પાલીતાણામાં તોડફોડના મામલે કાલે જામનગરમાં જૈન સમાજની રેલી: આવેદનપત્ર

• જૈન સમાજના વિરોધને વેપારી મંડળે ટેકો જાહેર કર્યો

દેશ દેવી ન્યુઝ જામનગર: તા.૨૨-૧૨-૨૨ તાજેતરમાં જૈન શૈક્ષણિક સંસ્થાના આગેવાનોની પાલીતાણામાં શંત્રુજય પર્વત ઉપર પ્રભુ શ્રી આદીનાથ દાદાની ચરણપાદુકા રોહીશાળા મુકામે હતી, તેને તોડફોડ કરવાના મામલે સમગ્ર જૈન સમાજમાં ઉગ્ર રોષની લાગણી જન્મી છે, ગુજરાતના અનેક ગામોમાં આ અંગે વિરોધ થયો છે, આ બનાવને લઇને જામનગરના સમસ્ત જૈન સમાજના ભાઇ-બહેનોની એક મહત્વની મીટીંગ ગઇકાલે યોજાઇ હતી, જેમાં આગામી શુક્રવાર તા.23ના રોજ સવારે 9:30 વાગ્યે ચાંદીબજારના શેઠજી દેરાસરથી એક બાઇક રેલી નિકળશે અને જે શહેરના મુખ્ય વિસ્તારમાં ફરી જોગસપાર્ક પાસે પૂર્ણ થશે અને ત્યારબાદ જિલ્લા કલેકટરને આવેદનપત્ર આપવામાં આવશે.જામનગર ચાંદી બજારમાં જયોતિ-વિનોદ જૈન ઉપાશ્રય(પાઠશાળા) ખાતે સમસ્ત જૈન સમાજનાં વિવિધ ફીરકાઓના સમસ્ત જૈન સમાજના દરેક જ્ઞાતિના પ્રમુખો, દેરાસરના ટ્રસ્ટીઓ, ઉપાશ્રયના ટ્રસ્ટીઓ, જૈન સંસ્થાઓના હોદેદારો, સોશિયલ ગ્રુપ, મહિલા મંડળો તેમજ જૈન શૈક્ષણીક સંસ્થાના આગેવાનોની પાલીતાણામાં શત્રુંજય પર્વત પર પ્રભુ શ્રી આદિનાથ દાદાની ચરણ પાદુકા રોહીશાળા મુકામે હતી તેને તોડ-ફોડના બનાવને લઇને સમગ્ર ગુજરાત તેમજ જામનગરના સમસ્ત જૈન સમાજના ભાઇઓ-બહેનોમાં ભારે રોષની લાગણી હતી. જેથી આ મીટીંગ બોલાવામાં આવેલ હતી.જેમાં આગામી તા. 23.12.22ને શુક્રવારના રોજ પ્રધાનમંત્રી, ગૃહમંત્રીને તેમજ ગુજરાતના મુખ્ય મંત્રી, ગૃહમંત્રીને જામનગરના કલેકટર મારફતે આવેદનપત્ર દેવાનું નક્કી કરેલ છે તેમજ આ દિવસે જામનગર શહેર-જિલ્લાના દરેક જૈન સમાજના લોકો પોતાનાં ધંધા-રોજગાર બપોરના 12:30 વાગ્યા સુધી બંધ રાખી,સ્કુટર રેલી દ્વારા આ આવેદન પત્ર દેવા દરેક ભાઈઓ-બહેનો તથા વડીલો બહોળી સંખ્યામાં હાજર રહે તેવું નક્કી કરવામાં આવેલ છે.આવેદન પત્ર આપવાનો સમય તા. 23.12.22, શુક્રવાર, સવારે 9:30 કલાકે બાઇક રેલીનો રૂટ : શેઠજી દેરાસરથી ચાંદી બજાર, માંડવી ટાવર, સેન્ટ્રલ બેંક, હવાઇ ચોક, ભંગાર બજાર, ગોવાળ મસ્જીદ થઇ,પંચેશ્વર ટાવર, નોબતથી બેડી ગેઇટ, ટાઉન હોલ, અંબર ટોકીઝ, જી.જી. હોસ્પીટલ, ડી.કે.વી., વિરલ બાગ, જોગશ પાર્ક ખાતે બાઇક રેલી પૂર્ણ થશે, ત્યાંથી કલેકટર ઓફીસ ખાતે આવેદન પત્ર આપવા માટે રેલી સ્વરૂપે જશે.

