જામનગરમાં ગોકુલનગર વિસ્તારમાં લીલા નારીયેળ ની આડ માં ઇગ્લીંશ દારૂનું વેચાણ કરતા બે વેપારી પકડાયા : અન્ય ૩ ના નામ ખુલ્યા

દેશ દેવી ન્યૂઝ જામનગર તા ૨૭ જાન્યુઆરી ૨૫, જામનગરમાં ગોકુલ નગર રડાર રોડ પર આવેલી નારિયેળ પાણીના વેચાણની દુકાનમાં બે દુકાનદારો ગેરકાયદે રીતે ઈંગ્લીશ દારૂ નું વેચાણ કરતા હોવાની બાતમીના આધારે પોલીસે દરોડો પાડી ૮૯ નંગ ઇંગ્લિશ દારૂની બાટલી નો જથ્થો પકડી પાડ્યો છે, અને બે દુકાનદારોની અટકાયત કરી છે. જ્યારે તેઓને દારૂ સપ્લાય કરનાર અન્ય ત્રણને ફરારી જાહેર કરાયા છે.જામનગરના સીટી સી. ડિવિઝનના પોલીસ સ્ટાફને ચોક્કસ બાતમી મળી હતી કે ગોકુલનગર રડાર રોડ વિસ્તારમાં એક ફાસ્ટફૂડની બાજુમાં નાળિયેર પાણી નું વેચાણ કરતા વેપારીઓ દ્વારા પોતાની દુકાનમાં લીલા નાળિયેરની આડશમાં ગેરકાયદે રીતે ઇંગ્લીશ દારૂનું વેચાણ કરવામાં આવી રહ્યું છે. જે બાતમીના આધારે ગઈકાલે સીટી સી. ડિવિઝન પોલીસે દરોડો પાડ્યો હતો. જે દરોડા દરમિયાન દુકાનમાંથી જુદી જુદી બ્રાન્ડની ૮૯ નંગ ઇંગ્લિશ દારૂની બાટલીનો જથ્થો મળી આવ્યો હતો.આથી પોલીસે રૂપિયા ૪૪,૫૦૦ ની કિંમતની ૮૯ નંગ ઈંગ્લીશ દારૂ ની બાટલી સાથે બે આરોપીઓ રીતીકભાઇ વિજયભાઇ ભારાવાળા (રહે. ઇન્દીરા સોસાયટી શેરી નં -૫) તેમજ ધનરાજભાઈ પ્રવિણભાઇ બારૈયા (રહે. રંગમતી પાર્ક શેરી નં.૫) ને ઝડપી લીધા છે, જ્યારે તેઓને દારૂ નો જથ્થો સપ્લાય કરનાર કિસાન ચોક વિસ્તારમાં રહેતા ઇમરાન શેખ, ઉપરાંત હિતેશ બાંભણિયા અને ઉમેશ ઉર્ફે બાબુ નાખવાને ફરારી જાહેર કરાયા છે.

જામનગર જિલ્લાના ઇતિહાસમાં દરિયા કિનારે આવેલા જુદા જુદા ચાર ટાપુઓ ઉપર ધ્વજ વંદન કરાયું

દેશ દેવી ન્યૂઝ જામનગર તા ૨૭, જાન્યુઆરી ૨૫ ગુજરાત રાજ્ય સરકારના સીધા માર્ગદર્શન હેઠળ જામનગર જિલ્લાના વહીવટી તંત્ર દ્વારા જિલ્લાના સાગરકાંઠા ઉપર આવેલા પીરોટોન સહિતના અલગ અલગ ૪ ટાપુઓ ઉપર સૌપ્રથમ વખત દેશના ૭૬ માં પ્રજાસત્તાક પર્વની ઉજવણી કરવામાં આવી હતી, અને વહીવટી તંત્ર દ્વારા આન બાન અને શાન થી ધ્વજવંદનનો કાર્યક્રમ યોજાયો હતો.ભારત દેશ ના ૭૬માં પ્રજાસતાક દિનની ઉજવણીના ભાગરૂપે જામનગર જીલ્લાના દરિયાઈ વિસ્તારમાં આવેલ પીરોટન ટાપુ ખાતે તા.૨૬મી જાન્યુઆરી ના રોજ ક.૦૦૮:૪૫ વાગ્યે શ્રી પી બી કરમુર (આર.એફ.ઓ.જામનગર મરીન ફોરેસ્ટ) તથા શ્રી વી.એસ. પોપટ (પો.સ.ઇન્સ., બેડી મરીન પો.સ્ટે., જામનગર) ના હસ્તે ધ્વજવંદન કાર્યક્રમ સંપન્ન કરવામાં આવ્યો હતો.ઉપરોક્ત પીરોટન ટાપુ ખાતે ના ધ્વજવંદન બાદ પીરોટન ટાપુની નજીક આવેલ જિંદડા, ચાકડી તથા સેજા ટાપુઓ પર પણ ધ્વજવંદન કરવામાં આવ્યું હતું, અને જામનગર જિલ્લાના વહીવટી તંત્ર દ્વારા સાગર કિનારા ઉપર આવેલા ચારેય ટાપુ પર ઇતિહાસમાં પ્રથમ વખત આન બાન અને શાન થી ધ્વજવંદન નો કાર્યક્રમ યોજવામાં આવ્યો હતો.

