પ્રધાનમંત્રી અને તેમની માતા અંગે ટીપ્પણી કરનારે જામનગરના વેપારી સાથે કરી રૂા. અઢી લાખની છેતરપીંડી કર્યાની ફરિયાદ

દેશ દેવી ન્યુઝ જામનગર: તા.૦૬ જાન્યુઆરી ૨૩ જામનગરમાં ગેલેક્સિ સિનેમા નજીક હાર્ડવેર ની દુકાન ધરાવતા એક વેપારીએ પોતાની સાથે બાર્જ રીપેરીંગ ના સ્પેરપાર્ટ ખરીદી જઈ, પૈસા પરત નહીં આપી રૂપિયા 2.56. લાખ ની છેતરપિંડી કર્યા ની ફરિયાદ સિક્કાના બાર્જ ના સંચાલક સામે નોંધાવી છે. જે આરોપી સામે ભારતના વડાપ્રધાન અને તેના માતા વિરુદ્ધ ટીપ્પણી કરવા અંગે સિક્કા પોલીસ મથકમાં ગુનો નોંધાવાયો છે, અને એસ.ઓ.જી. શાખા એ તેની ધરપકડ કરી લીધી છે.

આ ફરિયાદ અંગેના બનાવની વિગત એવી છે કે જામનગરમાં પટેલ કોલોની વિસ્તારમાં રહેતા અને ગેલેક્સી સિનેમા નજીક હાર્ડવેરના માલસામાનની દુકાન ધરાવતા રાજેન્દ્રભાઈ ગજેન્દ્રભાઈ ત્રિવેદીએ પોતાની દુકાનેથી રૂપિયા 2,56 લાખ નો માલ સામાન ખરીદ કરી પરત નહીં આપી છેતરપિંડી કરવા અંગે મૂળ ભાવનગર ના વતન અને હાલ પંચવટી સોસાયટી, સિક્કામાં રહેતા મૂળ ભાવનગરના વતની અફઝલ લાખાણી નામના બાર્જ સંચાલક સામે ફરિયાદ નોંધાવી છે.

જે ફરિયાદના અનુસંધાને પોલીસે આઈપીસી કલમ 406 અને 420 મુજબ ગુનો નોંધ્યો છે. ફરિયાદી વેપારી પાસેથી આરોપી અફઝલ ભાઈએ બાર્જ રીપેરીંગ ને લગત સ્પેરપાર્ટ ની ખરીદી કરી હતી, જેની રકમ નહીં ચૂકવી વિશ્વાસઘાત અને છેતરપિંડી કરતાં ફરિયાદ નોંધાવી છે.

ઉપરોક્ત આરોપી સામે સિક્કા પોલીસ મથકમાં ભારતના વડાપ્રધાન વિરુદ્ધ ટિપ્પણી કરવાના પ્રકરણમાં ગુનો નોંધવામાં આવ્યો હતો, અને એસ.ઓ.જી.ની ટીમે તેની ધરપકડ કરી લીધા પછી જેલ હવાલે કરાયો છે. જેની સામે સીટી એ. ડિવિઝન પોલીસ મથકમાં પણ એક ફરિયાદ નોંધાવવામાં આવી છે.

જામનગરમાં ભાનુશાળી યુવતિની આત્મહત્યા પ્રકરણમાં મરીજવા મજબૂર સહિતની કલમ હેઠળ ગુનોં નોંધાયો

• યુવતીના મૃત્યુ બાદ સાસરિયાઓ સામે મરી જવા મજબુર કર્યાની ફરિયાદ
• ૯ મહિનાના લગ્નગાળામાં અવાર-નવાર ત્રાસ આપ્યાની પરિવારનો આક્ષેપ.
• આરોપી:- મૃતકના પતિ ચિરાગ વિમેશભાઇ નંદા, સાસુ મીતલબેન વિમેશભાઇ નંદા, સસરા વિમેશ રમેશભાઇ નંદા અને નણંદ ચાંદનીબેન વિમેશભાઈ

