જામનગરના રેસ્ટોરન્ટમાં બે વેઈટરો રૂ .ત્રણ લાખની ચોરી કરી પલાયન: ચોરી કરતા CCTVમાં થયા કેદ.

પોલીસે સીસી ટીવી ફૂટેજના આધારે ગુનો નોંધીને શોધખોળ આરંભી : બંને વેઈટરો પોતાના વતન બીહાર નાશી ગયાનું પ્રાથમિક તારણ..દેશ દેવી ન્યુઝ 27.જામનગર શહેરમાં આવેલા રેસ્ટોરન્ટમાં બીહારી ર વેઈટરો રોકડ રૂા .૩ લાખ ઉપરાંતની ચોરી કરીને નાશી છુટ્યાની પોલીસમાં ફરિયાદ નોંધાતા ચકચાર મચી જવા પામી છે અને પોલીસે ગુનો નોંધીને આરોપી વેઈટરોની શોધખોળ આરંભી છે.

જામનગર શહેરના દિગ્વિજ્ય પ્લોટ -૮ માં રૂદ્ર એપાર્ટમેન્ટમાં બીજા માળે રહેતા નીલેષભાઈ હર્ષવદન વારીયા ( ઉ.વ .૪૭ ) નામના વેપારીનું શહેરના અંબર ટોકીઝ પાસે , નિયો સ્કવેર કોમ્પ્લેક્સમાં વિલીયમ જોન્સ પીઝા ( સુપરલેટીવ ) રેસ્ટોરન્ટ આવેલું છે.

આ રેસ્ટોરન્ટમાં બીહારના મધુબની જિલ્લાના બેલહા ગામના સુમીતકુમાર મંડલ અને અરવીંદ મંડલ નામના બન્ને શખસો વેઈટર તરીકે કામ કરે છે અને ગત તા.૨૧ ના રાત્રીના બન્ને બીહારી વેઈટરોએ રેસ્ટરોન્ટનું કેશ કાઉન્ટર તોડી નાંખ્યું હતું અને કાઉન્ટરમાં રાખેલ રોકડ રૂા .૩,૦૭,૦૦૦ ની ચોરી કરીને નાશી છુટ્યા હતાં. આ અંગેની વેપારીએ પોલીસમાં જાણ કરી હતી અને પોલીસ ગુપ્ત રીતે તપાસ હાથ ધરી હતી . પરંતુ બન્ને શખસો પોલીસને ચકમો આપીને બીહારમાં ચાલ્યા ગયા હોવાનું પોલીસના પ્રાથમિક તપાસમાં આવ્યું હતું .

જે બાદ આજે પોલીસે રેસ્ટોરન્ટના માલીકની ફરિયાદ પરથી કામ કરતાં બન્ને વેઈટરો સામે ચોરીનો ગુનો નોંધ્યો છે અને વધુ તપાસ સીટી -બીના પોલીસ ઇન્સ્પેક્ટર ભોયે ના માર્ગદર્શન હેઠળ પીએસઆઈ એસ.એમ.રાદડીયાએ તપાસ હાથ ધરી છે.

આ ચોરીના બનાવથી જામનગરના હોટલ અને રેસ્ટોરન્ટના સંચાલકોમાં સારી એવી ચકચાર જાગી છે .

જામનગરમાં બહાદુર પોલીસ કોન્સ્ટેબલની હિંમતથી મહિલાનો જીવ બચ્યો.

પોલીસ કોન્સ્ટેબલને તરતા “ન”  આવડતું હોવા છતાં તળાવમાં ડૂબતી મહિલાને જોઇ તળાવમાં છલાંગ લગાવી.. દેશ દેવી ન્યુઝ ૨૫.જામનગર: જામનગરના રણમલ તળાવના પાછળના ભાગમાં શુક્રવારે બપોરે એક મહિલા કોઈ રીતે પડી ગયા પછી પોલીસ કોન્સ્ટેબલે હિંમતભેર તળાવમાં ઝંપલાવીને મહિલાનો જીવ બચાવ્યો હતો. જામનગરના રણમલ તળાવના પાછલા ભાગમાં આવેલા ખડપીઠ નજીકના તળાવના ભાગમાં શુક્રવારે બપોરે એક મહિલા પડી ગયા હોવાની કોઈએ ફાયરબ્રિગેેડને જાણ કર્યા પછી ફાયરનો કાફલો તથા 108 ધસી ગયા હતા. ફાયરના જવાનોએ તે મહિલાને ચકાસતા તેઓ જીવિત જણાઈ આવતા 108 મારફતે આ મહિલાને જી. જી.માં સારવારમાં મોકલવામાં આવ્યા છે.

