જામનગર પંથકમાંથી પસાર થતા ટેન્કરોમાંથી પેટ્રોલ- ડીઝલ ચોરવાનું કારસ્તાન પકડાયું: 69 લાખની માલમત્તા કબ્જે

• ખંભાળિયા ધોરીમાર્ગ પર ઝાખર ગામના શખ્સ દ્વારા ચલાવતા કૌભાંડમાં બે શખ્સોની અટકાયત
• પેટ્રોલ- ડીઝલ ભરેલા બે ટેન્કર- 8 કેરબા સહિત રૂપિયા 69 લાખની માલમત્તા કબજે:
• જાખર ગામના મૂખ્ય સૂત્રધારની એસ.ઓ.જી. દ્વારા શોધખોળ
• SOG ના PSI જયદિપર્સિહ પરમાર તથા સ્ટાફના વિરેન્દ્રર્સિહ જાડેજા, અનિરૂદ્ધ સિંહ ઝાલા તથા ચંન્દ્રર્સિહની બાતમી

દેશ દેવી ન્યુઝ જામનગર તા ૧૬ ઓગસ્ટ ૨૨જામનગરની એસ. ઓ. જી. શાખાની ટીમ દ્વારા ગેસભરેલા ટેન્કરોમાંથી જાહેર જનતાના જીવને જોખમમાં મૂકીને ગેરકાયદે રીતે ગેસની ચોરી પછી હવે પેટ્રોલ- ડીઝલની ચોરી કરવાનું વધુ એક નેટવર્ક પકડી પાડ્યું છે. -જામનગર- ખંભાળિયા ધોરી માર્ગ પર જાખર ગામના પાટિયા નજીક લાલપુર તાલુકા ના જાખર ગામના એક શખ્સ દ્વારા ચલાવતા રેકેટનો પર્દાફાશ કરી પેટ્રોલ-ડીઝલ ભરેલા બે ટેન્કરો, આઠ નંગ પેટ્રોલ-ડીઝલના પ્રવાહી ભરેલા બેરલો સહિત રૂપિયા 69 લાખની માલમતા કબજે કરી લઈ બે શખ્સો ની અટકાય કરી છે, ઉપરાંત મુખ્ય સૂત્રધારને ફરારી જાહેર કરી તેની શોધ ખોળ હાથ ધરી છે.

જામનગરની એસ.ઓ.જી. શાખા ની ટીમે તાજેતરમાં ખીજડીયા બાયપાસ નજીકના વિસ્તારમાંથી એલ.પી.જી. ભરેલા ટેન્કરના ડ્રાઇવરો ને ફોડીને તેમાંથી એલ.પી.જી.ની ચોરી કરી લોકોના જીવને જોખમમાં મુકવાનું કારસ્તાન પકડી પાડ્યું હતું, અને પાંચ શખ્સોની અટકાયત કરી હતી. જે પ્રકરણમાં બે મુખ્ય સૂત્રધાર હજુ ફરાર છે, જેને એસ.ઓ.જી. ની ટીમ શોધી રહી છે.

દરમિયાન જામનગર -ખંભાળિયા ધોરી માર્ગ પર લાલપુર તાલુકાના ઝાખર ગામના અજીતસિંહ જાડેજા નામના શખ્સ દ્વારા આવું જ પેટ્રોલ-ડીઝલ ચોરીનું નેટવર્ક ચલાવવામાં આવી રહ્યું છે, તેવી બાતમી ના આધારે ગઈકાલે જાખર ગામના પાટીયા નજીક એક પતરાના શેડની બાજુમાં દરોડો પાડ્યો હતો. જે દરોડો દરમિયાન ઉપરોક્ત સ્થળેથી પેટ્રોલ- ડીઝલ ભરેલા જુદાજુદા બે ટેન્કરોને ઉભા રાખીને તેમાંથી ગેરકાયદે રીતે પેટ્રોલ-ડીઝલની ચોરી કરવાનું કારસ્તાન પકડી પાડ્યું હતું. ઉપરોક્ત સ્થળે થી બે નંગ પેટ્રોલ ડીઝલ ભરેલા ટેન્કરો ઉપરાંત તેમાંથી ચોરી કરીને પેટ્રોલ- ડીઝલ ભરવામાં આવેલા આઠ નંગ કેરબા તથા તેને લગતી જુદી જુદી સામગ્રી સહિત રૂપિયાના 69’06,432 ની માલમતા કબજે કરી લીધી છે.

