જામનગરના એડવોકેટની હત્યા કેસમાં સંડોવાયેલા આરોપીના ભાઈની ગેરકાયદે દુકાનોનું બાંધકામ પોલીસ બંદોબસ્ત વચ્ચે દૂર કરાયું

• રણજીત સાગર રોડ પર ૧૫૦૦ ફૂટ જગ્યામાં ગેરકાયદે ખડકી દેવાયેલી બે દુકાનો તોડી પડાઈ : એસપી ખૂદ હાજર રહ્યા

દેશ દેવી ન્યૂઝ જામનગર તા ૨૧ ડીસેમ્બર ૨૪, જામનગરના એડવોકેટ કિરીટ જોશીની હત્યા કેસમાં સંડોવાયેલા અને હાલ લંડનમાં જેલવાસ ભોગવી રહેલા જયેશ પટેલ ના ભાઈ સામે તાજેતરમાં વ્યાજ વટાવ સહિતના ગુના દાખલ કર્યા બાદ હવે તેના દ્વારા ગેરકાયદે ખડકી દેવાયેલી બે દુકાનો પર તંત્રનું બુલડોઝર ફરી વળ્યું છે. ખુદ જિલ્લા પોલીસવડા પ્રેમસુખ ડેલુ સ્થળ પર હાજર રહ્યા હતા, અને ગેરકાયદે દબાણ વાળી જગ્યા ખુલ્લી કરાવવામાં આવી હતી.
જામનગરના એડવોકેટ કીરિટ જોશીની હત્યા કેસમાં સંડોવાયેલા અને હાલ લંડન માં જેલવાસ ભોગવી રહેલા જયેશ પટેલ ના ભાઈ ધર્મેશ રાણપરીયા સામે તાજેતરમાં વ્યાજ વટાવ સહિતની પ્રવૃત્તિ અંગે ગુના નોંધવામાં આવ્યા હતા. દરમિયાન આજે મહાનગરપાલિકા દ્વારા તેની સામે વધુ એક કાર્યવાહી કરવામાં આવી છે.રણજીતસાગર રોડ પર ધર્મેશ રાણપરીયા દ્વારા જામનગર મહાનગર પાલિકાની જગ્યામાં ગેરકાય રીતે પંદરસો ફૂટ જગ્યામાં બે દુકાનો ખડકી દેવામાં આવી હતી. જે અંગે તંત્ર દ્વારા એક થી વધુ વખત નોટિસ પાઠવી હતી, પરંતુ તેમાં કોઈ કાર્યવાહી થઈ ન હોવાથી આખરે આજે તંત્ર દ્વારા ડીમાલેશનની પ્રક્રિયા હાથ ધરવામાં આવી હતી. આ વેળાએ ભારે પોલીસ બંદોબસ્ત રાખવામાં આવ્યો હતો. જામનગરના એસ.પી. પ્રેમસુખ ડેલુ જાતે જ હાજર રહ્યા હતા અને તેઓની હાજરીમાં જ ડિમોલેશન કાર્ય હાથ ધરવામાં આવ્યું હતું.

જામનગર મહાનગરપાલિકાની એસ્ટેટ શાખાના અધિકારી નીતિન દીક્ષિત, ઉપરાંત સુનિલ ભાનુશાલી, અનવર ગજણ, યુવરાજસિંહ ઝાલા સહિત ની ટીમ બનાવના સ્થળે પહોંચી હતી, અને એસ્ટેટ વિભાગની આશરે ૧૫ જેટલા કર્મચારીઓની ટુકડી દ્વારા ડિમોલેશન કાર્ય હાથ ધરવામાં આવ્યું હતું, જેમાં ત્રણ જેસીબી મશીન તથા એક ટ્રેક્ટર સહિતની મશીનરીની મદદ લેવામાં આવી હતી.માત્ર ત્રણ કલાકના સમયગાળા દરમિયાન જ સમગ્ર બાંધકામ દૂર કરી લેવાયું હતું, અને સંપૂર્ણ જમીનને ખુલ્લી કરાવવામાં આવી હતી.