જામજોધપુરના કડબાલ ગામની ૨૪ વર્ષીય યુવતી લાપતા બની જતાં ગુમ નોંધ કરાવાઈ

દેશ દેવી ન્યૂઝ જામનગર તા ૨૫ જાન્યુઆરી ર૫  જામનગર જિલ્લાના જામજોધપુર તાલુકાના કડબાલ ગામમાં રહેતી નિરાલીબેન ભદાભાઈ વરુ નામની ૨૪ વર્ષની યુવતિ કે જે પોતાના ઘેરથી એકાએક લાપતા બની ગઈ હતી અને પરિવારજનો દ્વારા તેણીની સગા સંબંધીઓ સહિતના અનેક સ્થળે શોધખોળ કરી હતી, પરંતુ તેણીનો કોઈ પતો સાંપડ્યો ન હતો.આથી નિરાલી બેનના કુટુંબી દ્વારા શેઠ વડાળા પોલીસ મથકનો સંપર્ક સાધવામાં આવ્યો હતો, અને સામતભાઈ ભીમાભાઇએ ગમ નોંધ કરાવતાં પોલીસ દ્વારા તેણીની શોધખોળ ચલાવવામાં આવી રહી છે.

જામનગરના પ્રદર્શન ગ્રાઉન્ડમાં હજારોની સંખ્યામાં ખગોળ પ્રેમી જનમેદનીની વચ્ચે પ્લેનેટ પરેડ નિદર્શન કાર્યક્રમ યોજાયો

• જામનગરના જિલ્લા કલેકટર- અધિક કલેકટર- એસપીના પરિવાર, ડેપ્યુટી મેયર સહિતના પદાધિકારીઓ અને વહીવટી તંત્રના અધિકારીઓ સાક્ષી બન્યા

