જામનગરના ગુલાબનગર વિસ્તારમાં યુવાનને જાનથી મારી નાખવાની ધમકી : લુખ્ખા તત્વોના ત્રાસથી ચોકીદારે ‘ઓલ આઉટ’ ગટગટાવ્યું

• હાજી શેરમામદ દોદાણી અગાઉ ગુલાબનગરમાં બાંધકામનું સુટીંગ કરવા ગયો હતો ત્યારે પણ બાંધકામ કરતા આસામીએ તેને લમધાર્યો હતો.

દેશ દેવી ન્યુઝ જામનગર: તા. o૪ માર્ચ ૨૩ જામનગરના ગુલાબનગર રવિ પાર્ક વિસ્તારમાં રહેતાં અને સંજયભાઈ પ્રજાપતિ નામના બિલ્ડરને ત્યાં ચોકીદારી કરતાં અબ્દુલભાઈ જોખીયા નામના યુવાન તેના ઘરે મચ્છર મારવાનું ઓલઆઉટ પી જતા સારવાર માટે હોસ્પિટલમાં ખસેડવામાં આવ્યો હતો. જ્યાં આ અંગેની જાણ થતા પીએસઆઈ એસ.વી. સામાણી તથા સ્ટાફને ચોકીદાર અબ્દુલભાઈએ આપેલા નિવેદનમાં જણાવ્યું હતું કે, ‘’હાજી શેરમામદ દોદાણી ‘ નામનો શખ્સ બિલ્ડર સંજયભાઈ પ્રજાપતિ વિરૂધ્ધ મહાનગરપાલિકા અને કલેકટર ઓફિસમાં બાંધકામ બાબતની ખોટી અરજી કરતો હતો અને બિલ્ડરને ત્યાં ચોકીદાર તરીકે ફરજ બજાવતા અબ્દુલભાઈને નોકરી મૂકી દેવાનું જણાવતા તેણે નોકરી મૂકવાની ”ના” પાડતા હાજી દોદાણીએ  ચોકીદારને અપશબ્દો બોલી મારી નાખવાની ધમકી આપી હતી.

જેના કારણે મનમાં ખોટું લાગી આવતા ચોકીદાર અબ્દુલએ મચ્છર મારવાનું ઓલઆઉટ પી ગયો હોવાનું જણાવ્યું હતું.’ જેના આધારે પોલીસે હાજી દોદાણી વિરૂધ્ધ ગુનો નોંધી તપાસ આરંભી હતી.ઉલ્લેખનીય છે કે હાજી શેરમામદ દોદાણીએ અગાઉ પાંચ મહિના પહેલા ગુલાબનગર વિસ્તારમાં બાંધકામ સાઇટનું શૂટિંગ કરવા જતા બિલ્ડરે લમધાર્યો હોવાનું પણ માલુમ પડેલ છે.

લોઠીયા થી માનતા ઉતારવા પગપાળા જતા યુવાનને વાહને હડફેટે લેતા કરૂણ મોત

જામનગર: લાલપુર તાલુકાના લોઠીયા ગામથી મામાદેવના મંદિરે દર્શન કરવાં યુવાન તેની બહેન અને તેના પુત્ર સાથે ચાલીને જતો હતો. તે દરમિયાન પૂરઝડપે બેફીકરાઇથી આવતા પીકઅપ વાહને યુવાનને ઠોકર મારી હડફેટે લેતા અકસ્માતમાં ગંભીર ઈજા પહોંચતા યુવાનનું મોત નિપજ્યું હતું. અકસ્માત બાદ ચાલક વાહન લઇ નાશી ગયો હતો.

