જામનગરમાં પ્રાણી અત્યાચાર નિવારણ સોસાયટીમાં જોડાવા માટે જીવદયાપ્રેમીઓને આહવાન.

જામનગર.

અબોલ પશુ પ્રાણીઓ ઉપર થતા અત્યાચારો અટકાવવા/નિવારવા માટે જામનગર જિલ્લામાં પ્રાણી અત્યાચાર નિવારણ સોસાયટીની રચના કરવામાં આવનાર છે.

સોસાયટીની રચનામાં પ્રાણીઓ ઉપર વધતા જતા શોષણ અટકાવવા જેવા કે અસહ્ય ભારનું વહન, ગેરકાયદેસર રીતે પશુઓનું થતું પરિવહન/ હેરફેર અને વ્યાપાર, ઘવાયેલા/માંદા પશુ-પ્રાણીઓની સેવા- સુશ્રુષા જેવા ઉમદા હેતુ સાથે સંકળાયેલા છે.

આ અન્વયે જે વ્યક્તિ જીવદયાનીપ્રવૃત્તિ સાથે સંકળાયેલા હોય અને જેના નામે ગુનાહિત ઈતિહાસ ન હોય તેવા વ્યક્તિઓ આ સોસાયટીના સભ્ય બની શકે છે.

આ ઉમદા હેતુને ધ્યાને લઇ કલેક્ટરશ્રીની સુચના અનુસાર સોસાયટીની રચના માટે સામાન્ય સભ્યો તથા આજીવન સભ્યોની નોંધણી સહ ઉમેરવાની કામગીરી કરવામાં આવશે, જેમાં કાયમી સભ્યપદ (પેટ્રન)ની નોંધણી ફી રૂ.1000/- અને સામાન્ય સભ્યની નોંધણી ફી રૂ.100/-ની રહેશે તેમજ સામાન્ય સભ્યની મુદત 01 (એક) વર્ષની રહેશે.

સભ્યોની નોંધણી બાદ સોસાયટીના હોદ્દેદારોની નિમણૂંક કરવામાં આવશે.

આ સોસાયટીનું સભ્યપદ સ્વેચ્છાએ મેળવવા ઇચ્છતા લોકોએ સ્વ-હસ્તાક્ષરમાં અરજી કરી નાયબ પશુપાલન નિયામકશ્રી કચેરી, પશુપાલન શાખા, છઠ્ઠો માળ, જીલ્લા પંચાયત ભવન, જામનગરના સરનામે 10- દિવસમાં મોકલી આપવાની રહેશે. અરજીમાં પૂરું નામ, રહેઠાણનું સરનામું (સંપર્ક નંબર તથા ઇમેલ એડ્રેસ સાથે), કાયમી સરનામું, જન્મતારીખ, રાષ્ટ્રીયતા, સામાજિક મોભો, કોઈ સ્વૈચ્છિક સંસ્થા સાથે સંકળાયેલા હોય તો તેનું નામ-સરનામું, સરકારી નોકરીમાંથી નિવૃત્ત થયેલ હોય તો તેની વિગત, અન્ય આનુસંગિક માહિતી ફોર્મ સાથે બીડવાની રહેશે. સાથે જ કબૂલાતનામું, જેમાં હું કબૂલ કરું છું કે, મારા નામે કોઈ ગુનો નોંધાયેલ નથી.

તે રજુ કરી અરજી સાથે સભ્ય ફીની રકમ રોકડમાં ભરવાની રહેશે તેમ અધ્યક્ષ અને કલેક્ટરશ્રી જામનગરની યાદી દ્વારા જણાવવામાં આવ્યું છે.

લખન પરમારે પોતાનું જીવન ટૂંકાવી ને અન્ય ત્રણને જીવતદાન આપતો ગયો

માતા-પિતા અને મંગેતર નો અંગદાન માટે નો ખુબ જ મહત્વનો નિર્ણય: અનેક લોકોએ અભિનંદન આપ્યા

જામનગર તા ૧૮, જામનગરના ખવાસ જ્ઞાતિનો આશાસ્પદ યુવાન લખન પરમાર કેજે પોતાની ટૂંકી ઝીંદગી છોડીને ચાલ્યો ગયો છે,

પરંતુ પોતાના શરીરના અવયવો મારફતે અન્ય ત્રણ વ્યક્તિઓ માં જીવિત રહ્યો છે, અને અલગ-અલગ ત્રણ વ્યક્તિઓને નવજીવન આપ્યું છે.

લખન ના માતા પિતા તેમજ મંગેતર દ્વારા આ ઐતિહાસિક નિર્ણય લેવાયો હતો.

