મોરબી થી જામનગર આવી રહેલી એક કારમાં ધ્રોળ નજીક લતીપર રોડ પર એકાએક આગ લાગી જતાં ભારે અફડા તફડી સર્જાઈ

• કારમાં બેઠેલું મોરબી નું દંપતી અને અઢી વર્ષની બાળકી સહી સલામત બહાર નીકળી જતાં ત્રણેયનો બચાવ થયો

• ધ્રોળ ફાયર બ્રિગેડની ટીમે ઘટના સ્થળે દોડી જઈ આગને બુઝાવી: વાયરીંગમાં શોર્ટ સર્કિટથી આગ લાગી: પોલીસ તંત્ર દોડતું થયું

દેશ દેવી ન્યૂઝ જામનગર તા ૧૦ જાન્યુઆરી ૨૪, મોરબી થી એક દંપતિ પોતાની અઢી વર્ષની બાળકીને સાથે રાખીને એક કારમાં બેસીને જામનગર તરફ આવી રહ્યા હતા તે દરમિયાન ધ્રોળ નજીક લતીપર રોડ પર એકાએક ચાલુ કારમાં આગ લાગી જતાં અફડાતફડી સર્જાઇ હતી, અને કારનો દરવાજો પણ એક તરફથી લોક થઈ ગયો હતો. દરમિયાન કારચાલક અને તેમના પત્ની બહાર નીકળી ગયા હતા અને અંદર પાછળની સીટમાં સુતેલી તેમની અઢી વર્ષની પુત્રીને પણ સહી સલામત બહાર ખેંચી લેતાં ત્રણેયનો બચાવ થયો હતો. જોકે કારમાં આગળ રાખેલી રોકડ રકમ- ઘડિયાળ વગેરે સળગી ગયા હતા. ધ્રોળની ફાયર બ્રિગેડ ની ટીમે ઘટના સ્થળે દોડી જઈ આગને કાબુમાં લીધી હતી, જ્યારે ધ્રોળનું પોલીસ તંત્ર પણ દોડતું થયું હતું.આ બનાવની વિગત એવી છે કે મોરબીમાં જ્યોતિ પાર્ક સોસાયટીમાં રહેતા અને કેબલ ઓપરેટર તરીકે નો વ્યવસાય કરતા રવિ કુમાર ચંદુભાઈ ઓધવીયા પટેલ (૩૨) કે જેઓ પોતાની જી.જે. ૩૬ એ.સી. ૪૫૮૦ નંબરની કારમાં બેસીને મોરબી થી જામનગર તરફ આવી રહ્યા હતા. જે કારમાં તેઓની સાથે પત્ની રવિના બહેનો (ઉંમર વર્ષ ૨૮) તેમજ અઢી વર્ષની પુત્રી ધ્યાની પણ સાથે બેઠેલા હતા.પોતાની કાર જામનગરના શોરૂમમાંથી ખરીદ કરી હોવાથી ત્યાં સર્વિસમાં મુકવા માટે આવી રહ્યા હતા, તે દરમિયાન ગઈકાલે બપોરે ત્રણેક વાગ્યાના અરસામાં ધ્રોળ- લતિપર હાઇવે રોડ પર એકાએક કારના આગળના ભાગમાં શોર્ટ સર્કિટ થવાના કારણે આગ લાગી હતી. સૌપ્રથમ ધુમાડા નીકળવા લાગતાં રવિ કુમાર કારનો દરવાજો ખોલીને બહાર નીકળી ગયા હતા, પરંતુ તેનો દરવાજો લોક થઈ ગયો હતો.ત્યારબાદ તેમના પત્ની રવિનાબેન પણ કારમાંથી બહાર નીકળ્યા હતા. દરમિયાન તેઓની પુત્રી ધ્યાની કે જે પાછળની સીટમાં બેઠી હતી, અને આગે મોટું સ્વરૂપ લઈ લીધું હતું. પરંતુ રવિ કુમારે સમય સૂચકતા વાપરીને પોતાની પુત્રીને સહી સલામત રીતે બહાર કાઢી લીધી હતી. જે દરમિયાન આગળની સીટના ભાગમાં આગ પ્રસરી ગઈ હતી, અને આગળ રાખેલી આઠ હજાર રૂપિયાની રોકડ રકમ, ઘડિયાળ તથા અન્ય સામગ્રી કપડાં વગેરે સળગી ઊઠ્યા હતા.

આ બનાવને લઈને અફડા તફડીનો માહોલ સર્જાયો હતો, આ મામલે પોલીસ તંત્રને જાણ થવાથી ધ્રોળના પોલીસ હેડ કોન્સ્ટેબલ જે. કે. દલસાણીયા તેમજ રાઇટર અનિલભાઈ સોઢીયા કે જેઓ ઘટના સ્થળે દોડી ગયા હતા અને ફાયર બ્રિગેડને જાણ કરવાથી ધ્રોળની ફાયર વિભાગની ટીમ ઘટના સ્થળે પહોંચી ગઈ હતી, અને પાણીનો મારો ચલાવીને આગ બુઝાવી હતી. પોલીસ તંત્ર દ્વારા પંચનામાં સહિતની કાર્યવાહી હાથ ધરી હતી તેઓએ રવિ ભાઈ પટેલ નું નિવેદન નોંધ્યું હતું, અને ધ્રોલ પોલીસ મથકમાં આગ અકસ્માતના બનાવ અંગેની નોંધ કરવામાં આવી છે.