આ દરોડા સમયે લાલપુર તાલુકાના મિઠોઈ ગામના અજયસિંહ રાજેન્દ્રસિંહ ભાટી તેમજ રાજકોટના કોઠારીયા વિસ્તારમાં રહેતો કેતન ચંદુભાઈ ચાવડા નામના બે શખ્સો મળી આવ્યા હોવાથી તે બંનેની એસ.ઓ.જી.ની ટિમ દ્વારા અટકાયત કરી લેવામાં આવી છે, અને તેઓ સામે પોલીસ ફરિયાદ નોંધવા કાર્યવાહી હાથ ધરાઈ છે. આ પ્રકરણમાં મુખ્ય સુત્રધાર ઝાખર ગામનો અજીતસિંહ જાડેજા ભાગી છૂટ્યો હોવાથી પોલીસ દ્વારા તેને ફરારી જાહેર કરી શોધખોળ હાથ ધરવામાં આવી છે.

જામનગર- રાજકોટ હાઇવે થયો રકત્તરંજિત : કાર અને સ્કૂટર વચ્ચેના ગોઝારા અકસ્માતમાં પુત્રનું મોત, પિતા ઘાયલ

દેશ દેવી ન્યુઝ જામનગર: તા.૧૫ ઓગસ્ટ ૨૩ જામનગર ધ્રોલમાં રહેતા છગનભાઈ પરમાર (ઉંમર વર્ષ 75) કે જેઓને પોતાના ઘેર પેટમાં દુ:ખાવો ઉપડ્યો હોવાથી તેના પુત્ર ધીરજલાલ છગનભાઈ પરમાર (37) કે જે પોતાના સ્કૂટર પર વૃદ્ધ પિતાને બેસાડીને પોતાના ઘરેથી નીકળી ધ્રોળના દવાખાને જઈ રહ્યા હતા. જે દરમિયાન જામનગર-રાજકોટ ધોરી માર્ગ પર ધ્રોળ નજીક સોમવારે સાંજે પુરપાટ વેગે આવી રહેલી રાજકોટ પાસિંગની જીજે-3 ઇ.સી. 6322 નંબરની કારના ચાલકે જીજે-10 ડી.જી.8264 નંબરના સ્કૂટરને ઠોકર મારી દેતાં ગોઝારો અકસ્માત સર્જાયો હતો. જે અકસ્માતમાં સ્કૂટર સવાર ધીરજલાલ છગનભાઈ પરમાર નું ગંભીર ઈજા થવાના કારણે મૃત્યુ નીપજ્યું હતું. ભારે રક્ત સ્ત્રાવ થઈ જવાના કારણે તેનો ભોગ લેવાયો હતો.

આ ઉપરાંત તેમની સાથે જ પાછળ બેઠેલા તેઓના વૃદ્ધ પિતા છગનભાઈ પરમાર કે જે ગંભીર સ્વરૂપે ઘાયલ થયા હતા. જેઓને સૌ પ્રથમ 108 નંબરની એમ્બ્યુલન્સ મારફતે સારવાર માટે રાજકોટ ની હોસ્પિટલમાં ખસેડવામાં આવ્યા હતાં, જ્યાં તેઓની તબિયત લથડી હોવાથી વધુ સારવાર માટે અમદાવાદની સિવિલ હોસ્પિટલમાં ખસેડવામાં આવ્યા છે, અને તેઓની હાલત પણ ગંભીર ગણાવાઈ રહી છે. આ અકસ્માતના બનાવની જાણ થતાં ધ્રોલ પોલીસ સ્ટેશનનો સ્ટાફ ઘટના સ્થળે દોડી ગયો હતો, અને સમગ્ર અકસ્માત મામલે વધુ તપાસ હાથ ધરી છે. પોલીસે મૃતક ધીરજલાલ પરમાર ના પુત્ર રાહુલ પરમારની ફરિયાદના આધારે કારચાલક સામે ગુનો નોંધ્યો છે. કારચાલક અકસ્માત સર્જી કારને છોડીને ભાગી છૂટ્યો હોવાથી પોલીસ તેને શોધી રહી છે, જયારે મૃતદેહનો કબજો સંભાળી પોસ્ટમોર્ટમની કાર્યવાહી હાથ ધરી હતી.

