જામનગરના ઇતિહાસમા સુવર્ણ પૃષ્ઠ : “છોટી કાશી” જામનગરમા વી.વાય.ઓ. વ્રજધામ હવેલીના નિર્માણનો શંખનાદ

• પૂ. પા. ગો. શ્રી વ્રજરાજકુમારજી મહોદયના વરદ હસ્તે લાલપુર રોડ પર હવેલી નુ ભવ્ય ભૂમિપૂજન સંપન્ન:મનોરથી દાતાશ્રીઓ દ્વારા દાનનો વરસાદ વરસ્યો

• મુખ્ય મનોરથી પરિવાર દ્વારા વૈષ્ણવ સમાજને ૪ કરોડનુ ભૂમિદાન, સંકુલમાં શિક્ષણ સહિતની બહુવિધ પ્રવૃત્તિઓ ધમધમશે

દેશ દેવી ન્યુઝ જામનગર તા ૧૫,ઓક્ટોબર ર૫ “છોટી કાશી” તરીકે વિશ્વભરમાં ખ્યાતિ પામેલા જામનગરના ધાર્મિક અને સાંસ્કૃતિક ઇતિહાસમાં વધુ એક સુવર્ણ પૃષ્ઠનો ઉમેરો થયો છે. શહેરના વિકાસ પામી રહેલા લાલપુર રોડ પર, સહજાનંદ પાર્ક ખાતે, વૈષ્ણવ સંપ્રદાયનુ આસ્થાના કેન્દ્ર સમાન ‘શ્રી વિ.વાય.ઓ. વ્રજધામ હવેલી’ના નિર્માણ માટેનો મંગલમય પ્રારંભ થયો હતો. ગઈકાલે મંગળવારે સાંજે આયોજિત એક ભવ્ય અને દિવ્ય સમારોહમાં, પૂજ્યપાદ ગોસ્વામી શ્રી વ્રજરાજકુમારજી મહોદયના પાવન સાંનિધ્યમાં હજારો વૈષ્ણવોની ઉપસ્થિતિ વચ્ચે ભૂમિપૂજન વિધિ સંપન્ન કરવામાં આવી હતી.આ ધર્મકાર્યના મુખ્ય મનોરથી અને શહેરના અગ્રણી  અને તેમના પરિવારે હવેલીના નિર્માણ માટે અંદાજે ૧૦,૫૦૦ સ્ક્વેર ફૂટ જેટલી વિશાળ ભૂમિનું દાન અર્પણ કર્યું હતું, જેની અનુમાનિત કિંમત ૪ કરોડ રૂપિયા છે.  પ્રેરણાદાયક કાર્ય બાદ અન્ય દાતાશ્રીઓએ પણ મંચ પરથી લાખો રૂપિયાના દાનની સરવાણી વહાવી હતી.આ ભક્તિસભર અવસરે ઉપસ્થિત વિશાળ વૈષ્ણવ સૃષ્ટિને સંબોધતા પૂ. પા. ગોસ્વામી શ્રી વ્રજરાજકુમારજી મહોદય (જેજે શ્રી) એ તેમના પ્રાસંગિક પ્રવચનમાં જણાવ્યું હતું કે, જામનગરમાં નિર્માણ પામી રહેલી આ હવેલી અનેક રીતે વિશિષ્ટ છે. તેમણે કહ્યું કે, “દેશ-વિદેશમાં વી.વાય.ઓ. (વલ્લભ યુથ ઓર્ગેનાઈઝેશન) દ્વારા જ્યાં પણ હવેલીઓનું નિર્માણ થયું છે, ત્યાં પ્રથમ સભાઓ અને આયોજન બાદ જમીન સંપાદનની કામગીરી થતી હોય છે. પરંતુ જામનગરમાં કુશળ નેતૃત્વ અને ઠાકોરજી પ્રત્યે અપાર શ્રદ્ધા ધરાવતા ધર્મ પ્રેમી પ્રથમ ભૂમિ સંપાદન કરી મને સરપ્રાઈઝ આપી છે, જે તેમની અનન્ય ભક્તિ અને કાર્યનિષ્ઠા દર્શાવે છે.” જેજે શ્રીએ દ્રષ્ટાંતો સાથે સમજાવ્યું કે, ભગવાન શ્રીકૃષ્ણ જ્યારે કોઈ વ્યક્તિનો ઉત્કર્ષ કરવા માંગતા હોય, ત્યારે તેને નિમિત્ત બનાવી શુભ કાર્યોની પ્રેરણા આપે છે, અને જ્યારે કોઈનું પતન કરવાનું હોય ત્યારે અશુભ પ્રેરણા મળતી હોય છે.