જામનગરમાં અંધઆશ્રમ આવાસ નજીક જાહેરમાં જાજરૂ કરી રહેલા દલિત યુવાનને માર મારી હડધુત કરાયો : બે સામે ફરિયાદ

દેશ દેવી ન્યૂઝ  જામનગર તા o૯ જાન્યુઆરી ૨૪, જામનગરમાં રણજીત સાગર રોડ પર ન્યુ હર્ષદ મિલની ચાલીમાં રહેતા રાહુલ દેવજીભાઈ પરમાર નામના ૨૫ વર્ષના દલિત યુવાને પોતાને માર મારી સમાજમાં હલકા પાડવા માટે હડધુત કરવા અંગે નાજીમ ઉર્ફે નાઝલો ગામેતી અને સૌક્ત નામના બે શખ્સ સામે સીટી સી. ડિવિઝન પોલીસ મથકમાં ફરિયાદ નોંધાવી છે.જે ફરિયાદમાં જાહેર કરાયા અનુસાર ફરિયાદી અંધ આશ્રમ આવાસ નજીકના વિસ્તારમાં જાહેરમાં જાજરુ કરી રહ્યો હતો, જે દરમિયાન બંને શખ્સોએ આવીને કે અહીં શું કામ જાજરૂ કરે છે, તેમ કહી ધમકાવ્યો હતો, અને કેવી જ્ઞાતિનો છે, તવું પૂછતાં પોતે દલિત જ્ઞાતિનો હોવાનું જણાવ્યું હતું.જેથી બંને શખ્સોએ ઉસકેરાઈ જઇ સમાજમાં હલકા પાડવા માટે હડધૂત કર્યો હોવાથી પોલીસ ફરિયાદ નોંધાવાઇ છે. જે મામલે પોલીસે બી.એન.એસ. કલમ ૧૧૫ (૨),૩૫૨,૩૫૧(૨) તથા એટ્રોસીટી એકટ કલમ-૩(૧)(આર) (એસ),૩(૨)(૫એ) મુજબ   એસ્ટ્રોસિટી એક્ટ ની કલમ મુજબ ગુન્હો નોંધ્યો છે, અને વધુ તપાસ હાથ ધરી છે.

જામનગર નજીક ખંભાળિયા બાયપાસ ચોકડી પાસે ડીઝલ ભરેલા ટેન્કરના ટાયરમાં ઓચિંતી આગ લાગતાં ભારે અફડા તફડી

• ફાયરની ટીમે સમયસર પહોંચી જઈ આગને કાબુમાં લઈ લેતાં સર્વેએ હાશકારો અનુભવ્યો

દેશ દેવી ન્યૂઝ જામનગર તા ૯ જાન્યુઆરી ૨૪, જામનગરની ભાગોળે ખંભાળિયા બાયપાસ ચોકડી પાસે ગઈકાલે રાત્રે ડીઝલ ભરીને રાજકોટ તરફ જઈ રહેલા જી.જે.૧૨ એ.ટી.૮૦૦૩ ટેન્કરના પાછલા ટાયર ના જોટામાં અકસ્માતે આગ લાગતાં ભારે અફડા તફડીનો માહોલ સર્જાયો હતો, અને ટેન્કર ચાલક તેમાંથી છલાંગ લગાવીને બહાર નીકળી ગયો હતો.સૌ પ્રથમ ટેન્કર ચાલક તથા અન્ય લોકોએ એકત્ર થઈને ટેન્કર ની અંદર રહેલા ફાયર ના નાના બાટલાનો ઉપયોગ કરીને આગ બુઝાવવાનો પ્રયાસ કર્યો હતો. ટેન્કરમાં ડીઝલનો જથ્થો ભરેલો હોવાથી સમગ્ર વિસ્તારમાં ભયનો માહોલ છવાયો હતો, અને જામનગર મહાનગરપાલિકાની ફાયર બ્રિગેડ શાખાને જાણ કરી દેવાતાં ફાયર શાખાના કર્મચારી એપલ વારા સહિતની ફાયરની ટુકડી તાબડતોબ ઘટના સ્થળે દોડી ગઈ હતી, અને પાણીના એક ટેન્કર વડે મારો ચલાવી ટાયરમાં લાગેલી આગને બુઝાવી દીધી હતી, તેથી સર્વેએ હાશકારો અનુભવ્યો હતો. સદભાગ્યે સમયસર આગ કાબુમાં આવી ગઈ હોવાથી વધુ નુકસાની થતી અટકી હતી.માત્ર પાછલું ટાયર ઘર્ષણના કારણે સળગ્યું હતું, જેને ટેન્કર ચાલક દ્વારા બદલી લેવામાં આવ્યું હતું. ત્યારબાદ ટેન્કરને કરી તેને રાજકોટ તરફ લઈ જવામાં આવ્યું છે.