પોલીસની તપાસમાં મહિલાનું નામ જયશ્રીબેન વિનુભાઇ ચાંદ્રા અને હિરજી મિસ્ત્રી રોડ પર રહેતી હોવાનું ખુલ્યું હતું. પાણીમાં પડવાનું કારણ હજુ અકળ છે. આખી ઘટનામાં પ્લોટ ચોકીમાં ફરજ બજાવતા કોન્સ્ટેબલ શૈલેષ ગઢવીએ હિમત દાખવી પાણીમાં કુદીને મહિલાને બહાર કાઢતા તેનો જીવ બચવા પામ્યો છે, જેની પોલીસબેડામાં તેમજ હાજર લોકોએ તેને બિરદાવ્યો હતાં.

જામનગર બાર એસો.ના પ્રમુખ તરીકે સતત આઠમી વખત ભરત સુવાનો વિજય

ઉપપ્રમુખ તરીકે અશોકભાઇ જોશી, મંત્રી તરીકે મનોજ ઝવેરી, લા.સેક્રેટરી તરીકે જયદેવસિંહ જાડેજા તેમજ રઘુવીરસિહ કંચવા સહિત કારોબારી સભ્યોનો ભવ્ય વિજય..

દેશ દેવી ન્યુઝ જામનગર 25 : જામનગર બાર એસો.ની યોજાયેલી ચૂંટણીમાં ગઇકાલે સાંજ સુધી સદસ્યો દ્વારા ઉત્સાહભેર મતદાન કરાયા બાદ હાથ ધરાયેલી મત ગણતરીમાં સતત આઠમી વખત પ્રમુખ પદે ભરતભાઇ સુવાને વિજેતા જાહેર કરવામાં આવ્યા હતા. આ ઉપરાંત ઉપપ્રમુખ સહિતના હોદ્દેદારોના નામો પણ જાહેર કરવામાં આવ્યા હતા. જામનગર બાર એસો.ની યોજાયેલી ચૂંટણીમાં શુક્રવારે સવારથી સાંજ સુધી વકીલો દ્વારા ઉત્સાહભેર મતદાન કરવામાં આવતા કુલ મતદાન 76.63 ટકા નોંધાયું હતું, ત્યારબાદ આરંભવામાં આવેલી મત ગણતરી રાત્રે 10 વાગ્યા સુધી કાર્યરત રહેવા પામી હતી, બાર એસો.ના કુલ 1095 સદસ્યો હોય, પરંતુ છેલ્લા બે વર્ષ દરમ્યાન સદસ્યોના થયેલા અવસાનના પગલે 4ર સભ્યોના નામો કમી કરવામાં આવતા આ ચૂંટણીમાં કુલ 10પ3 મતદારો રહેવા પામ્યા હતા.બાર એસો.ની સવારથી આરંભવામાં આવેલ મતદાનમાં સાંજના 4.30 કલાક સુધીમાં 1053 માંથી 807 મત પડ્યા હતા, આમ દિવસ દરમ્યાન કુલ 76.63 ટકા મતદાન નોંધાયું હતું, ત્યારબાદ બાર એસો.ના રૂમમાં જ મત ગણતરીનો પ્રારંભ કરવામાં આવ્યો હતો, આ મત ગણતરી રાત્રિના 10 વાગ્યા સુધી અવિરત જારી રાખવામાં આવી હતી.

પરિણામ જાહેર કરાતા પ્રમુખ પદે સતત આઠમી વખત ભરતભાઇ સુવાનો વિજય થયો હતો. આ ઉપરાંત ઉપપ્રમુખ તરીકે વિજેતા થયેલા અશોકભાઇ જોશીનો વિજય થયો હતો.

આ ઉપરાંત અન્ય હોદ્દેદારોને પણ બાર એસો. ના સદસ્યોએ હર્ષભેર વધાવી લીધો હતો, ન્યાયાલયના પટાંગણમાં દિવાળીને જેમ ફટાકડાઓ ફોડી વિજયને વધાવવામાં આવ્યો હતો, આ વેળાએ દરેક સદસ્યોમાં અનેરો આનંદ જોવા મળ્યો હતો.

જામનગરની સરકારી ફિઝીયોથેરાપી કોલેજના બોયઝ હોસ્ટેલમાં થયેલ રેગીગ મામલે કમિટી આકરા પાણીએ

6 જેટલા વિદ્યાર્થીઓને પરમેનેન્ટ હોસ્ટેલમાંથી સસ્પેન્ડ કરવામાં આવ્યા છે..

