જામજોધપુર માર્કેટિંગ યાર્ડમાંની રૂા.20 લાખની ચિલઝડપ પ્રકરણમાં વધુ એક આરોપી ઝડપાયો

દેશ દેવી ન્યૂઝ જામનગર: તા.૨૮ ઓગસ્ટ ૨૩ જામજોધપુર ના માર્કેટિંગ યાર્ડ ના એક વેપારી પાસેથી રૂપિયા 20 લાખની રોકડ રકમ ભરેલો થેલો આંચકી લેવા અંગેના ચકચારી પ્રકરણમાં જામજોધપુર પોલીસે અગાઉ બે આરોપીઓ મુસ્તકીમ શેખ તેમજ ધવલ પટેલ નામના બે શખ્સોની અટકાયત કરી લીધી હતી, અને તેઓ પાસેથી રૂપિયા 18 લાખની રોકડ રકમ કબજે કરી લીધી હતી.જ્યારે આ પ્રકરણમાં રાજકોટ જિલ્લાના ઉપલેટા તાલુકાના મોટી પાનેલી ગામના દિલીપ ઉર્ફે નુરી વિઠ્ઠલભાઈ કાંજિયા નામના પટેલ શખ્સ ની પણ સંડોવણી હોવાથી જામજોધપુર પોલીસ દ્વારા તેની શોધખોળ ચલાવવામાં આવી રહી હતી.

દરમિયાન જામજોધપુર પોલીસ સ્ટેશનના પોલીસ ઇન્સ્પેક્ટર વાય. જે. વાઘેલા તેમજ સ્ટાફના પોલીસ હેડ કોન્સ્ટેબલ પ્રજ્ઞરાજસિંહ જાડેજા, પોલીસ કોન્સ્ટેબલ દિલીપસિંહ જાડેજા, મહેન્દ્રસિંહ જાડેજા, અશોકભાઈ ગાગિયા, ભગીરથ સિંહ જાડેજા અને મહિલા પોલીસ કોન્સ્ટેબલ નિમુબેન ચિત્રોડા વગેરે ની ટીમ દ્વારા આ પ્રકરણમાં ઊંડાણપૂર્વકની તપાસ હાથ ધરવામાં આવી હતી, અને ત્રીજો આરોપી દિલીપભાઈ ઉર્ફે નુરી વિઠ્ઠલભાઈ કાંજિયા કે જે મોટી પાનેલી ઉપલેટા નો વતની છે, અને હાલમાં સતાધારમાં સંતાયો છે, તેવી બાતમીના આધારે તપાસ હાથ ધરી આરોપીને સતાધાર માંથી ઉપાડી લીધો હતો. જે આરોપી સામે સીઆરપીસી કલમ 70 મુજબનું પણ વોરંટ ઇસ્યુ થયું હતું. જેને જામજોધપુર લઈ આવ્યા પછી તેની વધુ પૂછપરછ ચલાવવામાં આવી રહી છે. આ પ્રકરણમાં ચોથા આરોપી નામ પણ ખુલ્યું છે. જેનું નામ નરશીભાઈ રાવજીભાઈ ખાંધર કે જે હાલ નાસ્તો ફરતો રહ્યો હોવાથી જામજોધપુર પોલીસ હજુ તેને શોધી રહી છે.

લાખોટા તળાવમાં ઝંપલાવનાર મહિલાનું રેસ્ક્યુ કરતી ફાયર બ્રિગેડ

દેશ દેવી ન્યુઝ જામગનર તા.૨૮ ઓગસ્ટ ૨૩ જામનગરના શંકર ટેકરી વિસ્તારમાં રહેતા હંસાબા જાડેજા નામના 65 વર્ષના વૃદ્ધ મહિલા કે જેઓ માનસિક સમતુલા ગુમાવી બેઠા છે. તેઓએ આજે સવારે 7.30 વાગ્યાના અરસામાં તળાવની પાળે આવ્યા પછી તળાવના પાણીમાં ઝંપલાવી દીધું હતું. આ બનાવ સમયે તળાવની પાળે હાજર રહેલી વ્યક્તિએ તરત ફાયર શાખાને જાણ કરતાં ફાયર શાખાની ટીમના ભરત જેઠવા, જયંતીભાઈ સિંધવ અને ભરત ગોહેલ વગેરે ઘટના સ્થળે દોડી ગયા હતા, અને પાણીમાં ઝંપલાવી દઇ વૃદ્ધ મહિલાને પાણીમાંથી જીવીત બહાર કાઢી લીધા હતા.