દેશ દેવી ન્યૂઝ જામનગર તા ૨૫, જાન્યુઆરી ૨૫ જામનગરના પ્રદર્શન મેદાનમાં ગઈકાલે તા. ૨૪મી જાન્યુઆરી ના રોજ સાંજે ૭.૦૦ વાગ્યા થી રાત્રી ના ૧૨.૦૦ વાગ્યા સુધીના પાંચ કલાકના સમય ગાળા દરમિયાન આપણા નભોમંડળમાં રહેલા મંગળ ગ્રહ, ગુરૂ ગ્રહ, શુક્ર ગ્રહ તથા શનિ સહિતના ગ્રહો નું ટેલિસ્કોપ દ્વારા પ્રત્યક્ષ નિદર્શન નો કાર્યક્રમ ખગોળ મંડળ- જામનગર તથા એમ. ડી. મહેતા સાયન્સ સેન્ટર ધ્રોળ ના સંયુક્ત ઉપક્રમે યોજવામાં આવ્યો હતો. આ નિદર્શનના કાર્યક્રમમાં હજારો ની સંખ્યા માં ખગોળ પ્રેમીઓ ઉમટી પડ્યા હતા. તેમજ જામનગર શહેર અને જિલ્લાના મહાનુભાવો પણ ઉપસ્થિત રહીને સમગ્ર ખગોળીય ઘટના ના સાક્ષી બન્યા હતા.જામનગર જિલ્લાના સાંસદ પૂનમબેન માડમ, જામનગરના ૭૮- વિધાનસભા વિસ્તારના ધારાસભ્ય રિવાબા જાડેજા, તેમજ ૭૯- દક્ષિણ વિધાનસભા વિસ્તારના ધારાસભ્ય દિવ્યેશભાઈ અકબરી, અને નગરના મેયર વિનોદભાઈ ખીમસૂરિયા તેરે ઉપસ્થિત રહી શક્યા ન હતા પરંતુ તેઓએ સમગ્ર કાર્યક્રમ સંદર્ભે ખગોળ પ્રેમી જનતા ને શુભકામનાઓ પાઠવી હતી.આ નિદર્શન ના કાર્યક્રમમાં જામનગરના જિલ્લા કલેકટર ભાવિનકુમાર પંડ્યા પરિવાર સહિત ઉપસ્થિત રહ્યા હતા, અને પ્લેનેટ પરેડનું ટેલિસ્કોપથી નિરીક્ષણ કરીને અભિભૂત થયા હતા. આ ઉપરાંત જિલ્લા પોલીસ અધિક્ષક પ્રેમસુખ ડેલુ ના પરિવાર, અધિક કલેકટર બી.એન. ખેર, શહેર વિભાગના પ્રાંત અધિકારી પી.બી. પરમાર ડિસ્ટ્રીક કો-ઓપરેટીવ બેંકના ચેરમેન જીતુભાઈ લાલ, પીજીવીસીએલ ના અધિક્ષક ઈજનેર હષિત વ્યાસ, ભારતીય જનતા પાર્ટીના શહેર અધ્યક્ષ ડો. વિમલભાઈ કગથરા, નગરના ડેપ્યુટી મેયર ક્રિષ્નાબેન સોઢા વગેરે પરિવાર સાથે મુખ્ય મહેમાન તરીકે ઉપસ્થિત રહી સમગ્ર ખગોળીય ઘટનાના સાક્ષી બન્યા હતા, અને પ્લેનેટ નિદર્શન નો કાર્યક્રમ ટેલિસ્કોપ ના માધ્યમથી નિહાળ્યો હતો.જામનગર ખગોળ મંડળના મુખ્ય સંયોજક કિરીટભાઈ શાહ, અને કિરીટભાઈ વ્યાસ, તેમજ એમ.ડી. મહેતા સાયન્સ સેન્ટર ધ્રોળના સુધાબેન ખંઢેરીયા ના માર્ગદર્શન હેઠળ પ્રોગ્રામ ઓફિસર ડો. સંજય પંડ્યા, રવિ ગજ્જર, પંકજ ડાંગર, સદામભાઇ નારેજા અને નદીમભાઈ નારેજા વગેરેની ટિમ દ્વારા જુદા જુદા પાંચ ટેલિસ્કોપ ગોઠવીને પ્લેનેટ નીદર્શન કાર્યક્રમ યોજવામાં આવ્યો હતો, જેમાં હજારોની સંખ્યામાં ખગોળ પ્રેમીઓએ ઉપસ્થિત રહી સાંજે ૭,૦૦ વાગ્યાથી લઈને રાત્રીના ૧૨,૦૦ વાગ્યા સુધી પ્લેનેટ પરેડ ની ખગોળીય ઘટના નીહાળી હતી જેમાં ખાસ કરીને બાળકોનો ઉત્સાહ વધારે જોવા મળ્યો હતો. કડકડતી ઠંડીમાં પણ નાના ભૂલકાઓ સહિતના ખગોળ પ્રેમી નગરજનોએ મોડીરાત્રી સુધી લાંબી લાંબી કતાર લગાવી હતી, અને પ્લેનેટ પરેડ નો કાર્યક્રમ નિહાળ્યો હતો.

જામનગર નજીક બેડીના દરિયામાં આવેલા પીરોટન ટાપુને દબાણ મુક્ત કર્યા પછી વહીવટી તંત્ર દ્વારા ૨૬ મી જાન્યુઆરીએ ધ્વજ વંદનનો કાર્યક્રમ યોજાશે

• ભારતના સીમાડે આવેલા ટાપુઓની સુરક્ષા માટે ગુજરાતનું વહીવટી તંત્ર સતર્ક છે, તેનો સંદેશો આપવા સમગ્ર કાર્યવાહી