જોડીયા તાલુકાના માવ નું ગામમાં થયેલી ચોરીનો ભેદ LCB ની ટુકડીએ ગણતરીના કલાકોમાં જ ઉકેલી નાખ્યો

• રૂપિયા ૧.૨૩ લાખ નું સોનુ અને રોકડ સહિતની ચોરાઉ સામગ્રી સાથે માળીયા મીયાણાના એક તસ્કર ને ઝડપી લીધો

• ચોરીમાં સંડોવાયેલી એક મહિલા સહિત અન્ય બે તસ્કરો ની પોલીસ દ્વારા શોધખોળ

• એલસીબી ની ટુકડીએ ચોરીનો ભેદ ઉકેલવા બે દિવસના રાત ઉજાગરા કરીને ૪૦ સીસીટીવી કેમેરા તપાસ્યા

• ભિક્ષા વૃતિ કરવાના બહાને ત્રણેય તસ્કરોએ રેકી કરીને ચોરી ને અંજામ આપ્યો

દેશ દેવી ન્યૂઝ જામનગર તા ૨૧ ડીસેમ્બર ૨૪, જામનગર જિલ્લાના જોડિયા તાલુકાના માવનુ ગામમાં રહેતા એક ખેડૂતના મકાનમાં થયેલી ચોરીનો ભેદ ઉકેલવામાં એલસીબીની ટુકડીને મહત્વની સફળતા સાંપડી છે, અને ગણતરીના કલાકોમાં જ ચોરીનો ભેદ ઉકેલી નાખીને એક ટાસ્કરને ઝડપી લીધો છે, અને તેની પાસેથી રોકડ રકમ અને સોનુ સહિત તમામ ચોરાઉ સામગ્રી કબજે કરી લીધી છે. ત્યારે તેની સાથે ચોરી કરવા માટે આવેલા અન્ય એક દંપતીને ફરારી જાહેર કરી શોધખોળ હાથ ધરી છે.આ બનાવની વિગત એવી છે કે જોડિયા તાલુકાના માવનું ગામમાં રહેતા અને ખેતી કામ કરતા દયાળજીભાઈ પેથાભાઇ રામપરિયા નામના ખેડૂતના બંધ રહેણાંક મકાનમાંથી ધોળે દહાડે ચોરી થઈ હતી, અને તસ્કરો રૂપિયા ૧.૨૩ લાખ નું સોનુ તેમજ ૮,૧૦૦ ની રોકડ રકમ સહિતની માલમતા ચોરી ગયા હતા.

જે અંગેની ફરિયાદ જોડિયા પોલીસ મથકમાં નોંધાવ્યા પછી એલસીબીની ટુકડી હરકતમાં આવી હતી, અને એલસીબીના પી.આઇ.વી.એમ. લગારિયા તેમજ પીએસઆઇ પી.એન. મોરી અને એ. કે. પટેલ ની રાહબરી હેઠળ સમગ્ર એલ.સી.બી.ની ટીમે ઊંડાણપૂર્વકની તપાસ હાથ ધરીને ચોરીનો ભેદ ઉકેલી નાખ્યો છે.

માળીયા મીયાણા વિસ્તારમાં રહેતા રૂપસિંગ ઉર્ફે રૂપલો રસિકભાઈ રાઠોડ નામના તસ્કરને ઝડપી લીધો છે, અને તેની પાસેથી ચોરીમાં ગયેલું ૧.૨૩ લાખનું સોનું અને ૮,૧૦૦ ની રોકડ રકમ વગેરે કબજે કરી લીધા છે. તેની સાથે ચોરી કરવા માટે આવેલા અજય હિંમતભાઈ રાઠોડ અને રોમાબેન અજયભાઈ રાઠોડ નામના દંપત્તિ હાલ ભાગી છૂટ્યા હોવાથી તેઓને ફરારી જાહેર કરી શોધખોળ હાથ ધરી છે

જોડીયા ના માવનું ગામમાં થયેલી ચોરી નો ભેદ ઉકેલવા માટે એલસીબી ની ટીમેં બે દિવસના રાત ઉજાગરા કર્યા હતા, અને એલસીબીના દિલીપભાઈ તલાવડિયા, હિતેન્દ્રસિંહ જાડેજા, તેમજ કાસમભાઇ બ્લોચ કે જેઓએ જ્યાં ચોરી થઈ હતી, ત્યાંથી અલગ અલગ વિસ્તારોમાં સીસીટીવી કેમેરાઓ ચેક કરવાનું શરૂ કર્યું હતું, તેમ જ એક ડમ્પર નો અવરજવર કરવા માટેની કળી મળી હતી, તેના આધારે ટોલનાકા પરથી ડમ્પર ના નંબરો મેળવ્યા હતા, ત્યારબાદ અલગ અલગ ૪૦ થી વધુ સીસીટીવી કેમેરાઓ ચકાસયા હતા, જેના આધારે તસ્કરોને શોધવામાં સફળતા મળી હતી, અને આખરે ચોરીનો ભેદ ઉકેલાઈ ગયો હતો.