દેશ દેવી ન્યુઝ જામનગર: તા.૦૬ જાન્યુઆરી ૨૩ જામનગર શહેરમાં પવનચકકી ઢાળિયા પાસે રહેતી મહિલાને તેણીના પતિ સહિતના સાસરિયાઓ દ્વારા લગ્નજીવન દરમિયાન અવાર-નવાર અપાતા શારીરિક અને માનસિક ત્રાસથી કંટાળીને ગળેફાંસો ખાઈ આત્મહત્યા કર્યાના બનાવમાં મૃતકની માતાએ નોંધાવેલી ફરિયાદના આધારે પોલીસે તપાસ આરંભી હતી.બનાવની વિગત મુજબ, જામનગર શહેરમાં પવનચકકી ઢાળિયા પાસે થોડા સમય અગાઉ જ લગ્ન થયેલ સપનાબેન નામની યુવતીએ તેના ઘરે ગળેફાંસો ખાઈ આત્મહત્યા કરી હતી. આત્મહત્યાના આ બનાવ બાદ મૃતક સપનાબેનની માતા નીતાબેન દ્વારા મૃતકના પતિ ચિરાગ વિમેશભાઇ, સાસુ મીતલબેન વિમેશભાઇ, સસરા વિમેશ રમેશભાઇ અને નણંદ ચાંદનીબેન વિમેશભાઈ સહિતના ચાર સાસરિયાઓએ યુવતીના લગ્નજીવન દરમિયાન જૂન 2022 થી અવાર-નવાર શારીરિક અને માનસિક ત્રાસ આપી મારકૂટ કરતાં હતાં અને મેણાટોણાં મારી મરી જવા મજબુર કરતા યુવતીએ આત્મહત્યા કરી હોવાની ફરિયાદ નોંધાવી હતી.જેના આધારે પીએસઆઈ વી.આર. ગામેતી તથા સ્ટાફે ચાર શખ્સો વિરૂધ્ધ મરી જવા મજબુરનો ગુનો નોંધી ધરપકડ માટે ચક્રો ગતિમાન કર્યા હતાં.

જામનગરના ગુલાબનગર વિસ્તારમાં જામ્યુકોની જમીન પરનું ગેરકાયદે દબાણ હટાવવા ડીમોલીશન

• પોલીસના ચૂસ્ત બંદોબસ્ત હેઠળ 32 આસામીઓ દ્વારા કરાયેલું દબાણ હટાવી જમીન ખુલ્લી કરાવાઇ
• મનપાના એસ્ટેટ કર્મી અને આસામી વચ્ચે શાબ્દિક ટપા-ટપી..

દેશ દેવી ન્યુઝ તા. oપ જાન્યુઆરી ૨૩ જામનગર: શહેરના ગુલાબનગર વિસ્તારમાં આવેલ સિન્ડિકેટ સોસાયટી વિસ્તારમાં મહાનગરપાલિકાની અઢી હજાર ફૂટ જેટલી જગ્યામાં 32 જેટલા આસામીઓ દ્વારા દબાણ કરાયું હતું, જ્યાં ભારે પોલીસ બંદોબસ્ત ની સાથે મેગા ડીમોલેશન હાથ ધરવામાં આવ્યું હતું.

નવા રોડ બનાવવા માટે થઈને અંદાજે અઢી હજાર ફૂટ જેટલી જગ્યા ખુલ્લી કરાવવામાં આવી રહી છે. શહેરના ગુલાબ નગર નજીક સિન્ડિકેટ સોસાયટી વિસ્તારમાં મહાનગરપાલિકાની જગ્યા આવેલી છે, જેમાં ઘણા સમયથી કેટલાક શખ્સો દ્વારા દબાણ કરી દેવાયું હતું. ઉપરોક્ત જગ્યામાં 9 મીટર તેમજ 22 મીટરના અલગ અલગ બે નવા રોડ બનાવવામાં આવી રહ્યા છે. જે રસ્તા પરની જગ્યામાં જ જુદા જુદા 32 જેટલા આસામીઓ એ દબાણ કરીને કાચા- પાકા મકાનો, ઓરડી, ગાર્ડન વગેરે બનાવી લીધા હતા. જે તમામને જગ્યા ખુલ્લી કરવા માટેની નોટિસ પાઠવાઇ હતી, તેમ છતાં પણ જગ્યા ખુલ્લી કરવામાં આવી ન હતી.