દેશ દેવી ન્યૂઝ જામનગર તા ૨૪ જાન્યુઆરી ૨૫, ગુજરાત રાજ્ય સરકારના સીધા માર્ગદર્શન અને દેખરેખ હેઠળ જામનગર નજીકના બેડીના દરિયા વિસ્તારમાં આવેલા પિરોટન ટાપુ પર ગેરકાયદે દબાણો દૂર કરવામાં આવ્યા હતા, અને જામનગર જિલ્લા ના એસ.પી. પ્રેમસુખ ડેલુના સીધા માર્ગદર્શન હેઠળ ભારે પોલીસ પહેરા હેઠળ ડીમોલેશનની કાર્યવાહી હાથ ધરી લેવામાં આવી હતી. જ્યાં તમામ પ્રકારના ધાર્મિક દબાણો દૂર કરીને સમગ્ર ટાપુને ખુલ્લો કરી દેવામાં આવ્યો હતો.ત્યારબાદ પીરોટન ટાપુ પર સુરક્ષા એજન્સીઓ દ્વારા સતત પેટ્રોલિંગ કરવામાં આવી રહ્યું છે, આ ઉપરાંત આગામી તારીખ ૨૬ મી જાન્યુઆરીએ રાજ્ય સરકારની માર્ગદર્શન હેઠળ સૌપ્રથમ વખત ધ્વજવંદનનો કાર્યક્રમ પણ યોજાવા જઈ રહ્યો છે.જામનગરના શહેર વિભાગના ડીવાયએસપી જે. એન. ઝાલાની રાવબરી હેઠળ બેડી મરિન પોલીસ સ્ટેશનના સ્ટાફ, એસ ઓ જી શાખા તથા અન્ય પોલીસ વિભાગની ટીમ, સાથો સાથ જામનગર સ્થિત કાર્યરત વાલસુરા- નેવી, કોસ્ટકાર્ડ સહિતની સુરક્ષા એજન્સીઓના ૩૦ થી વધુ અધિકારીઓ અને જવાનોની ટીમ ૨૬મી જાન્યુઆરીએ પીરોટન ટાપુ પર પહોંચશે, અને ત્યાં ધ્વજવંદનનો કાર્યક્રમ પણ યોજાશે. જે અંગેની તમામ તૈયારીઓ કરી લેવામાં આવી છે.ભારતના દરિયા કાંઠા ઉપર આવેલા અલગ અલગ ટાપુઓ, કે જ્યાં સુરક્ષા ની દ્રષ્ટિએ ભારતની તમામ સુરક્ષા એજન્સીઓ એલર્ટ છે, અને સુરક્ષાના તમામ પગલાંઓ લેવામાં આવી રહ્યા છે, જેનો સંદેશો પહોંચાડવાના ભાગરૂપે રાજ્ય સરકારના સીધા માર્ગદર્શન હેઠળ ધ્વજવંદન નો કાર્યક્રમ યોજવા જઈ રહ્યો છે.

જામનગરના દરબારગઢ- બર્ધન ચોક વિસ્તારમાં ગેરકાયદે દબાણો દૂર કરવા માટેની વહીવટી તંત્ર ની ઝુંબેશ આખરે રંગ લાવી

• શહેરના દરબારગઢ થી માંડવી ટાવર સુધીનો વિસ્તાર તેમજ દરબાર ગઢથી શાક માર્કેટ સુધીનો સમગ્ર વિસ્તાર દબાણ મુક્ત જણાયો

દેશ દેવી ન્યૂઝ જામનગર તા ૨૪ જાન્યુઆરી ૨૫, જામનગર મહાનગરપાલિકાના વહીવટી તંત્ર તેમજ પોલીસ વિભાગ દ્વારા છેલ્લા ચાર દિવસથી દરબારગઢ- શાક માર્કેટ- બર્ધન ચોક સહિતના વિસ્તારમાં ગેરકાયદેસરના દબાણો દૂર કરવા માટેની વિશેષ ઝુંબેશ હાથ ધરવામાં આવી છે, અને રેકડી- પથારા સહિતના દબાણો દૂર કરવામાં આવ્યા હતા, જયારે કેટલાક વેપારીઓ દ્વારા પોતાની દુકાન ની બહાર ઓટલા વગેરે ખડકી દેવાયા હતા, તે તમામ પણ દૂર કરી નાખવામાં આવ્યા હતા, અને સમગ્ર વિસ્તારને ખુલ્લો કરાવ્યો હતો.છેલ્લા ત્રણ દિવસથી જામનગર મહાનગરપાલિકાને એસ્ટેટ શાખાની ટીમ ઉપરોક્ત વિસ્તારમાં ફરતી રહી હતી, અને દબાણ કરનારાઓ સામે કડક હાથે કામ લીધું હતું. છેલ્લા ત્રણ દિવસ દરમિયાન ૩૦ થી વધુ રેકડી- કેબીનો વગેરે કબજે કરીને મહાનગરપાલિકાની કચેરીમાં જમા કરાવી દેવામાં આવી છે, તેમજ પથારા વાળાઓને પણ સ્પષ્ટ સૂચના આપી દેવાઇ છે. જેના કારણે ઉપરોક્ત વિસ્તાર દબાણ મુક્ત બન્યો છે.છેલ્લા ચાર દિવસની વહીવટી તંત્રની કવાયત આખરે રંગ લાવી છે અને દરબારગઢ થી બર્ધન ચોક અને ત્યાંથી છેક માંડવી ટાવર સુધીનો સમગ્ર રસ્તો ખુલ્લો જોવા મળ્યો હતો, અને આજે ઉપરોક્ત વિસ્તારમાં લોકોને અવરજવર માટેની કોઈ પણ પ્રકારની મુશ્કેલી થઈ ન હતી. સીટી બસ પણ આ વિસ્તારમાંથી આરામથી પસાર થઈ શકી હતી.જામનગર મહાનગર પાલિકાના એસ્ટેટ અધિકારી નીતિન દીક્ષિત તેમજ દબાણ હટાવ અધિકારી સુનિલ ભાનુશાળી અને યુવરાજસિંહ ઝાલાની રાહબરી હેઠળ ની ટુકડી બર્ધન ચોક, શાકમાર્કેટ સહિતના વિસ્તારમાં સતત પેટ્રોલિંગ કરી રહી છે, અને કોઈપણ પ્રકારના રેકડી પથારાના દબાણ ન સર્જાય તેની તકેદારી રાખી રહ્યા છે, અને આજે સંપૂર્ણ રસ્તા દબાણ મુક્ત થયેલા જોઈ શકાય હતા. જેથી રાહદારીઓ વાહન ચાલકો તેમજ સ્થાનિક રહેવાસીઓએ આખરે રાહતનો શ્વાસ લીધો છે.