ધર્મસ્થાનોના મહત્વ પર ભાર મૂકતા તેમણે ઉમેર્યું કે, “કોઈપણ શહેરમાં મોલ, દુકાન કે શોરૂમની જેમ લોકો પાસે ધર્મ અને આધ્યાત્મિકતા માટે પણ વિકલ્પો હોવા જોઈએ. જામનગરના વૈષ્ણવોને હવે પોતાના વિસ્તારમાં જ એક નવો વિકલ્પ ઉપલબ્ધ થઈ રહ્યો છે. દરેક વ્યક્તિની ઉર્જા અલગ હોય છે અને તે પોતાની ઉર્જા અનુસાર ધર્મસ્થાન પસંદ કરતો હોય છે.” તેમણે સ્પષ્ટ કર્યું કે જામનગરમાં બીજી હવેલીનું નિર્માણ અત્યંત સૌહાર્દપૂર્ણ વાતાવરણમાં થઈ રહ્યું છે અને આ વિસ્તારની વિશાળ વૈષ્ણવ સૃષ્ટિને તેમના ઘરઆંગણે પ્રથમ હવેલી મળી રહી છે. રાજકોટનું ઉદાહરણ આપતા તેમણે કહ્યું કે, “રાજકોટમાં ૫૦ હવેલીઓ છે, અને ૫૧મી હવેલી વી.વાય.ઓ. દ્વારા નિર્મિત થઈ છે, જ્યાં હજારો વૈષ્ણવો દર્શનાર્થે આવે છે.જેજે શ્રીએ ભવિષ્યના આયોજન અંગે વિગતો આપતા જણાવ્યું કે, આ હવેલી માત્ર પૂજા-અર્ચનાનું કેન્દ્ર નહીં, પરંતુ એક સંપૂર્ણ સામાજિક અને શૈક્ષણિક સંકુલ બનશે. અહીં બાળકો, યુવાનો અને વડીલો માટે શિક્ષણ, સંસ્કાર સિંચન અને અન્ય બહુવિધ પ્રવૃત્તિઓ ચલાવવામાં આવશે. હવેલીમાં શ્રી મદનમોહન પ્રભુ, શ્રી વલ્લભાચાર્ય, શ્રી યમુના મહારાણી અને શ્રી ગિરિરાજજીના દિવ્ય સ્વરૂપો બિરાજમાન કરવામાં આવશે. વધુમાં, જો કોઈ વૈષ્ણવને પોતાના ઘરે કોઈ કારણોસર ઠાકોરજીની સેવા-પૂજામાં અડચણ આવે, તો તેઓ પોતાના ઠાકોરજીને અહીં હવેલીમાં પધરાવી શકે તેવી વિશેષ વ્યવસ્થા પણ ઉપલબ્ધ કરાવાશે.આ કાર્યક્રમના મુખ્ય યજમાન અને દાતા શ્રી જણાવ્યું કે, “ઠાકોરજીની પ્રસન્નતા અને વૈષ્ણવોના આધ્યાત્મિક વિકાસના શુભ હેતુથી આ સુંદર હવેલીનું નિર્માણ કરવામાં આવી રહ્યું છે.”આ ભવ્ય ભૂમિપૂજન સમારોહમાં જામનગરના સામાજિક, રાજકીય, ઉદ્યોગપતિઓ, વેપારી અગ્રણીઓ, વિવિધ સંસ્થાઓના મહાનુભાવો તથા મોટી સંખ્યામાં અન્ય મનોરથીઓ અને વૈષ્ણવ ભક્તો મહેમાન તરીકે ઉપસ્થિત રહી આ દિવ્ય ક્ષણના સાક્ષી બન્યા હતા.

જામનગરમાં ખોડીયાર કોલોની વિસ્તારમાં લાયસન્સ મેળવ્યા વિના ફટાકડા વેચનાર એક વિક્રેતા પકડાયો

દેશ દેવી ન્યુઝ જામનગર તા ૧૪,ઓક્ટોબર ૨૫ જામનગરમાં લાયસન્સ મેળવ્યા વિના ફટાકડાનું વેચાણ કરનાર એક વેપારીની પોલીસ દ્વારા અટકાયત કરી લેવામાં આવી છે, અને ફટાકડા નો જથ્થો જપ્ત કરાયો છે.જામનગરના બેડીબંદર રોડ પર રહેતો અજય ધીરજલાલ સવાસડીયા નામનો વેપારી પોતાની પાસે ફટાકડા વેચવાનું કોઈ લાયસન્સ ન હોવા છતાં ખોડીયાર કોલોની વિસ્તારમાં રાજ ચેમ્બર પાસે ફટાકડાનું વેચાણ કરતાં મળી આવ્યો હતો. જેથી સીટી સી. ડિવિઝન પોલીસે તેની અટકાયત કરી લઇ ફટાકડાનો જથ્થો કબજે કર્યો છે, અને તેની સામે ભારતીય ન્યાય સંહિતા ની કલમ ૨૨૩ મુજબ ગુનો નોંધ્યો છે.