જામનગર ની સરકારી જી.જી. હોસ્પિટલમાં એચએમપીવી વાયરસ ના પગલે આઇસોલેશન વોર્ડ તૈયાર

દેશ દેવી ન્યૂઝ જામનગર તા. ૯ જાન્યુઆરી ૨૪ , ચાઇના થી પ્રસરેલા એચએમપીવી નામનાં વાઇરસ ધરાવતો એક પોઝિટિવ કેસ ગુજરાત મા નોંધાયો હતો.જેના અનુસંધાને રાજ્ય ની સાથો સાથ જામનગર નું આરોગ્ય તંત્ર પણ સાબદુ બન્યું છે.જેમાં સંભવિત રોગ નાં દર્દી માટે જામનગર ની જી જી હોસ્પિટલમાં આઇશોલેશન વોર્ડ તૈયાર કરવામા આવ્યો છે.અને તબીબો તૈનાત રાખવા મા આવ્યા છે. તેમજ વોર્ડ મા પણ જરૂરી તમામ સાધન સામગ્રી ની વ્યવસ્થા ઉપલબ્ધ કરી દેવામાં આવી છે.ચાઇના થી એચએમપીવી નામનો એક વાઇરસ પ્રસર્યો છે. આ વાયરસના લક્ષણ ધરાવતા એક દર્દી નો ગુજરાતમાં પોઝિટિવ રિપોર્ટ મળતા જ રાજ્યનું આરોગ્ય તંત્ર સતર્ક બન્યું છે . અને રાજ્ય સરકાર ની સૂચના મુજબ જામનગર નું આરોગ્યતંત્ર અને સરકારી હોસ્પિટલનું તંત્ર પણ સાબદુ બન્યું છે.બે દિવસ પહેલા જામનગર ની ગુરુ ગોવિંદસિઘ હોસ્પિટલમાં તબીબી અધિક્ષક ડો. દીપક તિવારી ના અધ્યક્ષ સ્થાને સંબંધિત વિભાગ ના તબીબો ની એક તાકીદ ની બેઠક બોલાવવામાં આવી હતી. જેમાં એમ પી શાહ મેડિકલ કોલેજના અધિક ડીન ડો. એસ એસ ચેટરજી , ઉપરાંત અનેક વિભાગના તબીબો ઉપસ્થિત રહ્યા હતા. અને હોસ્પિટલમાં ઉપલબ્ધ સાધન ,દવા મશીનરી ,ઓક્સિજન વગેરે ની ઉપલબ્ધિ સહિત ના મુદ્દે ચર્ચા કરવામાં આવી હતી. અને ખાસ વોર્ડ ની વ્યવસ્થા કરવા નિર્ણય લેવાયો હતો.જે મુજબ જામનગર ની જીજી હોસ્પિટલ આઇસોલેશન વોર્ડ તૈયાર કરી દેવામાં આવ્યો છે.જેમાં ઓક્સિજન વેન્ટિલેટર દવા નો જથ્થો ઉપરાંત બાળકો ની સારવાર માટે જરૂરી એચએસએનસી મશીનરી વગેરે પણ ઉપલબ્ધ છે.ઉપરાંત તબીબી ટુકડી પણ તૈયાર રાખવામાં આવી છે. ઉપરોક્ત વાઇરસ સંદર્ભે જી.જી. હોસ્પિટલ નું તંત્ર સંપૂર્ણ પણે તૈયાર હોવા નું તબીબી અધીક્ષકે જણાવ્યું છે.

જામનગરના બ્રાસપાર્ટના એક વેપારી સાથે રૂપિયા તેર લાખ નું ચિટિંગ કરવા અંગે જામનગરના જ એક શખ્સ સામે ફરિયાદ

• બ્રાસ નો ભંગાર ખરીદ કર્યા બાદ અડધી રકમ આપીને બાકીની રકમનો ત્રાહિત વ્યક્તિનો બોગસ ચેક આપી છેતરપિંડી આચાર્યનું સામે આવ્યું

• બ્રાસ ની ખરીદીના બિલ અને જીએસટી નંબર મેળવી લઈ તેના આધારે અન્ય પાર્ટી સાથે ખોટા વ્યવહાર કર્યાનું સામે આવ્યું

દેશ દેવી ન્યૂઝ જામનગર તા ૮ જાન્યું આરી ૨૫, જામનગરમાં દિગ્વિજય પ્લોટ વિસ્તારમાં રહેતા અને બ્રાસપાર્ટ ના ભંગારની લેતી દેતી નું કામ સંભાળતા બ્રાસપાર્ટના એક વેપારીએ પોતાની સાથે રૂપિયા ૧૩ લાખ ની છેતરપિંડી કરવા અંગે જામનગરના જ નામચીન શખ્સ સામે ફરિયાદ નોંધાવી છે. પોતાની પાસેથી બ્રાસનો ભંગાર ખરીદ કર્યા પછી અડધી રકમ ચૂકવીને બાકીની રકમનો ત્રાહિત વ્યક્તિનો ખોટો ચેક આપી વિશ્વાસઘાત અને છેતરપિંડી કરી હતી. ઉપરાંત તેની પેઢીના જીએસટી નંબર અને બિલ નો દૂરઉપયોગ કરી અન્ય પેઢી સાથે પણ બ્રાસપાર્ટના ભંગારની લેતી દેતી ના ખોટા વ્યવહાર કરવા અંગેનું સામે આવ્યું છે. જે મામલે પોલીસ ફરિયાદ નોંધાવાઇ છે.

