દેવભૂમિ દ્વારકા જિલ્લા પોલીસના 103 પોલીસ કર્મીઓને બઢતી આદેશ કરતા એસ.પી.

ખંભાળિયા: દેવભૂમિ દ્વારકા જિલ્લા પોલીસ વડા સુનિલ જોશી કડક કાયદાકીય કાર્યવાહી માટે જિલ્લા તથા પોલીસ બેડમાં જાણીતા છે. સાથે સાથે સરળ વ્યક્તિત્વ અને માનવતાની પણ અનેક બાબતો સામે આવી છે. આ વચ્ચે જિલ્લા પોલીસ વડા દ્વારા પોલીસ કર્મીઓ સાથે પણ યોગ્ય ન્યાય તથા પ્રોત્સાહન સ્વરૂપે સામૂહિક અને નોંધપાત્ર સંખ્યામાં બઢતીના ઓર્ડરો જારી કર્યા છે.

પોલીસ અધિક્ષક દ્વારા ગુરુવારે કરવામાં આવેલા સામૂહિક પ્રમોશનના ઓર્ડરમાં જિલ્લાના મુખ્ય મથક ખંભાળિયા સહિતના જુદા જુદા પોલીસ મથકમાં ફરજ બજાવતા 22 અનાર્મડ હેડ કોન્સ્ટેબલને અનાર્મડ હેડ કોસ્ટેબલ, 13 આર્મડ હેડ કોન્સ્ટેબલને આર્મડ એ.એસ.આઇ., 38 અનાર્મડ પોલીસ કોન્સ્ટેબલને અનાર્મડ પોલીસ હેડ કોન્સ્ટેબલ, તથા 30 આર્મડ પોલીસ કોન્સ્ટેબલને આર્મડ હેડ કોસ્ટેબલના પ્રમોશન આપવામાં આવ્યા છે. બદલી પામેલા આ પોલીસ કર્મીઓ સ્થાનિક પોલીસ મથકમાં જ સેવાઓ આપશે. હાલ કોરોના ના સમયમાં નોંધપાત્ર કામગીરી કરનારા પોલીસ સ્ટાફને પ્રોત્સાહિત કરવામાં આવ્યા છે.

હાલ કોરોના મહામારીમાં જિલ્લા પોલીસ વડા દ્વારા માનવતાવાદી અભિગમ અપનાવી અને પોલીસ સ્ટાફ કામગીરી પ્રત્યે કાર્યદક્ષતા વધુ સુદ્રઢ બને તે માટે પ્રમોશન આપી, આ 103 પોલીસ કર્મીઓને બિરદાવવામાં આવ્યા છે.

ચોમાસા પહેલા ‘જામ્યુકો’ હરકતમાં આવ્યું : શહેરની ભયજનક/જર્જરીત ઇમારોતના સલામતી સર્ટીફીકટ લેવા આદેશ.

કોઈપણ પરિસ્થિતીને લીધે જાનહાનિ થશે તો તેની સંપૂર્ણ જવાબદારી જે-તે ઇમારતોના ભોગવટો કરનાર આસામી આસામી/ માલિકની રહેશે.

જામનગર: ધી જી.પી.એમ.સી. એકટ-1949 ની કલમ નં.264 મુજબ જામનગર મહાનગરપાલિકાના હદ વિસ્તારમાં પ્રિ-મોન્સુનની કામગીરીના ભાગરૂપે ટાઉન પ્લાનીંગ શાખાના વોર્ડ એન્જીનીયરો ધ્વારા શહેરના જુદા-જુદા વિસ્તારોમાં ભયજનક/ જર્જરીત ઈમારતો કે ઈમારતોના ભાગોનો સર્વે કરી આ ભયજનક ઈમારત/ ઈમારતોનો ભાગ સેઈફ સ્ટેજે લાવવા કે દુર કરવા અંગે નોટીસો ઈસ્યુ કરી ભયજનક બાંધકામ/ બાંધકામના ભાગને સેઈફ સ્ટેજે સ્વખર્ચે લાવવા માટે કામગીરી કરવામાં આવેલ છે.