વૃદ્ધ મહિલા ને પાણીમાં તરતાં આવડતું હોવાથી તેઓએ ઝંપલાવ્યા પછી તરતાં તરતાં તળાવની મધ્યમાં ચાલ્યા ગયા હતા. દરમિયાન પાછળથી ફાયર બ્રિગેડની ટુકડી એ પણ ઝંપલાવી દીધું હતું, અને લાઈફ જેકેટ સાથે પાણીમાં પહોંચી જઈ વૃદ્ધ મહિલા ફિલ્મી ઢબે પીછો કરી લાઈફ જેકેટના સહારે બહાર ખેંચી લીધા હતા. ત્યારબાદ 108 ની ટીમને ઘટના સ્થળે બોલાવી લઇ સારવાર માટે જામનગરની જી.જી. હોસ્પિટલમાં પહોંચાડ્યા છે.

જામનગરની ગ્રેઈન માર્કેટની નામાંકીત પેઢીમાં ચોરી, સીસીટીવી કેમેરાનું ડીવીઆર પણ ચોરી ગયા

દેશ દેવી ન્યુઝ જામનગર તા.૨૬ ઓગસ્ટ ૨૩ : શહેરના ગ્રેઇન માર્કેટ વિસ્તારમાં આવેલી રમણીકલાલ દામોદરદાસ ની વેપારી પેઢીમાં ગઈ રાત્રે તસ્કરો ત્રાટક્યા હતા. જે પેઢીમાં તસ્તરોએ બારીના સળિયા તોડી અંદર પ્રવેશ મેળવી લીધો હતો, અને સૌપ્રથમ સીસીટીવી કેમેરાનું ડીવીઆર ઉઠાવી ગયા હતા, ત્યારબાદ વેપારી પેઢી ની અંદર રહેલા કબાટ ને તોડી નાખી માલ સામાન વેરણ છેરણ કર્યો હતો, જ્યારે અંદર રહેલી તિજોરી ને પણ તોડવાનો પ્રયાસ કર્યો હતો. પરંતુ તેમાં સફળ થયા ન હતા. તેથી તસ્કરોએ વેપારી પેઢીમાં રાખવામાં આવેલી ખાંડ ની ગુણીઓનો કેટલોક જથ્થો ઉઠાવી ગયા હતા. સમગ્ર ઘટનાની આજે સવારે વેપારી પેઢી ખોલતી સમયે જાણ થવાથી સીટી બી. ડિવિઝન પોલીસ મથકનો સંપર્ક સાધ્યો હતો, અને પોલીસ કાફલો ઘટના સ્થળે દોડી ગયો છે. આસપાસના વિસ્તારના અન્ય સી.સી ટીવી કેમેરાઓની મદદથી તસ્કરોને શોધવા માટેની કવાયત શરૂ કરી દેવામાં આવી છે.

જામનગર: પુત્રી સાથે મહિલા ગુમ થયાની ફરિયાદ

દેશ દેવી ન્યુઝ જામનગર: તા.૨૬ ઓગસ્ટ ૨૩જામનગર શહેરના મયુરનગર આવાસમાં માતાના ઘરે રહેતી મહિલાને કામ બાબતે ઠપકો આપતા મહિલા તેણીની 12 વર્ષની પુત્રી સાથે એકાએક ગુમ થઈ ગઈ છે.જામનગરમાં મયુર નગર આવાસના બ્લોક નંબર 24 રૂમ નંબર 15 માં રહેતી ઝરીનાબેન અશરફભાઈ બાબવાણી નામની 54 વર્ષીય પ્રોઢા એ પોલીસમાં જાહેર કર્યું હતું કે પોતાની પુત્રી રેશ્માબેન અશરફભાઈ બાબવાણી ઉ. વર્ષ 35 અને પોતાની 12 વર્ષથી પુત્રી મહેક અશોકભાઈ ડાંગર પોતાની સાથે રહે છે જે ગત તારીખ 24 ના રોજ એકા એક લાપતા બની ગઈ છે. જેનો અનેક સ્થળે શોધ્યા પછી પણ કોઈ પતો સાંપડ્યો ન હતો. તેણીને ઘરકામ બાબતે ઠપકો આપતાં માઠું લાગવાથી ઘર છોડીને ચાલી ગઈ હોવાનું સીટી સી. ડિવિઝન પોલીસમાં જાહેર કરાયું છે.

