જામનગર નજીક ઔદ્યોગિક વસાહત વિસ્તારમાં શ્રમિક પરિવારની ૫ વર્ષની બાળકી પર દુષ્કર્મના બનાવથી ભારે ચકચાર

• પોલીસે સીસીટીવી કેમેરા અને નંબર ઇન્ટેલિજન્સની મદદથી આરોપીને ઝડપી લીધો: વધુ પૂછપરછ બાદ જેલહવાલે કર્યો

દેશ દેવી ન્યુઝ જામનગર તા ૨૯, જૂન ૨૬ જામનગર નજીક આવેલા એક ઔદ્યોગિક વિસ્તાર સાથે સંકળાયેલા ગામમાં રહેતા એક શ્રમિક પરિવારની પાંચ વર્ષની બાળકી સાથે દુષ્કર્મ થયાની ગંભીર ઘટના સામે આવતાં સમગ્ર વિસ્તારમાં ભારે ચકચાર મચી ગઈ છે. આ મામલે પોલીસે તુરંત હરકતમાં આવી જઇ આરોપીની ધરપકડ કરી કાયદેસરની કાર્યવાહી હાથ ધરી જેલ હવાલે કરી દીધો છે.પ્રાથમિક વિગતો મુજબ, પરપ્રાંતીય શ્રમિક પરિવારની પાંચ વર્ષની બાળકી ગામ વિસ્તારમાં હતી ત્યારે ગામના જ એક ૩૫ વર્ષીય શખ્સે તેને એકાંત સ્થળે લઈ જઈ તેની સાથે દુષ્કર્મ આચર્યું હોવાનો આરોપ છે. ઘટનાની જાણ થતાં સમગ્ર મામલો પંચકોશી બી. ડિવિઝન પોલીસ મથકમાં લઈ જવાયો હતો. ભોગ બનનાર સગીરાની માતાની ફરિયાદના આધારે પંચકોશી બી. ડિવિઝન પોલીસે તુંરત એક્શન મોડમાં આવી જઈ સીસીટીવી કેમેરા ચકાસ્યા હતા, તેમજ મોબાઇલ ઇન્ટેલિજન્સ ની મદદ લઈને આરોપીને શોધી કાઢ્યો હતો. પીડિત બાળકીની તબીબી તપાસ માટે જામનગરની જી.જી. હોસ્પિટલ ખાતે ખસેડવામાં આવી હતી, ત્યારબાદ તેણીને રજા આપી દેવાતાં માતા સાથે મોકલી દેવામાં આવી હતી.આ અંગે પીડિતાની માતાની ફરિયાદના આધારે પંચકોશી ‘બી’ ડિવિઝનના પી.આઈ. વીરેન રાઠોડ અને તેઓની સમગ્ર પોલીસ ટીમે આરોપી સામે બળાત્કાર તેમજ પોક્સો સહિતની સંબંધિત કલમો હેઠળ ગુનો નોંધી વધુ તપાસ હાથ ધરી છે. પોલીસે આરોપીની ધરપકડ કરી કોર્ટમાં રજૂ કર્યા બાદ તેને જેલહવાલે કર્યો છે.ઘટનાને પગલે સમગ્ર વિસ્તારમાં ભારે રોષ અને ચિંતા વ્યાપી ગઈ છે. પોલીસ દ્વારા કેસની વધુ તપાસ ચાલુ રાખવામાં આવી છે.

જામનગર તાલુકા ના પીપરટોડા ગામી સીમ માંથી ખનીજ ચોરી ઝડપાઈ ; રૂ.૮૮ લાખ નો મુદામાલ કબજે લેવાયો

દેશ દેવી ન્યુઝ જામનગર તા. ૨૯ જૂન ૨૬, જામનગર તાલુકા ના પીપરટોડા ગામ ની સીમ માંથી પોલીસે ખનીજ ચોરી ઝડપી પાડી રૂ ૮૮ લાખ નો મુદામાલ કબજે કર્યો છે. જામનગર તાલૂકાના પીપરટોડા ગામ ની સીમ વિસ્તારમાં આવેલ વાગડીયા સીમ માંથી ગેરકાયદેસર ખનીજ મોરમ ચોરી થતી હોવા ની બાતમી ના આધારે પોલીસે દરોડો પાડ્યો હતો. અને બે નંગ જે.સી.બી. તથા ચાર નંગ ટ્રેકટર ટ્રોલી મળી કુલ રૂપીયા.૮૮,૦૦,૦૦૦ નો મુદામાલ લાલપુર પોલીસે કબજે કર્યો હતોલાલપુર પોલીસ સ્ટેશન ના પો.ઈન્સ. કે.એલ.ગળચર તથા પો.સબ ઈન્સ. એસ.પી.ગોહિલ તથા સ્ટાફ દ્રારા આ કામગીરી કરવામાં આવી હતી.