આ મીટીંગમાં જૈન આગેવાનો વિશા શ્રીમાળી જ્ઞાતિના પ્રમુખ ભરતભાઇ વસા, કે.ડી.શેઠ, વી.પી.મહેતા, કિરીટભાઇ મહેતા, કોર્પોરેટર નિલેશભાઇ કગથરા, અજયભાઇ શેઠ, જતીનભાઇ મહેતા, ભરતભાઇ પટેલ, નિતીનભાઇ સોલાણી, વિજયભાઇ શેઠ, નવીનભાઇ ઝવેરી, રાજુભાઇ, આશીષભાઇ ધનાણી, મહેશ ભાઇ મહેતા, પ્રફુલભાઇ મહેતા, કુમુદબેન મહેતા સહિતના અગ્રણીઓ હાજર રહ્યા હતાં.

જામનગર મહાનગરપાલિકાના વધુ બે કર્મચારીઓના રાજીનામાં!

દેશ દેવી ન્યુઝ જામનગર: તા. ૨૨-૧૨-૨૨ જામનગર મહાપાલિકાના ટેકસ શાખાના અધિકારી નિકુંજ શુકલએ રાજીનામું આપી દીધું છે, ઉપરાંત ભૂગર્ભ શાખાના નાયબ ઇજનેર જયેશ કાનાણીએ પણ તેમનું રાજીનામું કમિશ્નરને મોકલી આપ્યું છે. આમ બે અધિકારીએ એકાએક રાજીનામું આપતા કોર્પોરેશનમાં ચર્ચાઓ શરૂ થઇ છે, કામના ભારણના કારણે રાજીનામું આપ્યું છે કે, અન્ય કારણો છે ? તે અંગે પણ અનેક તર્ક-વિતર્ક થઇ રહ્યા છે, અધુરામાં પુરૂ હોય તેમ ગાર્ડન શાખાના અધિકારી મકવાણા આ મહીનાના અંતમાં નિવૃત થઇ જશે. એટલે કે ઉપરોકત બે અધિકારીઓના રાજીનામા કમિશ્નર મંજુર કરે તો મહાપાલિકાને વધુ ત્રણ અધિકારીઓની ખોટ પડશે.

વોટર વર્કશ શાખામાં કાર્યપાલક ઇજનેરની નિમણુંક થઇ નથી, એવી જ રીતે ભૂગર્ભ ગટર શાખામાં પણ કાર્યપાલક ઇજનેરની ભરતી બાકી છે અને નાયબ કાર્યપાલક ઇજનેરની નિમણુંક કરવામાં આવતી નથી, અનેકને પ્રમોશન આપવામાં ન આવ્યા હોય અધિકારીઓ ટ્રેસ ભોગવી રહ્યા છે.

જામનગર મહાપાલિકાની ડીએમસીની ખુરશીમાં કોઇ બેસવા તૈયાર નથી, ડીએમસી એ.કે.વસ્તાણી બે વર્ષ સુધી ટકી રહ્યા પરંતુ મોટેભાગે અગાઉ આ પોસ્ટ ઉપર મુકેશ કુંભારાણા ચાર્જ સંભાળતા હતાં અને હવે આ ચાર્જ ભાવેશ જાનીના સીરે છે, જામનગર મહાપાલિકામાં કેટલાયને અન્યાય થઇ રહ્યો છે, અનેક તો નિવૃતિના આરે છે, પરંતુ હજુ સુધી તેમને કોઇ પ્રમોશન અપાયું નથી અને કેટલાક મામકાઓને વચ્ચેથી પ્રમોશન આપી દેવામાં આવ્યા છે.

જી.જી. હોસ્પિટલ ખાતે ‘એન્ટીબાયોટિક રેઝિસ્ટન્સ અવેરનેસ પ્રોગ્રામ’ની ઉજવણી કરવામાં આવી

