શ્રીજી શીપીંગ કંપનીનો ટ્રક માલ સહીત લુંટી લેવાના કેશમાં આરોપીઓને નિદોર્ષ છોડી મુકતી નામદાર અદાલત

• સીકકાના ચકચારી લુંટ કેશમાં આરોપીઓનો નિદોર્ષ છુટકારો

• ફરીયાદી અને તેમના લગતા વળગતાની જુબાનીને ધ્યાને લઈ અને આરોપીને સજા થઈ શકે નહી : ધારાશાસ્રી રાજેશ ગોસાઈ

દેશ દેવી ન્યુઝ તા. ૨૭ જુલાઈ ૨૫ આ કેસની હકિક્ત એવી છે કે, શ્રીજી શીપીંગ કંપનીનો ટાટા કંપનીનો ટ્રક રીલાયન્સ કંપનીના કોલસા ભરીને નિકળેલ તે દરમ્યાન સરમતના પાટીયા પાસે પહોંચતા એક કાળા કલરની નંબર વગરની હુંડાઈ વર્ના ફોરવીલમાં ૪ આરોપીઓ આવી જઈ અને આ ટ્રકના ચાલક ફરીયાદી ઈશુબબભાઈ અલારખાભાઈ સાંધાણીને રોકી ટ્રકની નિચે ઉતારી અને તેમના સાથે સાઈડ કેમ આપતો નથી તેમ ધમકાવી અને ટ્રક ચાલક ફરીયાદીને ઢીકા પાર્ટુનો માર મારી અને ૪ આરોપીઓ પૈકી એક આરોપી ટ્રકની ચાવી જુટવી અને માલ સહીતના ટ્રકની લુંટ કરી અને રવાના થઈ ગયેલ અને બાકીના ૩ આરોપીઓ પણ વર્ના મોટરકારમાં રવાના થઈ ગયેલ,

આ રીતે સાંજના ૪ વાગ્યાના સમયે ખુલેઆમ લુંટ થવાના કારણે સીકકા પંથકમાં ચકચાર મચી જવા પામેલ અને આરોપીઓ સામે લુંટ અને માર મારવાની ફરીયાદ દાખલ થયેલ, જેની તપાસ થતાં આરોપીઓ યશગીરી ઉર્ફે ડાડો ગુલાબગર ગૌસ્વામી, કલ્પેશ લાલગીરી ગોસાઈ, સંજયગર જેન્તીગર મેધનાથી, અજયસીહ કિરીટસિંહ જાડેજાઓની સામે ગુન્હો દાખલ કરવામાં આવેલ તે કેશ ચાલી ગયેલ, ત્યારબાદ દલીલ ઉપર આવતા સરકાર પક્ષે દલીલો કરવામાં આવેલ કે, આરોપીઓએ ગંભીર પ્રકારનો ગુન્હો દીવસના સમયે કરેલ છે, અને આરોપીઓએ મારા મારી કરી અને લુંટ ચલાવેલ છે અને દીન દહાડે ખુલ્લેઆમ , કોઈ નાની વસ્તુની લુંટ કરવામાં આવેલ નથી પરંતુ અનેક ટન કોલસો ભરેલ ટ્રકની લુંટ કરવામાં આવેલ છે,