જોડીયા તાલુકાના જીરાગઢ ગામમાં વધુ એક બુઝુર્ગ મહિલાને નિશાન બનાવી લૂંટ ચલાવ્યાની પોલીસ ફરિયાદ

દેશ દેવી ન્યુઝ જામનગર તા ૧૩ઓક્ટોબર ૨૫, જામનગર જિલ્લાના જોડિયા તાલુકાના બોડકા ગામમાં એક વૃદ્ધ મહિલા ને માર મારી લૂંટ ચલાવવા અંગે એક મહિલા સહિતના શખ્સો સામે પોલીસ ફરિયાદ નોંધાવ્યા બાદ જીરાગઢ ગામમાં પણ આવો જ લૂંટનો એક બનાવ બન્યો હોવાથી તે અંગે પોલીસ ફરિયાદ નોંધાવાઇ છે.જોડીયા તાલુકા ના જીરાગઢ ગામમાં રહેતા રંભાબેન પરબતભાઈ ચોટલીયા નામના ૮૦ વર્ષના બુઝુર્ગ મહિલા, કે જેઓ પોતાના ઘરમાં સૂતા હતા, જે દરમિયાન ઘરના દરવાજાને લાતો મારી ખોલી નાખી એક સ્ત્રી તથા બે અજાણ્યા પુરુષો વગેરે ઘરમાં ઘૂસી આવ્યા હતા, અને બુઝુર્ગ મહિલાના હાથ પગ પકડી રાખી મોઢું દબાવી તેઓ પાસેથી રૂપિયા ચોવીસ હજારની કિંમતના સોનાના બુટીયા ની લૂંટ કરીને ભાગી છૂટ્યા હતા.જેથી આ મામલો જોડીયા પોલીસ મથકમાં લઈ જવાયો છે, અને લૂંટ ના બનાવ અંગે નો વધુ એક ગુનો નોંધવામાં આવ્યો છે. એલસીબી ની ટીમ તથા જોડીયા પોલીસ આ મામલે લૂંટારું ટોળકીને શકંજા માં લઇ વધુ તપાસ ચલાવી રહી છે.

જામનગર માં પોલીસ ને પડકારતા તસ્કરો અને લુંટારૂઓ

• જામનગર ની જે જે જશોદાનાથ સોસાયટી ના આઠ મકાન માંથી તસ્કરો લાખો ની મતા ચોરી – લૂંટ કરી ગયા