દેશ દેવી ન્યુઝ જામનગર તા.૨૧ ડિસેમ્બર ૨૨ જામનગરની જી.જી. હોસ્પિટલમાં ગત તા. ૧૯ ડિસેમ્બરના રોજ ‘એન્ટિબાયોટિક રેઝિસ્ટન્સ અવેરનેસ પ્રોગ્રામ’ની ઉજવણી કરવામાં આવી હતી. જી.જી. હોસ્પિટલ વોર્ડના વડાઓ, રેસિડન્ટ્સ, સ્ટાફ નર્સ દ્વારા દર્દીઓને ‘એન્ટીબાયોટિક રેઝિસ્ટન્સ અવેરનેસ પ્રોગ્રામ’ અંગે સમજણ તેમજ તબીબી સૂચનો આપી શકાય તે માટે પેમ્ફલેટ્સનું વિતરણ કરવામાં આવ્યું હતું.વિશ્વ સ્તરે પ્રખ્યાત સંસ્થા ‘WHO’ દ્વારા આરોગ્યલક્ષી અભિગમ અપનાવી એન્ટિબાયોટિકસની અસરકારકતા જાળવવા માટે મનુષ્યો અને પ્રાણીઓમાં એન્ટિબાયોટિકસના ઉપયોગ માટે ઓપ્ટિમાઇઝેશન પ્રોસેસને સમર્થન આપે છે. જો કે, અમુક કિસ્સામાં એન્ટિબાયોટિકસ બિન-અસરકારક બની રહી છે.તેના કારણો જોઈએ તો દર્દીઓને વધુ પ્રમાણમાં એન્ટિબાયોટિકસ આપવી, દર્દી જો વચ્ચેથી સારવાર લેવાનું બંધ કરી દે, હોસ્પિટલોમાં સ્વચ્છતાનો અભાવ, ચેપ નિયંત્રણમાં અભાવ, પશુ અને માછલી ઉછેરમાં વધુ પડતો એન્ટિબાયોટિકસનો ઉપયોગ, પૂરતા પ્રમાણમાં નવી એન્ટિબાયોટિકસ તૈયાર ન થવી, તબીબની સલાહ વગર દવાઓ લેવી- આ વિષય પર હોસ્પિટલના નિષ્ણાંત તબીબો દ્વારા ચર્ચા કરવામાં આવી હતી.કાર્યક્રમમાં ડીન ડો. નંદિની દેસાઈ, ઇન્ચાર્જ સુપ્રીટેન્ડેન્ટ  ડો. મનીષ મહેતા તેમજ ફાર્મોકોલોજી વિભાગીય વડા ડો. એચ.આર. ત્રિવેદી દ્વારા હોસ્પિટલના વડાઓની મુલાકાત, ઓ.પી.ડી. વિઝીટ અને દર્દીઓને માર્ગદર્શન આપવામાં આવ્યું હતું. કાર્યક્રમમાં સહાયક પ્રાધ્યાપક ડો. જે. ડી. બલાટ, મદદનીશ પ્રાધ્યાપક ડો. ટી. આર. ગોસાઈ, ડો. એ.જી. સુખલેખા, ડો. મનીષ કલસરિયા, ડો. દિપક વૈષ્ણવ, ડો. દીપેશ નારિયા, ડો. અક્ષય પરમાર, ડો. અંજલી ભાવસાર, લેબ ટેક્નિશિયન નરેન્દ્રભાઈ, સપનાબેન તેમજ હોસ્પિટલના અન્ય વિભાગના સ્ટાફ ઉપસ્થિત રહયા હતા.

જામનગરના બર્ધન ચોક વિસ્તારમાંથી રૂા. 2 લાખ 32 હજારની મત્તા સાથેના મહિલાના પર્સની ઉઠાંતરી કરનાર પટેલ દંપતિ સુરતથી જબ્બે.

• સમગ્ર તપાસ સુરત સુધી લંબાવાઈ : રૂ.૨.૩૨ લાખનો મુદામાલ રીકવર કરી દંપતિની અટકાયત કરી.
• આરોપી :- (૧) હરેશ તેજાભાઈ મોલીયા (ર) ચંદ્રીકાબેન તેજાભાઈ મોલીયા મૂળ કાલાવડ હાલ સુરત
• સીટી- એના Pl ગજજરની રાહબરી હેઠળ PSI બી.એસ વાળા તથા ‘‘D” સ્ટાફ રવિભાઈ શર્માં, રૂષિરાજસિંહ જાડેજા તથા રવિરાજસિંહ જાડેજાની બાતમીને મળી સફળતા.

દેશ દેવી ન્યુઝ જામનગર : તા.૨૧ ડિસેમ્બર ૨૨  જામનગરમાં રામેશ્વર નગર માટેલ ચોક વિસ્તારમાં રહેતી રક્ષાબા વિજયસિંહ ઝાલા નામની 30 વર્ષની મહિલા કે જે ગત 7.12.2022 ના દિવસે પોતાની દેરાણી સાથે બર્ધનચોક વિસ્તારમાં ખરીદી અર્થે આવી હતી, અને સિંધી માર્કેટના કાપડના વેપારી નંદલાલ ઓઢરમલ મનસુખાણી ની દુકાને ઓટા પર બેસીને ખરીદી કરી રહી હતી જે દરમિયાન તેનું પર્સ કે જેમાં એક ડબ્બામાં રૂપિયા 1,97,000 ની કિંમતનું મંગળસૂત્ર રાખેલું હતું, જ્યારે રૂપિયા 35,000 ની કિંમત ની સોનાની બુટ્ટી ની જોડી રાખેલી હતી. જે પર્સની કોઈ તસ્કર ઉઠાંતરી કરી લઈ ગયા હતા.