દરેડની બેંકમાં મેનેજરની કરતૂત: મહિલાઓના બાથરૂમમાં લગાવ્યા ‘જાસુસી કેમેરા’

• પંજાબ નેશનલ બેંકના ઈન્ચાર્જ મેનેજર સામે નોંધાવાઇ ફરિયાદ
• મહિલાઓના બાથરૂમમાં લગાવ્યા ‘જાસુસી કેમેરા’ભાંડો ફૂટી ગયો

દેશ દેવી ન્યુઝ જામનગર તા.૧૫ ઓગસ્ટ ૨૩ : જામનગરના દરેડ જીઆઇડીસી વિસ્તારમાં મહાવીર સર્કલ પાસે આવેલી પંજાબ નેશનલ બેંક કે જેના લેડીઝ વોશરૂમમાં બેંકના જ ઇન્ચાર્જ મેનેજર અખિલેશ સૈની દ્વારા સ્પાય કેમેરા લગાવવામાં આવ્યા હોવાનું સામે આવ્યું છે. ગત 10 મી ઓગસ્ટના બપોરના આશરે એકાદ વાગ્યાના સમયે બેંકમાં જ ફરજ બજાવતા એક મહિલા કર્મચારી કે જેઓ વોશરૂમનો ઉપયોગ કરવા માટે ગયા હતા, દરમિયાન તેઓને દરવાજાની ઉપરની દિવાલ પર સ્પાઈ કેમેરો લગાવેલો હોવાનું ધ્યાનમાં આવ્યું હતું.

બેંકના મહિલા કર્મચારી અથવા અન્ય કોઈ મહિલાઓ વોશરૂમ નો ઉપયોગ કરે, તે દરમિયાન તેઓના ફોટો- વિડીયો બનાવવાના બધી ઈરાદા થી છુપી રીતે સ્પાઈ કેમેરો લગાવવામાં આવ્યો હોવાનું જાણવા મળ્યું હતું. જે અંગે તપાસ કરવામાં આવતાં બેંકના ઇન્ચાર્જ મેનેજર અખીલેશ સૈની દ્વારા જ આ કૃત્ય કરવામાં આવ્યું હોવાનું બેંકના મહિલા કર્મચારીને ધ્યાનમાં આવ્યું હોવાથી તેઓએ આ પ્રકરણ અંગ બેન્કના ઉચ્ચ અધિકારીઓને જાણકારી હતી, તેમ જ સમગ્ર મામલાને પંચકોશી બી. ડિવિઝન પોલીસ મથકમાં લઈ જવાયો હતો. જયાં બેંકના મહિલા કર્મચારી ની ફરિયાદના આધારે બેંકના ઇન્ચાર્જ મેનેજર અખિલેશ સૈની કે જે હાલ જામનગરના યમુનાનગર વિસ્તારમાં રહે છે, પરંતુ પોતે મૂળ હરિયાણા રાજ્યનો વતની છે, તેની સામે ફરિયાદ દાખલ કરવામાં આવી છે, અને તેની સામે આઇપીસી કલમ 354 (સી) મુજબ વધુ તપાસ ચલાવવામાં આવી રહી છે.

આ ફરિયાદ પછી પંચકોશીએ ડિવિઝન ના પી.એસ.આઇ.એમ.એમ ઓરી અને તેમના સ્ટાફ દ્વારા બેંકમાં પહોંચી જઈ સ્પાઈ કેમેરા વગેરે કબજે કરી લેવાયા છે, અને બેંકના લેડીઝ વોશરૂમના સ્થળનું પંચનામું કરાવ્યું છે. બેંક દ્વારા પણ ઇન્ચાર્જ મેનેજર સામે ખાતાકીય પગલાં ભરવામાં આવ્યા છે. આ બનાવને લઈને બેન્ક વર્તુળમાં ભારે ચકચાર જાગી છે.

મુખ્યમંત્રી કાર્યાલયનાં અધિકારી તરીકે ખોટી ઓળખ આપી પોલીસ સામે સીન સોપાટા ભારે પડ્યા

• જામનગર સાયબર ક્રાઇમ પોલીસે પકડેલા આરોપીને છોડી મૂકવા મુખ્યમંત્રી કાર્યાલયનાં અધિકારી તરીકે પોલીસને ફોન કરનાર નિકુંજ પટેલ અમદાવાદથી દબોચી લેવાયો
• ફ્રોડ કંપની ઉભી કરીને ઇન્વેસ્ટમેન્ટના નામે અંદાજે ૧૦૦ કરોડના ફ્રોડના ગુનાનો જામનગરની સાયબર ક્રાઈમ પોલીસે પર્દાફાસ કરી સુરતથી ગેંગના માસ્ટર માઇન્ડને ઝડપી લીધા હતો
• જામનગર એસપીને મુખ્યમંત્રી કાર્યાલયના અધિકારીની ખોટી ઓળખ આપીને આરોપીને છોડી મુકવા ભલામણ કરનાર શખસ સામે પોલીસે ગુનો નોંધીને અમદાવાદથી ધરપકડ કરી છે.