તસ્કર ટોળકી દ્વારા દિવસ દરમિયાન ભિક્ષાવૃત્તિ કરવામાં આવી હતી, જે દરમિયાન તેઓને ઉપરોક્ત મકાન બંધ જણાયું હતું જેથી તે બંધ મકાનમાં ત્રાટકયા હતા, અને ચોરી કરીને એક ડમ્પર ની મદદથી તેઓ પરત માળીયા મીયાણા ભાગી છૂટ્યા હતા, પરંતુ એલસીબી ની ટુકડી એ સમગ્ર ઘટના અંગે ઊંડાણપૂર્વકની તપાસના અંતે તસ્કરને પકડી લેવામાં સફળતા મેળવી હતી.

જામનગર બાર એસો.ની ચૂંટણીમાં ઉપપ્રમુખ પદે ભરતસિંહ જાડેજા અને સેક્રેટરી તરીકે પરેશ ગણાત્રા વિજેતા બન્યા

• લાઇબ્રેરી સેક્રેટરીમાં જયદેવસિંહ જાડેજા જ્યારે મહિલા અનામતની બેઠકમાં રાધાબેન રાવલિયા ચૂંટાયા

દેશ દેવી ન્યૂઝ જામનગર તા ૨૦ ડીસેમ્બર ૨૪ , જામનગર બાર એસોસિયેશનની ચૂંટણી પહેલાં પ્રમુખ સેક્રેટરી અને ખજાનચી પદે બિન હરીફ વરણી થવા પામી હતી,જ્યારે આજે ઉપ પ્રમુખ પદ માટે તેમજ કારોબારી સહિતના અન્ય હોદ્દા માટેની આજે ચૂંટણી યોજાઇ હતી, જેનું મતદાન પૂર્ણ થયા બાદ મત ગણતરી કરવામાં આવી હતી જેમાં જામનગર બાર એસો. ના ઉપ પ્રમુખ તરીકે ભરતસિંહ જાડેજા(૪૭૧ મત), જોઈન્ટ સેક્રેટરી તરીકે પરેશ ગણાત્રા(૪૨૪ મત) તેમજ લાઇબ્રેરી સેક્રેટરીમાં જયદેવસિંહ જાડેજા (૪૯૦ મત) ચૂંટાયા છે. ઉપરાંત મહિલા અનામતની બેઠકમાં રાધા બેન રાવલીયા(૪૨૪ મત) વિજેતા જાહેર થયા છે.જામનગર બાર એસોસિયેશનની ચૂંટણીમાં સતત ૧૨મી વખત પ્રમુખ પદે ભરતભાઇ સુવા ,સેક્રેટરી તરીકે મનોજ ઝવેરી અને ખજાનચી પદ માટે રુચિર રાવલ બિન હરીફ વિજેતા જાહેર થયા હતા. ઉપરાંત અન્ય બાકીના હોદ્દેદારોની આજે ચૂંટણી યોજાઇ હતી. કુલ ૧૧૧૪ મતદારો હતા જે પૈકી ૮૪૩ મતદારોએ મતદાન કર્યું હતું ચૂંટણી કમિશનર તરીકે એડવોકેટ કે.ડી. ચૌહાણ જ્યારે સહ ચૂંટણી કમિશનર તરીકે મીહીરભાઈ નંદા અને ભરતભાઈ ગોસાઈ એ સેવા આપી હતી.

