લાલપુર પ્રાંત અધિકારી દ્વારા ગેરકાયદેસર લાઇમ સ્ટોનનું વહન કરતા ૨ ટ્રેક્ટર જપ્ત કરી દંડનીય કાર્યવાહી કરાઈ
દેશ દેવી ન્યૂઝ જામનગર તા. ૧૯ જૂન ૨૫, જિલ્લા કલેકટર કેતન ઠક્કરની સૂચનાના પગલે, લાલપુર પ્રાંત અધિકારી અસવારે જામજોધપુર તાલુકામાં નિરીક્ષણ હાથ ધર્યું હતું. આ ફેરણી દરમિયાન, ભોજાબેડી-શેઠવડાળા રોડ પર ગેરકાયદેસર રીતે લાઈમ સ્ટોનનું વહન કરતા બે ટ્રેક્ટરને ઝડપી પાડવામાં આવ્યા હતા.
લાલપુર પ્રાંત અધિકારી અસવાર તેમની ટીમ સાથે જામજોધપુર તાલુકાના અંતરિયાળ વિસ્તારોમાં અનધિકૃત ખનન અને પરિવહનની પ્રવૃત્તિઓ પર નજર રાખી રહ્યા હતા. આ કાર્યવાહી અંતર્ગત, ભોજાબેડી અને શેઠવડાળાને જોડતા માર્ગ પર શંકાસ્પદ રીતે પસાર થઈ રહેલા બે ટ્રેક્ટરને અટકાવવામાં આવ્યા હતા. તપાસ કરતા જણાયું કે આ ટ્રેક્ટરમાં વહન થઈ રહેલો લાઈમ સ્ટોન કોઈપણ માન્ય પરવાનગી વગર લઈ જવામાં આવી રહ્યો હતો.જેથી તાત્કાલિક કાર્યવાહી કરતા, પ્રાંત અધિકારી અસવારે બંને ટ્રેક્ટરને સ્થળ પર જ સીઝ કર્યા હતા. વધુ કાયદેસરની કાર્યવાહી અને દંડનીય પ્રક્રિયા માટે આ બંને ટ્રેક્ટરને શેઠવડાળા પોલીસ સ્ટેશનને સોંપવામાં આવ્યા છે.
જિલ્લા કલેકટર કેતન ઠક્કરે આ મામલે સ્પષ્ટ નિર્દેશ આપ્યા છે કે જિલ્લામાં કોઈપણ પ્રકારની ગેરકાયદેસર ખનન પ્રવૃત્તિઓ ચલાવી લેવામાં આવશે નહીં અને આવા કૃત્ય કરનારાઓ સામે કડકમાં કડક કાર્યવાહી કરવામાં આવશે.
દેશ દેવી ન્યૂઝ જામનગર તા ૧૯ જૂન ૨૫, જામનગર નજીક નેવી મોડા ગામમાં નકલી ઇંગલિશ દારૂ બનાવવાની મીની ફેક્ટરી એલસીબી ની ટુકડીએ પકડી પાડી છે, અને જામનગર તેમજ રાજસ્થાન સહિતના છ શખ્સોની અટકાયત કરી લઈ બનાવટી વિદેશી દારૂ બનાવવા માટેની સાધન સામગ્રી, દારૂ ના પાઉચ, કાચની બોટલ, તથા સ્ટીકર, મિશ્રણયુક્ત પ્રવાહી સહિત રૂપિયા ૭.૨૮ લાખ ની માલમતા કબજે કરી છે, અને તમામ છ શખ્સોની જીણવટ ભરી પૂછપરછ હાથ ધરી છે.
જામનગરની લોકલ ક્રાઈમ બ્રાન્ચ ની ટીમને ચોક્કસ બાતમી મળી હતી કે જામનગર નજીક નેવી મોડા ગામમાં રહેતા હાર્દિકસિંહ જાડેજા નામના શખ્સ ની વાડીમાં મકાનની અંદર નકલી દારૂ બનાવવાની ફેક્ટરી ચલાવવામાં આવી રહી છે, અને જામનગર તથા રાજસ્થાનના કેટલાક શખ્સો એકત્ર થઈને ગેરકાયદેસર રીતે નકલી દારૂ બનાવી તેનું જામનગર અને આસપાસના વિસ્તારમાં વેચાણ કરે છે. તેવી બાતમીને આધારે એલસીબીના પી.આઈ. વી.એમ. લગારિયા અને તેઓની ટીમે દરોડો પાડયો હતો.
જે દરોડા દરમિયાન છ શખ્સો નકલી દારૂ બનાવવાનું કારસ્તાન ચલાવી રહેલા નજરે પડ્યા હતા. જેઓ કેમિકલ જેવું પ્રવાહી કે જેમાં ભેળસેળ કરીને ઇંગ્લિશ દારૂની બાટલી તેમ જ વગેરે પર ડુપ્લીકેટ સ્ટીકર નો ઉપયોગ કરી નકલી દારૂ તૈયાર કરવામાં આવી રહ્યો હોવાનું ધ્યાનમાં આવ્યું હતું.