દરમિયાન જામનગર મહાનગરપાલિકાના ડેપ્યુટી કમિશનર ભાવેશ જાની તેમજ કંટ્રોલિંગ અધિકારી મુકેશ વરણવાના સુચના મુજબ એસ્ટેટ શાખાના અધિકારી નીતિન દીક્ષિત, તેમજ દબાણ હટાવ અધિકારી સુનિલ ભાનુશાળી તથા યુવરાજસિંહ ઝાલા, ના માર્ગદર્શન હેઠળ 12 થી વધુ દબાણ હટાવ શાખાના કર્મચારીઓની ટુકડી એક જેસીબી મશીન અને બે ટ્રેક્ટર સાથે સિન્ડિકેટ સોસાયટીમાં પહોંચી હતી, અને પોલીસ બંદોબસ્ત મેળવવામાં આવ્યો હતો. જેમાં PSI બી.બી કોડીયાતર, PC જીતેન્દ્રર્સિંહ ખુમાનસિંહ જાડેજા, સુરપાલસિંહ ઉદયસિંહ જાડેજા, મહિલા પોલીસ કર્મચારી તસ્લીમા સફિયા, જીએચ ગોજીયા સહિતના પોલીસ બંદોબસ્ત ને ગોઠવવામાં આવ્યો હતો, અને મહાનગરપાલિકાની અંદાજે અઢી હજાર ફૂટ જેટલી જગ્યા ખુલ્લી કરાવવા માટેની કાર્યવાહી હાથ ધરવામાં આવી છે.

જામનગરમાં આશાસ્પદ ઈજનેર યુવાનની આત્મહત્યાથી અરેરાટી

દેશ દેવી ન્યુઝ જામનગર તા.૦૫ જાન્યુઆરી ૨૩ જામનગર: જામનગરમાં ખોડીયાર કોલોની નજીક મધુરમ રેસીડેન્સીમાં રહેતો અને જામનગરની એક ખાનગી પેઢીમાં એન્જિનિયર તરીકે કામ કરતો મૂળ ભાયાવદરનો વતની વત્સલ રોહિતભાઈ અમૃતિયા નામના 29 વર્ષના ઇજનેર યુવાને ગઈકાલે પોતાના ઘેર પંખા ના હુકમાં દોરી બાંધી ગળાફાંસા દ્વારા આત્મહત્યા કરી લીધી હતી. આ બનાવ અંગે તેની પેઢીના સંચાલક હેત મિલનભાઈ કંડોરીયાએ પોલીસને જાણ કરતાં સિટી સી. ડિવિઝન પોલીસે મૃતદેહ નો કબજો સંભાળી પોસ્ટ મોર્ટમ સહિતની કાર્યવાહી હાથ ધરી છે.

મૃતક યુવાન જામનગરની ક્ધસ્ટ્રકશન કંપનીમાં એન્જીનીયર તરીકે ફરજ બજાવતો હતો, અને ખોડીયાર કોલોની મધુરમ સોસાયટીમાં રૂમ ભાડે રાખીને એકલો રહેતો હતો. તેણે કયા સંજોગોમાં આપઘાતનું પગલું ભરી લીધું છે, તે મામલે પોલીસ ઊંડાણપૂર્વકની તપાસ ચલાવી રહી છે. આ ઉપરાંત આત્મહત્યાનો બીજો બનાવ કાલાવડ તાલુકાના નાની નાગાજર ગામમાં બન્યો હતો. મૂળ નાગાજર ગામના વતની અને હાલ રાજકોટમાં રહેતા અને માલધારીનો વ્યવસાય કરતા મંછાભાઈ પબાભાઈ ગમારા નામના 35 વર્ષના યુવાને ગઈકાલે રાજકોટ થી પોતાના વતનમાં આવ્યા પછી વાડીની ઓરડીમાં લાકડાની આડસમાં ગળાફાંસા દ્વારા આપઘાત કરી લીધો હતો.

આ બનાવ અંગે મૃતક ના ભાઈ ગેલાભાઈ પબાભાઈ ગમારા એ પોલીસને જાણ કરતાં કાલાવડ ગ્રામ્ય પોલીસે મૃતદેહનો કબજો સંભાળી આ બનાવ અંગેની જીણવટ ભરી તપાસ હાથ ધરી છે.

