જામનગર જીલ્લામાં યમરાજાનો આંટો: અપમૃત્યુના ચાર બનાવ.

જામનગરમાં દેણું વધી જતા વેપારીની આત્મહત્યા
જામનગરના સ્વામિનારાયણ પાર્ક શેરી નંબર 5 ખાતે રહેતા વેપારી સુરેશભાઈ કાન્તિલાલ ભાઈ લશ્કરી ઉંમર વર્ષ 50 એ ગત તારીખ 8 ના રોજ તિરૂપતિ પાર્ક ખાતે આવેલી એસએ ટેકસો નામની દુકાનમાં ગળા ફાંસો ખાઈને આપઘાત કરી લીધો હતો. મરણ જનાર સુરેશભાઈ નામના વેપારી કોઈ જાતના કરજમાં ડૂબી ગયેલ હોય તેના કારણે આ પગલું ભરી લીધું હતું, આ બનાવની જાણ સ્વામિનારાયણ પાર્ક શેરી નંબર 2 માં રહેતા કેતન સુરેશભાઈ લશ્કરી દ્વારા સીટી-સી ડિવિઝનમાં કરવામાં આવી હતી.

ગુલાબનગરમાં ઉલ્ટી થતા સારવારમાં યુવાનનું મોત
જામનગરના ગુલાબનગર ના વૃંદાવનધામ બેમાં રહેતા હર્ષદભાઈ દિલીપભાઈ નકુમ ઉંમર વર્ષ 27 ને ઘરે ઊલટીઓ થતાં સારવારમાં લાવતા જ્યાં સારવાર દરમિયાન તેમનું મૃત્યુ થયાનું દિલીપભાઈ દ્વારા જાહેર કરાયું હતું.

મોટી નાગાજરના આધેડનું ચક્કર આવ્યા બાદ સારવારમાં મોત.
કાલાવડ તાલુકાના મોટી નાગાજાર ગામમાં રહેતા ઘનશ્યામ બેચરભાઈ ડાંગર ઉંમર વર્ષ 47 ગત તા 8ના રોજ પોતાના ઘરે હતા ત્યારે અચાનક ચક્કર આવતા અને શરીરે પરસેવો વળી જતા જી જી હોસ્પિટલમાં લાવવામાં આવેલ જ્યાં સારવાર દરમિયાન તેમનું મૃત્યુ નિપજ્યું હતું.આ બનાવ અંગે અરવિંદભાઈ ડાંગર દ્વારા ગ્રામ્ય પોલીસમાં જાણ કરવામાં આવી હતી.

ભૂલથી ઝેરી દવા પી લેતા મોત.
લાલપુર તાલુકાના વડ પાચસરા ગામમાં રહેતી કંનીબેન રામાભાઇ ઝાપડા ઉમર વર્ષ 41 ને તાવ આવતો હોય જેથી દવા અને ખેતીકામમાં ઉપયોગમાં લેવાતી દવા પાસે રાખેલ હોય જે ભોગ બનનારના ઘરે લાઇટ ન હોવાથી તાવમાં પીવાની દવા ના બદલે ખેતીમાં ઉપયોગમાં લેવાતી દવા સમજીને પી લેતા તેણીનું મૃત્યુ નીપજયું હતું. આ અંગે રામાભાઇ દ્વારા લાલપુર પોલીસમાં જાણ કરાઇ હતી.

જામનગરમાં ‘રેમડેસીવીર ઇન્જેક્શન કૌભાંડ’

આખરે…સ્વામિનારાયણ કોવીડ હોસ્પિટલના ‘ઇન્જેકશન’ની અનિયમિતતા મામલે ફરિયાદ દાખલ

મૃત અને ડીસ્ચાર્જ થયેલ દર્દીઓને નામે ઇન્જેક્શન લેવાયાનું બહાર આવ્યું.

બે-ત્રણ દિવસ સુધી ઢાંકપીછોડા કામ ન આવતા આખરે પોલીસ જ ફરિયાદ બની.

ફરિયાદ દાખલ થતા હવે પોલીસ તપાસનો ધમધમાટ, નવા ફણગાં ફૂટે તો નવાઇ નહીં!