જામનગર તાલુકાના બેડ ગામે સનાતનની આસ્થા ને ઠેસ પહોંચાડે તેવો કિસ્સો : તસ્કરોએ પદયાત્રીને પણ છોડ્યા નહીં

• જામનગર ખંભાળિયા હાઈવે પર પદયાત્રી સંન્યાસીની સાયકલમાંથી રોકડ રકમ અને સામાનની ચોરી ની ત્રણ સામે પોલીસ ફરિયાદ

દેશ દેવી ન્યુઝ જામનગર તા ૨૭, જૂન ૨૬ જામનગર તાલુકા વિસ્તારમાં પદયાત્રા દરમિયાન એક વૃદ્ધ સંન્યાસીની સાયકલમાંથી રોકડ રકમ અને સામાનની ચોરી થયાની ફરિયાદ નોંધાઈ છે. જેથી સનાતનીઓમાં રોષ ફેલાયો છે.ફરિયાદી સકારામજી મંગનાજી ચૌહાણ (ઉ.વ. ૭૬), મૂળ રાજસ્થાનના બાલોતરા જિલ્લાના અસાડા ગામના રહેવાસી અને સંન્યાસી જીવન જીવતા હોવાનું જણાવ્યું છે. તેઓ દ્વારકાની પદયાત્રા માટે પોતાના ગામેથી ત્રણ પૈડાવાળી સાયકલ સાથે નીકળ્યા હતા. જેઓ રાજસ્થાનથી ચાર પગે ચાલીને પોતાની માનતા ઉતારવા માટે દ્વારકાધીશના ચરણે શીશ ઝુકાવવા માટે જઈ રહ્યા છેફરિયાદ મુજબ, તા. ૨૫.૬.૨૦૨૬ના રોજ તેઓ જામનગરના બેડ ટોલનાકા નજીક આવેલી ખોડલ હોટલ ખાતે રોકાયા હતા. ત્યારબાદ તા. ૨૬ના રોજ વહેલી સવારે પદયાત્રા શરૂ કરી જામનગર-ખંભાળિયા હાઈવે પર બેડ નદી નજીક આવેલા બાપા સીતારામની મઢુલી પાસે પહોંચ્યા હતા. ત્યાં તેમણે પોતાની સાયકલ અને સામાન રોડની બાજુમાં મૂકી સામે આવેલા મંદિરમાં અગરબત્તી અને પૂજા માટે ગયા હતા.આ દરમિયાન એક અજાણ્યો વ્યક્તિ તેમની સાયકલ પાસે આવી ભેટ સ્વરૂપે રૂ.૫૦ આપીને વાતચીત કરવા લાગ્યો હતો. ત્યારબાદ તે વ્યક્તિ સાયકલ તરફ ગયો હતો, જ્યાં અન્ય બે વ્યક્તિઓ પણ હાજર હતા. ફરિયાદી પૂજા પૂર્ણ કરીને પરત ફર્યા ત્યારે ત્રણેય શખ્સો મોટરસાયકલ પર જતા રહ્યા હતા.સાયકલ પાસે પહોંચી તપાસ કરતા કપડાં, સાલ અને આધારકાર્ડ સહિતના દસ્તાવેજો ભરેલો થેલો તેમજ સાયકલની પાછળ લગાવેલી પતરાની પેટીમાં રાખેલા ભેટ-સોગાત રૂપે મળેલા આશરે રૂપિયા ૫૦,૦૦૦ થી રૂ.૬૦,૦૦૦ રોકડા ગાયબ હોવાનું જણાયું હતું.ફરિયાદીએ જણાવ્યું છે કે ત્રણેય આરોપીઓ અજાણ્યા હતા, જેમાં બેની ઊંચાઈ ઓછી અને એકની ઊંચાઈ વધુ હતી. તેમની સાથે વાત કરનાર વ્યક્તિને તેઓ ઓળખી શકે તેમ હોવાનું પણ જણાવ્યું છે.આ અંગે અજાણ્યા ત્રણ શખ્સો સામે ચોરીનો ગુનો નોંધાવી પોલીસ દ્વારા વધુ તપાસ હાથ ધરવામાં આવી છે. સમગ્ર બનાવમા સિક્કા પોલીસ ઊંડાણપૂર્વકની તપાસ કરી રહી છે, અને આરોપીઓને શોધવા માટે અલગ અલગ સીસીટીવી કેમેરા વગેરેની મદદ લેવામાં આવી રહી છે.

