જામનગર શહેરમાંથી બાઈક ની ચોરી કરનાર બે ટાબરીયા પકડાયા

• બાઈક ચોરીની સમગ્ર ઘટના CCTVમાં કેદ થતા ટાબરીયાને ઉઠાવી લેવાયા
• સીટી-બી ડિવિઝન પોલીસે ગણતરીની કલાકોમાં ચોરીનો ભેદ ઉકેલી નાખ્યો

દેશ દેવી ન્યુઝ જામનગર તા.૧ નવેમ્બર ૨૩ જામનગરના વાલકેશ્વરીમાંથી ચોરાયેલા બાઈકનો ભેદ ઉકેલાયો છે. પોલીસે બે ટાબરીયા ને ચોરાઉ બાઈક સાથે પોલીસે ઝડપી લીધા છે.જામનગરની વાલકેશ્વરી નગરી વિસ્તારમાંથી જીજે-૧૦-ડીબી ૪૩૪૩ નંબરનું બાઈક ચોરાઈ ગયાની પોલીસમાં ફરિયાદ નોંધાઈ હતી.તે દરમિયાન પોલીસે બાતમીના આધારે બેડી નજીકના પુલ પાસેથી કાયદાથી સંઘર્ષિત બે કિશોરને અટકાયતમાં લેવાયા હતા. બંનેને પોલીસ મથકે લઈ જઈ પૂછપરછ કરાતા તેઓએ ત્રણેક દિવસ પહેલા રૃા.૩૦ હજારનું બાઈક વાલકેશ્વરી નગરીમાંથી ઉઠાવ્યાની કબૂલાત આપી છે. પોલીસે બાઈક કબજે કરી પૂછપરછ હાથ ધરી છે.

જામનગરમાં ઓટો રિક્ષામાં મુસાફરી કરનાર યુવાનની રૂપિયા ૨૫ હજારની રોકડ રકમ ચોરી કરી લેવાના પ્રકરણ પરથી પડદો ઉચકાયો

• રોકડ રકમ પડાવી લેનાર રીક્ષા ચાલક અને તેના એક સાગરીતની અટકાયત: રીક્ષા અને રોકડ કબજે: અન્ય શખ્સ નું નામ ખુલ્યું

દેશ દેવી ન્યુઝ જામનગર ૧ નવેમ્બર ૨૩ જામનગરમાં તાજેતરમાં જકાતનાકા પાસેથી રિક્ષામાં બેસીને પ્રવાસ કરનારા એક મુસાફરના ખિસ્સામાંથી રૂપિયા ૨૫,૦૦૦ની રોકડ રકમની ચોરી થઈ ગઈ હતી, જે ચોરીના પ્રકરણ પરથી સીટી સી. ડિવિઝને પડદો ઊંચક્યો છે, અને રોકડ રકમની ચોરી કરનાર રિક્ષાચાલક અને તેના એક સાગરીતની અટકાયત કરી લઈ, રીક્ષા તથા રોકડ કબજે કરી છે. જેમાં મદદગારી કરનાર રાજકોટના અન્ય એક સાગરીત નું નામ પણ ખુલ્યું છે.જામનગરમાં ચાર દિવસ પહેલાં જકાતનાકા પાસેથી રિક્ષામાં મુસાફરી કરનારા એક યુવાનના ખિસ્સામાંથી રૂપિયા ૨૫૦૦૦ ની રોકડ રકમની ચોરી થઈ ગઈ હતી. જેથી આ બનાવ અંગે સીટી સી. ડિવિઝન પોલીસમાં ફરિયાદ નોંધાવાઈ હતી. ઉપરોક્ત ચોરીના બનાવનો ભેદ ઉકેલવામાં સીટી સી. ડિવિઝન પોલીસ ની ટીમને સફળતા સાંપડી છે અને રાજકોટના રહેવાસી રીક્ષા ચાલક સચિન ઢોંગીરામ આમકર નામના મરાઠી શખ્સ અને તેના સાગરિત રાજકોટના વતની ધનજીભાઈ દેવજીભાઈ ગેડાણી ની અટકાયત કરી લીધી છે. જયારે તેઓ પાસેથી ચોરી કરેલી રૂપિયા ૨૫,૦૦૦ ની રોકડ રકમ તેમજ જીજે- ૨૫ વી ૧૪૬૦ નંબરની ઓટો રીક્ષા કબજે કરી લીધી છે.પોલીસની પૂછપરછ દરમિયાન તેઓની સાથે રાજકોટમાં રહેતો વિશાલ પ્રવીણભાઈ પાટડીયા પણ જોડાયો હોવાથી અને ચોરી કરવામાં સામેલ હોવાથી પોલીસે તેને ફરારી જાહેર કરી શોધખોળ હાથ ધરી છે.