લાલપુરના મેઘપરમાં રહેતી ૨૨ વર્ષ ની યુવતી લાપત્તા થઈ જતાં પરિવારજનોમાં ચિંતા : ગુમ નોંધ કરાવાઈ

દેશ દેવી ન્યૂઝ જામનગર તા ૨૩ જાન્યુઆરી ૨૫, જામનગર જિલ્લાના લાલપુર તાલુકાના મેઘપર ગામમાં રહેતી ૨૨ વર્ષીય અપરણીત યુવતી પોતાના ઘરેથી એકાએક લાપતા બની જતાં પરિવારજનો ચિંતામાં મુકાયા છે, અને મેઘપર પોલીસ મથકમાં ગુમનોંધ કરાવાઈ છે. જેને પોલીસ શોધી રહી છે.લાલપુર નજીક મેઘપર ગામમાં રહેતી સપના ઉર્ફે ભૂમિ વકુભાઈ પરમાર નામની ૨૨ વર્ષની અપરણીત યુવતી કે જે પોતાના ઘેરથી ગત ૨૧મી તારીખે એકાએક લાપત્તા બની ગઈ હતી. પરિવારજનો એ તેની અનેક સ્થળે શોધખોળ કર્યા પછી પણ કોઈ પત્તો સાંપડ્યો ન હતો.આથી આખરે જામનગરના મેઘપર પોલીસનો સંપર્ક સાધવામાં આવ્યો હતો, અને ગુમ નોંધ કરાવતાં મેઘપર પોલીસ તેણીને શોધી રહી છે.

જામનગરના શંકર ટેકરી વિસ્તારમાં આવેલા મહાજન વેપારીના બે શેડ ખરીદવાના બહાને રૂપિયા ૧ કરોડ ૪૦ લાખની છેતરપિંડી

• જામનગરના શક્તિ ગ્રહ ઉદ્યોગના સંચાલક બે ભાઈઓએ બે વર્ષ પહેલાં સોદો કર્યા પછી નાણાં નહીં ચૂકવી છેતરપિંડી કર્યાની ફરિયાદ