જામનગરમાં માથાભારે શખ્સ સામે પાસા હેઠળ કાર્યવાહી : વડોદરા ની જેલમાં ધકેલાયો

દેશ દેવી ન્યુઝ જામનગર, તા. ૨૫ જૂન ૨૬, જામનગર જિલ્લામાં કાયદો અને વ્યવસ્થાની સ્થિતિ જાળવવા તથા અસામાજિક તત્વો સામે કડક કાર્યવાહી અંતર્ગત જામનગર જિલ્લા પોલીસે એક માથાભારે વ્યક્તિ સામે ગુજરાત અસામાજિક પ્રવૃત્તિઓ નિવારણ અધિનિયમ (પાસા) હેઠળ કાર્યવાહી હાથ ધરી છે.રાજકોટ વિભાગના નાયબ પોલીસ મહાનિરીક્ષક નિર્લિપ્ત રાય તથા જામનગર જિલ્લા પોલીસ અધિક્ષક ડૉ. રવિ મોહન સૈનીના માર્ગદર્શન હેઠળ જિલ્લાના અસામાજિક તત્વો સામે સતત કાર્યવાહી કરવામાં આવી રહી છે.આ કાર્યવાહી દરમિયાન શંકરટેકરી સુભાષપરા વિસ્તારમાં રહેતા વિજયભાઈ કેશુભાઈ વરાણીયા સામે પાસાની દરખાસ્ત તૈયાર કરવામાં આવી હતી. આરોપી સામે મારામારીના ચાર ગુનાઓ નોંધાયેલા હોવાનું પોલીસ તપાસમાં સામે આવ્યું હતું. દરખાસ્ત જિલ્લા મેજિસ્ટ્રેટ પી.બી. પંડ્યા સમક્ષ રજૂ કરવામાં આવતા તેમણે પાસા વોરંટ મંજૂર કર્યું હતું.પાસા વોરંટના આધારે પોલીસે આરોપીની અટકાયત કરી તેને મધ્યસ્થ જેલ, વડોદરા ખાતે મોકલવાની કાર્યવાહી હાથ ધરી છે. પોલીસના જણાવ્યા મુજબ જિલ્લાના કાયદો અને વ્યવસ્થાને ખોરવતા તત્વો સામે આવનારા સમયમાં પણ આવી જ કડક કાર્યવાહી ચાલુ રહેશે.આ સમગ્ર કામગીરી એલસીબીના પોલીસ ઇન્સ્પેક્ટર વી.બી. ચૌધરીના માર્ગદર્શન હેઠળ પીએસઆઈ એમ.વી. ભાટીયા, હીરેનભાઈ વરણવા, શરદભાઈ પરમાર, સુરેશભાઈ માલકિયા સહિત એલસીબી સ્ટાફ તેમજ સિટી-સી ડિવિઝન પોલીસ સ્ટેશનના પીઆઈ એન.બી. ડાભી અને તેમની ટીમ દ્વારા સફળતાપૂર્વક પૂર્ણ કરવામાં આવી હતી.

જામનગરમાં શરૂ સેક્શન રોડ પર ગઈ રાત્રે આહીર બુઝુર્ગ પર છરીના ઘા ઝીંકી હત્યા નિપજાવનાર આરોપી સામે ગુનો નોંધાયો

દેશ દેવી ન્યુઝ જામનગર તા ૨૫ જૂન ૨૬, જામનગર શહેરના ખોડિયાર કોલોની વિસ્તારમાં જૂની અદાવતના કારણે એક બુઝુર્ગની છરીના ઘા ઝીંકી હત્યા કરવામાં આવી હોવાનો ગંભીર બનાવ સામે આવ્યો છે. આ અંગે મળતી માહિતી મુજબ જામનગરના ફીયોનીકા સોસાયટી, ખોડિયાર કોલોની વિસ્તારમાં રહેતા રાજુ વજશીભાઈ વારોતરીયાએ સીટી ‘સી’ ડિવિઝન પોલીસ મથકે ફરિયાદ નોંધાવી છે. ફરિયાદ મુજબ તેમના દાદા દેવાયતભાઈ રાયસીભાઈ વારોતરીયા સાથે અગાઉ પડોશમાં રહેતા સાગર મારખીભાઈ વસરાને જૂના મનદુઃખ અને બોલાચાલીના બનાવો હતા. આરોપી અવારનવાર દાદાની મશ્કરી કરતો હોવાથી અગાઉ પણ બંને પક્ષ વચ્ચે વિવાદ થયો હતો.ગત ૨૪ જૂનના રોજ રાત્રે આશરે ૯ વાગ્યે દેવાયતભાઈ પોતાના ઘરની બહાર ખાટલામાં બેઠા હતા ત્યારે આરોપી સાગર મારખીભાઈ વસરા ત્યાં આવી પહોંચ્યો હતો. તે દરમિયાન આરોપીએ પોતાની પાસે રહેલી છરી વડે દેવાયતભાઈ પર આડેધડ હુમલો કરી ગંભીર ઇજાઓ પહોંચાડી હતી. પરિવારજનો દોડી આવતા આરોપીએ ભાગવાનો પ્રયાસ કર્યો હતો. ફરિયાદી રાજુભાઈએ તેનો પીછો કરીને પકડી લીધો હતો, પરંતુ આસપાસના લોકોએ પોલીસને જાણ કરવાની સલાહ આપતા તેને છોડી દેવામાં આવ્યો હતો.બનાવની જાણ થતા ૧૧૨ પોલીસ અને ૧૦૮ એમ્બ્યુલન્સ ઘટનાસ્થળે પહોંચી હતી. દેવાયતભાઈને તાત્કાલિક સારવાર માટે જી.જી. હોસ્પિટલ ખસેડવામાં આવ્યા હતા, જ્યાં ફરજ પરના તબીબે તેમને મૃત જાહેર કર્યા હતા.આ બનાવ અંગે સીટી ‘સી’ ડિવિઝન પોલીસે આરોપી સાગર મારખીભાઈ વસશ સામે ભારતીય ન્યાય સંહિતાની કલમ ૧૦૩(૧) તેમજ જી.પી. એક્ટ કલમ ૧૩૫(૧) હેઠળ ગુનો નોંધી વધુ તપાસ હાથ ધરી છે. તપાસ પોલીસ ઇન્સ્પેક્ટર નીખીલકુમાર બાબુભાઈ ડાભીના માર્ગદર્શન હેઠળ ચાલી રહી છે.