દિલ્હીમાં સંસદગૃહ ની બહાર કોંગ્રેસ-ભાજપ વચ્ચે થયેલી બબાલ નો રેલો છેક જામનગર સુધી પણ પહોંચ્યો

• જામનગરમાં ભાજપ-કોંગ્રેસ ના કાર્યકર્તાઓ સામ સામે બાખડયા: કોંગ્રેસ પ્રમુખ સહિત બે ની તબિયત લથડતાં હોસ્પિટલમાં ખસેડાયા

જામનગર તા. ૨૦, કેન્દ્ર સરકાર ના ગ્રહ મંત્રી અમિત શાહે ડો. બાબા સાહેબ આંબેડકર બાબતે કરેલા નિવેદન થી રાજકીય માહોલ ગરમાયો છે. અને ભાજપ તથા કોંગ્રેસ બંને પક્ષો સામ સામાં આક્ષેપો કરી રહ્યા છે. કોંગ્રેસના રાહુલ ગાંધી નું સંસદ માં દંગલ, સામે ભારતીય જનતા પાર્ટી વિરોધ દર્શાવી રહી છે, જેનો રેલો આજે જામનગર સુધી આવી પહોંચ્યો છે.જામનગર શહેર ભાજપ દ્વારા આજે સાંજે બેનર પોસ્ટર સાથે ભાજપ કાર્યાલય થી રેલી કાઢીને ટાઉનહોલ સર્કલ વિસ્તારમાં આવેલા કોંગ્રેસ કાર્યાલય સુધી પહોંચ્યા હતા. અને કોંગ્રેસ કાર્યાલય ની સામેના ભાગમાં રોડ પર સૂત્રોચારો કરવાનું શરૂ કર્યું હતું. ઉપરાંત ભાજપ ના કેટલાક કાર્યકરો દ્વારા રાહુલ ગાંધી ના પૂતળા નું દહન કરવામાં આવે તે પહેલા જ પોલીસે આ કાર્યક્રમ ને નિષ્ફળ બનાવ્યો હતો. બીજી તરફ ભાજપના આગેવાનો – કાર્યકરો દ્વારા રેલી કાઢીને કોંગ્રેસ હાય હાય , બાબાસાહેબ નું અપમાન નહીં સહેંગે જેવા સૂત્રોચાર કર્યા હતા.

ત્યારે સામા પક્ષે કોંગ્રેસના કાર્યકર્તાઓ પણ એકત્ર થઈ ગયા હતા અને ભાજપ વિરુદ્ધ નારા લગાવ્યા હતા. આ સમયે બંને પક્ષના અમુક કાર્યકરો વચ્ચે ઝપાઝપી થતાં શહેર કોંગ્રેસ અધ્યક્ષ દિગુભ જાડેજા તેમજ ૭૮- વિધાનસભા વિસ્તારના યુવક કોંગી પ્રમુખ હરેન્દ્રસિંહ જાડેજા ની તબિયત લથડી હતી. આથી તેમને બન્નેને તાત્કાલિક સારવાર માટે જી.જી. હોસ્પિટલ માં લઈ જવામાં આવ્યા હતા. અને હાલ બંનેની સારવાર ચાલી રહી છે.

ગુજરાત પ્રદેશ ભાજપ ના અનુસૂચિત મોરચા ના અધ્યક્ષ ગૌતમભાઈ ગેડિયા , મેયર વિનોદ ખીમસુરીયા , ધારાસભ્ય દિવ્યેશભાઈ અકબરી અને રીવાબા જાડેજા, શહેર ભાજપના અધ્યક્ષ ડો. વિમલભાઈ કગથરા, ડે.મેયર ક્રિષ્નાબેન સોઢા સહિતના હોદેદારો, અન્ય કોર્પોરેટરો, અને વિવિધ સંગઠન- મોરચાના અન્ય કાર્યકરો ઓ રેલી માં જોડાયા હતા.ગુજરાત ભાજપ અનુસૂચિત મોરચાના અધ્યક્ષ ગૌતમભાઈ ઘેડિયાએ જણાવ્યું હતું કે બાબા સાહેબ આંબેડકરના નામે કોંગ્રેસ મગર ના આંસુ સારે છે. આ એ જ કોંગ્રેસ છે, જેણે બાબા સાહેબ નું અપમાન કર્યું છે. આથી કોંગ્રેસે માફી માગવી જોઈએ.