દેશ દેવી ન્યૂઝ જામનગર તા ૨૩ જાન્યુઆરી ૨૫ જામનગરના શંકર ટેકરી ઉદ્યોગનગર વિસ્તારમાં આવેલા મહાજન વેપારીના બે શેડ ખરીદવાના બહાને જામનગરના શક્તિ ગ્રહ ઉદ્યોગના સંચાલક બે ભાઈઓએ બે વર્ષથી રૂપિયા નહીં ચૂકવી એક કરોડ ચાલીસ લાખની છેતરપિંડી કરવા અંગેની ફરિયાદ પોલીસમાં નોંધાવાતા ભારે ચકચાર જાગી છે.આ ફરિયાદ અંગેના બનાવની વિગત એવી છે કે જામનગરમાં હરિયા સ્કૂલ સામે મહાવીર એપાર્ટમેન્ટમાં રહેતા અને ઉદ્યોગ નગર વિસ્તારમાં મુંબઈના મહાજન વેપારી મિલકતો વગેરે સંભાળતા અને કારખાના નું એકમ ચલાવતા મેહુલભાઈ વીરચંદ શાહ નામના મહાજન વેપારીએ જામનગરના શક્તિ ગ્રહ ઉદ્યોગના સંચાલક મુકેશભાઈ મંગળજીભાઈ મકવાણા તેમજ તેમના ભાઈ શાંતિ લાલ મંગળજીભાઈ મકવાણા સામે રૂપિયા એક કરોડ ચાલીસ લાખની છેતરપિંડી કર્યાની ફરિયાદ સીટી સી. ડિવિઝન પોલીસ મથકમાં નોંધાવી છે.પોલીસ ફરિયાદમાં જાહેર કરાયા અનુસાર મૂળ મુંબઈના મહાજન વેપારી રાજનભાઈ ગડા કે જેઓના શંકર ટેકરી ઉદ્યોગ નગર વિસ્તારમાં બે પ્લોટ આવેલા છે, અને તેમાં શેડ ઊભા કર્યા બાદ તેનું સંચાલન ફરિયાદી મેહુલભાઈ શાહ ધણા વર્ષોથી કરી રહ્યા છે.જે બંને પ્લોટમાં ઊભા કરેલા સેડ એક કરોડ ૬૫ લાખ માં બંને ભાઈઓએ આજથી બે વર્ષ પહેલાં શોદો કરીને ને સુથી પેટે ૫૧,૦૦૦ ની રકમ આપી હતી, જયારે કેટલીક રકમ ચેક મારફતે પણ ચૂકવી હતી, અને તેના કાગળો તૈયાર કરાવ્યા હતા.જ્યારે બાકીની ૧.૪૦ કરોડ ની રકમ પોતે લોન મેળવીને ચૂકવી દેશે તેમ જણાવ્યું હતું. પરંતુ બે વર્ષનો સમયગાળો વીતી ગયો હોવા છતાં બાકીની ૧ કરોડ ૪૦ લાખની રકમ ચૂકવી ન હતી, અને મૂળ માલિક રાજનભાઈ ગડાની હાજરી વગર નોટરી કરાર વગેરે કરાવી લીધા હતા, અને બાકીના નાણા નહીં ચૂકવતાં વિશ્વાસઘાત અને છેતરપિંડી કરી હોવાથી મામલો પોલીસ મથકમાં લઈ જવાયો હતો.

જે ફરિયાદ ના આધારે સીટી સી. ડિવિઝન ના પી.એસ.આઇ. રવિરાજસિંહ ડી. ગોહિલે આઇપીસી કલમ ૪૦૬ અને ૪૨૦ મુજબ બંને ભાઈઓ સામે ગુન્હો નોંધ્યો છે, અને વધુ તપાસ હાથ ધરી છે.

જામનગરની પૌરાણિક રંગમતી- નાગમતી નદી નું વહેણ દબાવનારા તત્વો પર તંત્રનો હથોડો

• ભારે પોલીસ બંદોબસ્તની સાથે મહાનગર પાલિકાની ટીમ દ્વારા ૯૮,૦૦૦ ચોરસ ફુટ જગ્યા ખુલ્લી કરાવાઈ

• રહેણાક મકાનો અને ૬ ગેરેજ સહિતના કોમર્શિયલ દબાણ દૂર કરવા માટે ૨૦ માણસો સાથે ૪ જેસીબી ની મદદ લેવાઇ