જામનગરમાં અંબર ચોકડી નજીક ફ્લાયઓવર નીચે દબાણ હટાવવા ગયેલી મનપાની ટીમ પર હીંચકારો હુમલો

• મરચાં પાવડરનો સ્પ્રે અને પથ્થરમારામાં મનપા ના ચાર હંગામી કર્મચારીઓ ઇજાગ્રસ્ત, જી.જી. હોસ્પિટલમાં સારવાર હેઠળ

• જામનગર મહાનગરપાલિકાના અધિકારીઓ નો કાફલો હોસ્પિટલે દોડતો થયો : પોલીસ તંત્ર એ પણ સમગ્ર વિસ્તાર કોર્ડન કર્યો

• સ્ટેન્ડિંગ કમિટીના ચેરમેન ધીરેન મોનાણી , ડે. મેયર ,શાસક પક્ષના નેતા તેમજ આસી.મ્યુ. કમિશનર મુકેશ વરણવા સહિતના અધિકારી હોસ્પિટલ ખાતે દોડી ગયા

દેશ દેવી ન્યૂઝ જામનગર તા ૨૩ જૂન ૨૬, જામનગર શહેરના જુના રેલવે સ્ટેશન નજીક આવેલા નવા ફ્લાયઓવર નીચે થયેલા દબાણો દૂર કરવા માટે ગયેલી જામનગર મહાનગરપાલિકાની એસ્ટેટ શાખા તથા દબાણ હટાવ શાખાની ટીમ પર ઝૂપડાવાસીઓ ના કેટલાક તત્વોએ હુમલો કરતાં ભારે અફડાતફડીનો માહોલ સર્જાયો હતો. ઘટનામાં મનપાના ચાર હંગામી કર્મચારીઓ ઇજાગ્રસ્ત બન્યા હતા, જેમને સારવાર માટે સરકારી જી.જી. હોસ્પિટલમાં ખસેડવામાં આવ્યા છે.પ્રાપ્ત વિગતો મુજબ રેલવે સ્ટેશન નજીકના વિસ્તારમાં રેલવે તંત્ર દ્વારા જગ્યા સુરક્ષિત કરવા માટે દિવાલનું નિર્માણ કરવામાં આવી રહ્યું છે. જેના કારણે અગાઉ ત્યાં વસવાટ કરતા કેટલાક ઝૂપડાવાસીઓએ નવા ફ્લાયઓવર નીચે આશ્રય લીધો હતો અને ત્યાં માલસામાન એકત્ર કરી ફરીથી વસવાટની વ્યવસ્થા શરૂ કરી હતી.આ દબાણો દૂર કરવા માટે આજે મહાનગરપાલિકાની એસ્ટેટ શાખા અને દબાણ હટાવ શાખાની ટીમ સ્થળ પર પહોંચી હતી. દરમિયાન કેટલાક શખ્સો ઉશ્કેરાઈ જતા મનપાના કર્મચારીઓ સાથે બોલાચાલી કરી હતી. ત્યારબાદ હુમલાખોરોએ કર્મચારીઓ પર મરચાં પાવડરનો સ્પ્રે છાંટ્યો હતો અને પથ્થરમારો શરૂ કર્યો હતો. આ હુમલામાં મનપાના ચાર હંગામી કર્મચારીઓ ચેતનસિંહ જાડેજા, વિજય ઝાલા, વિજય ખરાડી અને મહિપત દાઉદીયા ઇજાગ્રસ્ત બન્યા હતા. ઘટનાની જાણ થતાં મહાનગરપાલિકાના સિક્યુરિટી વિભાગના ઇન્ચાર્જ અધિકારી અનવર ગજ્જણ સહિત અન્ય અધિકારીઓ તાત્કાલિક જી.જી. હોસ્પિટલ પહોંચ્યા હતા અને ઇજાગ્રસ્ત કર્મચારીઓની સારવાર અંગે જરૂરી વ્યવસ્થા કરી હતી.બીજી તરફ ઘટનાની જાણ પોલીસને કરવામાં આવતા પોલીસ કાફલો પણ સ્થળ પર તેમજ હોસ્પિટલ ખાતે દોડી ગયો હતો. સમગ્ર બનાવ અંગે જવાબદારો સામે કાયદેસરની કાર્યવાહી હાથ ધરવા માટે તજવીજ શરૂ કરવામાં આવી છે. બનાવને પગલે વિસ્તારમાં તંગદિલીનો માહોલ સર્જાયો હતો, જોકે પોલીસ અને મનપાના અધિકારીઓએ પરિસ્થિતિ પર કાબૂ મેળવી લીધો હોવાનું જાણવા મળે છે. સીટીબી ડિવિઝનના પોલીસ સ્ટાફ દ્વારા સમગ્ર વિસ્તારને કોર્ડન કર્યો છે, અને હુમલાખોરોને શોધવા માટેની કાર્યવાહી હાથ ધરી છે.