જામનગરના શાક માર્કેટ વિસ્તારમાં લખન દિનેશભાઇ પરમાર અમદાવાદની હોસ્પિટલમાં સારવાર દરમિયાન બ્રેઈનડેડ જાહેર કરાયા પછી અને તેના અંગોનું દાન કર્યા પછી માત્ર ૨૭ વર્ષની ઉંમરે જ તેને મૃત જાહેર કરાયો હતો. લખનનું મૃત્યુ થયું છે. પરંતુ અન્ય ત્રણ વ્યક્તિઓ માં પોતે જીવિત રહ્યો છે. જેની બે કીડની અને લિવરનું દાન કર્યા પછી બ્લડ ગ્રુપ મેચ કરીને અમદાવાદ ની ટીમ દ્વારા અન્ય ત્રણ વ્યક્તિમાં ટ્રાન્સપ્લાન્ટ કરી ત્રણ વ્યક્તિને નવજીવન અપાયા છે.

લખન પરમાર ના માતા-પિતા હર્ષિદાબેન અને દિનેશભાઈ ઉપરાંત તેની મંગેતર હેમાલી સોઢા કે જેઓ અકસ્માતના બનાવથી લઈને આજદિન સુધી લખન પરમાર ની સારવાર માટે ખડેપગે રહ્યા હતા. અને જ્યારે હવે તેનું જીવન શક્ય ન હતું ત્યારે અમદાવાદના તબીબોની સલાહ મુજબ અન્ય લોકોમાં જીવિત રહેવા માટેનો ઐતિહાસિક નિર્ણય લેવામાં આવ્યો હતો. ત્રણેએ આ બાબતે સહમતી આપી દીધા પછી ગઈ કાલે મોડી રાત્રે અંગદાન ની પ્રક્રિયા હાથ ધરવામાં આવી હતી, અને સાડા ચાર કલાક સુધી ઓપરેશન ની પ્રક્રિયા ચાલુ રહી હતી. જે દરમિયાન માતા પિતા અને મંગેતર આંખનું મટકું માર્યા વિના ઓપરેશન થિયેટરની બહાર ખડે પગે હાજર રહ્યા હતા, અને સમાજમાં એક ઉત્તમ ઉદાહરણ પૂરું પાડ્યું હતું.

જેઓ ના આ નિર્ણયને મૃતકના સગા સંબંધીઓ અને અન્ય મિત્ર વર્તુળ વગેરે હર્ષ ભેર વધાવી લીધો હતો.

જામનગરમાં મોમાઈ નગર વિસ્તારમાં રહેતી ૧૬ વર્ષની તરુણી પર ૭૦ વર્ષના ઢગા સહિત ત્રણ શખ્સોએ દુષ્કર્મ ગુજાર્યાની ફરિયાદથી ચકચાર.

જામનગર તા ૧૮, જામનગરમાં મોમાઈ નગર વિસ્તારમાં રહેતી સોળ વર્ષની એક સગીરાને છેલ્લા ૪૮ કલાકના સમયગાળા દરમિયાન ૭૦ વર્ષના એક ઢગા સહિત ત્રણ શખ્સોએ પોતાની હવસનો શિકાર બનાવી અલગ અલગ સ્થળોએ દુષ્કર્મ ગુજાર્યાની ફરિયાદ સિટી બી. ડિવિઝન પોલીસ મથકમાં નોંધાતા ભારે ચકચાર જાગી છે.

જામનગરમાં મોમાઈ નગર વિસ્તારમાં રહેતી સોળ વર્ષની તરૂણીને સૌપ્રથમ ચિરાગ નામના એક શખ્સે પોતાના ઘરે લઈ જઇ તેની સાથે દુષ્કર્મ આચર્યુ હતુ. ત્યાર પછી ધવલ નામના ૨૨ વર્ષના એક શખ્સે પણ સગીરાને પોતાની હવસનો શિકાર બનાવી ને દુષ્કર્મ ગુજાર્યું હતું.

આ ઘટના પછી સાધના કોલોની વિસ્તારમાં રહેતા પ્રવિણભાઇ નામના ૭૦ વર્ષ વયોવૃદ્ધએ પણ માત્ર સોળ વર્ષની સગીરાને પોતાની હવસનો શિકાર બનાવી લીધી હતી.

જ્યારે સગીરાને તબીબી ચકાસણી માટે જી જી હોસ્પિટલમાં મોકલી આપી છે.

વિશ્વ ચકલી દિન નિમિત્તે પક્ષી પ્રેમી ફિરોઝ ખાન પઠાણ અને તેમની ટીમ દ્વારા પાણીના કુંડા અને માળાનું વિતરણ. 