આ તમામ લુંટ જામનગર ખંભાળીયા હાઈવે ઉપર કરવામાં આવેલ છે, આરોપીઓને કાયદા અને વ્યવસ્થાની કોઈ જ ગંભીરતા ધ્યાને લીધેલ નથી, આરોપીઓ જે મોટરકારમાં આવેલ તે પણ નામ અને નંબર વગરની હતી જેથી પહેલાથી કોઈપણ પ્રકારે કોઈ લુંટ કરવાના ઈરાદાથી જ નિકળેલ અને કાવતરૂ રચેલ હતું , આરોપીઓએ ખુબજ ગંભીર પ્રકારનો ગુન્હો કરેલ છે, જે કેશમાં તપાસ કરનારે ચાર્જશીટ દાખલ કરેલ છે, તે ધ્યાને લેતા પણ સાબીત થાય છે, તો આવા આરોપીએ લુંટ ચાલવેલ છે તેથી આ આરોપીઓને સખત સજા કરી અને દાખલો બેસાડવો જોઈએ, ત્યારબાદ આરોપી પક્ષે દલીલો કરવામાં આવેલ કે, સમગ્ર કેશમાં જે જગ્યા જાહેર કરવામાં આવેલ છે, તે જગ્યા ચારેય બાજુથી મોટી મોટી હોટલો આવેલ છે અને ત્યા ટોલનાકું પણ આવેલ છે અને આ સમગ્ર તપાસ દરમ્યાન આ કામે કોઈ જ સીસીટીવી ફુટેજ કબજે કરવામાં આવેલ નથી, અને કોઈ સ્વતંત્ર સાહેદોના નિવેદનો પણ લેવામાં આવેલ નથી, અને માત્ર અને માત્ર ફરીયાદી અને તેમના લગતા વળગતાની જુબાનીને ધ્યાને લઈ અને આરોપીને સજા થઈ શકે નહી, સાંકળતો પુરાવો મળે તો જ અને તો જ આરોપીને સજા થઈ શકે, આ કેશમાં તો આવા કોઈ સ્વતંત્ર સાહેદો છે જ નહી અને ફોજદારી સીધ્ધાંતો મુજબ માત્ર શંકા રેકર્ડ ઉપર આવે તો પણ સજા થઈ શકે નહી અને શંકારહીત કેશ પુરવાર કરીયાદીએ કરવો પડે, પરંતુ આ કેશમાં ધણી શંકાઓ ટ્રાયલ દરમ્યાન ઉત્પન્ન થયેલ છે, આ કેશમાં ઓળખ પરેડ પણ કરાવેલ નથી અને કોઈ સીસીટીવી ફુટેજ પણ નથી તો આ જ આરોપીઓએ આ લુંટ કરેલ છે, તેવું કયાંય રેકર્ડ ઉપર સાબીત થયેલ નથી, તેથી ફરીયાદ પક્ષ શંકા રહીત સાબીત કરવામાં નિષ્ફળ થયેલ છે, તેની સામે આરોપી પક્ષે તમામ પ્રકારના પુરાવામાં તેઓની આ ગુન્હામાં કોઈ જ સંડોવણી નથી, તે સાબિત કરેલ છે, જેથી આરોપીઓને નિદોર્ષ ઠરાવી અને છોડી મુકવા જોઈએ, તે તમામ દલીલો ધ્યાને લઈ અને આરોપી પક્ષે થયેલ દલીલો માન્ય રાખી અને આરોપીઓ યશગીરી ઉર્ફે ડાડો ગુલાબગર ગૌસ્વામી, કલ્પેશ લાલગીરી ગોસાઈ, સંજયગર જેન્તીગર મેધનાથી, અજયસીંહ કીરીટસીંહ જાડેજાને નિદોષ ઠરાવી અને છોડી મુકેલ, આ કેશમાં આરોપીઓ તરફે વકીલ  રાજેશ ડી. ગોસાઈ, વિશાલ વાય. જાની, હરદેવસીહ આર.ગોહીલ, રજનીકાંત આર. નાખવા ત્થા નિતેષ જી. મુછડીયા રોકાયેલા હતા.

જામનગર તાલુકાના જગા મેડી ગામના ખેડૂતને ગ્રામ પંચાયત ચૂંટણીમાં મત નહીં આપવો ભારે પડ્યો : પગ ભાંગી નાખ્યો

• ગ્રામ પંચાયતની ચૂંટણીમાં હારી જનાર સભ્યએ ‘તમે મને મત કેમ નથી આપ્યો’ તેમ કહી હુમલો કરી દીધો : આરોપી ની અટકાયત

દેશ દેવી ન્યૂઝ જામનગર તા ૨૬,  જુલાઈ ૨૫ જામનગર તાલુકાના જગામેડી ગામમાં રહેતા અને ખેતી કામ કરતા અવસરભાઈ પરસોત્તમભાઈ ભાલોડીયા નામના ૬૧ વર્ષના ખેડૂત બુઝુર્ગે પોતાના ઉપર લોખંડના પાઇપ વડે હુમલો કરી પગ ભાંગી નાખી ફેક્ચર સહિતની ઈજા પહોંચાડવા અંગે પોતાના ગામમાં જ રહેતા દિલીપ જીવરાજભાઈ ગોહિલ સામે ફરિયાદ નોંધાવી છે. જ્યારે ઇજાગ્રસ્ત બુઝુર્ગ જામનગરની સરકારી જી.જી. હોસ્પિટલમાં સારવાર મેળવી રહ્યા છે.

