કાલાવડના રવેશિયા ગામના ડેમ પાસે વીજપોલના એંગલ સાથે લટકતી હાલતમાં યુવકનો મૃતદેહ મળ્યો
-
૬૬ કે.વી.ના વીજપોલ પાસે બનેલી ઘટનાથી ચકચાર : મોતનું કારણ જાણવા પોલીસ તપાસ
દેશ દેવી ન્યુઝ જામનગર તા. ૧૬ ઓક્ટોબર ૨૬: કાલાવડ તાલુકાના રવેશિયા ગામથી હસ્તળ ગામ તરફ જતા માર્ગ પર આવેલા ડેમ નજીક વીજપોલના લોખંડના એંગલ સાથે ગળાફાંસો ખાધેલી હાલતમાં એક યુવકનો મૃતદેહ મળી આવતાં ચકચાર મચી ગઈ હતી.પોલીસના અહેવાલ મુજબ, રવેશિયા ગામના ડેમ પાસે આવેલા ૬૬ કે.વી.ના વીજપોલના લોખંડના એંગલ સાથે સફેદ રંગની પ્લાસ્ટિકની દોરી બાંધેલી હાલતમાં જયમીન હિરજીભાઈ તાળા નામના ૩૫ વર્ષના યુવકનો મૃતદેહ મળી આવ્યો હતો. બનાવની જાણ થતાં પોલીસ દ્વારા તપાસ હાથ ધરવામાં આવી હતી.
આ બનાવ અંગે મૃતક જયમીન ના ભાઈ ભાર્ગવ હીરજીભાઈ તાળાની જાણકારી ના આધારે કાલાવડ ગ્રામ્ય પોલીસ મથકમાં અકસ્માતે મોતની નોંધ કરવામાં આવી છે. મૃતકના મોત પાછળનું ચોક્કસ કારણ જાણવા પોલીસે તપાસ હાથ ધરી છે.