સમગ્ર  વિશ્વભરમાં 20 માર્ચ ચકલી દિન ની ઉજવણી કરવામાં આવે છે.

મોબાઇલ ટાવર અને હવા પ્રદૂષણ ને કારણે ચકલીઓ લુપ્ત થવાની આરે છે ત્યારે લોકોમાં ચકલીને બચાવવા માટે જાગૃતતા કેળવાય તેવા શુભ આશયથી પક્ષી પ્રેમી ફિરોઝ ખાન પઠાણ અને તેમના ગ્રુપ દ્વારા દર વર્ષ ની જેમ આ વર્ષે પણ ચકલીના માળા અને કુંડાનું નિઃશુલ્ક વિતરણ કરવામાં આવનાર છે તે ખૂબ પ્રશંસનીય કાર્ય છે.

ફિરોઝ ખાન પઠાણ અને તેની ટીમ દ્વારા સતત ૧૨ વર્ષથી નિશુલ્ક કુંડા અને  માળાનું વિતરણ કરવામાં આવે છે અને અત્યાર સુધીમાં બાર હજારથી પણ વધુ કુંડા અને માળાનું વિતરણ કરેલ છે.

તારીખ. 20 શનિવારના રોજ ડીકેવી સર્કલ ખાતે સવારે ૯ થી બપોરના ૧ર સુધી દાતાઓના સહયોગથી સેવાકીય કાર્ય સફળ બનાવવા વિશ્વાસ ઠક્કર અંકુર ગોહિલ વગેરે મિત્રો જહેમત ઉઠાવી રહ્યા છે.

---

ખંભાળિયાના વૃદ્ધને મારી નાખવાની ધમકી: મહિલા સહિત ત્રણ કૌટુંબિક સગા સામે ફરિયાદ.

દેશ દેવી ન્યુઝ ખંભાળિયા તા.18

ખંભાળિયા તાલુકાના લાલપરડા ગામે રહેતા નથુભાઈ મેરામણભાઇ પિપરોતર નામના 62 વર્ષના વૃદ્ધને બિભત્સ ગાળો કાઢી, જાનથી મારી નાખવાની ધમકી આપવા સબબ લાલપરડા ગામના રહીશ રોહિત નગાભાઈ પિપરોતર, નગા મેરામણભાઇ પિપરોતર અને ભાવનાબેન નગાભાઈ પિપરોતર સામે અહીંની પોલીસમાં ધોરણસર ફરિયાદ નોંધાવવામાં આવી છે.

જમીન માપણી કરવા અંગે અગાઉ કરવામાં આવેલી અરજી અંગેનો ખાર રાખી, હુમલો કરવામાં આવ્યો હોવાનું પોલીસ ફરિયાદમાં જાહેર થયું છે.

આ સમગ્ર બનાવ અંગે ખંભાળિયા પોલીસે આઈ.પી.સી. કલમ 323, 504, 506 (2) તથા 114 અને જી.પી. એક્ટ મુજબ ગુનો નોંધ્યો છે.

લાલપુર પંથકમાં અજાણ્યા શખ્સની હત્યા, પુરાવાનો નાશ કરવા લાશને સળગાવી નાખતા ચકચાર.

દેશ દેવી ન્યુઝ નેટવર્ક જામનગર.

તા.18
લાલપુર પંથકના પીપળી ગામે રેલ્વે સ્ટેશન વાળી સીમ બાવળની ઝાડીમાં કોઈ અજાણ્યા ઈસમોએ અજાણ્યા પુરૂષ ઉ.વ.પ0 થી 60 વર્ષ વાળાને માથાના ભાગે કોઈ વસ્તુ/પદાર્થ/હથીયાર વડે માર મારી ગંભીર ઈજા કરી મોત નિપજાવ્યાની બનાવથી પંથકમાં ચકચાર મચીજવા પામી છે.

આ ઉપરાંત લાશ ઓળખાય નહીં તેમજ મરણજનારના મૃત્યુનુ કારણ જાણી શકાય નહી તે હેતુથી મરણજનારની લાશને સળગાવી નાંખી પુરાવાનો નાશ કરવાની પણ કોશીષ કરવામાં આવીછે.

આ અંગે લાલપુર પોલીસ સ્ટેશનમાં હેડ કોન્સ. ટીનુભા બચુભા જાડેજા એ ફરીયાદ નોંધાવી છે જેના પરથી પોલીસ આ હત્યાનો ભેદ ઉકેલવા તપાસના ચક્રો ગતિમાન કર્યા છે.