જ્યારે નવ જેટલા વિદ્યાર્થીઓને એક વર્ષ માટેનું સસ્પેન્શન આપવામાં આવ્યું છે..

દેશ દેવી ન્યુઝ જામનગર 25.આજરોજ સવારે ફિઝિયોથેરાપી કોલેજના ઇન્ચાર્જ પ્રિન્સિપાલ દ્વારા મીડિયાને સંબોધીને જણાવવામાં આવ્યું કે બોયઝ હોસ્ટેલ માં થયેલ રેગિંગ બાબતે એન્ટી રેગિંગ કમિટી આકરા પાણીએ જોવા મળી છે

ફિઝિયોથેરાપી કોલેજ ના ત્રીજા અને ચોથા વર્ષના સિનિયર વિદ્યાર્થીઓ એ બોયઝ હોસ્ટેલમાં જુનિયરો સાથે રેગીગ કરી અને તેવો ની પજવણી કારીહોવા અને માનસિક ત્રાસ આપતા હોવાનું તાપસ માં સામે આવતા 6 વિદ્યાર્થીઓ ને પરમેનેન્ટ સસ્પેન્ડ કરવામાં આવ્યા છે

તેમજ બાકીના વિદ્યાર્થીઓ ને એક વર્ષ માટે હોસ્ટેલમાંથી સસ્પેન્શન આપવામાં આવ્યું છે

જામનગરમાં શિક્ષણ જગતને લાંછન લગાવતી રેગિંગની ઘટના સામે આવતાં જ તમામ ભોગ બનનારાઓ નું નિવેદન નોંધી રિપોર્ટ તૈયાર કરી અને ગઈકાલ છ વાગ્યે એન્ટી રેગિંગ કમિટીને રિપોર્ટ સોંપવામાં આવ્યો હતો

રિપોર્ટ આવ્યા બાદ ૧૫ જેટલા વિદ્યાર્થીઓ ઉપર કમિટી દ્વારા સખત પગલાં લેવામાં આવ્યા છે સાથોસાથ આ વિદ્યાર્થીઓના વાલીને પણ આ બાબતે જાણ કરાઈ હતી અને જ્યાં સુધી વિદ્યાર્થીઓનું વલણ યોગ્ય ના થાય ત્યાં સુધી આ વિદ્યાર્થીઓના રીઝલ્ટ અનામત રાખવામાં આવ્યા છે સાથોસાથ એક વર્ષ માટે આ વિદ્યાર્થીઓ કોઇપણ સ્પર્ધાત્મક કે કોન્ફરન્સમાં ભાગ નહીં લઇ શકે તેમજ એક વર્ષ માટે એક્ઝામ આપવા ઉપર પણ રોક લગાવવામાં આવી છે એવું પણ ઇન્ચાર્જ પ્રિન્સિપાલ દ્વારા જણાવવામાં આવ્યું હતું

કાલાવડના ધોરાજી રોડ ઉપર રિક્ષાભાડા બાબતે યુવાનની હત્યાનો પ્રયાસ

ભાડા બાબતે બોલાચાલી થયા બાદ ચાર શખ્સો દ્વારા યુવાન ઉપર લાકડાના ધોકા અને છરી વડે જીવલેણ હુમલો

દેશ દેવી ન્યુઝ જામનગર 24. કાલાવડ તાલુકાના મુડીલા ગામમાં રહેતા વિરેન્દ્રસિંહ હરદેવસિંહ જાડેજા (ઉ.વ.22)નામનો યુવાન ગુરૂવારે બપોરના સમયે સરવાણીયા ગામના પાટીયા પાસે અનાજના ગોડાઉન નજીકથી રિક્ષામાં બેસીને કાલાવડમાં સાગર કોમ્પલેક્ષ સામેના માર્ગ સુધી આવ્યો હતો.

જયાં રિક્ષાવાળા સાથે ભાડા બાબતે બોલાચાલી થયા બાદ રિક્ષાવાળો જતો રહ્યો હતો અને થોડીવાર પછી વિરેન્દ્રસિંહ સાગર કોમ્પલેક્ષના કમ્પાઉન્ડમાં ઉભો હતો ત્યારે લતીફ, હુસેન, ફારૂક તથા અજાણ્યા સહિતના 4 શખ્સોએ આવીને યુવાનના માથાના પાછળના ભાગે છરીનો ઘા ઝીંકી જીવલેણ હુમલો કર્યો હતો તેમજ લાકડાના ધોકા વડે માથામાં તથા ખંભા ઉપર અને ઢિકાપાટુંનો માર મારી અપશબ્દો બોલી યુવાનના ભાઇ જયપાલસિંહ ઉપર હુમલો કરી ઇજા પહોંચાડી હતી.