જામનગરમાં હર્ષદ મિલની ચાલીમાં રહેતા પ્લમ્બર યુવાન અને તેની પત્ની પર લાકડી ધોકા અને પથ્થર વડે હુમલો કરાયો

• પાડોશીઓની જુગારની બાતમી આપતા હોવાની શંકાના આધારે પાંચ શખ્સોએ દંપત્તિ પર હુમલો કરી મોબાઈલ તોડી નાખ્યા

દેશ દેવી ન્યુઝ જામનગર તા ૩૧, ઓક્ટોબર ૨૩ જામનગરમાં હર્ષદમીલ ની ચાલી વિસ્તારમાં રહેતા એક પ્લમ્બર યુવાન અને તેની પત્ની પર પાંચ પાડોશીઓએ લોખંડ ના પાઈપ- ધોકા- લાકડી જેવા હથિયારો વડે હુમલો કરી ઇજા પહોંચાડયા ની તેમજ મોબાઇલ ફોન અને ચાંદી ની માળા તોડી નાખ્યા ની ફરિયાદ પોલીસમાં નોંધાવાઈ છે.ફરિયાદી ગોપાલભાઈ પરમાર અને તેની પત્ની મંજુબેન કે જેઓ પોતાના ઘેર જતા હતા, દરમિયાન આરોપીઓ ગૌતમ દિનેશભાઈ પરમાર, રાજ કિશોરભાઈ પરમાર, યુવરાજ પ્રકાશભાઈ પરમાર, વિમલ દીપકભાઈ પરમાર અને જયરાજ પ્રકાશભાઈ પરમાર વગેરેએ તેઓને રોકીને તમે અમારી જુગારની બાતમી કેમ આપો છો, તેમ કહી માર માર્યો હતો.ઉપરાંત તેઓના બંનેના બે મોબાઈલ ફોન પણ તોડી નાખ્યા હતા, જ્યારે ફરિયાદી ગોપાલભાઈ ની ચાંદીની માળા પણ તોડી નાખી રૂપિયા ૧૫,૦૦૦ નું નુકસાન પહોંચાડ્યું હતું. આથી મામલો સીટી એ. ડિવિઝન પોલીસ મથકમાં લઈ જવાયો હતો, અને પાંચેય આરોપીઓ સામે IPC કલમ ૩૨૩, ૫૦૪, ૫૦૬(૨), ૧૧૪, ૪૨૭, ૩૩૭ તથા જી.પી. એક્ટ કલમ ૧૩૫-(૧) મુજબ હુમલા અને ધાકધમકી અંગેની તેમજ તોડફોડ અંગેની ફરિયાદ નોંધાવી છે.