સોમનાથ મંદિરના પાર્કિગમાંથી બાઇકની ચોરી કરનાર આરોપીને જામનગર એલસીબીએ ઝડપી લીધો

દેશ દેવી ન્યુઝ જામનગર તા.૦૪ જાન્યુઆરી ૨૩ જામનગર: જામનગર પંથકમાં અવારનવાર વાહન ચોરી થતી હોવાની ઘટનાઓ બની રહી છે ત્યારે જામનગર એલસીબીની ટીમ દ્વારા વાહન ચોરોને ઝડપી પાડવા માટે ચક્રો ગતિમાન કરવામાં આવ્યા છે જે અનુસંધાને એલસીબી દ્વારા જામનગર ગ્રામ્ય વિસ્તારમાં પેટ્રોલિંગ હાથ ધરવામાં આવ્યું હતું. ત્યારે ગીર સોમનાથના સોમનાથ મંદિરના પાર્કિંગમાંથી બાઇકની ચોરી કરનાર આરોપીને દબોચી લેવામાં આવ્યો છે. જામનગર એલ.સી.બી.સ્ટાફના દિલીપભાઇ તલાવડીયા તથા હિતેન્દ્રસિંહ જાડેજાને મળેલ હકિકત આધારે જામનગર તાલુકાના દરેડ ગામે આઇટીઆઇ સામેથી આરોપી લખન હીરાભાઇ મારવાડી રહે. મારવાડી વાસ રણજીતસાગર રોડ, જામનગર વાળાના કબ્જામાંથી એક હિરો હોન્ડા સુપર સ્પેલેન્ડર મોટર સાયકલ રજીસ્ટર નંબર- GJ11 BD 7821 નુ કિ.રૂ. 20,000/- ગણી શકપડતી મિલ્કત તરીકે પો.હેડ કોન્સ. ભગીરથસિંહ સરવૈયાએ કબ્જે કરી કાયદેસર કાર્યવાહી કરેલ છે. સદરહુ મો.સા. ગીરસોમનાથ જીલ્લાના સોમનાથ મંદિરના પાર્કીંગ માંથી ચોરી કરેલની કબુલાત આપેલ છે.

મીઠાપુર નજીક આંગણવાડીમાંથી તેલના ટીન તથા બોટલની ચોરી

દેશ દેવી ન્યુઝ જામનગર તા.૦૪ જાન્યુઆરી ૨૩ જામનગર: મીઠાપુરના ટાઉન વિસ્તારમાં આવેલી એક આંગણવાડીમાંથી બે દિવસ પૂર્વે તેલના ડબ્બા તથા પાઉચની ચોરી થયાનો બનાવ પ્રકાશમાં આવ્યો છે. આ પ્રકરણ અંગે મીઠાપુરમાં જુના ફ્લેટ વિસ્તારમાં રહેતા અને આંગણવાડીમાં નોકરી કરતા અફસાનાબેન ઈબ્રાહીમભાઇ સુમારભાઈ ભીખલાણી (ઉ.વ. 27) એ મીઠાપુર પોલીસમાં જાહેર કરેલી વિગત મુજબ સોમવાર તારીખ 2 ના રોજ બપોરે 2 વાગ્યાથી ગઈકાલે મંગળવારે સવારના 9:30 વાગ્યા સુધીના સમયગાળા દરમિયાન મીઠાપુર ટાઉન વિસ્તારમાં આવેલી આંગણવાડીના બે રૂમના પાછળના દરવાજાના આગરીયા તોડી, કોઈ તસ્કરોએ અંદર પ્રવેશ કર્યો હતો.

આંગણવાડીમાં રાખવામાં આવેલા રૂપિયા 12,100 ની કિંમતના સીંગતેલ ભરેલા સાડા પાંચ ડબ્બા તથા રૂપિયા 7,497 ની કિંમતના એક-એક લીટરવાળા 51 તેલના પાઉચ કોઈ તસ્કરો ચોરી કરીને લઈ ગયા હતા. આમ, કુલ રૂપિયા 19,597 ના મુદ્દામાલની ચોરી થવા સબબ મીઠાપુર પોલીસે આઈ.પી.સી. કલમ 380, 454 તથા 497 મુજબ ગુનો નોંધી, આગળની તપાસ હાથ ધરી છે.