બીજી તરફ જામનગરના કોંગ્રેસના પૂર્વ સાંસદ અને પૂર્વ ધારાસભ્ય એવા વિક્રમભાઈ માડમે જણાવ્યું હતું કે ભાજપના રાજમાં ગુંડાગીરી નુ પ્રમાણ વધ્યું છે ભાજપ દ્વારા પૂતળા બાળવા માં આવે છે. છતાં પોલીસ તેની અટકાયત કરતી નથી .આજે પણ ભાજપે ગુંડાગીરીનું પ્રદર્શન કરતાં કોંગ્રેસના બે આગેવાનો ની તબિયત લથડી હતી અમે કોંગ્રેસ ગુંડાગીરી કરવામાં માનતા નથી .એટલે આ પ્રશ્ને કાનૂની કાર્યવાહી નો આશરો લેવામાં આવશે, તેમ જણાવ્યું હતું.

કોંગ્રેસ કાર્યાલયના દ્વારે સાંજના સમયે ભાજપ અને કોંગ્રેસના કાર્યકરો સામે આવી ગયા હતા અને હાથમાં બેનર પોસ્ટર તેમજ સૂત્રોચાર કરતાં પોલીસ ધંધે લાગી ગઈ હતી અને બંને જૂથને અટકાવવા ના પ્રયત્નો કર્યા હતા કેટલાક લોકો પણ આ સમરાંગણ જોઈને દંગ રહી ગયા હતા, અને વાહન વ્યવહાર થોડો સમય માટે થંભી ગયો હતો. ત્યારબાદ પોલીસે આખરે મામલો થાડે પાડ્યો હતો, અને કોંગ્રેસના હોદ્દેદારો કાર્યકર્તાઓ વગેરે હોસ્પિટલ તરફ પહોંચ્યા હતા, અને ભાજપના કાર્યકરો ત્યાંથી નીકળી જતાં સમગ્ર વિસ્તાર ને પોલીસે ખાલી કરાવી વાહન વ્યવહારને પૂર્વવત બનાવ્યો હતો.

જામનગર બાર એસોસિએશન ની ચૂંટણી માટે આજે મતદાન યોજાયું

• પ્રમુખ – સેક્રેટરી અને ખજાનચી બિન હરીફ જાહેર થયા બાદ ઉપ પ્રમુખ સહિતના અન્ય હોદ્દા માટે ચૂંટણી યોજાઈ

દેશ દેવી ન્યૂઝ જામનગર તા ૨૦ ડીસેમ્બર ૨૪ , જામનગર બાર એસોસિયેશનની ચૂંટણી પહેલા પ્રમુખ સેક્રેટરી અને ખજાનચી પદે બિન હરીફ વરણી થવા પામી હતી,જ્યારે ઉપ પ્રમુખ પદ માટે તેમજ કારોબારી સહિતના અન્ય હોદ્દા માટેની આજે ચૂંટણી યોજાઇ છે, જેનું મતદાન ચાલી રહ્યું છે.જામનગર બાર એસોસિયેશનની ચૂંટણીમાં સતત ૧૨મી વખત પ્રમુખ પદે ભરતભાઇ સુવા ,સેક્રેટરી તરીકે મનોજ ઝવેરી અને ખજાનચી પદ માટે રુચિર રાવલ બિન હરીફ વિજેતા જાહેર થયા હતા.જ્યારે ઉપ પ્રમુખ પદ માટે જયેન્દ્રસિંહ ઝાલા અને ભરતસિંહ જાડેજા મેદાન મા છે. ઉપરાંત અન્ય બાકીના હોદ્દેદારોની પણ ચૂંટણી યોજાઇ છે, જેનું આજે મતદાન યોજાયું છે. કુલ ૧૧૫૦ વકીલો મતદાન મા ભાગ લઇ રહ્યા છે, અને સાંજે મતદાન પછી તુરતજ મત ગણતરી હાથ ધરવામાં આવશે.

જામનગર શહેર પોલીસ દ્વારા ગઈકાલે રાત્રે હાથ ધરેલા કોમ્બિંગ દરમિયાન દેશી દારૂ અંગેના ૧૨ કેસ કરાયા

• તમામ સ્થળોએ ૪૦ લીટર દેશી દારૂ,૪૦૦ લીટર કાચો આથો અને ૨૮૦ કિલો ગોળ નો જથ્થો પકડી પાડ્યો

દેશ દેવી ન્યૂઝ જામનગર તા ૨૦ ડીસેમ્બર ૨૪ જામનગર શહેર વિભાગના ડીવાયએસપી જયવીરસિંહ ઝાલા ની રાહબરી હેઠળ જામનગર શહેરના ખાસ કરીને બાવરીવાસ સહિતના આસપાસના વિસ્તારમાં મેગા કોમ્બિંગ હાથ ધરવામાં આવ્યું હતું, અને દેશી દારૂ ના ધંધાર્થીઓ પર તવાઈ બોલાવવામાં આવી હતી.

