછપરછ ચલાવાઇ રહી હતી. મોડેથી પોલીસને સમગ્ર પ્રકરણમાં આ બનાવ અકસ્માતનો નહીં, પરંતુ હત્યાનો હોવાનું ધ્યાનમાં આવ્યું હતું. અને કારચાલક અક્ષય ડાંગરિયાએ આ હત્યા કરી હોવાની કબુલાત આપી હતી.પોતે મૃતક રવિની પત્ની રીંકલ સાથે છેલ્લા બે વર્ષથી પ્રેમ સંબંધ ચલાવી રહ્યો હોવાનું કબૂલી લીધું હતું, તેમાં પત્ની રીંકલેજ પતિ રવિ મારકણા બુલેટ લઈને નીકળે છે, તે પ્રકારનું લોકેશન આપ્યું હતું, અને જેના લોકેશન અને પૂર્વયોજિત કાવતરા ના આધારે ગઈકાલે સાંજે તેની હત્યા કરી નાખી હોવાનું બહાર આવ્યું હતું.

અને આરોપી અક્ષય ગઈકાલે સાંજે કાલાવડ થી જામનગર તરફના માર્ગે બુલેટ નો પીછો કરીને વિજરખી પાસે મોકો ગોતી હત્યા કરી નાખ્યાનું ષડયંત્ર બહાર આવ્યું છે. જેની આરોપી દ્વારા કબુલાત પણ કરી લેવાઇ છે, અને મૃતક ની પત્ની રીંકલ તેમાં સામેલ હોવાનું પણ જણાવી દીધું હતું. જેથી આ સમગ્ર બનાવમાં પોલીસે કાર કબ્જે કરી લીધી છે, તેમજ મૃતક રવિ ના પિતા ધીરજલાલ મારકણા ની ફરિયાદ ના આધારે આરોપી અક્ષય ડાંગરિયા અને મૃતક રવિની પત્ની રીંકલ સામે હત્યા અંગેનો ગુનો નોંધી લીધો છે, અને સમગ્ર પ્રકરણમાં ઊંડાણપૂર્વકની તપાસ ચલાવાઈ રહી છે.પોલીસ તપાસ દરમિયાન આરોપી કે જેણે પ્રેમમાં અંધ બની ગયા બાદ પોતાની પત્નીને છૂટાછેડા પણ આપી દીધા હોવાનું સામે આવ્યું છે. રીંકલ ના પ્રેમ સંબંધના કારણે પત્ની સાથે અવારનવાર ઝઘડા બાદ છુટાછેડા અપાયા હતા.