પોલીસ ફરિયાદમાં જાહેર કરાયા અનુસાર અવસરભાઈ કે જેઓએ ગત ગ્રામ પંચાયતની ચૂંટણીમાં સભ્યપદ માટે ઉભેલા આરોપી દિલીપ ગોહિલને મત આપ્યો ન હોવાથી ગઈકાલે રસ્તામાં આરોપી મળી જતાં તમે મને મત શું કામ નથી આપ્યો, તેમ કહી જીભાજોડી કરી હતી, અને ઉસકેરાટ માં આવી જઈ બુઝુર્ગનો પગ ભાંગી નાખ્યો હતો.

આ મામલામાં પંચકોશી એ. ડિવિઝનના એ.એસ.આઈ. ડી.એ. રાઠોડ હરકત માં આવી ગયા હતા, અને તાત્કાલિક અસરથી આરોપી દિલીપ જીવરાજ ગોહિલ ની અટકાયત કરી લીધી છે, અને તેની પાસેથી હુમલામાં વપરાયેલો લોખંડનો પાઇપ પણ કબજે કરી લીધો છે.

જામનગરના દરેડ વિસ્તારમાં રહેતી ૨૧ વર્ષીય અપરણિત યુવતી લાપતા બની જતાં પરિવારજનોમાં ચિંતા

દેશ દેવી ન્યૂઝ જામનગર તા ૨૬, જૂલાઈ ૨૫ જામનગર નજીક દરેડ વિસ્તારમાં રહેતી મૂળ ઉત્તર પ્રદેશની વતની પરપ્રાંતીય યુવતી પોતાના ઘેરથી એકાએક લાપત્તા બની ગઈ છે, અને પરિવારજનો તેમજ પોલીસ સ્ટાફ દ્વારા તેણી ની શોધખોળ ચલાવવામાં આવી રહી છે.જામનગર તાલુકાના દરેડ ગામમાં આદમભાઈ નામના મકાન માલિક ની ઓરડી માં ભાડેથી રહેતી મૂળ ઉત્તર પ્રદેશના બરેલી જિલ્લાની વતની પ્રીતિબેન દયારામ ભાઈ મોર્ય નામની ૨૧ વર્ષની અપરણીત યુવતી કે જે ગત ૨૩ તારીખે પોતાના ઘેરથી એકાએક લાપતા બની ગઈ હતી.

પરિવારજનો દ્વારા તેણીની અનેક સ્થળે શોધખોળ કર્યા પછી પણ કોઈ પત્તો સાંપડ્યો ન હતો. આખરે આ મામલો પંચકોષી બી. ડિવિઝન પોલીસ મથકમાં લઈ જવાયો છે, અને પરિવારજનો દ્વારા પ્રીતિબેન ગુમ થઈ ગયા ની ગુમનોંધ કરાવી છે. જેને પોલીસ શોધી રહી છે.

જામનગરના રણજી તનગર વિસ્તારમાં મોડી સાંજે એક વૃદ્ધાને નિશાન બનાવી ચેઇન સ્નેચિંગનો પ્રયાસ : ૭૯ વર્ષીય મહિલા ઈજાગ્રસ્ત બન્યા