દેશ દેવી ન્યુઝ ૧૩ ઓગસ્ટ ૨૩ જામનગરના એક આસામી સાથે ૩.૯ લાખ ઉપરાંતના થયેલા ક્રોડમાં પોલીસે ગેંગનો પર્દાફાશ કર્યો છે અને ગુજરાત, મહારાષ્ટ્ર સહિત પાંચ રાજ્યોમાં ફ્રોડ કંપની ઉભી કરીને ઇન્વેસ્ટના નામે કરોડોનું ચીટીંગ કરતી ગેંગનો જામનગર સાયબર ક્રાઇમ પોલીસે પર્દાફામ કર્યાં છે અને ગેંગના માસ્ટર માઈન્ડ ધરાવતા ૨૩ વર્ષિય આમીર ઉર્ફે અરમાન અસલમ ગરાણાની સુરતથી ઝડપી લીધો છે અને ૬ દિવસના રીમાન્ડ પર લઈને પુછપરછ કરવામાં આવી રહીછે. આ દરમ્યાન ગત તા.૧૦ ના રોજ જામનગર એસ.પી.પ્રેમસુખ ડેલુના સરકારી નબર ઉપર વોટ્સએપ કોલ આવ્યો હતો. કોલ કરનારે મુખ્યમંત્રી કાર્યાલયના અધિકારી તરીકે ઓળખ આપીને પોતાનું નામ નિકુંજ પટેલ હોવાનું જાવ્યું હતું અને આરોપી આમીર ગરાણાને છોડી મુકવા અને તેની સાથે વાત કરાવવા માટે ભલામણ કરી હતી. જેથી એસ.પી.એ અમારે ત્યા આવી કોઈ આરોપી છે કે, કેમ તે તપાસ કરાવી લેવાની વાત કરી હતી.

જે બાદ જે નંબર ઉપરથી કોલ આવ્યો હતો. તે કોલના આધારે સી.એમ કાર્યાલયમાં તપાસ કરાવતા નિકુંજ પટેલ નામનો કોઇ અધિકારી ન હોવાનું જણાવ્યું હતું. જેથી જામનગર એલસીબીની ટીમ ત્વરીત હરકતમાં આવી ગઈ હતી અને તે નંબરના આધારે અમદાવાદથી નિકુંજ અરવિંદભાઈ પટેલને ઝડપી લીધો હતો. તેની સામે LCBના ASI ભરતભાઈ પટેલએ ફરિયાદ નોંધાવીને ધરપકડ કરીને આગળની કાર્યવાહી માટે સીટી- એ ડિવિઝનને સોંપી દીધો છે. આ બનાવથી પોલીસ બેડામાં ચકચાર જાગી છે.

ધ્રોલના નગરજનોમાં “મારી માટી મારો દેશ” અભિયાનને લઈ અનેરો થનગનાટ

• કાર્યક્રમ પૂર્વે ભવ્ય કળશ યાત્રા તથા તિરંગા યાત્રા સાથે વિશાળ રેલીનું કરાયું આયોજન;બહોળી સંખ્યામાં નગરજનો સહભાગી થયાં

દેશ દેની ન્યુઝ જામનગર તા.૧૩, ઓગસ્ટ, આગામી તા.૧૪ ઓગસ્ટના રોજ ધ્રોલ નગરપાલિકા વિસ્તારમાં “મારી માટી મારો દેશ” કાર્યક્રમની ઉજવણી થવાની છે.જે કાર્યક્રમ પૂર્વે જ નગરજનોમાં અનેરા ઉત્સાહની લાગણી જોવા મળી રહી છે.સમગ્ર ધ્રોલ શહેર જાણે રાષ્ટ્ર ભક્તિના રંગે રંગાયું હોય તેવો માહોલ જોવા મળી રહ્યો છે.કાર્યક્રમ પૂર્વે ધ્રોલના શહેરીજનો દ્વારા હર્ષોલ્લાસ સાથે શહેરના તમામ વોર્ડને આવરી લેતી કળશ યાત્રા તથા તિરંગા યાત્રાનું આયોજન કર્યું હતું જેમાં અબાલ વૃદ્ધ સૌ ઉત્સાહભેર સહભાગી થયાં હતાં.શાળાના વિદ્યાર્થીઓએ હાથમાં રાષ્ટ્રધ્વજ સાથે યોજેલ રેલી સૌ કોઈના આકર્ષણનું કેન્દ્ર બની હતી.જ્યારે સૌ શહેરીજનોએ કુમકુમ અને પુષ્પોથી શણગારેલ કળશ સાથેની યાત્રામાં સહભાગી થઈ પોતાની રાષ્ટ્રભાવના વ્યક્ત કરી હતી.