જે સમગ્ર મામલો સીટી એ. ડિવિઝન પોલીસ મથકમાં લઈ જવાયો હતો, અને પોલીસ દ્વારા સૌપ્રથમ સીસીટીવી કેમેરાઓનું નિરીક્ષણ કરવામાં આવ્યું હતું. ત્યાર પછી તપાસનો દોર જુનાગઢ અને ધોરાજી તેમજ સુરત સુધી લંબાવવામાં આવ્યો હતો. પોલીસને આ ચોરીનો ભેદ ઉકેલવામાં સફળતા સાંપડી હતી  અને તસ્કર પટેલ દંપતિ પોલીસના સકંજામા આવી ગયુ હતું તેની પાસેથી ચોરાઉ દાગીના પણ મળી આવતા સમગ્ર મામલે હવે સિટી- એ ડિવિઝન પોલીસ ઊંડાણપૂર્વકની તપાસ ચલાવી પટેલ દંપતિની સુરતથી ધરપકડ કરી આગળની કાાર્યવાહી હાથ ધરી છે. ચોરીનો ભેદ ઉકેલાઇ જતા હાશકારો થયો હતો.

જામનગરમાં પાંચ દિવસ પહેલા લાપતા યુવાનનો મૃતદેહ સાંપડ્યો

• જૂની આરટીઓ પાછળ પડ્યો હોવાની અને દુગંધ મારતો હોવાની જાણ થતા મોક્ષ ફાઉન્ડેશનના વિક્રમસિંહ ઝાલા દોડી ગયા
• ખીસ્સામાંથી ડ્રાઇવિંગ લાયસન્સ, આધારકાર્ડ હોવાના કારણે ઓળખ થતી.
• થોડેક નજીક બાઈક તથા સાથે રહેલ થેલીમાં રહેલ વસ્તુ મળી આવી.

દેશ દેવી ન્યુઝ જામનગર: તા.૨૦ ડિસેમ્બર ૨૨ જામનગર શહેરમાં રણજીતસાગર રોડ પર આવેલી સાધના કોલોનીમાં રહેતો અને દોરા-બટનનું કામ કરી દુકાને-દુકાને ફેરી કરતો યુવાન પાંચ દિવસથી તેના ઘરેથી ગયા બાદ સોમવારે સાંજે જૂની આરટીઓ ઓફિસ પાસે પાછલા તળાવમાંથી મૃતદેહ મળી આવતા પોલીસે આગળની કાર્યવાહી હાથ ધરી હતી.

મળતી વિગત મુજબ જામનગર શહેરમાં રણજીત સાગર રોડ પર આવેલી સાધનાકોલોની બ્લોક નંબર એલ-13માં રહેતો અને દોરા-બટનનું કામ કરતો સંજયભાઇ નરેન્દ્રભાઇ વસીયર (ઉ.વ.47) નામનો યુવાન દુકાને-દુકાને ફેરી કરી વેચાણ કરતો હતો. યુવાન છેલ્લા પાંચ દિવસથી તેના ઘરેથી નીકળી ગયો હતો. ત્યારબાદ લાપતા રહેલા યુવાનની પરિવારજનો દ્વારા શોધખોળ કરવામાં આવી હતી. પરંતુ યુવાનનો પતો નહીં લાગતા આખરે પોલીસમાં જાણ કરી હતી.

દરમ્યાન સોમવારે સાંજના સમયે જૂની આરટીઓ ઓફિસ પાછળ આવેલા તળાવમાંથી યુવાનનો મૃતદેહ મળી આવ્યાની જાણ થતાં એએસઆઇ યુ.પી.પરમાર તથા સ્ટાફ ઘટનાસ્થળે પહોંચી ગયો હતો અને મૃતદેહનો કબ્જો સંભાળી ઓળખ મેળવવા તજવીજ હાથ ધરતા મૃતદેહ સંજય વસીયરનો હોવાની તેના ભાઇ પીયુષ વસીયર દ્વારા ઓળખ કરવામાં આવી હતી. જેના આધારે પોલીસે મૃતદેહને પીએમ માટે મોકલી ક્યા કારણોસર મોત નિપજ્યું તે અંગેની તપાસ હાથ ધરી હતી.