જેથી એલસીબી ની ટુકડીએ ઉપરોક્ત નકલી દારૂ બનાવવાની ફેક્ટરી ચલાવી રહેલા હરદીપસિંહ ઉર્ફે લાલો મહાવિરસિંહ ઉર્ફ સુખદેવસિંહ ઉર્ફે સુખુભા જાડેજા ગીરા ઉવ.૩૨ ધંધો ડ્રાઇવીંગ રહે. મોમાઇનગર શેરી નંબર-૫, સીટી બસ સ્ટોપની સામે, જામનગર (મુળ- નેવીમોડા તા.જી.જામનગર), (૨) શ્રીરાજસિંહ ઉર્ફે સિધ્ધરાજસિંહ ઉપેન્દ્રસિંહ ઝાલા ગીરા ઉવ.૨૫ ધંધો ડ્રાઇવીંગ રહે. રામેશ્વરનગર, નિર્મળનગર શેરી નંબર-૩ જામનગર, (૩) અર્જુનસીંગ તેજસીંગ સોઢા રાજપુત ઉવ.૩૦ ધંધો ડ્રાઇવીંગ રહે. ચોહટન, મેધવાલોકા વાસ, તા.ચોહટન જી.બાડમેર રાજસ્થાન, (૪) સુર્યપ્રતાપસીંગ ભાનુપ્રતાપસીંગ રાઠોડ રાજપુત ઉવ.૨૮ ધંધો મજુરી રહે. લોરડીગામ તા.વિજયનગર જી.બ્યાવર રાજસ્થાન, (૫) સૈતાનસીંગ ઉકારસીંગ રાઠોડ રાજપુત ઉવ.૪૩ ધંધો મજુરી રહે. બરેલાગામ તા.વિજયનગર જી.બ્યાવર રાજસ્થાન, અને (૬) સાવરલાલ ધેવરચંદ્ર મેવાળા કલાળ ઉવ.૨૪ ધંધો મજુરી રહે. બડલાગામ તા.હુરડા થાના ગુલાબપુરી જી.ભીલવાડા રાજસ્થાન વગેરેની અટકાયત કરી લીધી હતી.
એલસીબી ની ટીમ દ્વારા ડુપ્લીકેટ દારૂ બનાવના સ્થળેથી દારૂના ચપલા (પાઉચ) નંગ-૧૦૫૬ તથા અન્ય પદાર્થ (કેમીકલ) તથા સાધન સામગ્રી મોબાઇલ ફોન તથા વાહન મળી કુલ રૂ. ૭,૨૮,૪૫૦/- નો મુદામાલ કબજે કર્યો છે, અને પંચકોષી એ. ડિવિઝન પોલીસ મથકમાં તમામ છ આરોપીઓ સામે ભારતીય દંડ સંહિતાની જુદી જુદી કલમો હેઠળ, અને પૂર્વયોજિત કાવતરું ઘડી નકલી દારૂ બનાવવાની ફેક્ટરી ચલાવવા સંદર્ભે જુદી જુદી કલમો હેઠળ ગુનો દાખલ કર્યો છે. જે તમામની વિશેષ પૂછપરછ ચલાવાઇ રહી છે.
જામનગરમાં રહેતા હરિહરભાઈ બક્ષી બીમાર હોવાથી તેમના લંડન માં રહેતા પુત્રી નેહલબેન અને જમાઈ શૈલેષભાઈ પરમાર જામનગર આવ્યા હતા. અને બનાવના દિવસે એટલેકે ૧૨.૬.૨૦૨૫ ના પરોઢિયે જ જામનગર થી અમદાવાદ પહોંચ્યા હતા. જ્યાંથી તેઓ એ હવાઈ મુસાફરી બપોરે દોઢ વાગ્યે શરૂ કરી હતી. પરંતુ કમનસીબે થોડી મિનિટો માં જ આ વિમાન ક્રેશ થયુ હતુ જેમાં એક મુસાફર સિવાય તમામ લોકો ના મૃત્યુ થયા હતા.
શૈલેષભાઈ અને નેહલબેન કે જે બંનેના પરિવારો જામનગરમાં રહે છે, તેઓના પરિવારના ડીએનએ સેમ્પલ લેવાયા હતા. જે ગઈકાલે મેચ થઈ ગયા બાદ બંનેના મૃતદેહોને આજે વહેલી સવારે જામનગર લાવવામાં આવ્યા હતા. ત્યારબાદ વિરલબાગ પાસે આવેલા શૈલેષભાઈ પરમારના નિવાસ્થાને બંનેની અંતિમયાત્રા નીકળી હતી, જેમાં બક્ષી પરિવાર અને પરમાર પરિવાર ઉપસ્થિત રહ્યો હતો, અને ભારે ગમગીની છવાઈ હતી.
આજે સવારે ૧૧.૦૦ વાગ્યે બંનેની અંતિમયાત્રા એકી સાથે નીકળી હતી, અને જામનગરના આદર્શ સ્મશાનમાં અંતિમવિધિ કરવામાં આવી હતી, જેમાં બંનેના પરિવાર ઉપરાંત જામનગરના કેટલાક અગ્રણીઓ વગેરે બહોળી સંખ્યામાં જોડાયા હતા. રાજ્ય સરકાર ની ગાઈડ લાઇન મુજબ પરમાર પરિવારના નિવાસ્થાને મૃતદેહો ને લાવવામાં આવ્યા ત્યારથી સમગ્ર પ્રક્રિયા દરમિયાન પોલીસ બંદોબસ્ત પણ રાખવામાં આવ્યો હતો, અને મામલતદાર કચેરી ની ટીમ પણ સ્થળ પર હાજર રહી હતી.