મુખ્યમંત્રી ભૂપેન્દ્ર પટેલનો રાજ્યના શહેરી વિસ્તારોમાં જન સુખાકારીનો મહત્વપૂર્ણ નિર્ણય

• શહેરી વિસ્તારના ધારાસભ્યોને શહેરી મત ક્ષેત્રોમાં માર્ગ મરામત-માર્ગ વિકાસના કામો માટે ૨૦૨૩-૨૪ ના વર્ષમાં ધારાસભ્ય દિઠ બે કરોડ રૂપિયાની ગ્રાન્ટ ફાળવાશે
• મુખ્યમંત્રી ભૂપેન્દ્ર પટેલે રાજ્યના શહેરી વિસ્તારોમાં માર્ગ-રોડ રસ્તાના કામો માટે શહેરી વિસ્તારના ધારાસભ્યોને રૂ. બે કરોડની ગ્રાન્ટ ફાળવવાનો નિર્ણય કર્યો છે.

દેશ દેવી ન્યુઝ જામનગર તા.૧૩ ઓગસ્ટ ૨૩ રાજ્યના શહેરી મત વિસ્તારોનું પ્રતિનિધિત્વ કરતાં ધારાસભ્યો પોતાના વિસ્તારમાં આ ગ્રાન્ટમાંથી માર્ગ મરામત અને માર્ગ વિકાસના કામો હાથ ધરી શકે તે હેતુસર ધારાસભ્ય દિઠ રૂ. બે કરોડની ગ્રાન્ટ ૨૦૨૩ -૨૪ ના વર્ષ માટે માર્ગ-મકાન વિભાગમાંથી ફાળવવામાં આવશે.

મુખ્યમંત્રી સમક્ષ કરવામાં આવેલી દરખાસ્તનો સકારાત્મક પ્રતિભાવ આપતાં  ભૂપેન્દ્ર પટેલે આ જન સુવિધાલક્ષી નિર્ણય કર્યો છે.આ નિર્ણયથી શહેરી ક્ષેત્રોનાં માર્ગોનું નેટવર્ક વધુ સુગ્રથિત અને સુદ્રઢ બનશે.

જામનગના ધરારનગરમાં માતા-પુત્રી ઉપર ધોકા વડે હુમલો

• ઝઘડો કરવાની ના પાડતા ઉશ્કેરાયેલા શખ્સે માતા પુત્રીને બેફામ માર માર્યો

દેશ દેવી ન્યુઝ જામનગર તા.૧૨ ઓગસ્ટ ૨૩: જામનગરના ધરારનગરમાં દંપતિને બોલાચાલી કરવાની ના પાડતા ઉશ્કેરાયેલા શખ્સે ધોકા વડે માતા-પુત્રીને માર માર્યો હતો જે અંગે ધરારનગરના એક શખ્સ સામે ફરીયાદ દાખલ કરવામાં આવી હતી.

જામનગરના ધરારનગર-૨ ખાતે રહેતી રઝીયાબેન નુરમામદ લોરુ (ઉ.વ.૨૪) નામની યુવતિએ ગઇકાલે સીટી-બીમાં ધરારનગર-2માં રહેતા અકબર સલીમ ખુરેશીની વિરુઘ્ધ ફરીયાદ નોંધાવી હતી. ફરીયાદી પોતાના માતાના ઘરે રીસામણે આવેલ હોય, દરમ્યાન તા. ૧૦ ના રોજ આરોપી અકબર તથા તેની પત્ની સાયરા બંને બોલાચાલી કરતા હતા, આ વેળાએ ફરીયાદી તથા સાહેદ નુરીબેન બંનેને ઝઘડો કરવાની ના પાડી હતી આથી આરોપી અકબરે ઉશ્કેરાઇને રઝીયાબેન તથા તેના માતાને અપશબ્દો કહી ધોકા વડે ફરીયાદીને પગમાં માર મારી નીચે પાડી દીધી હતી તેમજ નુરીબેનને ધોકા વડે વાંસા અને પગમાં ઘા ઝીંકી મુંઢ ઇજાઓ પહોચાડી હતી.