જામનગરની જી. જી. હોસ્પિટલમાં ‘કાંડ’?
માનસીક વોર્ડમાં દાખલ મહિલાનું શંકાસ્પદ મોત

• મારી પત્નીનું ગળુ દબાવી દેતા મોત નિપજ્યું હોવાનો મૃતકના પતિનો આક્ષેપ.
• ગઇકાલ સાજનો બનાવ પોલીસ હોસ્પિટલ ખાતે દોડી ગઈ : સીસીટીવી ફૂટેજ ચેક કરાયા.
• પોલીસે યોગ્ય તપાસની ખાતરી આપતા મામલો થાળે પડ્યો હતો.

દેશ દેવી ન્યૂઝ જામનગર: તા.૧૯ ડિસેમ્બર ૨૨ જામનગર શહેરના પટેલ કોલોની શેરી નં-૭ એ રોડ નં-૪ માં રહેતાં અશોકભાઈ ભટ્ટજાણી નામના સિંધી લોહાણા વેપારી પ્રૌઢના પત્ની મધુબેન ભટ્ટજાણી (ઉ.વ.૪૫) નામના મહિલાને છેલ્લાં બે દાયકાથી માનસિક બીમારી થઈ હતી અને આ બીમારીના કારણે મધુબેનને સારવાર માટે જી.જી. હોસ્પિટલની નવી બિલ્ડિંગમાં ત્રીજા માળે આવેલા મહિલા સાયકેટ્રીક વોર્ડમાં દાખલ કરવામાં આવ્યાં હતાં. જ્યાં તેઓ છેલ્લા એકાદ મહિનાથી સારવાર લઇ રહ્યાં હતાં.

દરમિયાન રવિવારે સાંજના સમયે મધુબેન ભટ્ટી નામના મહિલાનું તેના જ વોર્ડમાં મોત નિપજયું હતું. જો કે, મૃતક મહિલાના પતિ અશોકભાઈના જણાવ્યા અનુસાર રવિવારે સાંજે આ વોર્ડમાં રહેલા એક માતા-પુત્રી ઝઘડો કરતા હતાં તે દરમિયાન મધુબેન બંને માતા-પુત્રીને છોડાવવા ગયા ત્યારે તે પૈકીને મહિલાએ મધુબેનનું ગળુ પકડી લીધું હતું. તે દરમિયાન અશોકભાઇ એ તેની પત્નીને તેના બેડ ઉપર સુવડાવતા બેશુદ્ધ થઈ ગઈ હતી. ત્યારબાદ તબીબોએ મધુબેનનું મોત નિપજયાનું જાહેર કર્યુ હતું તેમજ મૃતક મહિલાના પતિ અશોકભાઇ અન્ય મહિલાએ તેની પત્નીનું ગળુ દબાવી દીધું હોવાનો આક્ષેપ કર્યો હતો.જેના કારણે મામલો ગરમાયો હતો.

બનાવની જાણ થતા પીએસઆઈ બી.બી કોડિયાતર તથા સ્ટાફ ઘટનાસ્થળે દોડી ગયો હતો અને મામલો થાળે પાડવા પ્રયાસ કર્યો હતો. પશ્રંતુ મૃતકના પતિ દ્વારા કરાયેલા આક્ષેપને કારણે પોલીસે મૃતક મહિલાનું પેનલ પીએમ કરાવી ખાતરી આપી ત્યારબાદ મામલો થાળે પડયો હતો. આ રહસ્યમય ઘટનામાં પીએમ અને પોલીસ તપાસ બાદ જ સાચી હકીકતો બહાર આવશે.

ધુતારપુર સેવા સહકારી મંડળીના ૧.૧૪ કરોડ રૂપિયા પિતા પુત્ર “ચાઉ” કરી ગયા

• ધુતારપુર સેવા સહકારી મંડળીના પુર્વ મંત્રી રાજેશભાઇ અમ્રુતલાલ ચાઉ તેમજ પુર્વ સહ મંત્રી જયેશભાઇ રાજેશભાઇ અમ્રુતલાલ ચાઉ નું કારસ્તાન
• ખોટી સહીથી ચેક વટાવી તેમજ રાસાયણીક ખાતરનો સ્ટોક બારોબાર વેંચી મારી એક કરોડ ચૌદ લાખની ઉચાપત કરતા મામલો પોલિસ મથકે

દેશ દેવી ન્યુઝ જામનગર તા ૧૮ ડીસેમ્બર ૨૨ જામનગર જિલ્લાના ધુતારપુર ગામમાં રહેતા અને અગાઉ શ્રી ધુતારપુર સેવા સહકારી મંડળીના પુર્વ મંત્રી અને સહમંત્રી પિતા પુત્ર મંડળીના પગારદાર કર્મચારી હોય જેને ચેકમાં ખોટી સહી કરી મંડળીના ૧,૧૩, ૮૧, ૯૫૪/-  રૂપિયાનો પોતાની અંગત ઉપયોગ માટે વાપરીને ઉચાપત એગેની ફરીયાદ નોંધાતા નાના એવા ગામમાં ભારે ચકચાર જાગી છે.