આ ફરિયાદ અંગેના બનાવની વિગત એવી છે કે જામનગરમાં દિગ્વિજય પ્લોટ વિસ્તારમાં રહેતા અને મૂળ મધ્યપ્રદેશના વતની તેમજ જામનગરના ઉદ્યોગ નગરમાં મોદી મેટલ્સ નામની બ્રાસની પેઢી ચલાવતા અંતિમભાઈ ઠાકોરદાસ મોદીએ જામનગરના સીટી સી. ડિવિઝન પોલીસ મથકમાં પોતાની સાથે રૂપિયા ૧૩ લાખ થી વધુ ની છેતરપિંડી કરવા અંગે જામનગરના ખોડીયાર કોલોની વિસ્તારમાં રહેતા સાગર કારૂભાઈ નંદાણીયા સામે ફરિયાદ નોંધાવી છે.

પોલીસ ફરિયાદમાં જાહેર કરાયા અનુસાર ગત જુન માસ દરમિયાન ફરિયાદી અંતિમભાઈ પાસે આરોપી સાગરે બ્રાસ નો ભંગાર ખરીદ કરવા માટે આવ્યો હતો, અને તેણે આશરે ૨૫૦૦ કિલો જેટલો બ્રાસનો ભંગાર ખરીદ કર્યો હતો, અને તે પૈકી અડધી રકમ આપી હતી. જ્યારે બાકીની ૧૩ લાખ જેવી રકમ ચૂકવવાની બાકી રાખી હતી.

જેના બદલામાં તેણે એક ચેક આપ્યો હતો. જે ચેક અંગે ખરાઈ કરતાં ઉપરોક્ત ચેક અન્ય કોઈ વ્યક્તિનો હતો. જેમાં તેણે પોતાની ખોટી સહી કરી હતી.

ઉપરોક્ત ચેક બોગસ છે તે અંગે સાગર નંદાણીયા ને જાણ કરી હતી, અને તેની પાસેથી બાકી રોકાતી રકમ અંગે અનેક વખત માંગણી કરી હતી, તેમ છતાં પૈસા આપ્યા ન હતા.ઉપરાંત તપાસ દરમિયાન એવું જાણવા મળ્યું હતું, કે સાગરે બ્રાસ ભંગાર ખરીદ કરતી વખતે જે બિલ મેળવ્યું હતું, તે મોદી મેટલ્સ ના બિલ નો અને તેના જીએસટી નંબરનો દૂરઉપયોગ કરીને જામનગર માં અન્ય પેઢીને માલ સામાનની લે વેચ ના ખોટા બીલો બનાવી છેતરપિંડી કરી હોવાનું પણ ધ્યાનમાં આવ્યું હતું.

જેથી સમગ્ર મામલો સીટી સી. ડિવિઝન પોલીસ મથકમાં લઈ જવાયો હતો, અને સાગર કારૂભાઈ નંદાણીયા સામે ફરિયાદ નોંધાવી હતી. જે ફરિયાદના અનુસંધાને પી.એસ.આઇ. આર.ડી. ગોહિલે આઇપીસી કલમ ૪૦૬ ,૪૨૦, ૪૬૮ અને પૂર્વયોધિત કાવતરૂં ઘડવા અંગેની કલમ ૧૨૦- બી હેઠળ ગુનો નોંધ્યો છે, અને ગઈકાલે મોડી સાંજે સાગર કારુભાઈ નંદાણીયા ને ઝડપી લીધો છે, અને તેની વિશેષ પૂછપરછ હાથ ધરી છે. ઉપરાંત તેને રિમાન્ડ પર લેવા માટેની પણ કાર્યવાહી હાથ ધરવામાં આવી રહી છે.

જામનગર શહેર ની મધ્યે આવેલા રણમલ તળાવમાં પાણીનું પ્રમાણ ઘટયું હોવાથી ઘડિયાલી કૂવો દેખાવા લાગ્યો

દેશ દેવી ન્યૂઝ જામનગર તા ૭ જાન્યુઆરી ૨૫, જામનગર શહેર ની મધ્યમાં આવેલા રણમલ તળાવમાં ધીંમે ધીમે પાણી ના સ્તર માં ઘટાડો નોંધાઇ રહ્યો છે, જેની સાક્ષી રૂપે તળાવ ની વચ્ચે આવેલો ઘડિયાલી કૂવો તળાવ ની જળસ્તરનાં વધ-ઘટનો સૂચક છે. ઘડિયાલી કૂવો ડૂબી જાય એટલે તળાવમાં ભરપૂર જળરાશિ એકત્ર થઈ રહી છે, એમ કહેવાય અને કૂવો દેખાવા લાગે એટલે જળસ્તર ઘટયુ એમ કહેવાય છે.સામાન્ય રીતે ઉનાળામાં માર્ચ એપ્રિલમાં ઘડિયાલી કૂવો દેખાવા લાગે છે, અને ચોમાસામાં સારો વરસાદ તથા તળાવમાં નહેર વાટે વરસાદી પાણી ઠલવાય ત્યારે કૂવો ડુબી જાય છે. પરંતુ આ વર્ષે જાન્યુઆરી મહિના ના આરંભે જ ઘડિયાલી કૂવો દેખાવા લાગ્યો છે. ઉનાળાનાં તાપ પહેલા જ તળાવનું જળસ્તર ઘટી જતાં ચિંતાજનક સ્થિતિ છે, એમ કહી શકાય.અગાઉ વહીવટી તંત્ર દ્વારા તળાવમાં પાણી નું જળ સ્તર ઘટી ગયું હોવાથી ‘સૌની’ યોજના હેઠળનું દરેડની કેનાલ મારફતે પાણી પહોંચાડવામાં આવ્યું હતું, તે રીતે આ વખતે પણ જો પાણી પહોંચાડવા ની જરૂરિયાત ઊભી થાય, તેમ પણ મનાઈ રહ્યું છે.