જે દરમિયાન ગઈકાલે રાત્રિના અલગ અલગ દેશી દારૂ અંગેના ૧૨ કેસ કરવામાં આવ્યા હતા, અને સીટી સી. ડિવિઝન પોલીસ મથકમાં તે અંગે ના ગુન્હા દાખલ કરાયા છે. પોલીસની જુદી જુદી ટુકડીઓ દ્વારા કુલ ૪૦ લીટર દેશી દારૂ નો જથ્થો કબજે કરાયો હતો, ઉપરાંત ૪૦૦ લીટર દેશી દારૂનો કાચો આથો અને દારૂ બનાવવા માટે ઉપયોગમાં લેવાતો ૨૮૦ કિલો અખાદ્ય ગોળનો જથ્થો પણ કબજે કરી લેવામાં આવ્યો હતો. જે તમામ સામગ્રીનો પોલીસ દ્વારા સ્થળ પર જ નાશ કરવામાં આવ્યો હતો.જિલ્લા પોલીસ વડા પ્રેમસુખ ડેલુ ના માર્ગદર્શન હેઠળ ઉપરાંત એએસપી અક્ષેસ એન્જિનિયર ની રાહબરી હેઠળ શહેર વિભાગના ડીવાયએસપી તથા એલસીબી અને શહેરના ત્રણેય પોલીસ ડિવિઝનના પી.આઈ. અને તેમની સમગ્ર ટીમ દ્વારા આ કાર્યવાહી કરવામાં આવી હતી.

જામનગરના હાપા માર્કેટિંગ યાર્ડમાં સુકા અને લાલ મરચા ની ૪૦૦ થી વધુ ભારીની આવક થઈ

દેશ દેવી ન્યૂઝ જામનગર તા ૧૯, ડિસેમ્બર ૨૪ જામનગર ના હાપા માર્કેટિંગ યાર્ડમાં દિન પ્રતિ દિન જુદી જુદી જણસની આવક થઈ રહી છે, અને ખેડૂતોને ઊંચા ભાવ મળી રહ્યા હોવાથી ખેડૂતો પણ ખુશખુશાલ નજરે પડી રહ્યા છે. હાપા માર્કેટિંગ યાર્ડમાં આજે લાલ સુકા મરચા ની ૪૦૦ ભારી ની આવક થઈ હતી.જેમાં રેવા જાતિના મરચાંના ૨૮૦૦ થી ૩,૦૫૦ ભાવ બોલાવ્યો હતો. જ્યારે સાનિયા જાતિના મરચા ના ૨,૪૦૦ થી ૨૭૦૦રૂપિયા ના ભાવે ભારી ના સોદા થયા હતા.ઉપરાંત કડી કાબરા મરચા ના ૫૦૦ થી ૧,૨૦૦ રૂપિયા ના ભાવે શોદા થયા હતા. હજુ માર્કેટિંગ યાર્ડમાં ધીમે ધીમે લાલ મરચા ની આવક શરૂ થઈ રહી છે, અને ખેડૂતોને સારી જાતના મરચામાં ઊંચા ભાવ મળી રહ્યા છે.

જામનગરમાં કોંગ્રેસ દ્વારા સંસદમાં ડો. બાબા સાહેબ આંબેડકર વિશે બોલનારા ગ્રહમંત્રી ને સસ્પેન્ડ કરવાની માંગણી સાથે વિરોધ કરાયો

• જાહેરમાં વિરોધ પ્રદર્શન કરી રહેલા શહેર કોંગ્રેસ પ્રમુખ સહિતના ૨૪ હોદ્દેદારોની પોલીસ દ્વારા અટકાયત કરી લેવાઇ