અકસ્માતના બનાવની વિગત મુજબ, લાલપુર તાલુકાના લોઠીયા ગામમાં રહેતાં વિરમભાઈ ચનાભાઈ વાઘેલા (ઉ.વ.35) નામનો યુવાન ગત મંગળવારે રાત્રિના સમયે તેના પુત્ર અને તેની બહેન સાથે ચાલીને મામાદેવના મંદિરે માનતા પૂરી કરવા જતા હતાં તે દરમિયાન લાલપુરથી થોડે દૂર પહોંચ્યા ત્યારે પાછળથી પૂરઝડપે બેફીકરાઈથી આવતા સફેદ કલરના પીકઅપ વાહનના ચાલકે યુવાનને હડફેટે લેતા અકસ્માતમાં શરીરે અને માથામાં ગંભીર ઈજા પહોંચી હતી. અકસ્માત બાદ વાહન ચાલક નાશી ગયો હતો. ત્યારબાદ ગંભીર ઈજાગ્રસ્ત વિરમભાઈનું મોત નિપજ્યું હતું. આ બનાવ અંગેની જાણ થતા પોલીસે ઘટનાસ્થળે પહોંચી જઇ મૃતદેહનો કબ્જો સંભાળી મૃતકના પિતરાઇ કૈલાશભાઈના નિવેદનના આધારે વાહનચાલક વિરૂધ્ધ ગુનો નોંધી શોધખોળ આરંભી હતી.

જામનગર નાગેશ્વરમાં વેપારીને જાનથી મારી નાખવાની ધમકી: માં દિકરા સહિત ૩ સામે ફરીયાદ

• વેપારીની ઓરડી ખાખાખોરા કરતા અટકાવતા માં દિકરો ટુટી પડ્યા

દેશ દેવી ન્યુઝ જામનગર તા.૦૩ માર્ચ ૨૩ જામનગરમાં લુખ્ખા તત્વો બેફામ બન્યા હોય તેમ ગઇકાલે સાંજે નાગેશ્વર વિસ્તારમાં વેપારીને મુઢમાર મારી જાનથી મારી નાખવાની ધમકી આપતા ભારે ચકચાર જાગી છે. જેને લઈ વેપારીઓમાં ભારે રોષ ફાટી નીકળ્યો છે.બનાવની વિગત મુજબ નાગેશ્વર વિસ્તારમાં ખેતાણી ટાઇલ્સ નામથી દુકાન ધરાવતા હરીશભાઈ ખેતાણી નામના વેપારી ઉપર સામાન્ય બાબતે માં દીકરો સહિત ત્રણ શખ્સોએ ઢીકાપાટુનો મુંઢ મારી જાનથી મારી નાખવાની ધમકી આપતા ભારે ચકચાર મચી જવા પામી છે.

જામનગરના જોગસપાર્ક વિસ્તારમાં રહેતા અને નાગેશ્વર પાસે ખેતાણી ટાઇલ્સ નામની દુકાન ધરાવતા હરીશભાઈ ખેતાણી ગઇકાલ સાંજે સાડા ચાર વાગ્યાના અરસામાં નાગેશ્વર ખાતે વિજય ટાઇલ્સ કારખાના પાસે આવેલ પોતાના માલીકીની ઓરડીમાં કામ માટે ગયા હતા ત્યા ચિરાગ ડોસાણીયા અને અન્ય અજાણ્યો શખ્સ વેપારીની ઓરડીમાંથી બહાર નીકળતા જોઈ બંન્ને ટપારતા બંને ઉશ્કેરાઈ જઈ મનફાવે તેવી ભુંડી ગાળો ભાંડી બોલાચાલી કરવા લાગ્યા હતા અને વેપારીને અજાણ્યા શખ્સે પકડી રાખી ચિરાગે તેની માતાને બોલાવી એકસંપ થઇ વેપારીને ઢીંકાપાટુનો બેફામ મુંઢ માર મારી કાનના ભાગે ઇજા પહોંચાડતા તાત્કાલિક હોસ્પિટલ ખાતે ખસેડવામાં આવ્યા હતા બનાવની જાણના પગલે ભાજપના કોર્પોરેટર આશિષ જોશી તથા વેપારીઓ હોસ્પિટલ ખાતે દોડી ગયા હતા લુખ્ખા તત્વો દ્વારા વેપારીને બેફામ માર મારવાના ધેરા પ્રત્યાઘાત પડયા હતા અને વેપારીઓમાં રોષ ફાટી નીકળ્યો હતોબનાવના પગલે સીટી-બી ડિવિઝનના PSI વાઢેર તથા સ્ટાફ પોલીસ હોસ્પિટલ દોડી જઈ હરીશભાઈ ખેતાણીની ફરિયાદ પરથી મુક્તાબેન પ્રવિણભાઈ ડોસાણીયા તેનો દિકરો ચિરાગ ડોસાણીયા તથા એક અજાણ્યા શખ્સ વિરૂદ્ધ IPC કલમ- ૩૨૩,૫૦૪,૫૦૬(૨),૧૧૪ મુજબ ગુનો નોંધી ધરપકડના ચક્રો ગતિમાન કર્યા છે.