જામનગરના બેડી સોઢા ફળી વિસ્તારમાં મોહરમની નિયાઝ દરમિયાન ધકામુક્કી બાદ બે જૂથ વચ્ચે ધીંગાણું

• બન્ને પક્ષે મારામારી ના બનાવોમાં પાંચ વ્યક્તિ ઘાયલ: બન્ને પક્ષે સામસામે પોલીસ ફરિયાદ નોંધાવાઈ

દેશ દેવી ન્યુઝ જામનગર તા ૨૩, જૂન ૨૬ જામનગરના બેડી સોઢા ફળી વિસ્તારમાં મોહરમની નિયાઝની પ્રસાદી લેવા દરમિયાન બાળકો વચ્ચે થયેલી ધકામુક્કી બાદ બે પક્ષો વચ્ચે મારામારી અને પથ્થરમારો થયાનો બનાવ સામે આવ્યો છે. આ મામલે બેડીમરીન પોલીસ સ્ટેશનમાં બંને પક્ષોની સામસામે ફરિયાદોના આધારે ગુના નોંધવામાં આવ્યા છે.

પોલીસ ફરિયાદ મુજબ અનવરભાઈ સુલેમાનભાઈ સંઘારે નોંધાવેલી ફરિયાદમાં જણાવ્યું છે કે તેમની દિકરીનો દિકરો અને સામા પક્ષના દિકરા વચ્ચે નિયાઝની પ્રસાદી લેતી વખતે ધકામુક્કી થઈ હતી. આ બાબતનું મનદુઃખ રાખી તનવીર ગુલામ જેડા, ઝરીનાબેન ગુલામ રજાક જેડા, હુશેનાબેન ઓસમાણભાઈ જેડા, જુબીબેન રજાકભાઈ જેડા, શકીનાબેન અસગર જેડા, કાદર ઇસ્માઈલ ચૌહાણ અને ગુલામ રજાક જેડા સહિતના આરોપીઓએ એકત્ર થઈ ગેરકાયદે મંડળી બનાવી હુમલો કર્યો હતો. ફરિયાદ મુજબ આરોપીઓએ ગાળો બોલી ઢીકાપાટુનો માર માર્યો તેમજ પથ્થરમારો કર્યો હતો, જેમાં અનવરભાઈ તથા તેમના નવાસાને ઇજાઓ પહોંચી હતી. સાથે જ પરિવારને જાનથી મારી નાખવાની ધમકી આપવામાં આવી હોવાનો આક્ષેપ કરવામાં આવ્યો છે.આ ફરિયાદના આધારે બેડીમરીન પોલીસ સ્ટેશનમાં ભારતીય ન્યાય સંહિતાની કલમ ૧૨૫(અ), ૧૧૫(૨), ૧૧૮(૧), ૩૫૨, ૩૫૧(૨), ૧૮૯(૨), ૧૯૧(૨), ૧૯૧(૩), ૧૯૦ તેમજ જી.પી. એક્ટની કલમ ૧૩૫(૧) હેઠળ ગુનો નોંધવામાં આવ્યો છે.બીજી તરફ ઝરીનાબેન ગુલામ રજાક જેડાએ નોંધાવેલી ફરિયાદમાં જણાવ્યું છે કે તેમના દિકરા અને અનવર સંઘારની દિકરી વચ્ચે નિયાઝની પ્રસાદી લેતી વખતે ધકામુક્કી થઈ હતી. ત્યારબાદ સમજાવવા જતાં યાસ્મીન અનવર સંઘાર, અનવર સંઘાર, ફરીદાબેન અનવર સંઘાર અને એજાજ અનવર સંઘાર ઉશ્કેરાઈ ગયા હતા અને ગાળો બોલી મારપીટ કરી હતી. ફરિયાદ મુજબ અનવર સંઘારે લાકડી વડે હુમલો કરી ઇજા પહોંચાડી હતી તેમજ જાનથી મારી નાખવાની ધમકી આપી હતી.આ ફરિયાદના આધારે પોલીસે ભારતીય ન્યાય સંહિતાની કલમ ૧૧૫(૨), ૩૫૨, ૩૫૧(૨), ૫૪ તથા જી.પી. એક્ટની કલમ ૧૩૫(૧) હેઠળ ગુનો નોંધી વધુ તપાસ હાથ ધરી છે.બેડીમરીન પોલીસ દ્વારા બંને ફરિયાદોના આધારે કાયદેસરની કાર્યવાહી અને તપાસ શરૂ કરવામાં આવી છે.