દેશ દેવી ન્યૂઝ જામનગર તા ૧૯ ડીસેમ્બર ૨૪, સંસદ ભવનમાં ડો. બાબા સાહેબ આંબેડકર વિશે બોલનારા ગ્રહ મંત્રી અમિત શાહ ને સસ્પેન્ડ કરવાની માંગણી સાથે જામનગરના લાલ બંગલા સર્કલમાં કોંગ્રેસ દ્વારા વિરોધ પ્રદર્શન કરીને જોરદાર દેખાવો કરવામાં આવ્યા હતા. હાથમાં બેનર રાખીને ગૃહમંત્રીને સસ્પેન્ડ કરવાની માંગણી સાથે વિરોધ પ્રદર્શન કરાતાં ૨૪ કોંગી આગેવાનો- કાર્યકરોની પોલીસ દ્વારા અટકાયત કરી લેવામાં આવી છે.સંસદ ગ્રહમાં ડો. બાબા સાહેબ આંબેડકર વિશે બોલનારા ગ્રહ મંત્રી અમિત શાહને સસ્પેન્ડ કરવા સંદર્ભે શહેર કોંગ્રેસ પ્રમુખ દિગુભા જાડેજા ની રાહબરી હેઠળ તેમજ જામનગર મહાનગરપાલિકાના વિરોધ પક્ષના નેતા ધવલ નંદાની રાહબરીમાં શહેર કોંગ્રેસના અન્ય કોર્પોરેટરો ઉપરાંત દલિત સમાજના આગેવાનો લાલ બંગલા સર્કલમાં બેનર પોસ્ટર સાથે એકત્ર થયા હતા ,અને અમિત શાહનો વિરોધ દર્શાવી સૂત્રોચાર કર્યા હતા.જે સમયે પોલીસ તંત્ર આવી પહોંચ્યું હતું, અને જાહેરમાં વિરોધ કરી રહેલા ૨૪ જેટલા કોંગી અગ્રણીઓ અને કાર્યકરોની અટકાયત કરી લેવામાં આવી હતી. જે તમામને પોલીસ હેડ કવાટર્સમાં લઈ જવાયા હતા. જોકે મોડેથી તમામને મુક્ત કરી દેવામાં આવ્યા છે.

જામનગરના રણજીતસાગર રોડ પર આવેલા બાઈકના શોરૂમમાંથી રૂપિયા ૨.૩૭ લાખની રોકડ રકમ ની ચોરી થઈ ગયાની પોલીસ ફરિયાદ

• મોડી રાત્રે ચોરી કરવા આવેલા બે તસ્કરો સીસીટીવી કેમેરામાં કેદ થયા હોવાથી ફૂટેજ મેળવી પોલીસ દ્વારા તસ્કરોની શોધખોળ

દેશ દેવી ન્યૂઝ જામનગર તા ૧૮ ડીસેમ્બર ૨૪ જામનગર માં રણજીતસાગર રોડ પર આવેલા એક બાઈકના શોરૂમમાં બે દિવસ પહેલાં રાત્રી ના સમયે ત્રાટકયા હતા, અને શોરૂમ તથા સર્વિસ સ્ટેશન માંથી કુલ ૨,૩૭,૪૪૦ ની રોકડ રકમની ચોરી કરી લઈ ગયા ની ફરિયાદ સીટી એ. ડિવિઝન પોલીસ મથકમાં નોંધાવાઈ છે. મોડી રાત્રે આવેલા તસ્કરો સીસીટીવી કેમેરામાં કેદ થયા હોવાથી તેના ફૂટેજ મેળવીને પોલીસ દ્વારા તસ્કરોને પકડવા માટેના ચક્રો ગતિમાન કરાયા છે.જામનગરમાં રણજીત સાગર રોડ પર આવેલા અવધ ઓટો મોબાઈલ શો રૂમ માં ૧૪ મી તારીખે રાત્રિના સમયે તસ્કરો ત્રાટક્યા હતા અને શોરૂમના પાછળના ભાગે આવેલું શટર ઉચકાવી પ્રવેશ મેળવી લીધો હતો, અને કાઉન્ટરમાં રાખેલી રૂપિયા ૨,૧૮,૩૦૦ની રોકડ રકમ ની ચોરી કરી લીધી હતી. ત્યારબાદ બાજુમાં જ આવેલા વર્કશોપમાંથી પણ રૂપિયા ૧૯,૧૪૦ મળીને કુલ ૨,૩૭,૪૪૦ ની રોકડ રકમ ની ચોરી કરી લઈ ગયા હતા.