જામનગરના નદીપા વિસ્તારમાંથી ક્રિકેટનો સટ્ટો રમતા બે ઝડપાયા, કપાત કરનારનું નામ ખુલ્યુ

• સીટી – એ “D”સ્ટાફના PSI ભગીરથસિંહ વાળા તથા સ્ટાફના રવિરાજર્સિહ જાડેજા, વિક્રમસિંહ જાડેજા તથા વિરેન્દ્રસિંહ જાડેજાની માહિતી
• કપાત લેતો ચાંદી બજારનો કુખ્યાત તુષાર ઉર્ફે રૂપેશ વાણીયાને ફરારી જાહેર

દેશ દેવી ન્યુઝ જામનગર: તા.૦૨ માર્ચ ૨૩ જામનગરમાં નદીપા વિસ્તારમાંથી એક વેપારી સહિત બે શખ્સોને જાહેરમાં મોબાઈલ ફોન મારફતે ક્રિકેટનો સટ્ટો રમવા અંગે પોલીસે પકડી પડ્યા છે, જ્યારે તેઓની સાથે ક્રિકેટના સોદાની કપાત કરનાર અન્ય એક આરોપીને ફરારી જાહેર કરાયો છે. જામનગર ના સીટી એ. ડિવિઝનના પોલીસ સ્ટાફને ચોક્કસ બાતની મળી હતી કે જામનગરના નદીપા વિસ્તારમાં બે શખ્સો જાહેરમાં ઊભા રહીને મોબાઈલ ફોન ની એપ્લિકેશન મારફતે પાકિસ્તાનમાં રમાઈ રહેલી ક્રિકેટ મેચ પર સટ્ટો રમી રહ્યા છે, તે બાતમીના આધારે પોલીસે દરોડો પાડ્યો હતો, અને જસ્મીન હેમતલાલ સીમરીયા નામના એક વેપારી ઉપરાંત લુહારી કામ કરતા રમેશ મગનલાલ મકવાણાને ઝડપી લીધા હતા, અને તેઓ પાસેથી બે મોબાઈલ ફોન, ઉપરાંત ક્રિકેટના સટ્ટા ને લગતું સાહિત્ય વગેરે મળી રૂપિયા 21,400 ની માલમતા કબજે કરી હતી.

પોલીસની પૂછપરચ દરમિયાન તેઓ જામનગરના ચાંદી બજાર વિસ્તારમાં રહેતા તુષાર ઉર્ફે રૂપેશ વાણીયા પાસે ક્રિકેટના સોદાની કપાત કરતા હોવાથી તેને ફરારી જાહેર કરી શોધખોળ હાથ ધરવામાં આવી છે.

જામનગરમાં મસિતીયાના યુવાન ઉપર ૬ શખ્સોનો જીવલેણ હુમલો : સામાવાળાએ તોડફોડની વળતી ફરિયાદ નોંધાવી

• પૈસાની લેતી-દેતી કારણભૂત : સામસામી ફરીયાદ
• સુન્ની મુસ્લિમ જમાતના પ્રમુખે ઓફિસ તથા કારમાં તોડફોડની ૪ સામે નોંધાવી ફરિયાદ