દેશ દેવી ન્યુઝ જામનગર તા. ૨૬ જુલાઈ ૨૫ ,જામનગરના રણજીત નગર વિસ્તારમાં પટેલ સમાજ સામેના હાઉસિંગ બોર્ડના ફ્લેટ એ.-૧ નજીક એક ચેઇન સ્નેચિંગ ની ઘટના સામે આવી છે, જેમાં ૭૯ વર્ષીય વૃદ્ધા લક્ષ્મીબેન નાગડા ના ગળા માંથી સોનાના ચેઇનની ચીલઝડપનો બનાવ બન્યો હતો. આ ઘટનામાં તેઓ ગળામાં ઈજા થતાં ઘાયલ થયા છે.ઇજાગ્રસ્ત ના પરિવારજનો દ્વારા આપવામાં આવેલી માહિતી અનુસાર, લક્ષ્મીબેન પોતાના ઘરના બીજા માળેથી મોડી સાંજે બહાર જવા નીકળ્યા હતા અને નીચે રોડ પર પોતાના સંબંધીના વાહનની આવવાની રાહ જોઈ રહ્યા હતા. તે જ સમયે, એક અજાણ્યો ટુ-વ્હીલર ચાલક તેમની નજીક આવ્યો અને પાછળથી લક્ષ્મીબેનને પગમાં ઠોકર મારીને પાડી દીધા હતા. ત્યારબાદ ગળામાં પહેરેલો સોનાનો ચેઇન ઝૂંટવી લેવાનો પ્રયાસ કર્યો હતો.ચેઇન સ્નેચરે બુઝુર્ગ મહિલા ના ચેઇનના ત્રણ ટુકડા કરી દીધા હતા, અને ત્યાંથી ભાગી જવાનો પ્રયાસ કરી રહ્યો હતો. જોકે, લક્ષ્મીબેને બૂમો પાડતાં અજાણ્યા શખ્સો ગભરાઈ ગયો હતો, અને ચેઇન ત્યાં જ ફેંકીને ફરાર થઈ ગયો હતો. આ ઘટનામાં વૃદ્ધા લક્ષ્મીબેનને ગળાના ભાગે ઈજા પહોંચતા તેમને તાત્કાલિક સારવાર આપવામાં આવી હતી. પરિવારજનોએ આ બનાવ અંગે પોલીસને જાણ કરતાં સિટી સી. ડિવિઝન પોલીસે ઘટનાસ્થળે પહોંચી જઈ સીસીટીવી કેમેરાના ફૂટેજના આધારે બાઇક સવાર ની શોધ ખોળ હાથ ધરી છે.

જામનગરના મિગ કોલોની વિસ્તારમાં આવેલા જંગલેશ્વર મહાદેવ મંદિરનું સ્થળાંતર કરી જુના મંદિર નો હિસ્સો દૂર કરાયો

દેશ દેવી ન્યૂઝ જામનગર તા ૨૫ જુલાઈ ૨પ, જામનગરમાં ગવર્મેન્ટ કોલોની ની પાછળ મિગકોલોની પાસેના વિસ્તારના જંગલેશ્વર મહાદેવ નું મંદિર આવેલું છે, ત્યાંથી મહાનગરપાલિકા દ્વારા આરટીઓની જૂની કચેરી થી મિગ કોલોની સુધીના માર્ગે નવો રોડ બનાવવામાં આવી રહ્યો હોવાથી તે મંદિરનું સ્થળાંતર કરાયું છે. મંદિરના ટ્રસ્ટીઓ વગેરેએ રોડની સાઈડમાં બાજુની જગ્યામાં જ નવું મંદિર તૈયાર કરી લીધું છે, અને તે સ્થળે શિવલિંગ તથા અન્ય મૂર્તિ વગેરેની પ્રાણ પ્રતિષ્ઠા કરી લેવાઇ હતી.ત્યારબાદ શ્રાવણ માસના પ્રથમ દિવસે જ નવા મંદિરમાં સેવા પૂજા ચાલુ કરી દીધી છે, જ્યારે જુના મંદિર વાળો હિસ્સો કે ત્યાં ડિમોલેશન કાર્ય હાથ ધરી લેવામાં આવ્યું હતું, અને જૂના મંદિરના બાંધકામ વાળા હિસ્સાને દૂર કરીને રસ્તો કાઢવા માટેની પ્રક્રિયાઓ શરૂ કરી દેવામાં આવી છે.