પોલીસ પોથીએથી જાણવા મળતી માહિતી મુજબ જામનગરના શ્રી ધુતારપુર સેવા સહકારી મંડળી .ના પુર્વ મંત્રી રાજેશભાઇ અમ્રુતલાલ ચાઉએ તેમજ પુર્વ સહ મંત્રી જયેશભાઇ રાજેશભાઇ અમ્રુતલાલ ચાઉ બન્ને પિતા-પુત્ર હોય અને મંડળીના પગારદાર કર્મચારી હોય જેઓએ એક બીજા સાથે મેલાપીપણુ કરી મંડળીની સિલકના વહેવારોમાં તેમજ મંડળીના બેંક ખાતાના ચેકોમાં ખોટી સહીઓ કરી ચેક વટાવી નાંણા ઉપાડી લઇ તેમજ મંડળીના રાસાયણીક ખાતરના માલ સ્ટોકમાંથી માલ વેંચી જેના રૂપીયા મંડળીમાં જમા નહી કરાવી કુલ રૂપીયા ૧,૧૩,૮૧,૯૫૪/– ની નાણાની પોતાના અંગત ઉપયોગ માટે વાપરી ઉચાપત કરતા નાના એવા ગામમાં ભારે ચકચાર જાગી છે. હાલ તો

પંચકોશી -એ ડિવીઝન પોલીસ દ્વારા અશ્વીનભાઇ ગોરધનભાઇ ગલાણી જાતે.પટેલ. ઉ.વ.૪૪ ની ફરિયાદ પરથી IPC કલમ-૪૦૬, ૪૨૦, .૪૦૯, ૪૬૫, ૪૬૭, ૪૬૮, ૪૭૧, ૧૧૪ મુજબ પિતા પુત્ર સામ સામે વિશ્વાસધાત છેતરપિંડી સબબ ગુનોં નોંધી વધુ તપાસ PSI જે.પી સોઢા ચલાવી રહ્યા છે.

જામનગર બાર એસો.ની ચૂંટણીમાં ફરી પ્રમુખ બનતા ભરતભાઇ સુવા જ્યારે  ઉપપ્રમુખમાં ભરતસિંહ જાડેજા વિજેતા થતા જોગાનું જોગ વકીલ મંડળમાં બે ભરતનો સંગમ થયો હતો

• ભરતભાઈ સુવાએ 604 મત મેળવી ચોથી ટર્મમાં પ્રમુખ બન્યા
• ઉપપ્રમુખ પદે ભરતસિંહ હેમુભા જાડેજાને 403 મત
• સેક્રેટરી માટે મનોજ ઝવેરીને 544 મત
• લાઇબ્રેરી સેક્રેટરી માટે બ્રિજેશ ત્રિવેદીને 330 મત
• ખજાનચી તરીકે રાવલને 554 મત મળતા વિજેતા જાહેર

દેશ દેવી ન્યુઝ જામનગર: તા.૧૭. ડીસેમ્બર ૨૨ જામનગર બાર એસોસિએશનની શુક્રવારે સવારે ચૂંટણી યોજાઈ હતી ત્યારબાદ મૂડી રાત્રે ચૂંટણી પ્રક્રિયા પૂર્ણ થતા મતગણતરી સંપન્ન થઈ હતી જેમાં જામનગર વકીલ મંડળની ચૂંટણીમાં પ્રમુખ પદે હેટ્રિક મારી ભરતભાઈ સુવાએ 604 મત મેળવી ચોથી ટર્મમાં પ્રમુખ બન્યા છે. આ ઉપરાંત ઉપપ્રમુખ પદે ભરતસિંહ હેમુભા જાડેજા ને 403 મત મળ્યા છે.

સેક્રેટરી માટે મનોજ ઝવેરીને 544 મત મળ્યા છે લાઇબ્રેરી સેક્રેટરી માટે બ્રિજેશ ત્રિવેદીને 330 મત મળ્યા છે. આ ઉપરાંત ખજાનચી તરીકે રાવલને 554 મત મળતા તેઓ વિજેતા જાહેર કરવામાં આવ્યા હતા.