જામનગરના આમરા ગામમાંથી પિસ્તોલ અને કાર્ટીસ સાથે શખ્સને ઝડપી લેતું એલસીબી 

દેશ દેવી ન્યુઝ જામનગર તા.૩ જાન્યુઆરી રર જામનગર તાલુકાના આમરા ગામના પાટીયા પાસેથી પિસ્તોલ સાથે શખ્સ પસાર થવાની એલસીબીના ભગીરથસિંહ સરવૈયા અને શિવભદ્રસિંહ જાડેજાને મળેલી બાતમીના આધારે સ્ટાફે વોચ ગોઠવી હતી.

દરમિયાન બાતમી મુજબનો શખ્સ આમરા ગામના પાટીયા પાસેથી પસાર થતા એલસીબીએ સુલતાન ઉર્ફે ગાંડી જુસબ સુભણિયા (રહે. સલાયા તા. ખંભાળિયા) નામના શખ્સને આંતરીને તલાસી લેતા તેના કબ્જામાંથી લાયસન્સ વગરની રૂા.25000 ની કિંમતની પિસ્તોલ અને રૂા.200 ની કિંમતના બે જીવતા કાર્ટીસ મળી આવતા રૂા.25,200 નો મુદ્દામાલ કબ્જે કરી ગુનો નોંધી વધુ પૂછપરછ હાથ ધરી હતી.

પ્રધાનમંત્રી મોદી અને તેમના સ્વર્ગસ્થ માતા વિષે સોશ્યલ મિડિયામાં ગેરશબ્દો વાપરનારો સિકકાનો શખ્સ પકડાયો

• એસ.ઓ.જી. શાખાની ટુકડીએ આરોપીને બે દિવસના રિમાન્ડ પર લીધો: બે મોબાઈલ ફોન કબજે

દેશ દેવી ન્યુઝ જામનગર: તા. જાન્યુઆરી ૨૨ ભારતના પ્રધાનમંત્રી નરેન્દ્ર મોદી અને તેમના સ્વર્ગસ્થ માતા અંગે ફેસબુક માં ગેર શબ્દનો ઉપયોગ કરી સુલેહ શાંતિ નો ભંગ થાય તેવી પોસ્ટ સોશિયલ મીડિયા માં વાયરલ કરનાર સિક્કા ગામ ના શખ્સ સામે ફરિયાદ નોંધાવાઈ છે.એસ.ઓ.જી.ની ટીમે તેની ધરપકડ કરી લઇ બે દિવસ ના રિમાન્ડ મેળવ્યા છે, જ્યારે તેના બે મોબાઈલ ફોન કબજે કરી લેવાયા છે.

જામનગર તાલુકા ના સિક્કા પોલીસ સ્ટેશન માં ગત 31.12.2020 ના રાત્રીના સમયે સિક્કાના જ એક શખ્સ સામે IPC કલમ-120(બી), 153(ક), 292(ર) (ક), 294(બ), 295(ક), 298, 469, 500, 501, 504, 505(ર) તથા આઇ.ટી એકટ સને 2000 ની કલમ 67 મુજબ નો ગુનો નોંધાયો હતો. આ ગુનાની તપાસ એસ.ઓ. જી. ના પોલીસ ઈન્સેકટર બી.એન.ચૌધરી ને સોંપાઈ છે.

આ ગુના ના આરોપી અફજલ કાસમભાઈ લાખાણી (ઉ.વ.40) -ધંધો શેરબજાર નો રહે.પંચવટી સોસાયટી, સોઢા સ્કુલની પાસે, હુશેનભાઈ સુંભાણીયાના મકાનમાં, સિકકા ગામ, તા.જી. જામનગર (મુળ રહે જમના કુંડ ચોક, ભાવનગર ) વાળાએ પોતાના ફેસબુકના પેઇઝ ગુજરાત ત્રસ્ત ભાજપા મસ્ત નામના ફેસબુક એકાઉન્ટમા ભારતના વડાપ્રધાન તથા તેઓના માતૃશ્રી વિરૂધ્ધ ગેરશબ્દોનો ઉલ્લેખ કરી, જાહેર સુલેહ શાંતિનો ભંગ થાય તેમજ ઉશ્કેરાટ પેદા થાય તેવા શબ્દો ભાષાનો ઉલ્લેખ કરતી પોસ્ટ મુકી હતી.