જીવલેણ હુમલામાં ઘવાયેલા બન્ને યુવાન ભાઇઓને સારવાર માટે કાલાવડની હોસ્પિટલ ખસેડવામાં આવ્યા હતાં. જયાં વિરેન્દ્રસિંહને ગંભીર ઇજા પહોંચી હોવાથી વધુ સારવાર માટે જામનગરની જી.જી.હોસ્પિટલમાં ખસેડવામાં આવ્યો હતો.

જયાં બનાવની જાણના આધારે પીઆઇ યુ.એચ.વસાવા તથા સ્ટાફે ચાર શખ્સો વિરૂધ્ધ હત્યાના પ્રયાસનો ગુનો નોંધી તપાસ હાથ ધરી હતી.

જામનગર જિલ્લા પંચાયતમાં પ્રમુખનું સરપ્રાઇઝ ચેકીંગ 25 કર્મચારી ‘ઘેરહાજર’

દેશ દેવી ન્યુઝ 24.જામનગર: જામનગર જિલ્લા પંચાયતમાં પ્રમુખના આકસ્મિક ચેકીંગમાં 25 કર્મચારી ગેરહાજર મળી આવ્યા હતાં.

ગુટલીબાજ કર્મચારીઓને નોટીસ ફટકારી ખુલાસા પૂછવામાં આવશે. પંચાયતની 16 શાખામાં 2 થી વધુ કલાક ચેકીંગથી કર્મચારીઓમાં ભારે દોડધામ મચી ગઇ હતી.

જામનગર જિલ્લા પંચાયતમાં ફરજ દરમ્યાન કર્મચારીઓ ગેરહાજર રહેતા હોવાની ફરિયાદો અરજદારોમાં જોરશોરથી ઉઠી હતી. જેના પગલે જિલ્લા પંચાયત પ્રમુખ ધરમશીભાઇ ચનિયારાએ ગુરૂવારે બપોરે 12 વાગ્યાની આસપાસ સરપ્રાઇઝ ચેકીંગ હાથ ધર્યું હતું. પ્રમુખે પંચાયતની 16 શાખામાં કર્મચારીઓની હાજરી અંગે વિગતો મેળવી હતી.

જિલ્લા પંચાયતમાં 2 થી 2.30 કલાક ચાલેલા ચેકીંગમાં 25 કર્મચારીઓ ગેરહાજર મળી આવ્યા હતાં. આથી પ્રમુખ પણ ચોંકી ઉઠયા હતાં. જિલ્લા પંચાયત પ્રમુખે હાજરી અંગે આકસ્મિક ચેકીંગ હાથ ધરતાં કર્મચારીઓમાં દોડધામ મચી ગઇ હતી. ચેકીંગ દરમ્યાન ગેરહાજર કર્મચારીઓને નોટીસ ફટકારી ખુલાસા પૂછવામાં આવશે.

જામનગરની જિલ્લા જેલમાં ફરજ બજાવતા ડોકટર ઉપર કેદીનો હુમલો..

જામનગર જિલ્લા જેલમાં કેદીઓ દ્વારા કર્મચારી પર વધતા જતા હુમલા ચિંતાનો વિષય.!

દેશ દેવી ન્યુઝ 24.  જામનગર શહેરમાં આવેલી જિલ્લા જેલમાં દવાખાના વિભાગમાં તબીબ તરીકે ફરજ બજાવતા ડો.જન્મેજયસિંહ અજયસિંહ જાડેજા નામના યુવાન ગુરૂવારે જેલના દવાખાનામાં કેદીઓને તપાસતા હતા.

ત્યારે જહાંગીર યુસુફ ખફી નામના કેદી શખ્સે જી.જી.હોસ્પિટલમાં સારવારમાં જવા માટે તબીબ સાથે ઉગ્ર બોલાચાલી કરી ઉશ્કેરાઇને અપશબ્દો બોલી પતાવી દેવાની ધમકી આપી હતી.

ત્યારબાદ તબીબે પોલીસને જાણ કરતાં પીએસઆઇ આઇ.આઇ.નોયડા તથા સ્ટાફે જહાંગીર ખફી વિરૂઘ્ધ 186,504 ,506 (2) ફરજમાં ફરજમાં રૂકાવટ સહિતની કલમ હેઠળ ધમકીનો ગુનો નોંધી આગળની તપાસ તપાસ હાથ ધરી હતી.