જામનગર બાર એસોસિએશનની શુક્રવારે ચૂંટણી યોજાઈ હતી. કુલ 881 મતદારો પૈકી બાર સોસીએશનના 726 સભ્યોએ મતદાન કર્યું હતું પ્રમુખ પદ માટે ભરત એસ. સુવા તેમજ વિક્રમસિંહ જેઠવા વચ્ચે ચૂંટણી જંગ ખેલાયો હતો, જેમાં એડવોકેટ ભરત સુવાને 604 મત મળ્યા છે, અને જંગી બહુમતીથી સતત નવમી વખત પ્રમુખ તરીકે વિજેતા બન્યા છે. તેઓના પ્રતિસ્પર્ધી વિક્રમસિંહ જેઠવા ને માત્ર એકસો મત મળ્યા હતા.

નથુવડલા ગામના પશુપાલકના ૪૩ ઘેટા-બકરાઓના મૃત્યુ થતાં સરકાર દ્વારા ત્વરિત રૂ.૭૦૯૫૦ ની સહાય ચૂકવવામાં આવી

• કેબિનેટ મંત્રી રાઘવજીભાઈ પટેલે પશુપાલકને ચેક અર્પણ કરી પરિવારને સાંત્વના પાઠવી
• સરકાર દ્વારા પશુપાલકોને મદદરૂપ થવા માટે અનેક યોજનાઓ અમલમાં મૂકવામાં આવી છે : મંત્રી રાઘવજીભાઈ પટેલ

દેશ દેવી ન્યુઝ જામનગર તા.૧૭ ડિસેમ્બર ૨૨ , જામનગર જિલ્લાના નથુવડલા ગામે રહેતા પશુપાલક શ્રી હઠાભાઈ કરણાભાઈ ઝાપડાનાં ૪૧ ઘેટા અને ૨ બકરા મળી ૪૩ પુખ્ત પશુઓનું ફૂડ પોઈઝનીંગથી ગત તા.૧૪ ડિસેમ્બરના રોજ મૃત્યુ થયું હતું. વર્ષ ૨૦૨૨-૨૩ હેઠળ રોગચાળા, મહારોગચાળા સમયે મરઘાં, બતક તથા પશુધનના મૃત્યુ સામે વળતર આપવાની યોજના હેઠળ સરકાર દ્વારા રૂ.૭૦૯૫૦ની સહાય મંજૂર કરવામાં આવતા રાજ્યના કૃષિ, પશુપાલન, ગૌસંવર્ધન, મત્સ્યોધ્યોગ, ગ્રામ ગૃહ નિર્માણ અને ગ્રામ વિકાસ વિભાગના મંત્રી રાઘવજીભાઈ પટેલ દ્વારા પશુપાલકને ચેક અર્પણ કરી તેમના પરિવારને સાંત્વના પાઠવવામા આવી હતી.

પશુપાલક તેમજ તેમના પરિવારને સાંત્વના પાઠવતા કેબિનેટ મંત્રી રાઘવજીભાઈ પટેલે જણાવ્યું હતું કે, સરકાર દ્વારા પશુપાલકોને મદદરૂપ થવા માટે અનેક યોજનાઓ બહાર પાડવામાં આવી છે. પશુપાલકોનું જીવનધોરણ ઊંચું આવે તેમના પશુઓને ઘાસચારો મળી રહે, રહેઠાણ મળી રહે તેમજ પશુ બીમાર હોય ત્યારે સારવાર થઈ શકે તે માટે સરકાર દ્વારા પ્રયાસો કરવામાં આવી રહ્યા છે. ત્યારે નથુવડલા ગામના પશુપાલકના ઘેટાં-બકરાઓના ફૂડ પોઈઝનીંગથી મૃત્યુ થવાની ઘટના દુખદ છે. તેમના પરિવારને સરકાર તરફથી સાંત્વના પાઠવતા રાધવજી પટેલે જણાવ્યું હતું કે હઠાભાઈની આજીવિકા છીનવાઇ જતાં તેઓને આર્થિક સહાય મળી રહે તે માટે સરકાર દ્વારા ત્વરિત રૂ.૭૦૯૫૦ની સહાય અર્પણ કરવામાં આવી છે. પશુપાલકો, ખેડૂતો તેમજ નાનામાં નાના વ્યક્તિને પણ કઇ રીતે મદદરૂપ થવું તે દિશામાં સરકાર સતત પ્રયત્ન કરી રહી છે. અને છેવાડાના માનવી સુધી સરકારની યોજનાઓ મારફતે સહાય પહોંચે તે માટે સરકાર સતત કાર્યરત છે. હઠાભાઈના ઘેટા-બકરાઓના મૃત્યુ થતાં સરકાર દ્વારા તેમણે ડીબીટીથી ત્વરિત સહાય ચૂકવવામાં આવતા તેઓએ સરકાર તેમજ મંત્રીનો આભાર વ્યક્ત કર્યો હતો.