દેશ દેવી ન્યૂઝ જામનગર તા ૨૨ જાન્યુઆરી ૨૫, જામનગર મહાનગરપાલિકાનું તંત્ર હાલમાં મોટા પાયે દબાણ હટાવની ઝુંબેશ હાથ ધરી રહ્યું છે, અને અનેક નાના મોટા દબાણ દૂર કરવામાં આવી રહ્યા છે. ખાસ કરીને કેટલાક ગુન્હેગારો પર વધારે સિકંજો કસવામાં આવી રહ્યો છે.દરમિયાન જામનગર શહેરની ઐતિહાસિક રંગમતી-નાગમતી નદી વહેણ પણ દબાણ કરનારા તત્વો દ્વારા બંધ કરી દેવામાં આવ્યા હતા, અને છડે ચોક મકાનો તેમજ ધંધા ના સ્થળો ઉભા કરી દેવાયા હતા, જેના કારણે અનેક વિસ્તારોમાં પાણી ભરાવાની સમસ્યા પણ ઊભી થાય છે. જે તમામ દબાણો ઉપર તંત્રનો હથોડો ઝીંકાયો છે.જામનગરની રંગમતી-નાગમતી નદીના વહેંણ ના પટ કે જ્યાં મોટા પાયે દબાણ થઈ ગયા હોવાથી ગઈકાલે સાંજે મહાનગરપાલિકા ના કમિશનર ડી.એન. મોદી તેમજ જિલ્લા પોલીસ વડા પ્રેમસુખ ડેલુ અને પોલીસ કાફલો તેમજ મહાનગરપાલિકાની ટીમ દ્વારા સર્વે કરવામાં આવ્યો હતો. અને કેટલાક આસામીઓને આખરી નોટિસ પાઠવી દેવામાં આવી હતી, જેમાં ૬ રહેણાંક મકાનો અને છ કોમર્શિયલ બાંધકામાનો સમાવેશ થાય છે.આ તમામ સ્થળોએ આજે વહેલી સવારથી ડિમોલેશનનું કામ હાથ પર લેવાયું હતું. જામનગર મહાનગરપાલિકાના એસ્ટેટ વિભાગના કંટ્રોલિંગ અધિકારી મુકેશ વરણવા, એસ્ટેટ અધિકારી નીતિન દીક્ષિત, દબાણ હટાવ અધિકારી સુનિલ ભાનુશાલી, તથા યુવરાજસિંહ ઝાલા ની રાહબરી હેઠળ એસ્ટેટ શાખાનો ૨૦ કર્મચારીઓનો કાફલો ચાર જેસીબી મશીન અને બે ટ્રેક્ટર સહિતની મશીનરીઓ સાથે રંગમતી નાગમતી નદીના પટમાં પહોંચ્યો હતો.આ વેળાએ જામનગર શહેર વિભાગના ડીવાયએસપી જે એન ઝાલા, સિટી એ. ડિવિઝનના પી.આઇ. એન એ ચાવડા તથા વિશાળ પોલીસ કાફલો બંદોબસ્તમાં જોડાયો હતો. મહાનગરપાલિકા ની લાઇટ શાખાની ટુકડીને પણ સાથે રાખવામાં આવી હતી, અને સૌ પ્રથમ ગેરકાયદે જણાતા વિજ વાયરો ઉતારી લેવામાં આવ્યા હતા.આજે વહેલી સવારથી જ પાકા મકાનો તેમજ ગેરેજ સહિતના કોમર્શિયલ દબાણો દૂર કરવા માટે જેસીબી મશીનથી ડીમોલેશન ની કાર્યવાહી હાથ ધરવામાં આવી હતી, અને આશરે ૯૮ હજાર ચોરસ ફુટ જગ્યા ખુલ્લી કરાવવામાં આવી છે. આ મેગા ડીમોલેશનને લઈને બચુનગર સહિતના આસપાસના વિસ્તારમાં ભારે દોડધામ મચી ગઈ હતી. હજુ પણ બચુનગર સહિતના વિસ્તારમાં અનેક દબાણો હોવાથી મહાનગરપાલિકાની ટીમ દ્વારા સર્વે કરવામાં આવી રહ્યું છે, અને નજીકના ભવિષ્યમાં તે સ્થળે ડીમોલેશનની કાર્યવાહી હાથ ધરવામાં આવશે, તેમ મહાન નગરપાલિકાના સૂત્રોમાંથી જાણવા મળી રહ્યું છે.

જામનગરમાં ટુંક સમય માં મેગા ઓપરેશન ડીમોલિશન ની તંત્ર ની તૈયારી

• જામનગર નાં બર્ધન ચોક ,દરબારગઢ.,માંડવી ટાવર ની ટ્રાફિક સમસ્યા ના કાયમી ઉકેલ માટે તંત્ર ની કવાયત : નદી નાં પટ માં થયેલ દબાણો પણ દૂર થશે