દેશ દેવી ન્યુઝ જામનગર તા. ૧૨ઓક્ટોબર ૨૫, જામનગર માં તસ્કરો અને લૂંટાર ઓ બેખોફ બન્યા છે. અને પોલીસ ના અસ્તિત્વ ઉપર પણ સવાલ ઉભો કરી દીધો હોય તેમ ગઈ રાત્રે એક સાથે આઠ મકાન માં તસ્કરો ત્રાટક્યા હતા .અને લાખો ની મતા ની ચોરી કરી લઈ ગયા હતા. આ દરમિયાન એક વૃદ્ધા ઘર ના ફળિયા માં સુતા હતા ત્યારે તેમને હથિયાર વડે ડૂમો આપી ને બેફામ માર મારી ને તેની પાસે થી લૂંટ પણ ચલાવી હતી.આ બનાવ ની જાણ થતા જ પોલીસ કાફલો દોડતો થયો છે. અને ચો તરફ તપાસ નો ધમધમાટ શરૂ કર્યો છે.જામનગર પોલીસ દ્વારા એક તરફ કડક પેટ્રોલિંગ ના દાવા ઠોકવા માં આવી રહ્યા છે ત્યારે બીજી તરફ શહેર – જિલ્લા માં લૂંટ અને ચોરી ના બનાવલો સિલસિલો પણ યથાવત ચાલુ રહયો છે. હજુ પરમ દિવસે જ જોડીયા પંથક માં એક વૃદ્ધા પાસે થી લૂંટ ના બનાવ ની શાહી સુકાઈ નથી ત્યાં જ ગઈ રાત્રે ફરી એક વખત શહેર ની ભાગોળે તસ્કરો અને લૂંટારું ની ગેંગ ત્રાટકી હતી.જામનગર ના રણજીત સાગર માર્ગે જે જે જશોદાનાથ સોસાયટીમાં ગત રાત્રે એક મોટરકાર અને બાઈક માં આવેલા બે શખ્સો એ આઠેક મકાન માં ચોરી ને અંજામ આપ્યો હતો. અહીં રહેતા યાજ્ઞિક દિનેશભાઈ ભંડેરી એ જણાવ્યા પ્રમાણે ગત રાત્રે પોતાની સોસાયટીના આઠ મકાન માં ગયા હતા અને કબાટ માં થી રોકડ તથા ઘરેણા વગેરે ની ચોરી કરી લઈ ગયા હતા.આ દરમિયાન એક મકાન માં ઘર ના ફળિયા માં ઊંઘી રહેલા વૃદ્ધા ને કોઈ હથિયાર વડે ડૂમો આપવામાં આવ્યો હતો. અને બેફામ મારા મારી ને ઇજા કરી ને તેમની પાસે થી રોકડ અને ઘરેણાં ની લૂંટ પણ ચલાવી હતી.આ બનાવવાની જાણ થતા જ એએસપી શ્રી પ્રતિભા અને પોલીસ કાફલો બનાવ સ્થળે દોડી ગયો હતો. અને તપાસ નો ધમધમાટ શરૂ કર્યો છે.ઉપરાંત આ સોસાયટીમાં લાગેલા સીસીટીવી કેમેરા ના ફૂટેજ પણ ચકાસવામાં આવી રહ્યા છે. આ બનાવે શેહેરભર માં ભારે ચર્ચા જગાવી છે. તો બીજી તરફ પોલીસ સામે પણ સવાલો ઊભા થયા છે. લૂંટ ના આ બનાવ અંગે પ્રફુલભાઈ લખમણભાઇ ભાડજા એ પોલીસ માં ફરિયાદ નોંધાવી છે જેમાં જણાવ્યા મુજબ ગત રાત્રે પોતાના માતા ઘરમાં ફળિયા માં સુતા હતા ત્યારે કોઈ દરવાજો ખખડાવતા દરવાજો ખોલ્યો હતો. ત્યારે બે તસ્કરો – લુંટારૂઓ એ પોતાની પાસે ના ગન જેવા હથિયાર વડે અને બેફામ માર મારીને પછાડી જઈને તેમણે કાન માં પહેરેલા રૂપિયા રૂ. ૫૦ હજાર ની કિંમત ના સોના ના બુટીયા ની લૂંટ ચલાવી હતી.

જામનગર જિલ્લા માં ભાજપ ને મોટો ઝટકો, સિક્કા નગરપાલિકા ના કારોબારી ચેરમેન સહિત આઠ કોર્પોરેટરો કોંગ્રેસમાં જોડાયા

દેશ દેવી ન્યૂઝ જામનગર તા. ૧૧ ઓક્ટોબર ૨૫. જામનગર જિલ્લા ની રાજનીતિ માં આજે એક મોટો રાજકીય ધડાકો થયો છે.જામનગર તાલુકા ના સિક્કા નગરપાલિકા ના વર્તમાન કારોબારી ચેરમેન જુશબભાઈ બારૈયા તથા સાત કોર્પોરેટરોએ ભાજપ નો ત્યાગ કરી કોંગ્રેસ પક્ષ માં વિશ્વાસ વ્યક્ત કર્યો છે. આ તમામ લોકોએ કોંગ્રેસના સિદ્ધાંતો, લોકો માટે ના વિચાર અને સર્વસમાવેશક વિકાસ ના વિઝન થી પ્રેરાઈ આજે સત્તાવાર રીતે કોંગ્રેસ માં જોડાયા છે.આ જોડાણ થી જામનગર જિલ્લા માં કોંગ્રેસ ને નવી ઉર્જા અને બળ મળશે. કોંગ્રેસ આવનાર સમયમાં જામનગર માં એક મજબૂત વિકલ્પ નહીં, પણ એક મુખ્ય પક્ષ તરીકે ઉભરશે. કોંગ્રેસના વરિષ્ઠ આગેવાનો અને જિલ્લા કક્ષા ના નેતાઓ એ આ જોડાણનું સ્વાગત કરતા જણાવ્યું કે આ ફક્ત રાજકીય પરિવર્તન નથી, પરંતુ લોકહિત અને વિકાસ ને સમર્પિત વિચાર ધારા નો વિજય છે  જામનગર જિલ્લા કોંગ્રેસ ના સંગઠન માં આ નવા જોડાણ સાથે હવે સંગઠન વધુ સશક્ત બનશે, અને આવનારી ચૂંટણીમાં કોંગ્રેસ એક નવી શક્તિ તરીકે પ્રગટ થશે.