આ તકે પશુપાલન વિભાગના નિયામક  ફાલ્ગુનીબેન ઠક્કર, ધારાસભ્ય મેઘજીભાઈ ચાવડા, જિલ્લા પંચાયતના પ્રમુખ ધરમશીભાઈ ચનીયારા, પશુપાલન વિભાગના અધિકારીઓ, જિલ્લા પંચાયતના સભ્ય મનસુખભાઈ ચભાડીયા, તાલુકા પ્રમુખ નવલભાઈ મૂંગરા, ગામના આગેવાનશ્રીઓ તેમજ ગ્રામજનો બહોળી સંખ્યામાં ઉપસ્થિત રહ્યા હતા.

જામનગર પ્રધાનમંત્રી મોદી વિરુદ્ધ ટીપણી કરનાર પાકિસ્તાનના વિદેશ મંત્રીના પૂતળાનુ દહન

• જામનગર શહેર ભાજપ લાલધૂમ : રેલી સ્વરૂપે જિલ્લા કલેક્ટર કચેરીએ પહોંચી વિસ્તૃત આવેદનપત્ર પાઠવ્યું

દેશ દેવી ન્યુઝ જામનગર તા ૧૭ ડીસેમ્બર ૨૨: જામનગરમાં ભારતીય જનતા પાર્ટી યુવા મોરચા દ્વારા પાકિસ્તાનના વિદેશ મંત્રી બિલાવલ ભુટોના પૂતળાનુ દહન કરવામાં આવ્યું હતું. વડાપ્રધાન નરેન્દ્રભાઈ મોદી વિરુદ્ધ ટીપણી કરવા ને લઈને ભારે વિરોધ સાથે જામનગરમાં ભાજપે પાકિસ્તાનના વિદેશ મંત્રી નું પૂતળું બાળ્યું છે. અને પાકિસ્તાનના નારા લગાવી જામનગર કલેકટર કચેરીએ ભાજપના ધારાસભ્યો મેયર અને પાર્ટીના આગેવાનો કાર્યકરોએ આવેદનપત્ર પાઠવ્યું હતું.

પાકિસ્તાનના વિદેશ મંત્રી બિલાવલ ભુટ્ટો કે જેણે ભારતના વડાપ્રધાન નરેન્દ્રભાઈ મોદી વિશે અભદ્ર ટિપ્પણી કરી હોવાથી તેનો વિશ્વભરમાં વિરોધ થઈ રહ્યો છે. ત્યારે જામનગર શહેર ભાજપ દ્વારા પાક વિદેશ મંત્રી નો વિરોધ કરવાના ભાગરૂપે બીલાવલ ભુટ્ટોના પૂતળાનું જાહેરમાં દહન કરવામાં આવ્યું હતું.

નગરના મેયર બીનાબેન કોઠારી, શહેર ભાજપના અધ્યક્ષ ડો. વિમલ કગથરા જિલ્લા ભાજપ પ્રમુખ રમેશભાઈ મુંગરા, જામનગર શહેરના ધારાસભ્ય દિવ્યેશ અકબરી તથા શહેર ભાજપના અન્ય અગ્રણીઓએ એકત્ર થઈને પૂતળાને ચપ્પલ માર્યા પછી તેનું દહન કર્યું હતું. ત્યારબાદ રેલી સ્વરૂપે જિલ્લા કલેક્ટર કચેરીએ પહોંચી વિસ્તૃત આવેદનપત્ર પાઠવ્યું હતું.

ભારતીય જનતા પાર્ટી આજે વડાપ્રધાન નરેન્દ્ર મોદી વિરુદ્ધ પાકિસ્તાનના વિદેશ મંત્રી બિલાવલ ભુટ્ટો ઝરદારીએ કરેલી અપમાનજનક ટિપ્પણી સામે દેશવ્યાપી વિરોધ પ્રદર્શન કર્યું છે. બીજેપીએ શુક્રવારે એક નિવેદનમાં કહ્યું હતું કે, દેશભરના તમામ રાજ્યોની રાજધાનીઓમાં વિરોધ પ્રદર્શન કરવામાં આવશે. ભાજપના કાર્યકરો પાકિસ્તાન અને પાકિસ્તાનના વિદેશ મંત્રીના પૂતળા સળગાવશે અને તેમના શરમજનક નિવેદનની સખત નિંદા કરશે.