આ જાહેર નોટીસથી વર્ષ : 2021 ની પ્રિ-મોન્સુન કામગીરીના ભાગરૂપે આવા જામનગર મહાનગરપાલિકાની હદ-વિસ્તારમાં આવેલ ભયજનક/ જર્જરીત ઈમારતો કે ઈમારતોના ભાગમાં રહેઠાણ કરનાર તમામ આસામીઓને તાત્કાલિક બાંધકામને સેઈફ સ્ટેજે લાવી જામનગર મહાનગરપાલિકાના માન્ય સ્ટ્રકચર એન્જીનીયર પાસેથી સ્ટેબીલીટી અંગેનું સર્ટીફીકેટ મેળવી ટાઉન પ્લાનીંગ શાખામાં રજુ કરવું. અન્યથા કોઈપણ કુદરતી હોનારત, ભારે વરસાદ, આકસ્મિક બનાવો, આગ લાગવાની ઘટનાઓ કે અન્ય કોઈપણ પરિસ્થિતીને લીધે જાનહાનિ થશે તો તેની સંપૂર્ણ જવાબદારી જે-તે ઇમારતોના ભોગવટો કરનાર આસામી આસામી/ માલિકની રહેશે, જેની લગત આસામીએ નોંધ લેવી.

વધુમાં જણાવવાનું કે, જામનગર મહાનગરપાલિકાના વિસ્તારમાં રહેતા તમામ આસામીઓને પણ પોતાની રહેણાંકની આસપાસ જો આવી કોઈ ભયજનક કે જર્જરીત ઈમારતો આવેલ હોય તો ટાઉન પ્લાનીંગ શાખાને તુરંત તેની લેખિતમાં જાણ કરવાની રહેશે. જેની દરેકએ નોંધ લેવા વિનંતી.

સીટી એન્જીનીયરીંગ, ટાઉન પ્લાનીંગ શાખા-જામનગર મહાનગરપાલિકાની યાદીમાં જણાવાયું છે.

દ્વારકામાં ઘરફોડ ચોરીનો આતંક મચાવનારી ગેંગના 3 સભ્યની ધરપકડ

દેશ દેવી ન્યુઝ નેટવર્ક દ્વારકા : દ્વારકા જિલ્લાના દ્વારકા પોલીસ સ્ટેશન તથા કલ્યાણપુર પોલીસ સ્ટેશનના ઘરફોર તથા બાઈક ચોરીઓ બની હતી. દ્વારકા પોલીસના પીએસઆઇ ચાવડા, પો. હેડ કોન્સ્ટેબલ નરેશભાઇ, મુકેશભાઇ તથા કુલદિપસિંહ જાડેજાને દ્વારકા પંથકમાં સિકલીગર ગેંગ કાર્યરત થઇ હોવાની જાણકારી મળી હતી.

આ જાણકારીના માધ્યમથી સિકલીગર ગેંગના ત્રણ સભ્યો શેરસિંગ ઉર્ફે સુરજસિંગ રણજીત સિંગ ખીચ્ચી, (ઉ.વ.36), સતપાલસિંગ સતનામસિંગ ટાંક, (ઉ.વ.33) તથા જસપાલસિંગ સંતોકસિંગ જુણી, (ઉ.વ.19) જામનગર હોવાની બાતમી મળતા, આ ત્રણેય આરોપીને દબોચી લીધા હતા.

દ્વારકા તથા કલ્યાણપુરમાં ઘરફોડ ચોરી કરનાર ત્રણેયની ગેંગને દ્વારકા પોલીસે કુલ 49000ના મુદ્દામાલ સાથે ઝડપ્યા હતા. બનાવની વિગત મુજબ તારીખ ચોવીસ તથા પચ્ચીસ એપ્રિલ ના રાત્રિ દરમ્યાન દ્વારકાના મુરલીધર ટાઉનશિપ અને જલારામ સોસાયટી ખાતે ઘરફોડ ચોરીના બનાવ બન્યા હતા અને તે અંગે દ્વારકા પોલીસ સ્ટેશન ખાતે ગુન્હા રજીસ્ટર થયેલ હોય અને તે બાબતે દ્વારકા જિલ્લા ડીવાયએસપી ચૌધરીના માર્ગદર્શન હેઠળ દ્વારકા પોલીસ પીએસઆઇ એ. આઇ. ચાવડાએ  ટીમ સાથે મળી સિકલિગર ગેંગને ટેકનિકલ સરવેલન્સની મદદથી અને સીસી કેમેરાને આધારે દ્વારકા પોલીસ સ્ટેશને ચોરીનો ભેદ ઉકેલી અને આ ત્રણ શખસોને ઝડપી કોરોના ટેસ્ટ કરાવી, જે ટેસ્ટ નેગેટિવ આવતા અટક કરી છે.