જે ચોરીના બનાવ અંગે શોરૂમના મેનેજર દીપકભાઈ અનિલભાઈ લખીયરે સિટી એ. ડિવિઝન પોલીસ મથકમાં ફરિયાદ નોંધાવતાં પી.એસ.આઇ. એમ.કે. બ્લોચ પોતાની ટીમ સાથે બનાવના સ્થળે દોડી ગયા હતા, અને તપાસના ચક્રો ગતિમાન કર્યા હતા. શોરૂમમાં લગાવેલા સીસીટીવી કેમેરા ની તપાસ કરતાં તેમાં રાત્રિના પોણા ત્રણેક વાગ્યાના અરસામાં બે તસ્કરો ચોરી કરવા માટે આવ્યા હોવાનું જાણવા મળ્યું હતું, આથી પોલીસે તે ફૂટેજ મેળવી લઈ ઉપરોક્ત વર્ણન ના આધારે તસ્કરોને શોધી કાઢવા માટેની કવાયત હાથ ધરી છે.

જામનગરના ગુલાબનગર વિસ્તારમાં સગીરા સાથે દુષ્કર્મ ગુજારનાર આરોપી ને પોલીસે ઝડપી લીધા પછી જેલ હવાલે કરાયો

• સગીરાને પ્રેમ જાળમાં ફસાવી લઈ અનેક વખત દુષ્કર્મ ગુજાર્યાનું સામે આવ્યું : સગીરાને વિકાસગૃહમાં મોકલાવાઈ

દેશ દેવી ન્યૂઝ જામનગર તા ૧૮ ડિસેમ્બર ૨૪, જામનગરના ગુલાબ નગર વિસ્તારમાં રહેતી એક સગીરાને પ્રેમઝાળ માં ફસાવી તેણી પર દુષ્કર્મ ગુજાર્યા નો મામલો પોલીસ મથકે પહોંચ્યા પછી પોલીસે આરોપી ને ઝડપી લીધો હતો, અને જરૂરી પુરાવા મેળવ્યા પછી અદાલત સમક્ષ રજૂ કરતાં તેને જેલ હવાલે કરાયો છે. સગીરા સાથે અનેક વખત દુષ્કર્મ ગુજાર્યાનું સામે આવ્યું છે, જયારે સગીરાને વિકાસગૃહમાં મોકલી દેવામાં આવી છે.પોલીસમાં જાહેર કરાયા અનુસાર ગુલાબ નગર વિસ્તારમાં રહેતી એક સગીરા કે જેના સંપર્કમાં તે જ વિસ્તારમાં રહેતો સંજય ભીમજી મકવાણા નામનો શખ્સ આવ્યો હતો, અને તેણે સગીરાને પ્રેમ જાળમાં ફસાવી તેણીની સાથે અનેક વખત દુષ્કર્મ ગુજાર્યું હતું. આખરે સગીરાએ પોતાના પરિવાર વગેરે સહિત જામનગરના સિટી બી. ડિવિઝન પોલીસ મથકનો સંપર્ક સાધ્યો હતો, અને પોતાની સાથે અનેક વખત દુષ્કર્મ ગુજારવામાં આવ્યું હોવાની ફરિયાદ કરી હતી.

જે ફરિયાદના આધારે સીટી બી. ડિવિઝન ના પી.આઇ. પી.પી.ઝા અને તેમનો સ્ટાફ દોડતો થયો હતો, અને આરોપી સંજય ભીમજી મકવાણા ને ઝડપી લીધો હતો. અને તેની વિશેષ પૂછપરછ કરી હતી. જ્યારે પોલીસે જે સ્થળે બનાવ બન્યો હતો, તે જગ્યાએ પંચનામું કરીને કેટલાક પુરાવાઓ એકત્ર કર્યા હતા. ત્યારબાદ તેને અદાલત સમય રજૂ કરાતાં જેલહવાલે થયો છે.

આ ઉપરાંત ભોગ બનનાર સગીરા કે જેની તબીબી ચકાસણી કરાયા પછી પોલીસ દ્વારા વિશૅષ પૂછપરછ કરાતાં તેણીએ પોતાના માવતરે જવાને બદલે વિકાસગૃહમાં જવાનું પસંદ કર્યું હતું. જેથી પોલીસે ભોગ બનનાર સગીરાને વિકાસગૃહમાં મોકલાવી દીધી છે.