ઉપરોક્ત ગુમ થનાર માતા-પુત્રી વિશે કોઈને જાણકારી હોય તો તેઓએ જામનગરના સીટી સી. ડિવિઝન પોલીસ મથકમાં પોલીસ કોન્સ્ટેબલ કે. જે. જાડેજા (0288-2550805) નો સંપર્ક સાધવા અનુરોધ કરાયો છે.

પારકી પંચાતમાં સર્જાઇ મોટી બબાલ :ધરારનગમાં કજીયામાં વચ્ચે પડેલા યુવાનને લમધારી નંખાયો..!

• આઠથી દશ જેટલા શખ્સોએ ધોકા અને તલવાર વડે હુમલો કર્યો

દેશ દેવી ન્યુઝ જામનગર: તા.૨૬ ઓગસ્ટ ૨૩ જામનગર શહેરના બેડેશ્વર વિસ્તારમાં એકડેએક બાપુની દરગાહ પાસે બીજાના ઝઘડામાં વચ્ચે છોડાવવા પડેલા યુવાન અને બાળકી સહિતના ત્રણ લોકો ઉપર આઠેક જેટલા શખ્સોએ હુમલો કરતા ઈજાગ્રસ્તોને સારવાર માટે જી. જી. હોસ્પિટલમાં ખસેડવામાં આવ્યાં હતાં.

હુમલાના બનાવની વિગત મુજબ, જામનગર શહેરના બેડેશ્વરમાં રેલવે સ્ટેશન પાસે એકડેએક બાપુની દરગાહ પાસે રહેતાં સદામભાઈ પઠાણ તેના ઘર પાસે હતાં તે દરમિયાન પાડોશીઓના ચાલી રહેલા ઝઘડામાં છોડાવવા વચ્ચે પડતા સદામભાઈ ઉપર આઠથી દશ જેટલા શખ્સોએ ધોકા અને તલવાર વડે હુમલો કર્યો હતો. હુમલામાં એક બાળકી અને યુવતી ત્રણ વ્યક્તિઓને ઈજા પહોંચતા ત્રણેયને સારવાર માટે જી. જી. હોસ્પિટલમાં ખસેડવામાં આવ્યાં હતાં. જ્યાં બનાવ અંગેની જાણ થતા પોલીસ કાફલો હોસ્પિટલે પહોંચી ગયો હતો અને ઈજાગ્રસ્તના નિવેદનના આધારે ગુનો નોંધવા તજવીજ હાથ ધરી હતી.

જામનગરમાં નવજાત શિશુને ત્યજી દેવાનો સીલસીલો યથાવત : શરૂ શેકશન પાસેથી નવજાત જીવીત અવસ્થામાં મળી આવ્યું

• પાયલોટ વિરભદ્રસિંહ જાડેજા અને ગીતાબેન ખરાની સરાહનીય કામગીરી: થોડી ક્ષણ મોડુ થાત તો બાળકનો જીવ જોખમમાં મુકાત
• અજાણી મહિલા પોતાનું પાપ છુપાવવા કચરામાં ફેંકી ફરાર
• પોલીસ કાફલો ઘટનાસ્થળે પહોંચ્યો : તપાસના ચક્રો ગતિમાન

દેશ દેવી ન્યુઝ જામનગર તા.૨૬ ઓગસ્ટ ૨૩ જામનગરના શરૂ શેકશન રોડ પર આવેલ સીટીઝન એપાર્ટમેન્ટ પાછળ કચરામાં ત્યજી દીધેલ નવજાત શિશુ મળી આવતાં ભારે ચકચાર મચી જવા પામી છે તેવામાં કોઈએ 108ને જાણ કરતા નવજાતને જીવીત અવસ્થામાં હોસ્પિટલ ખાતે ખસેડવામાં આવ્યું હતુંજામનગરમાં નવજાત બાળકો મળવાની ઘટના ચીંતાજનક બની રહી છે. છેલ્લા બે મહિનામાં નવજાત મળવાની ત્રીજી ઘટના સામે આવતા ભારે ચકચાર મચી ગયો છે લોકોમાં રોષ ફાટી નીકળ્યો છે.અને જનેતા ઉપર ફિટકાર વરસી રહ્યો છે. શહેરના બેડીગેઈટ પાસે મહિલાએ બાળક ત્યજી દીધાની ઘટના હજુ સમી નથી ત્યા આજરોજ સવારે કચરામાંથી જીવીત અવસ્થામાં નવજાત બાળક મળી આવતા સારવાર માટે 108 મારફત સરકારી હોસ્પિટલમાં દાખલ કરવામાં આવ્યું છે. કોઈ અજાણી મહિલાએ પોતાનું પાપ છુપાવવા નવજાત શિશુને ત્યજી દઈ ફરાર થઈ ગઈ હોવાની દિશામાં તપાસ આરંભી છે.કચરામાં બાળક ત્યજી દીધેલ દઈ માતા પલાયન થઈ ગયાના સમાચાર વાયુવેગે પ્રસરી જતા લોકોની ભીંડ જામી હતી બનાવની જાણના પગલે સીટી-બી ડિવિઝન પોલીસ કાફલો ઘટનાસ્થળે દોડી ગયો હતો અને માતાની શોધખોળ આદરી હતી હાલતો નવજાત શિશુને કચરામાં ત્યજી દીધાની બીજી ઘટના પ્રકાશમાં ભારે ચકચાર જાણી છે.