જામનગરમાં હાથી શેરીમાં આવેલા એક બંધ મકાનને નિશાન બનાવતા તસ્કરો : ૩૫,૦૦૦ ની માલમતા ઉઠાવી ગયા

દેશ દેવી ન્યૂઝ જામનગર તા ૨૫ જુલાઈ ૨૫, જામનગરમાં હવાઈ ચોક નજીક હાથી શેરીમાં એક બંધ રહેણાક મકાનને કોઈ તસ્કરોએ નિશાન બનાવી લીધું હતું, અને અંદરથી જુના ચાંદીના દાગીના, જૂની ચલણી નોટ, જૂની સ્ટેમ્પ સહિત રૂપિયા ૩૫,૦૦૦ની માલમતા ચોરી કરી ગયા ની ફરિયાદ પોલીસમાં નોંધાવાઇ છે.

આ ફરિયાદ અંગેના બનાવની વિગત એવી છે કે જામનગરમાં હાલ ગોકુલ ધામ સોસાયટી વિસ્તારમાં રહેતા પ્રવિણાબેન સુધીરભાઈ નામના ૬૩ વર્ષ મહિલા કે જેઓનું હાથી શેરીમાં જૂનું મકાન આવેલુ છે તે, મકાનને કોઈ તસ્કરોએ નિશાન બનાવી લીધું હતું. અને મકાનમાં ખાતર પાડ્યું હતું.તસ્કરોએ મુખ્ય દરવાજાનું તાળું તોડી અંદર પ્રવેશ મેળવી લક જુના મોતીના સેટ સાથેના ચાંદીના દાગીના, સ્ટેમ્પની અલગ અલગ ટિકિટો,ગ જૂની ચલણી નોટો શહીદ વગેરે રૂપિયા ૩૫,૦૦૦ ની માલમતા ચોરી કરી લઈ ગયા હતા. જે બનાવા અંગે સિટી એ. ડિવિઝન પોલીસ મથકમાં ફરિયાદ નોંધાવતા પોલીસે તપાસ હાથ ધરી છે.

જામજોધપુર તાલુકાના વાંસજાળીયા ગામમાં એક રહેણાંક મકાન પર મોડી રાત્રે એલસીબીની ટીમનો દારૂ અંગે દરોડો

• મકાનમાં સંતાડેલો રૂપિયા ૧૨ લાખની કિંમતનો ૨૦૩૫ નંગ ઇંગ્લિશ દારૂની બાટલીનો જંગી જથ્થો પકડાયો : આરોપો ફરાર

દેશ દેવી ન્યૂઝ જામનગર તા ૨૪ જુલાઈ ૨૫, જામજોધપુર તાલુકાના વાંસજાળીયા ગામમાં એક મકાનમાં ઇંગલિશ દારૂની બાટલીનો માતબર જથ્થો ઉતારવામાં આવ્યો છે, અને તેનો ખાનગીથી વેચાણ કરવા માટેની પહેરવી થઈ રહી છે. તેવી ચોક્કસ બાતમી ના આધારે ગઈકાલે મોડી રાત્રે એલસીબીની ટુકડીએ દરોડો પાડ્યો હતો, અને મકાનમાંથી જુદી જુદી બ્રાન્ડની નાની મોટી ૨૦૩૫ નંગ ઈંગ્લીશ દારૂની બાટલીનો આશરે રૂપિયા બારલાખ ની કિંમત નો જથ્થો કબજે કરી લીધો છે, અને દારૂનો જથ્થો સંતાડનાર મકાન માલિકની શોધ ખોળ હાથ ધરી છે.

આ દરોડા ની વિગત એવી છે કે જામજોધપુર તાલુકાના વાંસજાળીયા ગામમાં રહેતા પબાભાઈ મેરાભાઈ મોરી નામના રબારી શખ્સ દ્વારા પોતાની વાડીના જુનવાણી મકાનમાં ઇંગલિશ દારૂનો મોટો જથ્થો ઉતાર્યો છે, અને તેનું વેચાણ કરવાની પેરવી ચાલી રહી છે. જે બાતમી ના આધારે ગઈ રાત્રે એલસીબીની ટુકડી ત્રાટકી હતી, અને ઉપરોક્ત મકાન પર દરોડો પાડ્યો હતો.