ક્રેડીટબુલ્સ ઇન્વેસ્ટમેંટના ૨૩ કરોડના કૌભાંડના નાસતા ફરતા આરોપીને નેપાળ બોર્ડર થી પકડી પાડતી જામનગર પોલીસ

દેશ દેવી ન્યૂઝ જામનગર તા. ૬ જાન્યુઆરી ૨૪, જામનગર માં ક્રેડિટ બુલ્સ ઇન્વેસ્ટમેન્ટ ના ૨૩ કરોડ નાં કૌભાંડ મા સંડોવાયલો અને નાસ્તો ફરતો એક આરોપી નેપાળ બોર્ડર પર થી જામનગર પોલીસ નાં હાથે ઝડપાયો છે.જામનગર નાં સીટી-બી ડીવીઝન પોલીસ મથક મા નોંધાયેલ ગુના મા નાસ્તા ફરતા આરોપી ધવલ દીનેશભાઈ સોલાણી અને યશ દીનેશભાઈ સોલાણી ની શોધ-ખોળ કરતાં બન્ને આરોપીઓ વિદેશ નાસી ગયા હોવાનું જાણવા મળ્યું હતું . આ કેસ મા અગાઉ મુખ્ય આરોપીઓ પકડાઇ ગયો હતો, અને હાલ તે જેલ હવાલે છે.આ સમય દરમ્યાન હાલ ના આરોપી યશ વિરૂધ્ધ સી.આર.પી.સી. કલમ ૭૦ મુજબના વોરંટમા નાસ્તો ફરતો હોય જે આરોપી ની તપાસમાં સર્વેલન્સ સ્ટાફ પ્રયત્નશીલ હતા તથા તપાસ દરમ્યાન બાતમી મળી હતી કે આરોપી યશ દીનેશભાઈ સોલાણી પ્રથમ દુબઈ અને ત્યાથી થાઈલેન્ડ નાશી ગયો છે. અને થાઈલેન્ડ થી નેપાળ અને નેપાળ થી કોઈપણ રાજ્ય ના બોર્ડર થી ભારત માં પ્રવેશ કરવાનો પ્લાન કરી રહ્યો છે.જે માહિતી ના આધારે વધુ હકીકત મેળવી હતી કે નેપાળ રકસોલ બોર્ડર થી આરોપી ભારત માં પરત આવવાનો હોય જેથી તે આરોપીને પકડવા માટે જામનગર પોલીસ ની એક ટીમ તૈયાર કરી રકસોલ બોર્ડર (બિહાર) ખાતે આરોપીની તપાસમાં મોકલવામા આવી હતી.તપાસમાં ગયેલ ટીમ નેપાળ થી ભારતમાં પ્રવેશ કરવાના ચેક પોસ્ટ પર વોચમાં હતી તે દરમ્યાન આરોપી નેપાળ થી ભારતમાં આવતા તુરત જ તેને પકડી નામ પુછતા યસ દીનેશભાઈ સોલાણી ( રહે.પટેલ કોલોની, ૧૧/૨ વ્રજમંગલ એપાર્ટમેન્ટ રૂમ નં ૮૦૫ જામનગર) વાળો હોવાનુ જણાવતા તપાસમાં ગયેલ ટીમે તેને હસ્તગત કરી મૌખીક પુછપરછ કરતાં પોતે ક્રેડીટ બુલ્સ કંપનીમાં એચ.આર.હેડ હોવાનું જણાવ્યું હતું, અને ગુના ની કબુલાત આપતાં કાયદેસરની કાર્યવાહી કરવામાં આવી હતી. જે બાદ ધરપકડ કરી જી.પી.આઈ.ડી. સ્પેશીયલ કોર્ટમા રજુ કરતાં આરોપી નાં ચાર દિવસ ના પોલીસ રીમાંડ મંજુર થયા છે.અગાઉ આ કેસ મા પંકજભાઈ પ્રવીણભાઈ વડગામા (બ્રાંચ હેડ) અને ફરઝાના ઇમરાન શેખ પકડાઈ ચુક્યા છે. અને હાલ જેલમાં છે. જ્યારે આ કેસ મા વધુ એક આરોપી ઝડપાયો છે.