આરોપી : (૧) આરીફ જુમાભાઈ ખફી (૨) અસરફ જુમાભાઈ ખફી (૩) ફીરોજ ઉર્ફે ટીટી નશરૂદીન ખફી (૪) રફીક નશરૂદીન ખફી (૫) અફઝલ બંટી રહે. બધા જામનગર (૬) એક અજાણ્યો માણસ

આરોપી:- (૧) અયુબ દોસમામદ (૨) હાજી અયુબ (૩) હાજી ખફી રહે મસીતીયા (૪) શીવો

દેશ દેવી ન્યુઝ તા. ૦૨ માર્ચ ૨૩ જામનગરમાં મોરકંડા પાસે જૂની અદાવતનો ખાર રાખી હાજીભાઈ હમીરભાઇ ખફી નામના યુવાન ઉપર ૬ શખ્સો તલવાર, ધોકા પાઇપ જેવા તિક્ષણ હથીયારો સાથે ટુટી પડતા નાસભાગ મચી ગઈ હતી અને હાજી ખફીને લોહીલુહાણ હાલતમાં જી.જી હોસ્પિટલ ખસેડાયો હતો જેને લઇ ભાર ચકચાર મચી જવા પામી હતી

પોલિસ સુત્રમાંથી જાણવા મળતી માહિતી મુજબ ગઇકાલ રાત્રે પૈસાની લેતી-દેતી મામલે મસીતીયા ગામના હાજી ખફી નામના યુવક ઉપર આરીફ ખફી અને અશરફ સહિતના ૬ શખ્સોએ જીવલેણ હુમલો કર્યો હતો

ફરીયાદી હાજી ખફી તથા આરીફ જુમાભાઈ ખફીને પાંચેક મહીના પહેલા રૂપીયાની લેતી દેતી હતી તે હીસાબ પુરો થઈ ગયેલ તેમ છતા વધુ રૂપીયા આપવાની ઉઘરાણી કરી ઉપરોક્ત તમામ આરોપીઓ એકસંપ થઈ બે કારમા આવી ગે.કા. મંડળી રચી હાથમા પ્રાણધાતક હથિયારો ધારણ કરી અને આરોપી આરીફ તથા અશરફએ હાથમા તલવાર તથા ફીરોજ ઉર્ફે ટીટી નશરૂદીન ખફીએ તથા તેના ભાઈ રફીક નશરૂદીન ખફીએ હાથમા પાઈપ તથા અફઝલ બંટી તથા અજાણ્યા માણસએ હાથમા લાકડાની હોકીઓ લઈ આવી ફરીયાદી હાજીને માર મારી જમણા હાથ તથા પગમા ફેકચર તથા જમણા હાથના આગળામા તથા ગાલ ઉપર ઈજાઓ કરી તથા શરીરે મુંઢ ઈજાઓ કરી ભુડી ગાળો આપી ફરીયાદીને જાનથી મારી નાખવાની ધમકી આપી,ફરીયાદીની કારમા નુકસાન કરી ભાગી છૂટ્યા હતા

બીજી બાજુ મસીતીયાના હાજીભાઈ હમીરભાઇ ખફી સહિત ચાર શખ્સોએ આરીફ ખફીની ઓફિસ તથા કારમાં તોડફોડ કર્યાંની સીટી-એ ડિવિજન પોલીસ મથકમાં ફરીયાદ નોંધાતા પોલીસે બંનેની સામસામી ફરિયાદ નોંધી આગળની તપાસ આરંભી છે.

આથી પંચ-બી પોલીસે IPC કલમ -૩૨૫ ,૩૨૪ ,૩૨૩, ૫૦૬ (૨), ૧૪૩, ૧૪૭, ૧૪૮, ૧૪૯,૨૯૪(ખ), ૪૨૭ તથા જી.પી.એક્ટ કલમ-૧૩૫(૧) મુજબ રાયોટિંગ સહિતની કલમ હેઠળ ગુનોં નોંધી આગળની કાર્યવાહી PSI એમ.બી મોરી તથા સ્ટાફના ધમભા ઝાલા, મહાવિરર્સિહ જાડેજા તથા નિર્મળર્સિહ જાડેજા ચલાવી રહ્યા છે.