જામનગર: મોબાઇલ એપથી રોકાણકારો સાથે છેતરપીંડી આચરતા શખસની સુરતથી ધરપકડ

• ઉંચુ વળતર આપવાની લાલચ આપી એપ્લિકેશન બનાવી રોકાણકારો પાસેથી નાણા ખંખેરતી ગેંગના મુખ્ય સૂત્રધારને જામનગર સાયબર ક્રાઇમે દબોચી લીધો

દેશ દેવી ન્યુઝ જામનગર તા.૧ર ઓગસ્ટ ૨૩ : જામનગર શહેરમાં રહેતાં ઉચ્ચ શિક્ષિત યુવાનને ફોરેક્સ કંપનીના કર્મચારી તરીકે ખોટી ઓળખ આપી તેઓની કંપની ઓટો ટ્રેડિંગ સિસ્ટમ તરીકે કામ કરે છે. આ કંપનીમાં ઇન્વેસ્ટ કરનારને સમય કાઢયા વગર ફકત પૈસા ઇન્વેસ્ટ કરવાથી કંપની ફોરેકસમાં ઇન્વેસ્ટ કરે છે. જેના કારણે રોકાણકારને દરરોજ 4 થી 5 ટકાનું ઉંચુ રિટર્ન મળે છે. આમ, વિશ્ર્વાસમાં લઇ યુવાનને ફોરેકસ કરન્સીમાં ઇન્વેસ્ટ કરવાના બહાને ખાતુ ખોલાવી કટકે-કટકે બે એકાઉન્ટમાંથી રૂા. 9,19,125 ની રકમ ઓનલાઇન ટ્રાન્સફર કરાવી પડાવી લીધી હતી.

આ સાયબર ક્રાઇમ અંગે ભોગ બનનાર યુવાને જામનગર સાયબર ક્રાઇમ બ્રાન્ચમાં ફરિયાદ નોંધાવી હતી. જેના આધારે પોલીસ અધિક્ષક પ્રેમસુખ ડેલુની સૂચનાથી ડીવાયએસપી જે.એન. ઝાલાના માર્ગદર્શન હેઠળ પીઆઇ તથા સ્ટાફના જેસાભાઇ ડાંગરના એનાલિસિસના આધારે હેકો પ્રણવ વસરા, પોકો કારુભાઇ વસરા, જેસાભાઇ ડાંગર સહિતના સ્ટાફે તપાસ આરંભી હતી.

સાયબર ક્રાઇમ પોલીસ દ્વારા દોઢ વર્ષના ટેકનિકલ એનાલિસીસ અને તપાસના અંતે વિવિધ માહિતીઓ એકત્રિત કરી ખરાઇ કર્યા બાદ આ છેતરપીંડીનો મુખ્ય સૂત્રધાર સુરતમાં હોવાની બાતમીના આધારે સાયબર ક્રાઇમ પોલીસ સ્ટાફે રેઇડ દરમિયાન સુરતના રાંદેરમાં જેનાબ હોસ્પિટલની બાજુમાં 604, અમઝા એપાર્ટમેન્ટમાં રહેતા આમિર ઉર્ફે અરમાન અસલમ ગરાણા નામના શખ્સને ઝડપી લીધો હતો. જામનગર લઇ આવી પૂછપરછ હાથ ધરાતાં આ ગેંગ દ્વારા ફોરેન કરન્સીમાં રોકાણના નામે લોકોને છેતરતાં હોવાનું ખુલ્યું હતું. તેમજ ગેંગ દ્વારા ગેરકાયદેસર કોલ સેન્ટર ઉભું કરી વોટ્સએપ તથા ફોન પર ફોરેન કરન્સી કંપનીના કર્મચારી તરીકે ઓળખ આપી રોકાણકારોને ભોળવી, વિશ્ર્વાસમાં લઇ ઉંચા વળતરની લાલચ આપી નાણા ખંખેરતાં હતાં. તેમજ રોકાણકારોને ફેક ઇન્વેસ્ટમેન્ટની થર્ડ પાર્ટી એનરોઇડ એપ્લિકેશન ડાઉનલોડ કરાવી તેમાં એકાઉન્ટ બનાવી વિશ્ર્વાસમાં લેતાં હતાં. ત્યારબાદ રોકાણકારોને પૈસા ટ્રાન્સફર કરાવી ફેક એપ્લિકેશનમાં બનાવેલા એકાઉન્ટમાં એક-બે દિવસમાં જ ખોટો પ્રોફિટ દેખાડી ઓટો ટ્રેડિંગ પર કામ કરે છે. તેવું દર્શાવતાં હતાં. ઉપરાંત રોકાણકારોને પ્રોફિટ બતાવી નાની-નાની રકમ વિડ્રો કરાવી વિશ્ર્વાસમાં લઇ મોટી રકમનું રોકાણ કરાવતાં હતાં.