જે દરોડા દરમિયાન મકાનમાંથી જુદી જુદી બ્રાન્ડ ની નાની મોટી ઇંગ્લિશ દારૂની બાટલી કે જેના પર ઓન્લી સેલ ફોર ઉત્તરાખંડ લખેલું હતું, જે ૨૦૩૫ નંગ ઇંગ્લિશ દારૂની બાટલીનો માતબર જથ્થો મળી આવ્યો હતો. આથી પોલીસે રૂપિયા ૧૨,૦૮,૯૦૦ ની કિંમતનો ઇંગ્લિશ દારૂ કબજે કરી લીધો છે, જ્યારે મકાન માલિક પબાભાઈ રબારી ભાગી છૂટ્યો હોવાથી તેને ફરારી જાહેર કરી, શોધખોળ હાથ થઇ છે. અને જામજોધપુર પોલીસ સ્ટેશનના પી.એસ.આઇ એચ.બી. વડાવીયા તેને શોધી રહ્યા છે.

જામનગર : બે પિસ્તોલ અને છ કારતૂસ સાથે પકડાયેલ ઈસમનો કેસ ચાલી જતાં છોડી મૂકતી નામદાર કોર્ટ

દેશ દેવી ન્યૂઝ જામનગર તા. ૨૪ જુલાઈ ૨૫ આ કેસની હકીકત એવી હતી કે, આ કામના ફરીયાદી આઈ.કે.શેખ સબ ઇન્સ્પેક્ટર તા.૨૦/૦૪/૨૦૧૬ ના રોજ સ્ટાફ અને પોલીસ ઇન્સપેકટર એચ.એચ.શારડા સાહેબ સાથે સિટી “બી” પોલીસ સ્ટેશન વિસ્તારમાં પેટ્રોલીંગમાં હોય તે સમય દરમ્યાન સાથેના સ્ટાફના વ્યક્તિને ખાનગી રાહે બાતમી હકીકત મળેલ કે આગળના કાય પર જય મહાકાલ અને પાછળના કાચ પર ઝાલા લખેલ કાર જામનગર વિકટોરિયા પુલથી ગુલાબનગર તરફ ગેર-કાયદેસર અગ્નિ શસ્ત્ર હથિયાર રાખી એક ઇસમ નિકળવાનો હોય તેવી બાતમી મળતા બે પંચોને હકીકતથી વાકેફ કરી વોચ માં હોય તે સમય દરમ્યાન ઉપરોક્ત હકીકત વાળી કાર નીકળતા તેને રોકી ડ્રાઇવિંગ સીટ પર બેસેલ ઇસમનું નામ પૂછતા પોતાનું નામ ક્રુષ્ણસિંહ ઉર્ફે મુનો ઉર્ફે મહાકાલ અભેસિંહ ઝાલા હોવાનું જણાવેલ હોય જે ઈસમની અંગ જડતી કરતાં તેના પેન્ટના ખિસ્સા માથી એક અને કારની જડતી કરતાં એક દેશી બનાવટની પિસ્તોલ અને જીવતા છ કારતૂસ મળી આવેલ હતી.

જેથી તુરંતજ હેડ ક્વાટરથી આર્મર પણ બોલાવી લેવામાં આવેલ હોય અને તેમના દ્વારા સદરહુ પિસ્તોલની ચકાસણી કરતાં બંને પિસ્તોલો ચાલુ હાલતમાં હોય અને ફાયરિંગ થઈ શકે તેમ હોય જેથી છ જીવતા કારતૂસ, બે ગેર કાયદેશર પિસ્તોલ, મોબાઈલ, કાર વી. પંચનામાની વિગતે કબ્જે કરી ક્રુષ્ણસિંહ ઉર્ફે મુનો ઉર્ફે મહાકાલ અભેસિંહ ઝાલા વિરુધ્ધ આર્મ્સ એકટની કલમ ૨૫(૧) બી-એ, ૨૯ વી. અંગેની ફરિયાદ નોંધાવેલ હતી.