જામનગરના વાલ્મિકીવાસમાં અસમાજીક અને માથાભારે શખ્સોના ત્રાસ સામે સ્થાનિકોનો હલ્લાબોલ

• સામૂહિક રજૂઆત પછી પોલીસ એકશનમાં આવી એકની અટકાયત કરી

દેશ દેવી ન્યુઝ જામનગર તા.૨૮ ફેબ્રુઆરી ૨૩ જામનગરના વાલ્મિકી વાસ મહાવીર નગર વિસ્તારમાં રહેતી 15 વર્ષની તરુણી નું તાજેતરમાં અપહરણ થયું હતું, અને મુસ્લિમ શખ્સ તરુણીને ભગાડી ગયો હતો, જે સમગ્ર મામલો સીટી એ. ડિવિઝન પોલીસ મથકે પહોંચ્યા પછી પોલીસની હાજરીમાં સમાધાન થયું હતું, પરંતુ ફિરોજ નામનો મુસ્લિમ શખ્સ ઉશ્કેરાયો હતો અને ગઈકાલે મોડી સાંજે મહાવીર નગર વાલ્મીકિવાસમાં આવ્યો હતો અને સગીરાના પરિવારને ધમકીઓ ઉચ્ચારી હતી, અને બધાને પતાવી દેવાની ધમકી આપતાં વાતાવરણ તંગ બન્યું હતું.

આ ઘટનાના ઘેરા પ્રત્યાઘાતો પડ્યા હતા, અને મોડી રાત્રે વાલ્મિકી સમાજનું ટોળું એકત્ર થયું હતું, અને મહાવીર નગર પેટા પંચાયત વાલ્મિકી સમાજના પ્રમુખ કાંતિભાઈ પાટડીયાની આગેવાનીમાં જિલ્લા પોલીસવડાને એક અરજી આપી આરોપી સામે તાત્કાલિક અટકાયત કરવા માંગણી કરી હતી.
ઉપરાંત સીટી એ. ડિવિઝનના પી.આઇ. એમ.બી. ગજ્જર સમક્ષ પણ ઉગ્ર રજૂઆત કરી આરોપીને રાત્રિ ભર માં પકડી લઈ તેની સામે પગલા ભરવાની માંગણી કરી હતી.પોલીસ તંત્ર દ્વારા કડક પગલાની હૈયા ધારણા અપાતાં આખરે મામલો થાળે પડ્યો હતો. આગામી દિવસોમાં આવા તત્વો સામે યોગ્ય કાર્યવાહી નહીં થાય, તો સમગ્ર વાલ્મિકી સમાજ વધુ ઉગ્ર બનશે તેવી ચીમકી પણ અપાઇ હતી. એક તરુણીના અપહરણ પછી મુસ્લિમ શખ્સ દ્વારા ગઈ કાલે મોડી સાંજે આવીને ધમાચકડી મચાવી હતી . આ મામલો પોલીસ તકે લઈ જવાયા પછી પોલીસે આરોપી સામે ગુનો નોંધ્યો છે, અને અટકાયત કરી લીધી છે.

જામનગરના નીલકંઠ નગર વિસ્તારમાં રહેતો ફિરોજ ઊર્ફે ફિરીયો આમદ ભાઈ ખીરા, કે જે ગઈકાલે મહાવીરનગર માં જઈને એક દંપતિને ખખડાવ્યા હતો, અને સમગ્ર પરિવારને પતાવી દેવાની ધમકી ઉચ્ચારતો હતો. તેમ જ જાતિ પ્રત્યે અપમાનજનક શબ્દો પણ ઉચ્ચાર્યા હતા, જે મામલો સિટી એ. ડિવિઝન પોલીસમથકે લઇ જવાયો હતો, અને રેલી સ્વરૂપે દરબારગઢ સર્કલમાં પહોંચી જઈ પીઆઈ એમ બી. ગજ્જરની સમક્ષ રજૂઆત કરી હતી.
પોલીસે આરોપી ફિરોજ ખીરા સામે ધાક ધમકી અને એસ્ટ્રોસિટી એક્ટની કલમો હેઠળ ગુનો નોંધ્યો છે અને આરોપીને અટકાયતમાં લઈ લીધો છે.