ત્યારબાદ મોટી રકમની ઉચાપાત્ત કરી લેતાં હતાં. આ ફોરેન કરન્સીના નામે છેતરપીંડી ગુજરાત, મહારાષ્ટ્ર, ઉત્તરપ્રદેશ અને દિલ્હી તથા દેશના અનેક શહેરોમાં નેટવર્ક ચાલતું હોવાનું ખુલ્યું હતું. પોલીસ તપાસ દરમિયાન ઝડપાયેલો અરમાન મેમણ મુખ્ય સૂત્રધાર હતો. તેમજ તેની સાથે અન્ય એક સૂત્રધાર હતો. ત્યારબાદ એક સોફટવેર ડેવલોપરની મદદ વડે કોલર, વેરાવળ લીંકના બેંક એકાઉન્ટ પ્રોવાઇડર જેમાં હેડલર અરમાન મેમણ હતો તથા નંદુરબાર લીંકના બેંક એકાઉન્ટ પ્રોવાઇડર હેડલર તરીકે પીર મોમહમદ તથા એક સીમ કાર્ડ પ્રોવાઇડર અને તેની હેઠળ કમાલ શાહ નામનો શખ્સ રહેતો હતો. ઉપરાંત હેડલર અરમાન મેમણની નીચે ફૈઝાન તથા ઐઝાઝ (એમપાયર ટ્રેડીંગ) તથા હેડલર પીરમોમહમદની નીચે ડો. અલ્તાફ, રમીઝ રાઝા શેખ તથા મો. ખટીક (જીએસએમ ટ્રેડિંગ) જેટલા સખ્સો એક્ટિવ હતાં અને આ નેટવર્ક દ્વારા રોકાણકારોને છેતરવાનું કૌભાંડ ચાલતું હોવાનું ખુલ્યું હતું. જેના આધારે જામનગર સાયબર ક્રાઇમ દ્વારા અન્ય શખ્સોની શોધખોળ હાથ ધરી હતી.

કાંટાળી વાડમાંથી મળેલું ફુલ હવે અમેરિકાની ગલીઓમાં મહેકશે

• જિલ્લા કલેકટર બી.એ.શાહ દ્વારા દત્તક વિધાન થકી અઢી વર્ષીય બાળકીને અમેરિકન દંપતીને સોંપાઈ
• વિવિધ સરકારી વિભાગોના યોગ્ય સહયોગ અને સંકલનને કારણે આજે અમારો પરિવાર સંપૂર્ણ બન્યો-શૈલી વોઈટ (બાળકીને દતક લેનાર માતા)
• આજે ઘણા બાળકોને પરિવારની જરૂરિયાત છે દત્તકવિધાનથી આવા બાળકને સુવર્ણ ભવિષ્ય અને દંપત્તિને સંતાન સુખ મળે છે-સ્ટીવન વોઈટ

દેશ દેવી ન્યુઝ તા.૧૧ ઓગસ્ટ ૨૩ જામનગર અંદાજે અઢી વર્ષ પહેલા કોઈ અવાવરૂ સ્થળે કાંટાની વાડમાંથી જામનગર જિલ્લા પોલીસને એક નવજાત બાળકી મળી આવેલ. જામનગર પોલીસે રાત-દિવસ એક કરી આ બાળકીના માતા પિતાની શોધ આદરી અને બાળકીના માતા-પિતા મળી આવ્યા ત્યારે તેઓએ બાળકીમાં શારીરિક ખોટ અને અન્ય સામાજિક કારણોસર તેને અપનાવવાનો ઇનકાર કરી દીધો.જેથી પોલીસે બાળ કલ્યાણ સમિતિ જામનગરનો સંપર્ક કરતાં સમિતિના ચેરમેને કસ્તુરબા  વિકાસ ગૃહ ખાતે આ બાળકીને આશ્રય આપવાની વ્યવસ્થા કરી.બાળકીની શારીરિક ખોટ દૂર કરવા તેને જામનગરની જી.જી. હોસ્પિટલ ખાતે મોકલી અપાઈ જ્યાં જી..જી. હોસ્પિટલના તબીબોએ અંગત કાળજી લઈ આ બાળકીને પુન:સ્વસ્થ કરવાની સાથે નવજીવન આપ્યું.