જામનગરમાં બર્ધન ચોકમાંથી ક્રિકેટનો સટ્ટો રમતા વેપારી ઝડપાયો: કપાત કરનાર કુખ્યાત રૂપેશ મહેતા ઉર્ફ રૂપલા નું નામ ખૂલ્યું

• બર્ધનચોક પાસે એચ.જી ધાબરીયા નામની દુકાન પાસેથી ઇબ્રાહીમ અસગરઅલી ધાબરીયા જબ્બે

દેશ દેવી ન્યુઝ જામનગર તા.૨૫ ઓગસ્ટ ૨૩ જામનગરમાં બર્ધન ચોક વિસ્તારમાંથી એક વેપારીને પોતાના મોબાઈલ ફોન ની એપ્લિકેશન મારફતે ક્રિકેટ નો સટ્ટો રમવા અંગે પોલીસે ઝડપી લીધો છે, જયારે તેની સાથે ક્રિકેટના સોદાની કપાત કરનાર શખ્સ ને ફરારી જાહેર કરાયો છે. જામનગરના સીટી એ. ડિવિઝનના પોલીસ સ્ટાફને ચોક્કસ બાતમી મળી હતી, કે જામનગરના બર્ધન વિસ્તારમાં એક વેપારી ઇબ્રાહીમ અસગરઅલી ધાબરીયા પોતાના મોબાઈલ ફોન મારફતે ક્રિકેટ મેચનો સટ્ટો રમી રહ્યો છે, તે બાતમીના આધારે પોલીસે દરોડો પાડ્યો હતો.

દરમિયાન જામનગરમાં ગોલ્ડન સીટી વિસ્તારમાં રહેતો અને બર્ધનચોક વિસ્તાર નો વેપારી ઇબ્રાહીમ અસગરઅલી ધાબરીયા મોબાઈલ ફોન મારફતે ક્રિકેટ નો સટ્ટો રમતાં મળી આવ્યો હોવાથી પોલીસે અટકાયતમાં લઈ લીધો હતો અને તેના કબજા માંથી મોબાઇલ ફોન રોકડ રકમ સહીત રૂપિયા 10,500 ની માલમતા કબજે કરી છે. પોલીસની પૂછપરજ દરમિયાન પોતે જામનગરમાં ચાંદી બજાર વિસ્તારમાં રહેતો તુષાર ઉર્ફ રૂપેશ નામના વણિક શખ્સ સાથે કપાત કરતો હોવાથી પોલીસે તેને ફરારી જાહેર કરી શોધખોળ હાથ ધરી છે.

જામનગર ભાજપ શહેર -જિલ્લા દ્વારા મતદાતા ચેતના મહાભિયાન અંતર્ગત પ્રેસ કોન્ફરન્સ યોજાઈ

દેશ દેવી ન્યુઝ જામનગર તા.૨૫ ઓગસ્ટ ૨૩ જામનગરમાં જિલ્લા ભાજપ કાર્યાલય અટલ ભવન ખાતે લોકતંત્રને મજબૂત કરવા નવા યુવા મતદારોને મતદાર યાદીમાં મતદાન માટેનો અધિકારથી વંચિત ન રહે તે માટે જાગૃતિ મતદાતા ચેતના અભિયાન શરૂ કરવામાં આવી રહ્યું છે.