જામનગરમાં કામદાર કોલોની વિસ્તારમાં શ્વાન પર ક્રૂર હુમલો કરવાના મામલામાં પ્રાણી પ્રેમીઓ સામે આવ્યા

• પ્રાણી પ્રેમીઓની ફરિયાદ ના આધારે સીસીટીવી કેમેરા ના માધ્યમથી પશુ પ્રત્યે ક્રૂરતા આચરનાર વાહન ચાલક ને ઓળખી લેવાયો

દેશ દેવી ન્યુઝ જામનગર તા ૨૨ જૂન ૨૬, જામનગર શહેરના કામદાર કોલોની વિસ્તારની શેરી નંબર ૨માં એક નિર્દોષ શ્વાન પર ક્રૂરતાપૂર્વક હુમલો કરાયાની ઘટના સામે આવતા પ્રાણીપ્રેમીઓમાં ભારે રોષ ફેલાયો છે. સમગ્ર ઘટનાનો વીડિયો સોશિયલ મીડિયામાં વાયરલ થતાં મામલો પોલીસ સુધી પહોંચ્યો છે. સીસીટીવી કેમેરા ના માધ્યમથી પશુ પ્રત્યે ક્રૂરતા દાખવનાર વાહન ના નંબરો મેળવી લઇ તેની સામે સીટી સી. ડિવિઝન પોલીસ મથકમાં ફરિયાદ નોંધાવાઇ છે.

ફરિયાદી કલ્પનાબેન ભરતગીરી ગોસાઈ, જે  ‘એનિમલ કેર’ સંસ્થા સાથે જોડાયેલા છે, તેમના જણાવ્યા મુજબ તા. ૧૭ જૂન ૨૦૨૬ ની રાત્રે આશરે સાડા નવ વાગ્યે તેમને વોટ્સએપ ગ્રૂપમાં એક વીડિયો મળ્યો હતો. વીડિયો નિહાળતા કામદાર કોલોની શેરી નંબર ૨ ખાતે રોડની બાજુમાં સુતેલા એક શ્વાન પર એક અજાણ્યા શખ્સે લાકડાની હોકી વડે વારંવાર પ્રહાર કર્યા હોવાનું જોવા મળ્યું હતું. વીડિયોમાં દેખાતો શખ્સ કાળા રંગના એક્સેસ મોપેડ પર આવ્યો હતો. હુમલો કર્યા બાદ તે પોતાના વાહન સાથે સ્થળ પરથી ફરાર થઈ ગયો હતો. ઘટનાની જાણ થતાં પ્રાણીપ્રેમી દિશાબેન દ્વારા તાત્કાલિક ઘાયલ શ્વાનને સારવાર માટે ગેલેક્સી મલ્ટીસ્પેશિયાલિટી એનિમલ હોસ્પિટલ ખાતે ખસેડવામાં આવ્યો હતો. અને હાલ હોસ્પિટલમાં શ્વાનની લાંબા સમય સુધીની સારવાર કરવામાં આવી રહી છે. સ્વહણ ની હાલત અત્યંત દયનીય છે અને પોતે ખોરાક પણ લઈ શકતું નથી, અને તેને બાટલા ચડાવીને નવજીવન આપવાના પ્રયત્નો થઈ રહ્યા છે.શ્વાનની સ્થિતિ નિહાળતા તેની આંખ પર પાટો બાંધવામાં આવ્યો હોવાનું તેમજ તે ઉભું પણ રહી શકતું ન હોવાનું જાણવા મળ્યું હતું. હુમલાના કારણે સ્વાનને મોઢાના ભાગે ગંભીર ઇજાઓ પહોંચી હોવાનું પણ સામે આવ્યું છે.ઘટનાના અનુસંધાને પ્રાણી પ્રેમીઓએ સંબંધિત વ્યક્તિ વિરુદ્ધ કડક કાયદેસરની કાર્યવાહી કરવાની માંગ સાથે પોલીસમાં ફરિયાદ નોંધાવી છે. ફરિયાદના આધારે પોલીસે ગુનો નોંધી વધુ તપાસ હાથ ધરી છે. પોલીસે વાયરલ વીડિયો, વાહન સંબંધિત વિગતો તેમજ અન્ય પુરાવાઓના આધારે આરોપીની ઓળખ કરી તેની સામે કાર્યવાહી શરૂ કરી છે.પોલીસ ફરિયાદના જાહેર કરાયા અનુસાર તેની પાસે કાળા કલરનું જીજે -૩૭ કે. ૦૦૯૦ નંબરનું એક્સેસ સ્કૂટર હોવાનું ધ્યાનમાં આવ્યું છે, ત્યારે પોલીસની તપાસ દરમિયાન આ વાહન ચાલકનું નામ કુલદીપસિંહ જાડેજા હોવાનું પણ જાણવા મળ્યું છે. પોલીસ દ્વારા તેને શોધી કાઢી પોલીસ મથકે બોલાવવા પ્રયત્ન કરાયા છે, પરંતુ હાલ તે ભાગી છૂટ્યો છે. શ્વાનપ્રેમીઓને પણ પોલીસ મથકે હાજર રખાવી તેની ઉપસ્થિતિમાં જ આરોપીને હાજર કરાવવા માટેના પ્રયત્નો થઈ રહ્યા છે. આ ઘટનાએ શહેરના પ્રાણીપ્રેમીઓમાં ભારે આક્રોશ ફેલાવ્યો છે. નિર્દોષ અને મૂક પ્રાણીઓ પર અત્યાચાર કરનારાઓ સામે કડક કાર્યવાહી કરવાની માંગ ઉઠી રહી છે. પોલીસ તપાસ પૂર્ણ થયા બાદ સમગ્ર ઘટનાની વધુ વિગતો બહાર આવે તેવી શક્યતા છે.