ત્યારબાદ CARA (સેન્ટ્રલ એડોપ્શન રિસોર્સ ઓથોરિટી)ના માધ્યમથી અમેરિકાના શિકાગો ખાતે રહેતા સ્ટીવન વોઈટ અને શૈલી વોઇટે આ બાળકીને સ્વીકારવાની તત્પરતા દર્શાવતા જિલ્લા કલેકટર શ્રી બી.એ.શાહના આદેશ બાદ તમામ કાનૂની પ્રક્રિયાઓ પૂર્ણ કરી આ બાળકીને કલેક્ટરશ્રીના હસ્તે દતક વિધાન થકી તેના વાલીને સોંપવામાં આવી. દતકવિધાન વેળાએ બાળકીને દત્તક લેનાર માતા શૈલી વોઈટે હર્ષ સાથે જણાવ્યું કે સરકારના વિવિધ વિભાગોએ અમને આ સમગ્ર પ્રક્રિયા દરમિયાન ખૂબ સહકાર આપ્યો.જ્યાં જ્યાં જરૂર પડી ત્યાં અંગત રીતે અમારી ખૂબ મદદ કરી.તેમના આ સહકારને કારણે મારા દીકરાને એક બહેન અને અમને આજે એક દીકરી મળી છે અને જેના કારણે અમારો પરિવાર પરિપૂર્ણ થયો છે.અમારા જીવનમાં ખુશીઓ લાવનાર આ બાળકીનું અમે જીવની જેમ જતન કરીશું.પિતા સ્ટીવન વોઈટ જણાવે છે કે આજે દુનિયામાં અનેક એવાં નિરાધાર બાળકો છે કે જેમને વાલીની જરૂર છે જ્યારે અનેક એવાં દંપતી પણ છે કે જેઓ સંતતિ સુખથી વંચિત છે.ત્યારે આ પ્રકારની મદદ બંને માટે આશીર્વાદરૂપ છે.તેમ જણાવી બાળકીને યોગ્ય વાલી મળે અને ફરી તેનું જીવન મહેકી ઉઠે તે માટે જહેમત ઉઠાવનાર જિલ્લા વહીવટી તંત્ર જામનગર, જિલ્લા પોલીસ, બાલ કલ્યાણ સમિતિ, જિલ્લા સમાજ સુરક્ષા અધિકારી જિલ્લા બાળ સુરક્ષા અધિકારી તથા કસ્તુરબા સ્ત્રી વિકાસ ગૃહનો તેઓએ આભાર વ્યક્ત કર્યો હતો.

દત્તક વિધાન વેળાએ અધિક કલેક્ટર  બી.એન.ખેર, નાયબ પોલીસ અધિક્ષક જયવીરસિંહ ઝાલા, બાળ કલ્યાણ સમિતિના ચેરમેન હર્ષિદાબેન પંડ્યા તથા સમિતિના સભ્યો, જિલ્લા બાળ સુરક્ષા અધિકારી આર.જે.શિયાર, કસ્તુરબા સ્ત્રી વિકાસ ગૃહના પ્રમુખ કરશનભાઇ ડાંગર તથા કર્મચારીઓ, ચિલ્ડ્રન હોમ ફોર ગર્લ્સના અધિક્ષક  સ્વિટીબેન જાની, ખાસ દત્તક સંસ્થાના  ઉર્વીબેન સીતાપરા તથા કર્મચારી ગણ વગેરે ઉપસ્થિત રહ્યા હતા.

અહેવાલ:- વિરેન્દ્રસિંહ પરમાર

જામનગર: દારૂ પીવા બાબતે યુવાન ઉપર હુમલો: પાંચ શખસો સામે ફરિયાદ

દેશ દેવી ન્યુઝ જામનગર તા.૧૦ ઓગસ્ટ ૨૩ : જામનગરના સત્યનાયારણ મંદિર નજીક સોની ફળીમાં રહેતા વિશાલ અશોકભાઇ મોનાણી નામનો યુવક ગત મોડી રાત્રે તેના ઘરે પાસે બેઠો હતો. ત્યારે વંશરાજ સહિત 5 અજાણ્યા લોકો તેના ઘર પાસે દારૂ પીવા માટે આવ્યા હતા. ત્યારબાદ અહીં દારૂ નહિં પીવા બાબતે વિશાલભાઇ સાથે બોલાચાલી કરાતાં વિશાલભાઇ પર વંશરાજ સહિત 5 લોકો દ્વારા ધોકા, પાઇપ, તલવાર વડે જીવણલ હુમલો કરાયો હતો.

ત્યારબાદ, સ્થાનિક રહેવાસીઓ દ્વારા ઇજાગ્રસ્ત વિશાલભાઇને 108 નંબરની એમ્બ્યુલન્સ મારફતે સારવાર અર્થે જી.જી.હોસ્પિટલ ખસેડવામાં આવ્યા હતા. આ ઘટના ની જાણ કરાતા સિટી-એ ડિવિઝન ની પોલીસ ટુકડી હોસ્પીટલ ખાતે દોડી ગઇ હતી, તેમજ ફરિયાદ ની તજવીજ હાથ ધરાઇ છે.