ગુજરાત આયુર્વેદ યુનિવર્સિટી નાં ૫૯ માં સ્થાપના દિવસ નિમિત્તે જામનગરમાં ઇન્ટર કોલેજ ક્રિકેટ ટુર્નામેન્ટ નું આયોજન

• પૂર્વ ક્રિકેટર અજયસિંહજી જાડેજા એ બેટિંગ કરીને વિદ્યાર્થીઓનો ઉત્સાહ વધાર્યો હતો

દેશ દેવી ન્યૂઝ જામનગર તા ૬ જાન્યુઆરી ૨૫, ગુજરાત – આયુર્વેદના જ્ઞાનના પ્રચાર અને પ્રસાર માટે છેલ્લા ૫૯ વર્ષથી સતત કાર્યરત, વિશ્વની સૌથી પહેલી આયુર્વેદ યુનિવર્સિટી, ગુજરાત આયુર્વેદ યુનિવર્સિટી આ વર્ષે પોતાનો ૫૯ મો સ્થાપના દિવસ ઉજવી રહી છે. આ ઉજવણી ૫, જાન્યુઆરી, ૨૦૨૫ રવિવારના રોજ ક્રિકેટ અને સાંસ્કૃતિક કાર્યક્રમ સાથે શરૂ થઈ છે, જે તારીખ ૧૮ જાન્યુઆરી, સુધી ક્રિકેટ ટુર્નામેન્ટ રમી ને ઊજવવામાં આવશે.જામનગર શહેર અને રાજવી પરીવાર સાથે ગુજરાત આયુર્વેદ યુનિવર્સિટીના તાણાવાણા જોડાયેલા છે. જામસાહેબના માર્ગદર્શન સાથે ગુજરાત આયુર્વેદ યુનિવર્સિટી દેશ-વિદેશમાં પોતાના વિદ્યાર્થીઓ-શિક્ષકો-સંશોધકો દ્વારા ભારતના આ અદ્વિતીય જ્ઞાનને પ્રસરાવી રહી છે, ત્યારે યુનિવર્સિટીના સ્થાપના દિવસે આજે સવારે મુખ્ય મહેમાન તરીકે યુવરાજ અજયસિંહજી જાડેજા (ભૂતપૂર્વ ક્રિકેટર અને જામનગર રાજ પરિવારના સભ્ય) એ ક્રિકેટ ટુર્નામેન્ટનું ઉદઘાટન કર્યું હતું. પ્રથમ ગુજરાત આયુર્વેદ યુનિવર્સિટીના પટાંગણમાં ધન્વંતરી ભગવાની મૂર્તિનું પૂજન કરીને તેમણે પ્રભુને સર્વની સુખાકારી માટે પ્રાર્થના કરી હતી.ત્યાર બાદ યુવરાજ અજયસિંહ જાડેજા એ ધન્વંતરી ક્રિકેટ ગ્રાઉન્ડ મા યુનિવર્સિટી ધ્વજનું આરોહણ કર્યું હતું . સાથે ગુજરાત આયુર્વેદ યુનિવર્સિટીના કુલપતી ડૉ. મુકુલ પટેલ, કુલસચિવ ડૉ. અશોક ચાવડા, શારીરિક સ્વાસ્થ્ય શિક્ષણના ડાયરેક્ટર હર્ષવર્ધન ઝાલા, બોર્ડ ઑફ ગવર્નર્સના સભ્ય ડૉ. ભરત કલસરિયા તથા ચીફ એકાઉન્ટ ઑફિસર એમ. એન. બાદી પણ ઉપસ્થિત રહ્યા હતા.આંતરરાષ્ટ્રીય ક્રિકેટર તરીકે ખૂબ ખ્યાતિ મેળવનાર યુવરાજ અજયસિંહ જાડેજાએ મંચ પરથી સંબોધન કરતાં પોતાની જામનગરના દિકરા તરીકે જ ઓળખાણ આપી હતી. તેમણે પોતાના બાળપણની ક્રિકેટની યાદોને તાજી કરતાં જણાવ્યું હતું. આ જ ગ્રાઉન્ડમાં અમે પણ ક્રિકેટ રમીને મોટા થયા છીએ. તમારી જેમ જ ટેનિસ બોલથી ક્રિકેટ રમતાં હતાં, અને આજે પણ અમે આ માટી સાથે જોડાયેલા છીએ. જામ સાહેબ રણજીતસિંહજી બાપુ એ જામનગરમાં ક્રિકેટના જે મૂળ નાખ્યા છે, તે હવે અમારા બધાના લોહીમાં વણાવા લાગ્યું છે. આ પ્રસંગે યુવરાજ એ પોતાના તમામ પૂર્વજો, વડીલોને યાદ કરીને આયુર્વેદ યુનિવર્સિટી સાથેનો રાજ પરિવારનો અનોખો, વર્ષો જૂનો સંબંધ પણ વાગોળ્યો હતો.આ પ્રસંગે ગુજરાત આયુર્વેદ યુનિવર્સિટીના કુલપતિશ્રી ડૉ. મુકુલ પટેલે પણ જામસાહેબ શત્રુશલ્યસિંહજી બાપુ સાથેના તેમના વિદ્યાર્થીકાળના સંસ્મરણો વાગોળ્યા હતા. અને ક્રિકેટ પ્રેમ તથા આયુર્વેદ અંગેના બાપુસાહેબના પ્રેમ વિશે પણ વાત કરી હતી. તેમનું કહેવું હતું કે ‘આ ક્રિકેટ ટુર્નામેન્ટ વિદ્યાર્થીઓમાં રમતગમતની ભાવના અને સૌહાર્દને પ્રોત્સાહન આપશે.”ત્યાર બાદ આ ક્રિકેટ ટુર્નામેન્ટને ઔપચારિક રૂપે શરૂ કરીને યુવરાજ અજયસિંહજી જાડેજા તથા ગુજરાત આયુર્વેદ યુનિવર્સિટીના કુલપતિશ્રી ડૉ. મુકુલ પટેલે ગ્રાઉન્ડ પર આવીને એક બોલની રમત રમી હતી. ડૉ. મુકુલ પટેલે બૉલિંગ કરી હતી અને યુવરાજ એ બેટિંગ કરીને વિદ્યાર્થીઓના ઉત્સાહમાં વધારો કર્યો હતો.આ ઉજવણીમાં સમગ્ર રાજ્યમાંથી સ્ટાફ, વિદ્યાર્થીઓ, પૂર્વવિદ્યાર્થીઓ અને મહાનુભાવો ઉપસ્થિત રહ્યા છે, જે આ વિશિષ્ટ અવસરને યાદગાર બનાવશે. આયુર્વેદનું મૂલ્ય અને તેના આ ભવ્ય વારસાને સામાન્ય જીવનમાં વણી લેવાના પ્રયાસ સાથે જ્યારે ભારત દેશના વડાપ્રધાન નરેન્દ્રભાઈ મોદી પ્રતિબદ્ધ છે. ત્યારે ગુજરાત આયુર્વેદ યુનિવર્સિટી પણ તે જ દિશામાં આગળ વધીને પોતાના પ્રયત્નો કરી રહી છે.