જામનગરના દરેડ જીઆઈડીસી માં સ્ટેટ જીએસટીના મેગા ઓપરેશનથી ખળભળાટ: ૨૨થી વધુ ગાડીઓના કાફલા સાથે સપાટો

• સ્થાનિક અને બહારગામના તત્વો દ્વારા ભાડાના શેડ રાખી બોગસ બિલિંગ કૌભાંડથી સરકારને કરોડોનો ચૂનો લગાવવા નું કારસ્તાન ની આશંકા

• મંદીના માહોલમાં સ્થાનિક ઉદ્યોગકારોની લોકલ હેરફેર ઠપ્પ, જી.એસ.ટી. વિભાગનું ચેકિંગ હજુ ૮-૧૦ દિવસ ચાલવાનુ અનુમાન

દેશ દેવી ન્યુઝ જામનગર તા ૨૦, જૂન ૨૬ જામનગર શહેરના ઔદ્યોગિક હબ સમાન દરેડ જીઆઈડીસી વિસ્તારમાં આજે વહેલી સવારથી જ સ્ટેટ જીએસટી વિભાગ દ્વારા ૨૨થી વધુ વાહનોના વિશાળ કાફલા સાથે ત્રાટકીને ઐતિહાસિક મેગા સર્ચ ઓપરેશન હાથ ધરવામાં આવતા પિત્તળના ભંગાર સહિતના નાના-મોટા કારખાનેદારોમાં ભારે ફફડાટ વ્યાપી ગયો છે.ઉદ્યોગનગરના આધારભૂત સૂત્રો પાસેથી પ્રાપ્ત થતી પ્રાથમિક માહિતી અનુસાર, બહારગામથી આવેલા કેટલાક ભેજાબાજ તત્વોએ જામનગરના દરેડ વિસ્તારમાં માત્ર ભાડાના શેડ રાખીને તેને પોતાના ધંધાકીય સ્થળ તરીકે દર્શાવી, બોગસ જી.એસ.ટી. નંબર મેળવી લીધા હતા. આ લેભાગુ તત્વોએ કાગળ પર જ મોટા પાયે ખોટી વેરાશાખ (ઇનપુટ ટેક્સ ક્રેડિટ) ઉભી કરીને સરકારી તિજોરીને કરોડો રૂપિયાનો ચૂનો ચોપડ્યો હોવાની આશંકાએ આ વ્યાપક દરોડાની કાર્યવાહી શરૂ કરવામાં આવી છે.આ કૌભાંડના મૂળિયાં ખૂબ ઊંડા હોવાથી આગામી આઠથી દસ દિવસ સુધી આ જ પ્રકારે બોગસ પેઢીઓ અને ભાડાના એકમો બતાવીને ગેરરીતિ આચરનારા ધંધાર્થીઓને ઝડપી લેવા સઘન તપાસનો ધમધમાટ યથાવત રહેશે તેવી પ્રબળ શક્યતાઓ સેવાઈ રહી છે.એક તરફ વૈશ્વિક મંદી અને આસમાને પહોંચેલી મોંઘવારીના કારણે જામનગરનો બ્રાસપાર્ટ ઉદ્યોગ આર્થિક સંકળામણનો સામનો કરી રહ્યો છે, ત્યારે બીજી તરફ જી.એસ.ટી. વિભાગના આ મેગા ચેકિંગે સ્થાનિક અને પ્રામાણિક કારખાનેદારો માટે જાણે કે ‘દાઝ્યા પર ડામ’ દીધો હોય તેવી અત્યંત કફોડી સ્થિતિ નિર્માણ કરી છે. વ્યાપક દરોડાના ભય અને સઘન તપાસના માહોલને પગલે ઉદ્યોગનગરમાં કાચા અને તૈયાર માલની લોકલ હેરફેર સંપૂર્ણપણે અટકી ગઈ છે, જેનાથી દૈનિક વ્યાપારિક ગતિવિધિઓ પર ગંભીર બ્રેક વાગી છે. સરકારી તિજોરીને નુકસાન પહોંચાડતા કરચોરોને ડામવા માટે લેવાયેલું આ પગલું કડક અને જરૂરી છે, પરંતુ સતત ચાલનારા આ મેરાથોન સર્ચ ઓપરેશનના કારણે જામનગરના સમગ્ર ઔદ્યોગિક જગતમાં હાલ પૂરતો ભારે સન્નાટો અને વ્યાપારિક અનિશ્ચિતતાનો માહોલ છવાઈ ગયો છે.