કોંગ્રેસ માં જોડાયેલા નગરપાલિકાના અન્ય ભાજપ સભ્યો માં વલીમામદ મલેક , અસગર હુંદડા , જ્યોત્સ્નાબેન ગૌસ્વામી , રેશ્માબેન કુંગડા , મામદભાઈ કુંગડા , રોશનબેન સુંભણીયા અને ઝુબેદાબેન સુંભણીયાનો સમાવેશ થાય છે. તેમ જામનગર જિલ્લા કોંગ્રસ પ્રમુખ મનોજ કથીરિયા એ જણાવ્યું છે.આજે અમદાવાદ ના રાજીવ ગાંધી ભવન માં પ્રમુખ અમિતભાઈ ચાવડા ,ઉપરાંત લાલજીભાઈ દેસાઈ, મનીષભાઈ દોશી ની ઉપસ્થિતિમાં, જામનગર જિલ્લા કોંગ્રેસ અધ્યક્ષ મનોજભાઈ કથીરિયા, તાલુકા પ્રમુખ ઇકબાલભાઈ સુમરા અને યુવા કોંગ્રેસ પ્રમુખ દેવરાજભાઈ ગોહિલ ની આગેવાની માં અનેક આગેવાનો અને કાર્યકર્તાઓ એ કોંગ્રેસ પક્ષ માં વિશ્વાસ વ્યક્ત કરી જોડાણ કર્યું હતું.

જામનગરના વતની અને UK માં સ્થાયી થયેલા એક NRI  ની વસઈ મુકામે આવેલી ૧૦ વીઘા ખેતીની અતી કીમતી જમીન પચાવી પાડવાનું કારસ્તાન

• જામનગર અને મુંબઈના ૪ શખ્સોએ બનાવટી દસ્તાવેજ ના આધારે એનઆરઆઇ ની જમીન પોતાના નામે કરી લીધી હોવાનો સિક્કા પોલીસ મથકમાં ગુનો નોંધાયો

દેશ દેવી ન્યુઝ જામનગર તા ૧૧ ઓક્ટોબર ૨૫, જામનગરના વતની અને હાલ યુકેમાં સ્થાયી થયેલા એક એનઆરઆઈ વેપારીની જામનગર નજીક વસઈ ગામમાં આવેલી આશરે ૧૦ વીઘા ખેતીની જમીન કે જેના બનાવટી દસ્તાવેજો તૈયાર કરીને પચાવી પાડવામાં આવી હોવાનો કારસો રચાયો હોવાથી આ મામલો સિક્કા પોલીસ મથકમાં લઈ જવાયો છે, અને જામનગર અને મુંબઈના ચાર શખ્સો સામે પોલીસ ફરિયાદ નોંધાવાઈ છે. જે મામલે સિક્કા પોલીસ વધુ તપાસ ચલાવે છે.

આ ફરિયાદ અંગે ના બનાવની વિગત એવી છે કે મૂળ જામનગરમાં જયંત સોસાયટી વિસ્તારમાં રહેતા અને હાલ યુ.કે.માં સ્થાયી થયેલા અમિતભાઈ દામજીભાઈ શાહ યુકેમાં બિઝનેસ કરે છે. તેઓની જામનગર તાલુકાના વસઈ ગામમાં આશરે ૧૦ વીઘા ખેતીની જમીન આવેલી છે. જે જમીનના પોતાના નામે આજથી ૨૫ વર્ષ પહેલાં સને ૨,૦૦૦ ની સાલમાં દસ્તાવેજ કરાવેલા હતા, અને યુકેથી સમયાંતરે ભારત આવીને પોતાની જમીનનું નિરીક્ષણ કરતા હતા.છેલ્લે ૨૦૨૪ સુધી તેઓની જમીન યથાવત જોવા મળી હતી, પરંતુ તાજેતરમાં તેઓને ધ્યાનમાં આવ્યું હતું, કે પોતાની જમીનના દસ્તાવેજ વેચાણ અર્થે જામનગર પંથકમાં ફરી રહ્યા છે, તેથી તેઓએ જામનગર આવીને ખરાઈ કરતાં તેમની જમીન અન્ય ના નામે વેચાણ થઈ ગઈ હોવાનું અને ફરીથી મોટી રકમમાં વેચાણ કરવા માટેનો કારસો ચાલતો હોવાનું ધ્યાનમાં આવ્યું હતું.