દેશદેવી ન્યુઝ નેટવર્ક-જામનગર.
જામનગરના સીમાડે આવેલ નાઘેડી નજીકની સ્વામીનારાયણ કોવીડ હોસ્પીટલમા એસડીએમ આસ્થા ડાંગર ઉઢજઙ સહિત્તની ટીમ દ્વારા આ કોવિડ હોસ્પીટલમાં લાબા સમય સુધી એક એક રેકોર્ડની તપાસ કરતા હોય જમાંથી મહત્વપૂર્ણ જાણકારી બહાર આવી હતી જેમાં મૃત અને ડીસ્ચાર્જ થયેલ દર્દીઓને નામે ઇન્જેક્શન લેવાયાનું બહાર આવ્યું છે.

હાલ કોરોના મહામારીમાં રેમડેસીવીર ઇન્જેકશન કોરોના દર્દી માટે સંજીવન સમાન હોય છે અને આ કપરીમાં પરિસ્થિતીમાં આવી દવા અંગે ખોટી માહિતી રજૂ કરવી સહિતની તપાસનો વિષય બની ગઇ છે.

છેલ્લા બે ત્રણ દિવસ સુધી આ અંગે ફરિયાદ દાખલ ન થતા શહેરમાં ચર્ચાનો વિષય બની હતી અને હવે છેવટે પોલીસ જ આ પ્રકરણમાં ફરિયાદી બની છે ત્યારે હવે પોલીસ તપાસનો ધમધમાટ શરૂ થયો છે, આ પ્રકરણમાં નવું અને વધુ કોઇ ફણગાં ફૂટે તો નવાઇ નહીં

પોલીસ દ્વારા નોંધાયેલ ફરિયાદ મુજબ, જામનગર મહાનગર પાલિકા વિસ્તારમાં આવેલ શ્રી સ્વામીનારાયણ ગુરૂકુળ ખાતે શ્રી સ્વામીનારાયણ કોવીડ હોસ્પીટલમાં મરણ ગયેલ દર્દીના નામે રેમડેસીવિર ઇન્જેક્શન મેળવવા બાબતે તથા અન્ય ગેરરીતી બાબતે તા.06/05/2021 ના રોજ સબ ડિવિઝનલ મેજીસ્ટ્રેટશ્રી, જામનગર (શહેર) અને જામનગર જિલ્લાના રેમડેસીવિર ઇન્જેક્શનની ફાળવણીના નોડલ અધિકારી શ્રી આસ્થાબેન ડાંગર તથા ટીમ દ્વારા રૂબરૂ હોસ્પીટલ ખાતે જઈ તપાસ કરતા મરણ ગયેલ દર્દીના નામે રેમડેસીવિર ઇન્જેક્શન મેળવવા બાબતે તથા હોસ્પીટલ ખાતે રેમડેસીવીર ઈન્જેકશનના ખોટી માહીતી આપેલ હોવાનુ જણાયેલ હોય