જામનગર : યુવાનનું અપહરણ કરી માર મારી અને લૂંટ કરવાના ગુનામાં આરોપી જામીન મુકત

• તપાસનીસ અધીકારીની જામીન રદ કરવાની અરજી નામંજુર

દેશ દેવી ન્યુઝ તા. ૨૦ જૂન ૨૬ આ કેશની હકીકત એવી છે કે, ફરીયાદી શીવમભાઇ ધનજીભાઇ રાણેવાડીયા એ જામનગર સીટી-બી ડીવીઝન પોલીસમાં આપેલી ફરીયાદીની વીગત મુજબ તા.૨૧/૦૫/૨૦૨૬ ના રોજ ફરીયાદી તેમના માતાની તબીયત ખરાબ હોય નવાગામ ધેડ ગાયત્રી ચોકમાં આવેલા દવાખાને સારવાર કરવા ગયેલા ત્યાં નવાગામ ઘેડમાં રહેતા રોહીત શીંગાળા આવેલ અને કહેલ કે ઉભો રે સાગર પરમારને તારૂ કામ છે જેથી મે કહેલ કે મારે કામ છે તેમ છતાં રોહીત શીંગાળાએ મને જબરજસ્તીથી રોકી રાખેલ અને સાગર પરમારને ફોન કરી બોલાવેલ ત્યારબાદ એક રીક્ષામાં સાગર પરમાર તથા વિપુલ પરમાર તથા આરીફ સુમારા આવેલ અને રોહીત શીંગાળાએ કહેલ કે આને લઇ જાવ જેથી સાગર આવી મારો કાઠલો ખેચી લીધેલ અને મારી મોટરસાયકલ ની ચાવી લઇ લીધેલી અને મારીજ મોટર સાયકલ માં બેસાડી મને ઇન્દીરા સોસાયટી મધુરમ સોસાયટીમાં લઇ ગયેલા અને ત્યાં એક અજાણ્યા વ્યકતી રીક્ષા લઇ ને આવેલ અને મને તેમાં જબરજસ્તીથી બેસાડી લઇ ગયેલ અને મોબાઇલની લૂંટ ચલાવેલ વીગેરે હીકીકતો સહીતની હકીકતો વાળી ફરીયાદ આપતા બી.એન.એસ ની કલમ ૧૩૭(૨),૩૦૯(૪), ૧૧૭(૨),૧૧૫(૨),૩પર, ૧૨૬(૨),૫૪ વીગેર મુજબનો ગુનો નોંધાયેલ આરોપી રોહીત શીંગાળા તથા સાગર પરમાર તથા વીપુલ પરમાર તથા આરીફ આમરોણીયા ના ઓને ધોરણસર અટક કરવામાં આવી હતી.આરોપી રોહીત ઉર્ફે ગાંડો વિશાલભાઇ શીંગાળા ની તા. ૦૧/૦૬/૨૦૨૬ ના રોજ અટક કરવામાં અવેલ અને નામદાર કોર્ટમાં રીમાંડ સાથે રજુ કરવામાં આવેલ જે રીમાંડ નામંજુર થતાં જયુડીશ્યલ કસ્ટડીમાં મોકલી આપવામાં આવેલ જેથી આરોપી રોહીત ઉર્ફે ગાંડો વિશાલભાઈ શીંગાળા દ્વારા તેમના વકીલ  અશોક એચ.જોશી દ્વારા જામીન પર છુટવા માટે નામાદર કોર્ટમાં અરજી કરવામાં આવેલ જે જામીન અરજી દરમ્યાન તપાસનીસ અધીકારી દવારા રોહીત ઉર્ફે ગાંડો વીશાલભાઇ શીંગાળા સામે જામનગર સીટી બી ડીવીઝન પોલીસમાં નોંધાયેલ અન્ય ગુન્હાનામાં જામીન રદ કરવા અરજી કરવામાં આવેલ જે જામીન અરજી તથા જામીન રદ કરવાની અરજી અન્વયે અરજદાર રોહીત ઉર્ફે ગાંડો વિશાલભાઇ શીંગાળા એ તેમના વકીલ  અશોક એચ.જોશી મારફત નામદાર કોર્ટમાં દલીલો કરવામાં આવેલ રોહીત ઉર્ફે ગાંડો વિશાલભાઇ શીંગાળા ના વકીલ અશોક એચ.જોશી દવારા એવી રજુઆત કરવામાં આવેલ કે,આરોપી નિર્દોષ છે ગુનાના કામે ખોટી રીતે શંડોવી દેવામાં આવેલ છે જેથી જમીન મુકત કરવા રજુઆત કરેલ અને જામીન રદ કરવાની અરજીમાં જણાવેલ કારણોસર જામીન રદ કરી શકાય નહી તેવી રજુઆત કરવામાં આવતા નામાદર કોર્ટ દ્વરા રોહીત ઉર્ફે ગાંડો વિશાલભાઇ શીંગાળા ને જામીન મુકત કરવા હુકમ કરવામાં આવેલ છેતેમજ જામીન મીકેનીકલી રદ કરી શકાય તેમ જણાવી અને તપાસનીસ અધીકારી દ્વારા કરવામાં આવેલ જામીન રદ કરવાની અરજી નામંજુર કરવામાં આવેલ છે. રોહીત ઉર્ફે ગાંડો વિશાલભાઇ શીંગાળા ના વકીલ તરીકે અશોક એચ.જોશી રોકાયેલા હતા.