આથી તેઓએ તુરત જ જામનગર ગ્રામ્ય વિસ્તારના પ્રાંત અધિકારી સમક્ષ અરજી કરી હતી, અને તપાસ કરાવતાં ઉપરોક્ત જમીન જામનગરમાં રહેતા ભગવાનજીભાઈ હંસરાજભાઈ ગોરી ના નામે ટ્રાન્સફર થઈ ગઇ હોવાનું અને મુંબઈના અમિતભાઈ દામજીભાઈ શાહ નામના એક શખ્સે તેનો ખોટો દસ્તાવેજ કરી આપ્યો હતો. ઉપરાંત તેમાં જામનગરના નવીનભાઈ રામજીભાઈ ગોરી અને મુંબઈ ના વતની યોગેશ કેશવજીભાઈ શાહ એ સાક્ષી તરીકે સહી કરી હતી.

ગત ૧૧.૨.૨૦૨૫ ના રોજ આ બનાવટી દસ્તાવેજો બનાવી લેવાયા હતા, અને જામનગરની સબ રજીસ્ટર કચેરીમાં તેની નોંધણી કરાવી હતી. જેથી ઉપરોક્ત જમીનના ખોટા દસ્તાવેજો બનાવનાર જામનગર અને મુંબઈના ચારેય શખ્સો સામે પોલીસ ફરિયાદ નોંધાવવા માટે સિક્કા પોલીસ મથકનો સંપર્ક સાધ્યો હતો અને ફરિયાદ નોંધાવી હતી. જેથી સિક્કાના પી.આઈ. જે જે ચાવડા એ ભારતીય ન્યાય સંહિતા ની કલમ ૩૩૬-૨, ૩૩૬-૩, ૩૩૮ , ૩૩૯ , ૩૪૦-૨, ૨૪૨, ૬૧-૨ (એ) મુજબ ગુનો નોંધ્યો છે અને સમગ્ર મામલાના ઊંડાણપૂર્વકની તપાસ શરૂ કરી છે. આ ફરિયાદના બનાવને લઈને શહેરભરમાં ભારે ચકચાર જાગી છે.

જામનગર ની નંદધામ સોસાયટી ના રહીશો દ્વારા મહાપાલિકા માં રેંકડી સાથે ઘંટનાદ કરીને મ્યુનિ.કમિશ્નર ને રજૂઆત

દેશ દેવી ન્યૂઝ જામનગર તા. ૧૧ ઓક્ટોબર ૨૫, જામનગરની નંદધામ સોસાયટી ના કોમન પ્લોટ માં ગેરકાયદેસર બાંધકામ કરી તેમાંથી ભાડુ ઉઘરાવવાતું હોવા બાબતે આજે ફરી એક વખત આશ્ચર્યજનક કાર્યક્રમ હેઠળ રેલી કાઢી કમિશ્નરને આવેદનપત્ર પાઠવી દબાણકારો સામે પગલા લેવાની માંગ કરી હતી. આ સમયે રેંકડી સાથે ઘંટનાદ કરવા માં આવ્યો હતો.

જામનગર માં પ્રણામી સ્કૂલ સામે ના વિસ્તારમાં નંદધામ સોસાયટી ના કોમન પ્લોટમાં ગેરકાયદે દબાણ કરી બાંધકામ કરી લેવાયું છે. અને તેના ભાડા ની રકમ ના ઉઘરાણા કરવામાં આવે છે. આ મુદ્દે સોસાયટી ના રહીશોની આગેવાની માં અગાઉ પણ રજૂઆતો કરવામાં આવી હતી. છતાં કોઈ પગલા લેવાયા નથી.આથી આજે સોસાયટીના રહીશોને સાથે રાખીને રેંકડી અને ઘંટનાદ સાથે રજૂઆતો માટે મહાનગરપાલિકા કચેરીમાં પહોંચ્યા હતાં અને નિયમ મુજબ પગલા લેવા માંગણી કરી છે.