ખંભાળિયા: બર્થ-ડે પાર્ટીના રંગમાં પોલીસનોભંગ: જાહેરનામાના ભંગ સબબ 3ની અટકાયત, પાંચ ફરાર.

ખંભાળિયા: ખંભાળિયા પોલીસ અધિકારી તથા સ્ટાફ દ્વારા રાત્રિના સમયે હાથ ધરવામાં આવેલા પેટ્રોલીંગ દરમ્યાન ખંભાળિયા નજીકના હાઇવે માર્ગ પર આવેલી એક ગાર્ડન રેસ્ટોરન્ટ પાસે ઉભા રહીને કેટલાક શખ્સો ફટાકડા ફોડી બર્થ ડે પાર્ટી મનાવી રહ્યા હોવાનું પોલીસ સ્ટાફના ધ્યાને આવ્યું હતું. જેથી પોલીસ કાફલો આ સ્થળે ધસી ગયો હતો.

આ સ્થળે કોરોના મહામારીને અવગણીને માસ્ક પહેર્યા વગર કેકની છોળો ઉડાડી અને સોશિયલ ડિસ્ટન્સના ધજાગરા કરતા યુવાનો પોલીસને હાથ લાગ્યા હતા. જેમાં પોલીસે કરણ વિનોદભાઈ ઘેડિયા (ઉ.વ. 35), આશિષ જીતેન્દ્રભાઈ જોષી (ઉ.વ. 21) અને અર્જુન કરસનભાઈ આસાણી (ઉ.વ. 19) નામના ત્રણ શખ્સોને ઝડપી લીધા હતા.

પોલીસ દરોડા દરમિયાન રાજેશ રામાભાઇ ખૂટી, કિશન ઉમેશભાઈ ગોકાણી, જતીન ગોસાઇ, કૌશિક નકુમ, અને પ્રવીણ ગાગીયા નામના પાંચ શખ્સો નાસી છૂટવામાં સફળ થયા હતા. પોલીસે ત્રણ શખ્સોની અટકાયત કરી, જાહેરનામા ભંગ સહિતની કલમ મુજબ ગુનો નોંધી, અન્ય પાંચ શખ્સોની શોધખોળ હાથ ધરી છે.

ચોમાસા દરમિયાન જિલ્લામાં જાન માલની કોઈ નુકસાની ન થાય તે માટે આગોતરું આયોજન હાથ ધરવા સંબંધિત વિભાગોને જીલ્લા કલેક્ટરની સૂચના.

જામનગર જિલ્લા કલેક્ટર ના અધ્યક્ષ સ્થાને વીડિયો કોન્ફરન્સના માધ્યમથી પ્રિ-મોન્સૂન કામગીરી અંગેની બેઠક યોજાઇ.

જામનગર, વીડિયો કોન્ફરન્સના માધ્યમથી જિલ્લા કલેક્ટર શ્રી રવિશંકરના અધ્યક્ષ સ્થાને પ્રિ-મોન્સૂન કામગીરી અંગેની બેઠક યોજાઇ હતી.જેમાં ઉપસ્થિત રહેલ સંબંધિત વિભાગોના અધિકારીશ્રીઓને જિલ્લા કલેક્ટરશ્રીએ ચોમાસા પૂર્વે રાખવાની તકેદારી વિશે માર્ગદર્શન પૂરું પાડી જરૂરી સૂચનો કર્યા હતા.