જે બાબતે  તા.06/05/2021 ના રોજ વિવિધ સમાચાર માધ્યમો મારફતે પ્રસારીત થયેલ સમાચાર બાબતે પોલીસ અધિક્ષકશ્રી, જામનગરનાઓ દ્વારા હુકમ કમાંક-8/ન્યુઝ બનાવ-કાર્યવાહી/3157/2021 તા.07/05/2021 થી નાયબ પોલીસ અધિક્ષકશ્રી, જામનગર ગ્રાામ્ય વિભાગ, જામનગરમાં પ્રસિઘ્ધ થયેલ સમાચાર બાબતે તપાસ કરવા હુકમ થયેલ હોય જે ફુકમ અનુસંધાને નાયબ પોલીસ અધિક્ષકશ્રી, જામનગર ગામ્ય વિભાગ, જામનગર દ્વારા સબ ડિવિઝનલ મેજીસ્ટ્રેટશ્રી, જામનગર (શહેર) અને જામનગર જિલ્લાના રેમડેસીવિર ઇન્જેક્શનની ફાળવણીના નોડલ અધિકારી આસ્થાબેન ડાંગર નાઓ પાસેથી તા.06/05/2021 ના રોજ તેઓએ હોસ્પીટલની લીધેલ વિઝીટ દરમ્યાન કરેલ રોજકામ તથા તપાસના કાગળો સાથેની માહિતી માંગતા જે આવેલ માહિતીમાં શ્રી સ્વામીનારાયણ કોવિડ હોસ્પીટલ જામનગર ના જવાબદાર ડોક્ટર શ્રી કૈડીકારીયા તા.06/05/2021 ના રોજ લીધેલ નીવેદન તેમજ હોસ્પીટલના ઇન્ડેન્ટ પત્ર તથા આવેલ માહિતી જોતા શ્રી સ્વામીનારાયણ કોવિડ હોસ્પીટલ જામનગર ખાતે તા.27/04/2021 ના રોજ કોરોના દર્દી રામચંદ મોહનલાલ મુલાણી દાખલ થયેલ અને તેઓનું હોસ્પીટલ ખાતે તા.03/05/2021 ના રોજ મરણ ગયેલ તેમ છતા આ દર્દીના નામે તા 04/05/2021 તથા તા.05/05/ર0ર1 તથા તા,06/05/202 ના રોજ રેમડેસીવિર ઇન્જેક્શનની માંગણી કરેલ હોવાનું જાણવા મળેલ હતું.

બીજા દર્દી હરદિપભાઇ મેન્દપરા તા.03/05/2021 ના રોજ ડીસ્યાર્જ થયેલ હોય તેમ છતા તેઓના નામે ડીસ્યાર્જ થયા પછી પણ તા.04/05/2021 તથા તા.05/05/2021 તથા તા.06/05/2021 ના રોજ રેમડેસીવિર ઇન્જેક્શનની માંગણી કરેલ હતી.

ત્રીજા દર્દી બોબેન્દર સિંધ રાણાના ઇન્જેક્શનના ડોઝ તા.01/05/2021 ના રોજ પુર્ણ થઇ ગયેલ હોય તેમ છતા તેખોના નામે તા.04/05/2021 ના રોજ રેમડેસીવિર ઇન્જેક્શનની માંગણી કરેલ હોવાનું તા.06/05/2021 ના રોજ ઇન્ડેન્ટ ફોર્મમાં રેમડેસીવિર ઇન્જેક્શનનો હાથ ઉપરનો સ્ટોક નીલ બતાવેલ પરંતુ સબ ડિવિઝનલ મેજીસ્ટ્રેટશ્રી, જામનગર (શહેર) અને જામનગર જિલ્લાના રેમડેસીવિર ઇન્જેક્સનની ફાળવણીના નોડલ અધિકારી નાઓની સ્થળ તપાસ દરમ્યાન 22 રેમડેસીવિર ઇન્જેક્શન હોસ્પીટલ ખાતે સ્ટોકમાં હોવાનું જાણમાં આવેલ છે.

કોરોના મહામારી સમયમા રેમડેસીવીર ઈન્જેકશાનની આવશ્યક ચીજ વસ્તુ હેઠળ ગણવામા આવેલ હોય તેમ છતા હોસ્પીટલના જવાબદાર ડોક્ટર કે.ડી કારીયા નાઓએ રેમડેસીવિર ઇન્જેક્શન મેળવવા સબ ડિવિઝનલ મેજીસ્ટ્રેટશ્રી, જામનગર (શહેર) અને જામનગર જિલ્લાના રેમડેસીવિર ઇન્જેક્શનની ફાળવણીના નોડલ અધિકારીશ્રી સમક્ષ ખોટી માહિતી રજુ કરેલ હોય જેથી પ્રથમ દ્રષ્ટીએ પોલીસ અધિકારનો ગુન્હો બનતો હોય જેથી શ્રી સ્વામીનારાયણ કોવિડ હોસ્પીટલ ના જવાબદાર ડોક્ટર કે.ડી.કારીયા તથા તપાસમાં ખુલે તે વ્યક્તિઓ વિરૂઘ્ધ ઇ.પી.કો. કલમ 177 તથા ધી ડીઝાસ્ટર મેનેજમેન્ટ એક્ટ 2005 ની કલમ-પર તથા આવશ્યક ચીજવસ્તુ અધિનિયમ 1955 ની કલમ-3,7 મુજબ કાયદેસર કાર્યવાહી કરવા ફરિયાદ નોંધાઇ છે.