જામનગર જિલ્લા તથા શહેર સમસ્ત બ્રહ્મ સમાજ ની નવી કારોબારીની ટીમની જાહેરાત કરાઇ

• શહેર પ્રમુખ તથા જિલ્લા મહિલા પ્રમુખ સહીતના હોદ્દેદારોનું અનેક ભૂદેવોની ઉપસ્થિતિમાં સન્માન કરાયું

દેશ  દેવી ન્યૂઝ જામનગર તા ૧૦ ઓક્ટોબર ૨૫, જામનગર જિલ્લા તથા શહેર સમસ્ત બ્રહ્મ સમાજ ની નવી કારોબારીની ટીમની તાજેતરમાં જાહેરાત કરાઇ હતી, અને જિલ્લા મહિલા પ્રમુખ તથા મહિલા સંગઠનના અન્ય હોદ્દેદારો અને શહેર પ્રમુખ તથા અન્ય હોદ્દેદારોના નામની જાહેરાત કરવામાં આવી હતી, અને તમામનું અનેક ભૂદેવો ની ઉપસ્થિતિ માં સન્માન કરવામાં આવ્યું હતું.જામનગર જિલ્લા તથા શહેર બ્રહ્મ સમાજ દ્વારા તાજેતરમાં શરદોત્સવ નો કાર્યક્રમ યોજાયો હતો, જેની સાથે સાથે શહેર જિલ્લાના બ્રહ્મ સમાજના સંગઠનના નવા હોદ્દેદારોની જાહેરાત પણ કરવામાં આવી હતી, જે તમામ હોદ્દેદારોને બ્રહ્મ સમાજના અનેક અગ્રણીઓ વગેરેએ ઉપસ્થિત રહીને અભિનંદન પાઠવ્યા હતા. જામનગર જિલ્લા ના પ્રમુખ તરીકે આશિષભાઈ જોશીની જિલ્લા ના મહામંત્રી તરીકે ભાસ્કર ભાઈ જોશી ની અગાઉ નિમણૂક કરી લેવાયા બાદ તેઓની ઉપસ્થિતિમાં સંગઠનના અન્ય હોદ્દેદારોના નામની જાહેરાત થઈ હતી જેમાં શહેર પ્રમુખ તરિકે યુવા અગ્રણી કાર્યકર હિરેનભાઈ કનૈયા ની નિમણુંક કરાઈ છે, જ્યારે શહેર મહામંત્રી તરીકે જસ્મીન ધોળકિયા ના નામની જાહેરાત કરવામાં આવી હતી.આ સાથે જ જામનગર જિલ્લા ની બ્રહ્મ સમાજની મહિલા પાંખની ટીમની પણ જાહેરાત કરવામાં આવી હતી. જેમાં જિલ્લાના મહિલા પ્રમુખ તરીકે મનિષા બેન સુંબડ, જિલ્લા મહિલા મહામંત્રી તરીકે વૈશાલી બેન જોષી, શહેર મહિલા પ્રમુખ તરીકે જાગૃતિ બેન ત્રિવેદી, શહેર મહિલા મહામંત્રી તરીકે મીના બેન જ્યોતિષી ની નિમણુંક કરાઈ હતી, જે તમામનું પુષ્પહાર કરીને સર્વે ભૂદેવોની વચ્ચે સન્માન કરવામાં આવ્યું હતું.આ ઉપરાંત યુવા ટીમમાં જિલ્લા યુવા પ્રમુખ તરીકે જનકભાઈ ખેતીયા, જિલ્લા યુવા મહામંત્રી તરીકે ચિરાગભાઈ પંડયા અને વિમલ ભાઈ જોષી, શહેર યુવા પ્રમુખ તરીકે ચિરાગ ભાઈ અસવાર, શહેર યુવા મહામંત્રી યશ મહેતા (ભૂદેવ) હર્ષલ ભાઈ જોષી વગેરેની નિમણૂક કરી લેવામાં આવી છે.આગામી સમયમાં બધી ટીમ ના ઉપ પ્રમુખ તથા મંત્રી ની ટીમ જાહેર કરવામાં આવશે, તથા જિલ્લા મા તાલુકા ની મુલાકાત લઈ વિસ્તૃત ટીમ પણ બનાવામાં આવશે, તેવી જાહેરાત નવનિયુક્ત જિલ્લા પ્રમુખ આશિષ જોષી દ્વારા કરવામાં આવી હતી, જેને સૌ કોઈ ઉદય હોય આવકાર આપ્યો હતો. અને સમગ્ર નવનિયુક્ત ટીમને અભિનંદન પાઠવ્યા હતા.