આ બેઠકમાં જિલ્લા કલેક્ટરશ્રીએ વિવિધ વિભાગોના અધિકારીશ્રીઓને રાહત અને બચાવના સાધનોની પૂર્વ ચકાસણી કરવા, જર્જરિત મકાનો તથા જોખમી વૃક્ષો દૂર કરવા, જિલ્લાના આશ્રયસ્થાનોની ચકાસણી કરવા, તરવૈયાઓની યાદી તૈયાર કરવા, ગટર તથા વરસાદી વહેણની ચકાસણી કરી પાણીના યોગ્ય નિકાલની વ્યવસ્થા કરવા, માછીમારોને સાવચેત કરવા, રેઇન ગેઇજની ચકાસણી કરવા,રસ્તાઓનું સમારકામ કરવા, રાઉન્ડ ધ ક્લોક કંટ્રોલ રૂમ શરૂ કરવા, વરસાદી આંકડાઓ કંટ્રોલ રૂમ ખાતે સમયસર નોંધાવવા, તળાવોને ઊંડા ઉતારવા, ડેમ ઓવરફ્લો થવાના સંજોગોમાં તાત્કાલિક નદીકાંઠાના ગામોને સાવચેત કરવા, જે.સી.બી, બુલડોઝર, ટ્રક વગેરે વાહનોની યાદી તૈયાર કરવી, સ્વૈચ્છીક સંસ્થાઓની યાદી બનાવવી, વીજ પુરવઠો ન ખોરવાય તે અંગેની વ્યવસ્થા કરવી, વાયર લેસ સેટ તથા વાયરલેસ ઓપરેટર ઉપલબ્ધ કરાવવા, આરોગ્ય વ્યવસ્થા સુદ્રઢ કરવી, દવાઓની વ્યવસ્થા કરવી, પશુઓમાં રોગચાળો ન ફેલાય તે માટે પૂરતી તકેદારી રાખવી, તાલુકા ગ્રામ્ય કક્ષાએ આપદા મિત્રો તૈયાર કરવા, જોખમી હોર્ડિંગ્સ દૂર કરવા, ઇંધણનો રિઝર્વ સ્ટોક રાખવો, ઘાસનો સ્ટોક ઉપલબ્ધ રાખવો, ગોદામોમાં અનાજ સુરક્ષિત રહે તેની તકેદારી રાખવી, શાળાના મકાનોની ચકાસણી કરવી, વીજ લાઈનની ચકાસણી કરવી, વગેરે બાબતે તાત્કાલિક યોગ્ય કાર્યવાહી હાથ ધરવા સૂચના આપી હતી.આ તમામ વ્યવસ્થાઓમાં કોવિડ પ્રોટોકોલનું યોગ્ય પાલન થાય તેની તકેદારી રાખવા પણ જિલ્લા કલેક્ટરશ્રીએ તાકીદ કરી હતી.

આ બેઠકમાં જિલ્લા વિકાસ અધિકારી શ્રી વીપીન ગર્ગ અધિક કલેક્ટર શ્રી રાજેન્દ્ર સરવૈયા, જામનગર મહાનગરપાલિકા, માર્ગ અને મકાન વિભાગ, ફિશરીઝ વિભાગ, સિંચાઈ વિભાગ, પી.જી.વી.સી.એલ, આરોગ્ય વિભાગ, પશુપાલન વિભાગ, માહિતી વિભાગ, વન વિભાગ, ખેતીવાડી વિભાગ, આર.ટી.ઓ. તથા એસ.ટી.વિભાગ, શિક્ષણ વિભાગ, બી.એસ.એન.એલ, પોલીસ તથા હોમગર્ડ્સ વિભાગ, મામલતદારશ્રી, તાલુકા વિકાસ અધિકારીશ્રી સહિતના જિલ્લાના વિવિધ વિભાગોના અધિકારીશ્રીઓ ઉપસ્થિત રહ્યા હતા.

જિલ્લા કલેક્ટરશ્રીએ આ તમામ વિભાગોને પ્રિ-મોન્સૂન અંતર્ગત કરવાની થતી કામગીરી અંગેની વિસ્તૃત જાણકારી આપી હતી.તેમજ વિભાગો દ્વારા હાલ કેવી તૈયારીઓ કરવામાં આવી છે તેની સમીક્ષા કરી જરૂરી માર્ગદર્શન પૂરું પાડ્યું હતું.