તા.06/05/2021 ના રોજ હોસ્પીટલની વિઝીટ તથા તપાસ કરનાર સબ ડિવિઝનલ મેજીસ્ટ્રેટશ્રી. જામનગર (શહેર) અને જામનગર જિલ્લાના રેમડેસીવિર ઇન્જેક્શનની ફાળવણીના નોડલ અધિકારી તથા તેઓની કમીટીના સભ્યો છે.

આ કેસની વતપાસ સી.એમ કાંટેલીયા (પો સબ. ઇન્સ-જામ પંચકોષી બી ડિવિ પો.સ્ટે-જામનગર) ચલાવી રહ્યા છે.

જામનગર: પત્નિને હેરાન કરનાર શખસ વિરૂઘ્ધ ફરિયાદ કરતા આધેડ ઉપર હુમલો.

જામનગર: જામનગર શરૂ સેકશન રોડ કુકડા કેન્દ્ર પાસે આવાસ બિલ્ડીંગ ખાતે રહેતા મહેશ ભાઈલાલભાઈ મારડિયા ઉંમર વર્ષ 50 દ્વારા સીટી-એ ડિવિઝનમાં રફીક દોસમામદ સુમરા તથા 2 અજાણ્યા ઈસમો વિરૂદ્ધ આઈપીસીની કલમ 325, 324, 506(2), 504, 114 અને જીપીએ કલમ 135(1) મુજબ ફરિયાદ નોંધાવી હતી.

જેમાં જણાવ્યા મુજબ ફરિયાદીની પત્ની સાથે આરોપી રફીક જબર જસ્તીથી મૈત્રી સંબંધ રાખવા દબાણ કરતો હોય જેથી ફરિયાદીએ આરોપી વિરુદ્ધ અગાઉ પોલીસમાં અરજી કરી હતી.

જે બાબતનો ખાર રાખીને આરોપીઓ તારીખ 6 ના રોજ દિગ્વિજય પ્લોટ વાડી પાસે ફરિયાદીના હાથ પકડી રાખી આરોપી રફીકે પાઇપ વડે પગ અને વાસા માં જેમતેમ ધા મારી, બંને પગમાં ફેક્ચર અને હાથના ભાગે ગંભીર ઇજા પહોંચાડી હતી. તેમજ અપશબ્દો બોલી, મારી નાખવાની ધમકી આપી નાસી છૂટયા હતા ફરિયાદના આધારે પોલીસ દ્વારા તપાસ હાથ ધરવામાં આવી છે.

દેવભૂમિમાં સામૂહિક આત્મહત્યાએ જગાવી ચકચાર: પરિવારના ત્રણ સભ્યોએ ઝેર પી અનંતની વાટ પકડી..

દેશ દેવી ન્યુઝ નેટવર્ક દ્વારકા: દ્વારકામાં ટીવી સ્ટેશન વિસ્તારમાં રહેતા અને છૂટક ફરસાણ અંગેના વ્યવસાય સાથે સંકળાયેલા જયેશભાઈ જશવંતભાઈ જૈન નામના 60 વર્ષીય વૃદ્ધ બે દિવસ પહેલા કોરોનાગ્રસ્ત થયા હતા. જેથી તેમને સારવાર અર્થે સ્થાનિક હોસ્પિટલમાં દાખલ કરવામાં આવ્યા હતા.