• આજે મ્યુનિ.કમિશનર -જિલ્લા પોલીસ વડા સહિત નાં કાફલા એ સ્થળ મુલાકાત લીધી

દેશ દેવી ન્યૂઝ જામનગર તા. ૨૨ જાન્યુઆરી ૨૫ જામનગર ના બર્ધન ચોક., માંડવી ટાવર વિસ્તાર માં ફેરીયા અને પથારા વાળાઓ જાહેર રોડ ઉપર ટ્રાફિક ને અડચણરૂપ થાય તે રીતે ધંધો કરતા હોવા થી ટ્રાફિક સમસ્યા સર્જાય છે. આ સમસ્યાના કાયમી નિરાકરણ માટે તંત્ર દ્વારા કવાયત હાથ ધરવામાં આવી છે.જેના અનુસંધાને આજે મહાનગરપાલિકાના કમિશનર અને જિલ્લા પોલીસવડા સહિત ના વિશાળ કાફલા એ સ્થળ મુલાકાત લીધી હતી. અને સર્વેક્ષણ કર્યું હતું. આ સાથે જ નદીના પટમાં થયેલા ગેરકાયદે દબાણ ને દૂર ખસેડવા માટે પણ અધિકારીને કાફલા એ સ્થળ નિરીક્ષણ કર્યું હતું. મતલબ કે આગામી ટૂંક સમયમાં જ જામનગરમાં મોટાપાયે સાફ સુફી થવાના એંધાણો વર્તાઈ રહ્યા છે.જામનગર માં બર્ધનચક વિસ્તાર માં કાયમી ટ્રાફિક સમસ્યા સર્જાય છે , સમયાંતરે મહાનગરપાલિકા અને પોલીસ વિભાગ દ્વારા દબાણો ને દૂર કરવામાં આવે છે. પરંતુ બીજા દિવસ થી ફરી અહી ફેરિયાઓ ધંધાર્થી ઓ ત્યાં ગોઠવાઈ જતા હોય છે. આથી માથાના દુખાવા રૂપ આ સમસ્યાના નિરાકરણ માટે તંત્ર એ નક્કર આયોજન કર્યું છે. જેના ભાગરૂપે આજે મહાનગરપાલિકાના કમિશનર ડી એન મોદી , એસ પી પ્રેમસુખ ડેલુ ,નાયબ કમિશનર દેવેન્દ્રસિંહ ઝાલા , કંટ્રોલિંગ અધિકારી મુકેશ વરણવા , ડીવાયએસપી શ્રી ઝાલા ,પી આઇ શ્રી ચાવડા મનપા નાં અન્ય અધિકારી એન આર દીક્ષિત , સુનિલ ભાનુશાલી ,યુવરાજસિંહ ઝાલા તેમજ વિશાળ પોલીસ કાફલો સહિત ના ઓ દ્વારા આજે બર્ધન ચોક વિસ્તાર ની મુલાકાત લેવા માં આવી હતી. અને ટ્રાફિક સમસ્યા ના કાયમી નિરાકરણ માટે સર્વે હાથ ધોરવામાં આવ્યું હતું. ખાસ કરીને બર્ધન ચોક માં એક હંગામી ચોકી ઉભી કરવામાં આવશે. જ્યાં પોલીસ અને મહાનગરપાલિકા ના કર્મચારી હાજર રહેશે. અને દબાણ કરતાં ફેરિયા ,દબાણ કરનારા ને ત્યાં થી દૂર ખસેડવામાં આવશે. ઉપરાંત શાક માર્કેટ થી દરબારગઢ સુધી ના રોડ માં ડિવાઇડર બનાવવામાં આવશે.મળતી માહિતી મુજબ દરબારગઢ વાળી સમગ્ર બિલ્ડિંગમાં કવર્ડ ફૂટપાથ ની સુવિધા ઉપલબ્ધ છે. પરંતુ કેટલાક દુકાનદારો દ્વારા પોતાની દુકાન નો માલ સામાન બહાર ગોઠવી દઈને ફૂટપાથમાં પણ દબાણ કરવામાં આવ્યું છે.આજે પણ મહાનગરપાલિકા અને પોલીસની સંયુક્ત ટીમ દ્વારા સમગ્ર વિસ્તારમાંથી ફેરીયાઓને અને રેકડી ધારકોને દૂર કરવામાં આવ્યા હતા અને સમગ્ર વિસ્તારને ખુલ્લો કરાવવા માં આવ્યો હતો.

આ ઉપરાંત નદીના પટમાં ગેરકાયદે અસંખ્ય દબાણો કરવામાં આવ્યા છે. પરિણામે વરસાદી પાણી ના વેણ રોકાય છે , અને અમુક લોકો ના ઘર માં વરસાદી પાણી ઘૂસે છે. આ સમસ્યાના નિરાકરણ માટે પણ આયોજન થઈ રહ્યું છે. એટલે કે ટૂંક સમયમાં આ વિસ્તારમાં મોટા પાયે ઓપરેશન ડિમોલેશન હાથ ધરવામાં આવે તેવી શક્યતા પણ નકારી શકાતી નથી.

મળતી માહિતી મુજબ નદીના પટ નજીકના બચુ નગર પાસેના કેટલાક દબાણ કારો ને મહાનગરપાલિકા દ્વારા નોટિસ આપવામાં આવી હોવાનું પણ જાણવા મળે છે.ટૂંકમાં શેહેર નાં બર્ધન ચોક વિસ્તાર ની ટ્રાફિક સમસ્યા તેમજ વરસાદી પાણીના વેણ રોકાવાની સમસ્યા નાં કાયમી ઉકેલ લાવવા માટે તંત્ર કવાયત કરી રહ્યું હોવા નું જાણવા મળે છે.