ગુજરાત આયુર્વેદ યુનિવર્સિટીના સ્થાપના દિન નિમિત્તે આયુર્વેદના વારસાને આગળ વધારવામાં પોતાનું યોગદાન આપનાર પૂર્વ આચાર્યો તથા સંશોધકોને યાદ કરતાં ગુજરાત આયુર્વેદ યુનિવર્સિટીના કુલપતિશ્રી ડૉ. મુકુલભાઈ પટેલનું કહેવું છે, કે ‘આયુર્વેદનું જ્ઞાન એ દરેક રીતે માનવમાત્રના જીવનમાં સમૃદ્ધિ વધારનારું સાબિત થયું છે. માત્ર ગુજરાત જ નહીં, પરંતું, ભારત અને વિશ્વભરમાં આયુર્વેદને ધારાધોરણ પ્રમાણેના અભ્યાસના ઢાંચામાં ઢાળવામાં ગુજરાત આયુર્વેદ યુનિવર્સિટી સર્વ પ્રથમ રહી છે. શૈક્ષણિક ક્ષેત્રે આયુર્વેદનો અભ્યાસક્રમ ગોઠવાયો, મેઇનસ્ટ્રીમ મેડીકલમાં તેનો ઉમેરો થયો. દેશ વિદેશના વિદ્યાર્થીઓ આ જ્ઞાનને મેળવવા માટે પ્રતિબદ્ધ થયા છે, ત્યારે આ દરેક તબક્કે ગુજરાત આયુર્વેદ યુનિવર્સિટીનું યોગદાન અતિ મહત્વનું રહ્યું છે. આજે આ સંસ્થાને આ મુકામે પહોચાડવામાં પોતાનો ફાળો આપનાર તમામને હું હ્રદયથી વંદન કરું છું. તમામનો હું આભાર માનું છું.

જામનગરના ખોજા વેપારી યુવાનની પત્ની એકાએક લાપત્તા બની જતા પરિવારજનોમાં ચિંતા : ગુમનોંધ કરાવાઈ

દેશ દેવી ન્યૂઝ જામનગર તા ૬ જાન્યુઆરી ૨૫, જામનગર માં સેના નગર વિસ્તારમાં રહેતા ખોજા જ્ઞાતિના વેપારી યુવાન ની પત્ની એકાએક લાપતા બની જતાં સિટી સી. ડિવિઝન પોલીસ મથકમાં ગુમ નોંધ કરાવાઈ છે.આ બનાવની વિગત એવી છે કે જામનગરમાં સેનાનગર વિસ્તારમાં રહેતા ખોજા વેપારી અમિતભાઈ આશિષભાઈ પીરાણી (જાતે.ખોજા ઉ.વ-૩૨) એ સીટી સી. ડીવીઝન પોલીસ મથકમાં આવીને જાહેર કર્યું હતું કે પોતાની પત્નિ શીફાબેન અમિતભાઈ પીરાણી (જાતે-ખોજા ઉ.વ-૨૨) તેમના ઘરેથી કોઇને કહ્યા વગર એકાએક લાપતા બની ગઈ છે.જેની અનેક સ્થળે તેમજ સગા સંબંધીઓને ત્યાં પૂછપરછ અને શોધખોળ કરતાં ક્યાંય પત્તો મળ્યો ન હોવાથી આ ગુમ નોંધ કરાવી છે. જેને એએસઆઈ એ જે સિંહલા સહિતની પોલીસ ટીમ શોધી રહી છે.