આ મતદાતા ચેતના અભિયાનના આયોજન પૂર્વે ભાજપના જિલ્લા કાર્યાલય ખાતે સાંસદ પૂનમબેન માડમ, ધારાસભ્ય રિવાબા જાડેજા, મેયર, જિલ્લા પંચાયતના પ્રમુખ ધરમશીભાઈ ચનિયારા, જિલ્લા ભાજપ અધ્યક્ષ રમેશભાઈ મુંગરા, શહેર ભાજપ અધ્યક્ષ ડો. વિમલભાઈ કગથરા ઉપરાંત ભાજપના જિલ્લા અને શહેરના મહામંત્રી પ્રકાશભાઈ બામણીયા, વિજયસિંહ જેઠવા, મેરામણભાઇ ભાટુ, દિલીપભાઈ ભોજાણી, અભિષેક પટવા, ડૉ વિનોદ ભંડેરી સહિત અગ્રણીઓની ઉપસ્થિતિમાં પત્રકાર પરિષદમાં આ અભિયાન માટે માહિતી આપવામાં આવી હતી. આ તબક્કે જામનગર જિલ્લા ભાજપ મીડિયા કનવિંનર નરેન્દ્રસિંહ પરમાર, શહેર મીડિયા કનવિંનર ભાર્ગવ ઠાકર ઉપસ્થિત રહેલ.

આગામી 25 અને 26 ચૂંટાયેલા પ્રતિનધિઓ અને સંગઠનના લોકો મતદાર યાદીમાં નોંધણી અને સુધારા માટે કાળજી પૂર્વક મતદાર જન જાગૃતિ અભિયાન એટલે કે , મતદાતા ચેતના અભિયાન અંતર્ગત ભાજપ દ્વારા ઝુંબેશ હાથ ધરવામાં આવશે.

દરેડની બેંકમાં મહિલા વોશરૂમમાં સ્પાય કેમેરા મુકનાર ઈન્ચાર્જ મેનેજરની ધરપકડ

• વિકૃત મેનેજરે મહિલાઓના બાથરૂમમાં જાસુસી કેમેરા લગાવતા ભાંડોફ્ટી ગયો હતો
• મહિલા કર્મચારીએ ફરિયાદ નોંધાવતા ખળભળાટ મચી ગયો હતો

દેશ દેવી ન્યુઝ જામનગર: તા.૨૩ ઓગસ્ટ ૨૩ જામનગર તાલુકાના દરેડ જીઆઇડીસી ફેસ-3 માં મહાવીર સર્કલ પાસે આવેલી પંજાબ નેશનલ બેંકના ઈન્ચાર્જ મેનેજરે બેંકમાં આવેલા લેડીસ વોશરૂમમાં સ્પાય કેમેરા મુકવા અંગે મેનેજરની ધરપકડ કરી વધુ પૂછપરછ હાથ ધરી હતી.

આ અંગેની વિગત મુજબ, બિહાર રાજ્યના સીમરી તાલુકાના વતની અને ઢીચડા રોડ પરના વિસ્તારમાં રહેતાં તથા પંજાબ નેશનલ બેંકની દરેડ ફેસ-3 શાખામાં ફરજ બજાવતા મહિલા તેણીના બેંકના લેડીઝ વોશરૂમમાં ગયા તે દરમિયાન દરવાજાની દિવાલ ઉપર સ્પાય કેમેરો લગાવવાનું ધ્યાને આવ્યું હતું. અને લેડીઝ વોશરૂમમાં સ્પાય કેમેરો પંજાબ નેશનલ બેંકના જે-તે વખતના ઈન્ચાર્જ મેનેજર અખિલેશ શૈની (રહે. જામનગર) હરિયાણાના વતની દ્વારા મૂકવામાં આવ્યો હતો. આ સ્પાય કેમેરાને કારણે મહિલાઓની પ્રાઇવેસી ભંગ થતી હોય અને મહિલાઓના ફોટા-વીડિયો બનાવવાના બદઈરાદે કેમેરો લગાડવામાં આવ્યો હોવાની મહિલા દ્વારા પંચ બી પોલીસ સ્ટેશનમાં ઈન્ચાર્જ બેંક મેનેજર અખિલેશ શૈની સામે ફરિયાદ નોંધાવવામાં આવી હતી.

જેના આધારે પીએસઆઇ એમ.એ. મોરી તથા સ્ટાફે જુદી જુદી દિશામાં ઈન્ચાર્જ મેનેજર અખિલેશ શૈનીની શોધખોળ માટે ચક્રો ગતિમાન કર્યા હતાં. દરમિયાન બુધવારે પોલીસે ઈન્ચાર્જ મેનેજર અખિલેશ શૈનીની ધરપકડ કરી રિમાન્ડ મેળવવા અદાલતમાં રજૂ કરવા તજવીજ હાથ ધરી હતી.