જેમાં ટ્રાયલ દરમ્યાન પોલીસ આઠ સાહેદો અને બે પંચો ઉપરાંત એફએસએલ અધિકારી તથા જામનગરના પૂર્વ કલેક્ટર અને હાલ જોઇન્ટ સેક્રેટરી ફૂડ એન્ડ સિવિલ સપ્લાયના ડિરેક્ટર, ન્યુ દિલ્લી રવિશંકર સાહેબ ને આરોપી વિરુધ્ધ આર્મ્સ એકટ અંગેની ચાર્જશીટ બનાવવાની પરવાનગી આપવા અંગે તપાસવામાં આવેલ હતા. ટ્રાયલના અંતે નામદાર કોર્ટ દ્વારા આરોપી ક્રુષ્ણસિંહ ઉર્ફે મુનો ઉર્ફે મહાકાલ અભેસિંહ ઝાલાના વકીલશ્રી મારફતે લંબાણ પૂર્વક દલીલો થયેલ હોય જેમાં નામદાર ટ્રાયલ કોર્ટે આરોપી પાસેથી ફરિયાદમાં જણાવ્યા મુજબનો મુદામાલ કબ્જે કરવામાં આવેલ તેવી હકીકત ફરિયાદ પક્ષ નિશંકપણે સાબિત કરવામાં નિષ્ફળ ગયેલ હોવાનું જણાઈ આવતું હોય અને ગુન્હો નિશંકરીતે પડેલ પુરવાથી સાબિત ન થાય ત્યાં સુધી એવું અનુમાન કરવાનું રહે છે કે આરોપી નિર્દોષ છે અને તેનો લાભ આરોપીને આપવો જોઈએ જેથી આરોપી ક્રુષ્ણસિંહ ઉર્ફે મુનો ઉર્ફે મહાકાલ અભેસિંહ ઝાલાને હાલના ગુન્હામા શંકાનો લાભ આપી છોડી મૂકવાનો હુકમ ફરમાવેલ હતો.

ઉપરોક્ત કામે આરોપી તરફે જામનગરના ધારાશાસ્ત્રી જયેન્દ્રસિંહ એન. ઝાલા , હરપાલસિંહ પી. ઝાલા, કેયૂર કે. અજુડીયા રોકાયેલા હતા.

જામનગરના સીટી-બી ડિવિઝન પોલીસ સ્ટેશન હેઠળ ના જુદા જુદા ચાર વિસ્તારમાં બુટલેગર તથા માથાભારે તત્વોના ઘરમાં પોલીસદ્વારા વિજ તંત્રને સાથે રાખીને સરપ્રાઈઝ ચેકિંગ કરાયું

• બેડી- બેડેશ્વર વિસ્તાર, ગુલાબ નગર અને નવાગામ ઘેડ સહિતના વિસ્તારમાં રહેતા અસામાજિક તત્વો ના રહેણાંક મકાનમાંથી વીજ ચોરી પકડી લેવાઇ

દેશ દેવી ન્યુઝ જામનગર તા ૨૨ જુલાઈ ૨૫, જામનગર શહેરના સિટી બી. ડિવિઝન પોલીસ સ્ટેશન હેઠળના વિસ્તારમાં વસવાટ કરતા દારૂના ધંધાર્થીઓ અથવા તો માથા ભારે શખ્સો, કે જે લોકોની પોલીસતંત્ર દ્વારા એક સપ્તાહ ના સમયગાળા દરમિયાન બીજી વખત યાદી કરાઇ છે, તે પૈકીના અલગ અલગ ચાર વિસ્તાર માં રહેતા શખ્સોના નામની યાદી બનાવીને આજે સીટી બી. ડિવિઝન ના પી.આઈ. પી.પી. ઝા ના માર્ગદર્શન હેઠળ ૧ પોલીસ ટુકડી બેડી-બેડેશ્વર વિસ્તારમાં પહોંચી હતી, અને પીજીવીસીએલ ની ટીમને સાથે રાખીને સરપ્રાઈઝ ચેકિંગ કરવામાં આવ્યું હતું.જે દરમિયાન બુટલેગર અને માથાભારે ગણાતા કેટલાક શખ્સોના રહેણાંક મકાનમાં વીજ ચોરી મળી આવી હતી. જેથી તમામ સામે વીજ ચોરી અંગેના જામનગરના વિજ પોલીસ મથકમાં અલગથી ગુના નોંધવામાં આવી રહ્યા છે.આ ઉપરાંત જામનગર ના નવાગામ ઘેડ વિસ્તારમાં અલગ અલગ બે ટુકડીઓને દોડતી કરાવવામાં આવી છે, અને ગુલાબ નગર વિસ્તારમાં પણ એક પોલીસ ટુકડી વિજતંત્રને સાથે રાખીને દરોડા પાડી રહી છે, અને વીજ ચેકિંગ કરવામાં આવી રહ્યું છે. આ કાર્યવાહીને લઈને માથાભારે તત્વો માં ફફડાટ મચી ગયો છે.