વયોવૃદ્ધ મોભી જયેશભાઈએ ગત રાત્રીના આશરે દોઢેક વાગ્યે અંતિમ શ્વાસ ખેંચતા સવારે તેમના પરિવારજનો દ્વારા જયેશભાઈની અંતિમ વિધિ કરવામાં આવી હતી. મૃતકના 57 વર્ષીય ધર્મપત્ની સાધનાબેન તથા 35 વર્ષના પુત્ર દુર્ગેશભાઈ અને 39 વર્ષના પુત્ર કમલેશભાઈ દ્વારા આજરોજ સવારે તેમના અગ્નિદાહની વિધિ સંપન્ન કર્યા બાદ સવારે આશરે સાડા છ વાગ્યે ઘરે પહોંચ્યા હતા.

આ પછી બંધ રહેલા મકાનમાં નિત્યક્રમ મુજબ દૂધ દેવા માટે દૂધવાળાએ ઘર ખોલ્યું ત્યારે તેમને આ સ્થળે ત્રણ મૃતદેહ પડયા હોવાનું ધ્યાને આવ્યું હતું. આ ત્રણેય મૃતદેહ જયેશભાઈના ધર્મપત્ની સાધનાબેન, તથા દુર્ગેશભાઈ અને કમલેશભાઈના હોવાનું જાહેર થયું હતું.

આ સમગ્ર બનાવ અંગે સ્થાનિક પોલીસને જાણ કરાતા દ્વારકાના પી.આઈ. જી.આર. ગઢવી તથા સ્ટાફ ઘટનાસ્થળે દોડી ગયો હતો અને સ્થળ પર જોતા આ ત્રણે વ્યક્તિઓએ ઘરના મોભીના અવસાનથી વ્યથિત થઈ અને ઝેરી દવા પીને આપઘાત કરી લીધો હોવાનું પ્રાથમિક અનુમાન વ્યક્ત કરવામાં આવ્યું હતું. પોલીસે આ ત્રણેય પરિવારજનોના મૃતદેહનો કબ્જો મેળવી અને પોસ્ટમોર્ટમ સહિતની કાર્યવાહી કરી હતી. આ કરુણ બનાવે સમગ્ર દ્વારકા પંથકમાં ભારે શોક સાથે અરેરાટી પ્રસરાવી છે.

જામનગરના પટેલ કોલોની વિસ્તારના ગેલેરીયા કોમ્પલેકસમાંથી મળ્યો યુવાનનો મૃતદેહ.

દેશ દેવી ન્યુઝ નેટવર્ક જામનગર.

જામનગર શહેરના પટેલ કોલોની શેરી નં. ૨ માં આવેલા ગેલેરીયા કોમ્પલેકસના પાર્કિંગમાંથી આજે સવારે ૧૮ વર્ષ જેટલી ઉંમરના અજ્ઞાત યુવાનનો મૃતદેહ મળી આવતાં પોલીસ ઘટના સ્થળે પહોંચી ગઇ હતી.

વિજ આંચકાથી આ યુવાનનું મૃત્યુ નિપજયાનાં તારણ સાથે પોલીસે પોસ્ટમ મોર્ટમ કરાવવા સહિતની કાર્યવાહી હાથ ધરી છે.

સૂત્રોમાંથી મળતી વિગત મુજબ જામનગર શહેરના પટેલ કોલોની શેરી નંબર ૨ પાસે આવેલ ગેલેરીયા કોમ્પ્લેક્ષના પાર્કિંગ માં અજયના યુવકની લાશ પડી હોવાની જાણ થતા ઘટનાસ્થળે તાત્કાલિક પોલીસ પહોંચી ગઈ અને જીવંટભરી તપાસ હાથ ધરેલ મૃત વ્યક્તિ અઢાર વર્ષની ઉંમરનો હોય અને ચોરીના ઈરાદે કોમ્પ્લેક્ષના પાર્કિંગ માં આવેલ હોય અને જીવંત ઈલેક્ટ્રીક વાયર પકડી લેતા વીજ ઝટકાથી મોત નીપજ્યું હોય તેવું પ્રાથમિક તપાસમાં જાણવા મળેલ છે. હાલ પોલીસે મૃતદેહનો કબજો સંભાળી જામનગરની જી.જી હોસ્પિટલ ખાતે પોસ્ટ મોર્ટમ અર્થે ખસડેલ છે.અને તપાસનો ધમધમાટ શરૂ કર્યો છે.