જામનગરના ગુલાબ નગર વિસ્તારમાંથી એક સગીરાનું અપહરણ : મોરબીના શખ્સ સામે ફરિયાદ : મદદગારીમાં બે ના નામ ખુલ્યા

દેશ દેવી ન્યુઝ  જામનગર તા ૧૦ઓક્ટોબર ૨૫, જામનગરના ગુલાબ નગર વિસ્તારમાંથી તાજેતરમાં એક સગીરાનું અપહરણ થઈ ગયું હતું, જેને ઉઠાવી જવા અંગે મોરબીમાં રહેતા મોહિતગીરી હરેશગીરી ગોસ્વામી નામના શખ્સ સામે સગીરાની માતા દ્વારા સીટી બી. ડિવિઝન પોલીસ મથકમાં ફરિયાદ નોંધાવાઇ છે.પોલીસ ફરિયાદમાં સગીરાને ઉઠાવી જવામાં મદદગારી કરવા અંગે મોહિત ના પિતા હરેશગીરી ગોસ્વામી ઉપરાંત કોઈ ગુલાબગીરી ગોસ્વામીએ પણ મદદ કરી હોવાથી તેઓ સામે પણ ગુનો દાખલ કરવામાં આવ્યો છે. પી એસ આઇ એમ વી મોઢવાડિયા સમગ્ર મામલામાં તપાસ ચલાવી રહ્યા છે.

ધ્રોલ તાલુકાના હમાપર ગામમાં ખેતીની જમીન ખેડવાના પ્રશ્ન બે જૂથ વચ્ચે ધીંગાણું ખેલાયું : ત્રણ વ્યક્તિની હત્યાનો પ્રયાસ

• બે મહિલા સહિતના એક જ પરિવારના ચાર શખ્સો ધારિયા કુહાડા જેવા હથિયારો સાથે તૂટી પડ્યા: પોલીસે હત્યા પ્રયાસ અંગે ગુનો નોંધ્યો

દેશ દેવી ન્યુઝજામનગર તા ૯,ઓક્ટોબર ૨૫ જામનગર જિલ્લાના ધ્રોળ તાલુકાના હમાપર ગામમાં ખેતીની જમીન ખેડવાના પ્રશ્ન બે કુટુંબો વચ્ચે ધીંગાણું ખેલાયું હતું, અને પિતા પુત્ર અને કાકા સહિત ત્રણ વ્યક્તિઓ પર જીવલેણ હુમલો કરી હત્યા નો પ્રયાસ કરાયો છે.જે હુમલો કરવા અંગે એક જ પરિવારના બે મહિલા સભ્ય સહિત ચાર સામે પોલીસ ફરિયાદ નોંધાવાઇ છે. ઇજાગ્રસ્તો જીજી હોસ્પિટલમાં સારવાર હેઠળ છે.આ બનાવની વિગત એવી છે કે ધ્રોળ તાલુકાના હમાપર ગામમાં રહેતા અક્ષય કેશુભાઈ ડાંગર નામના ૨૬ વર્ષના ખેડૂત યુવાને પોતાના પિતા કેસુભાઈ ડાંગર, અને કાકા વિનુભાઈ ડાંગર ઉપર કુહાડી, ધારીયા જેવા ધારદારા હથીયાર વડે હુમલો કરી હત્યાનો પ્રયાસ કરવા અંગે બાજુમાં જ વાડી ધરાવતા રવિ મુળુભાઈ ડાંગર, રાજ મુળુભાઈ ડાંગર, ગનુબેન મુળુભાઈ ડાંગર અને પૂજા મુળુભાઈ ડાંગર સામે ફરિયાદ નોંધાવી છે.ત્રણેય ઇજાગ્રસ્તોને લોહી નીતરતી હાલતમાં સારવાર માટે જામનગરની સરકારી જી.જી. હોસ્પિટલમાં દાખલ કરવામાં આવ્યા છે, અને તેઓની સારવાર ચાલી રહી છે. પોલીસ ફરિયાદમાં જાહેર કરાયા અનુસાર ફરિયાદીની ખેતીની જમીન આવેલી છે, જેની બાજુમાં સરકારી ખરાબાની જગ્યા માં આરોપીઓ ખેતી કામ કરી રહ્યા હતા, જેની સાથે સાથે ફરિયાદીના પરિવારની જમીનમાં પણ ખેડાણ કરી નાખ્યું હતું, તે અંગે સમજાવવા જતાં બંને પરિવારો વચ્ચે ઝઘડો થયો હતો, ચારેય આરોપીઓ દ્વારા જીવલેણ હુમલો કરી હત્યાનો પ્રયાસ કરાયાનું પોલીસમાં જાહેર થયું છે. સમગ્ર ઘટના બાદ ધ્રોળ પોલીસ ની ટીમ ઘટના સ્થળે અને જીજી હોસ્પિટલમાં દોડી ગઈ છે, જ્યારે ફરાર થઈ ગયેલા ચારેય આરોપીઓને શોધવા માટેની કવાયત હાથ ધરી છે.