જામનગર શહેર અને જિલ્લા ભાજપના પ્રમુખ પદ ની ચૂંટણી માટે ઉમેદવારીપત્રો ભરાયા

• શહેર માટે ૧૩ અને જિલ્લા માટે ૨૧ ઉમેદવારોની દાવેદારીઃ પ્રદેશ ભાજપના નિરીક્ષકો ઉપસ્થિત

દેશ દેવી ન્યુઝ જામનગર તા. ૪ જાન્યુઆરી ૨૪, જામનગર શહેર (મહાનગર) અને જિલ્લા ભાજપ પ્રમુખ પદની મુદ્દત પૂર્ણ થતાં સંગઠન પર્વને અનુલક્ષીને નવા પ્રમુખની વરણી કરવામાં આવનાર છે. આ માટે આજે ઉમેદવારી પત્રો ભરવાની કાર્યવાહી કરવામાં આવી હતી.જામનગર શહેર ભાજપ કાર્યાલયમાં પ્રદેશ ચૂંટણી નિરીક્ષક ચૂંટણી અધિકારી તરીકે ડો. જાનકીબેન આચાર્ય અને રાજૂભાઈ ધારૈયા ઉપસ્થિત રહયા હતા અને તેઓએ દાવેદારો પાસેથી સવારે ૧૦ થી બપોરે ૧ વાગ્યા સુધી ઉમેદવારી ફોર્મ સ્વીકારવામાં આવ્યા હતા. શહેર ના પ્રમુખપદ માટે ૧૩ ઉમેદવારો એ દાવેદારી નોંધાવી છે.જેમાં વિમલભાઈ કગથરા, ખુમાનસિંહ સરવૈયા, વિજયસિંહ જેઠવા, કે. જી. કનખરા, દિલીપસિંહ જાડેજા, દયાબેન પરમાર, પ્રવીણ મકવાણા, દિલીપ જોઈશર, ધર્મરાજસિંહ જાડેજા, ગિરીશ અમેથીયા, પ્રવીણ પરમાર, દિનેશ ગજરા અને ગોપાલ સોરઠીયા નો સમાવેશ થાય છે.આ કાર્યવાહી સમયે શહેર ભાજપ પ્રમુખ ડો. વિમલ કગથરા, મહામંત્રી પ્રકાશ બાંભણીયા અને વિજયસિંહ જેઠવા, સ્થાનિક અગ્રણી મનીષ કનખરા, ખુમાનસિંહ સરવૈયા સહિતનાઓ ઉપસ્થિત રહ્યા હતા. તેવી જ રીતે જિલ્લા ભાજપના પ્રમુખ પદ માટેની ચૂંટણી નિરીક્ષક- અધિકારી તરીકે એચ.એમ. પટેલ અને નરેશ દેસાઈ ઉપરાંત સ્થાનિક માં દિલીપસિંહ ચુડાસમા અને કે.બી. ગાગીયા ઉપરાંત જિલ્લા ભાજપ પ્રમુખ રમેશભાઈ મુંગરા, યાર્ડના ચેરમેન મુકુન્દ સભાયા સહિતનાઓ ઉપસ્થિત રહ્યા હતા.બપોરે ૧૨-૩૦ સુધી ફોર્મ સ્વીકારવામાં આવ્યા હતાં. અને ૨૧ ઉમેદવારોએ પોતાના ફોર્મ રજૂ કર્યા હતાં. જેમાં ડૉ.વિનોદભાઈ ભંડેરી, દિલીપસિંહ ચુડાસમા, કુમારપાલસિંહ રાણા, દિલીપભાઈ ભોજાણી, સુરેશભાઈ વસરા, કૌશિકભાઈ રાબડીયા, લખધીરસિંહ જાડેજા, પ્રતીક્ષાબા જાડેજા, નાનજીભાઈ ચોવટિયા, ભરતભાઈ અકબરી, વલ્લભભાઈ ધારવીયા, કાનજીભાઈ પરમાર, એમ. ડી. મકવાણા, હર્ષાબેન રાજગોર, લાલજીભાઈ વ્યાસ, બ્રિજરાજસિંહ જાડેજા (ધ્રોલ) , ગીતાબેન નકુમ, ડી. ડી. જીવાણી, અરશીભાઈ કરંગીયા, પ્રવીણભાઈ ભંડેરી, ભરતભાઈ બોરસદીયા નો સમાવેશ થાય છે.આ તમામ ફોર્મનો અહેવાલ પ્રદેશ પ્રમુખ સમક્ષ રજૂ કરવામાં આવ્યા પછી શહેર-જિલ્લાના પ્રમુખના નામોની જાહેરાત થશે તેમ જાણવા મળ્યુ છે. સમગ્ર શહેર-જિલ્લાના કલ્સ્ટર તરીકે બાબુભાઈ જેબલીયા પણ ઉપસ્થિત હતા.