જામનગરની રંગમતી- નાગમતી નદીની દરેડની કેનાલ મારફતે આવતા પાણી ના જથ્થામાંથી લેવાયેલા સેમ્પલ માં જૈવિક કચરો ભળ્યાનો રિપોર્ટ આવ્યો

• ગુજરાત પ્રદુષણ નિયંત્રણ બોર્ડ દ્વારા ગઈકાલે તળાવમાં આવતી કેનાલ ના પાણીનું ફરી સેમ્પલ લેવાયું : પાંચ કારખાનામાં પણ સેમ્પલ મેળવવા કાર્યવાહી

દેશ દેવી ન્યૂઝ જામનગર તા ૨૨ જુલાઈ ૨૫, જામનગર શહેરના મધ્યમાં આવેલા લાખોટા તળાવમાં દરેડની કેનાલ મારફતે રંગમતી નાગમતી નદીનું પાણી આવે છે, જે કેનાલમાં કેટલાક ઉદ્યોગગ્રહો દ્વારા પોતાના કેમિકલ યુક્ત પ્રવાહીના જથ્થાનો નિકાલ કરી દેવામાં આવતો હોવાના કારણે પ્રદૂષણયુક્ત પાણી લાખોટા તળાવમાં આવી રહ્યું છે, તેવી અનેક ફરિયાદો થયા પછી ગત ૨૭ જૂન ના રોજ ગુજરાત પ્રદૂષણ નિયંત્રણ બોર્ડની જામનગરની કચેરી દ્વારા પાણીના સેમ્પલો લેવામાં આવ્યા હતા, અને પૃથ્થકરણ માટે લેબોરેટરીમાં મોકલવામાં આવ્યા હતા.જેના સેમ્પલો આવી ગયા છે, અને ઉપરોક્ત પાણીના જથ્થામાં જૈવિક કચરો ભળ્યો હોવાના રિપોર્ટ પણ મળ્યા છે. જેથી ગુજરાત પ્રદુષણ નિયંત્રણ બોર્ડ દ્વારા તાત્કાલિક અસરથી જામનગર મહાનગરપાલિકાને આની જાણ કરવામાં આવી છે.આ ઉપરાંત હાલ વરસાદી સીઝન ચાલુ છે, અને ફરીથી ગઈકાલે લાખોટા તળાવમાં નવું પાણી આવ્યું હોવાથી ગુજરાત પ્રદૂષણ નિયંત્રણ બોર્ડની ટીમ દ્વારા રંગમતી નાગમતી નદીના પાણીના માંથી ફરી સેમ્પલો લેવામાં આવ્યા છે, અને પૃથકરણ માટે લેબોરેટરીમાં મોકલાયા છે. સાથો સાથ દરેડની કેનાલ ને જોડતી ઉદ્યોગ નગર વિસ્તારની કેનાલ કે જેના વિસ્તારમાં આવતા અલગ અલગ પાંચ કારખાનાઓ ને ત્યાં પણ જઈને ગુજરાત પ્રદુષણ નિયંત્રણ બોર્ડની ટીમ દ્વારા સેમ્પલો લેવામાં આવ્યા છે, અને આગળની કાર્યવાહી ચલાવવામાં આવી રહી છે.