આરોપીએ ફેસબુક એપ માં અફજલ લાખાણી નામથી એક ફેસબુક એકાઉન્ટ ખોલેલું હતું. જે એકાઉન્ટ માંથી વિવિધ પ્રકારના ફેસબુક પેઈઝ તથા અનેકો અકાઉન્ટ ખુલેલા છે. જે એકાઉન્ટો મહિલાઓ ના નામે પણ છે. અને આરોપી સોશ્યલ મિડીયા નો જાણકાર હોવાથી પોતે પોતાની પોસ્ટ ઉપર પોતાના અન્ય નામ થી બનાવેલ આઈ. ડી. માં થી કોમેન્ટ કરે છે. જેના હજારોની સંખ્યામાં ફોલોવર્સ છે.

સમગ્ર મામલો ધ્યાને આવતાં આરોપી અફઝલ લાખાણી સામે ગુનો નોંધી તેની અટકાયત કરી લેવામાં આવી હતી, અને તેનો કોવિડ ટેસ્ટ કરાયો હતો. જેનો રિપોર્ટ નેગેટીવ આવતાં ગઈકાલે મોડી રાત્રે તેની ધરપકડ કરી લેવામાં આવી હતી. જેને આજે અદાલત સમક્ષ રજૂ કફ રાયો હતો, અને સાત દિવસની રિમાન્ડની માંગણી કરવામાં આવી હતી. જેમાં અદાલત દ્વારા બે દિવસ ના પોલીસ રિમાન્ડ મંજૂર કરાયા છે SOG ની ટીમ દ્વારા તેના બે મોબાઈલ ફોન કબજે કરી લેવાયા છે, અને સાઈબર ક્રાઇમની ટીમ પણ આ પ્રકરણમાં તપાસમાં જોડાઈ છે, અને એસ.ઓ.જી. ની ટીમ સાથે ઊંડાણપૂર્વકની વધુ તપાસ ચલાવવામાં આવી રહી છે.

જામ્યુકો વિરોધપક્ષના નવા હોદ્દેદારોની વરણી

• વિરોધપક્ષના નેતા તરીકે ધવલ નંદા, ઉપનેતા તરીકે કોર્પોરેટર રાહુલ બોરીચા તેમજ દંડક તરીકે સમજુબેન પારિયાની પણ વરણી

દેશ દેવી ન્યુઝ જામનગર તા ૦૩ જાન્યુઆરી ૨૨ જામનગર મહાનગરપાલિકા ના વિરોધ પક્ષના નેતા તરીકેની કોંગ્રેસ પાર્ટીમાં સમજૂતીથી રોટેશન નકકી કર્યું હતું. આજે આનંદભાઈ રાઠોડની મુદત પૂરી થઈ છે, અને કોર્પોરેટર ધવલભાઈ નંદાની વિપક્ષના નેતા તરીકે વરણી કરવામાં આવી છે. જામનગરના વોર્ડ નંબર 13 ના કોંગી કોર્પોરેટર ધવલ સુરેશભાઈ નંદાની આજે વિરોધ પક્ષના કાર્યાલયમાં વિપક્ષના નેતા તરીકે સર્વાનું મતે વરણી કરવામાં આવી હતી.આ ઉપરાંત ઉપનેતા તરીકે વોર્ડ નંબર 6 ના બ.સ.પાના. કોર્પોરેટર રાહુલભાઈ બોરીચા, જયારે દંડક તરીકે વોર્ડ નંબર -1 ના કોંગ્રેસ પાર્ટીના કોર્પોરેટર સમજુબેન દીપુભાઈ પારીયા ની પણ સર્વાનુમતે વરણી કરવામાં આવી હતી. ખંભાળિયા વિસ્તારના પૂર્વ કોંગી ધારાસભ્ય વિક્રમભાઈ માડમ, ઉપરાંત જામનગર શહેરના પ્રમુખ દીગુભા જાડેજા વગેરેની ઉપસ્થિતિમાં વિપક્ષી નેતા- ઉપનેતા અને દંડક તરીકેની વરણી કરવામાં આવી હતી, આ વેળાએ અન્ય વિપક્ષી કોર્પોરેટરો હાજર રહ્યા હતા, અને સર્વેએ ત્રણેય નવ નિયુક્ત હોદ્દેદારોનું ફૂલહાર કરીને સન્માન કરવામાં આવ્યું હતું.