સ્વાસ્થય પ્રેમી ચોર: દુકાનમાંથી કાજુ-બદામ-રોકડની ચોરી: ભારે કરી

• ગોકુલનગરનો બનાવ : કાજુ-બદામ તથા રૂપિયા દસ હજાર ઉઠાવી ગયા

દેશ દેવી ન્યુઝ જામનગર: તા.૨૭ ફેબ્રુઆરી ૨૩ જામનગરના ગેાકુલનગર રડાર રોડ સામે આવેલી બારાડી ટ્રેડર્સ નામની કરીયાણાની હોલસેલ દુકાનમાં રાત્રીના સમયે કોઇ અજાણ્યો તસ્કર દુકાનમાં ઘુસી તેમાં રાખેલા રૂા. 10 રોકડ તથા રૂા. 5200 ની કિમતના કાજુ-બદામ ચોરી કરી લઇ જતાં કલાભાઇ સામજીભાઇ નકુમે અજાણ્યા તસ્કર વિરૂઘ્ધ સીટી-સી ડીવી.માં પોલીસ ફરિયાદ નોંધાવતા પોલીસે ગુનો નોંધી તસ્કરોની શોધખોળ હાથ ધરી છે.

બનાવ બાદ પોલીસે આ વિસ્તારમાં રહેલા તમામ સીસી ટીવી કેમેરા પણ ચેક કરવામાં લાગી ગઇ છે જેથી તસ્કરોનો ભાળ મળી શકે. ચોરી રાત્રીના સાડાદશથી સવારના આઠ વાગ્યા દરમિયાન થઇ છે. જેને લઇને પોલીસ તપાસમાં લાગી ગઇ છે, ચોરીના બનાવ અંગે હેડ કોન્સટેબલ એસ.એમ. સીસોદીયા તપાસ ચલાવી રહયા છે. બનાવે શહેરમાં ચકચાર જગાવી છે.

જામનગરના રામપર ગામમાં એક સાથે ત્રણ મંદિરના તાળા તૂટ્યા રાત્રિના સમયે તસ્કરો મંદિરમાંથી લાખોના દાગી તથા રોકડ લઈ ફરાર

• રામપર ગામમાં તસ્કરો ત્રાટક્યા ત્રણ મંદિરને નિશાન બનાવી લાખોના દાગીના ઉઠાવી ગયા
• Live ચોરીની સમગ્ર ઘટના મંદિરમાં લાગેલ CCTV કેમેરામાં કેદ

દેશ દેવી ન્યુઝ જામનગર તા.૨૭ ફેબ્રુઆરી ૨૩ જામનગર નજીકના રામપર ગામમાં એક સાથે ત્રણ મંદિરમાં તસ્કરો ત્રાટકતા મંદિરમાંથીસોના ચાંદીના છત્તર હાર સહિત અંદાજે ત્રણ લાખની ચોરી કરી ગયા હોવાના CCTV સામ આવતા ભારે ખળભળાટ મચી ગયો હતો

રામ પર ગામમાં આવેલ હરસિદ્ધ માતાના મંદિર, મચ્છુ માતા સહિતના ત્રણ મંદિરમાં તસ્કરો ત્રાટક્યા હતા અને લાખોના સોના-ચાંદીના દાગીના લઇને ફરાર થઈ જતા પોલિસને ખુલ્લો પડકાર ફેંક્યો હતો.

બનાવની જાણ થતા LCB તથા પંચકોશી-બી ડિવિઝન પોલીસનો કાફલો ઘટના સ્થળે દોડી ગયો હતો મંદિરમાં ચોરીના પગલે ગ્રામજનોમાં રોષ ફાટી નીકળ્યો હતો તેવામાં મંદિરની ચોરી CCTV કમરામાં કેદ થતા પોલીસે તે દિશામાં તપાસના ચક્રો ગતિમાન કર્યા છે.