જામનગર નજીક ગંગાવાવ પાસે આવેલી પાનની દુકાનમાં બીડી-તમાકુ ના શોખીન એવા તસ્કરો ત્રાટક્યા

• દુકાનમાંથી શેમ્પૂ- બીડી- ગુઢકા તેમજ બિસ્કીટ અને ૪૦ કિલો લોટ ની ચોરી કરી ગયા ની પોલીસ ફરિયાદ

દેશ દેવી ન્યુઝ જામનગર તા ૩૧, ઓક્ટોબર ૨૩ જામનગર નજીક ગંગાવાવ પાસે આવેલી એક પાનની દુકાનમાં બીડી- તમાકુના શોખીન એવા તસકરો ત્રાટક્યા હતા, અને દુકાનમાંથી બીડી તમાકુ  અને ઘઉંનો લોટ સહિતની સામગ્રી ચોરી ગયા ની ફરિયાદ પોલીસમાં નોંધાવાઈ છે. જે મામલે પોલીસ તપાસ ચલાવે છે.આ બનાવની વિગત એવી છે કે જામનગર નજીક જામનગર તાલુકાના લાવડીયા ગામમાં રહેતા અને ગંગાવાવ પાસે પાન-બિડીની દુકાન ધરાવતા પ્રફુલભાઈ નવીનભાઈ-નામક વેપારીએ પોતાની દુકાનમાંથી કોઈ તસકરો રૂપિયા ૭ ,૫૦૦ની રોકડ રકમ ઉપરાંત દુકાનમાં રાખેલો ૪૦ કિલો ઘઉંનો પાવડર – શેમ્પુ- ગુટકા વિમલના પેકેટ બિસ્કીટ વગેરે માલમત્તા ની ચોરી કરી લઈ ગયા ની ફરિયાદ પોલિસીમાં નોંધાવાઇ છે.

જામનગરના કસ્તુરબા સ્ત્રી વિકાસ ગૃહમાં આશ્રિત બે બાળકોને પુના તથા રાજસ્થાનના દંપતિ દ્વારા દતક લેવાયા

• જિલ્લા કલેકટર  બી.એ.શાહ સહિતના અધિકારીશ્રીઓની ઉપસ્થિતિમાં દતક વિધાન અંગેની કાર્યવાહી પુર્ણ કરાઈ
• બંને બાળકોના વાલીઓએ દતક અંગેની સરળ પ્રક્રિયા તેમજ તંત્રના સહયોગ બદલ સરકાર તથા સ્થાનિક તંત્રનો આભાર વ્યકત કર્યો

દેશ દેવી ન્યુઝ જામનગર તા.૩૦ ઓક્ટોબર ૨૩ આજથી સાડા ત્રણ વર્ષ પહેલા પુના તથા રાજસ્થાનના દંપતિ દ્વારા ભારત સરકારના સેન્ટ્રલ એડોપ્શન રિસોર્સ ઓથોરિટી(કારા), મહિલા અને બાળ કલ્યાણ વિભાગ ન્યુ દિલ્હીને બાળક દતક લેવા માટે અરજી કરેલ હતી જે અરજીને ગ્રાહ્ય રાખી દંપતિના ઘર તપાસ અહેવાલ તથા કાયદાકીય તમામ પુરાવાના આધારે આ દંપતિઓએ ગુજરાતનું બાળક દતક લેવાની ઈચ્છા દર્શાવતા ભારત સરકાર તથા બાળ કલ્યાણ સમિતિ દ્વારા બાળકોને કાયદાકીય રીતે દત્તક વિધાન માટેની મંજૂરી મળ્યાં બાદ આજથી ત્રણ માસ અગાઉ શ્રીકસ્તુરબા સ્ત્રી વિકાસ ગૃહના બે બાળકોનું રેફરલ આપતા દંપતિઓ દ્વારા બાળકની પસંદગી દર્શાવેલ.જેના આધારે જિલ્લા એડોપ્શન કમિટી જામનગર દ્વારા દત્તક દંપતિઓના પુરાવા તથા ઘર તપાસ અહેવાલ ચકાસી બાળકને પ્રી-એડોપ્શનમાં આપવા એડોપ્શન કમિટી દ્વારા પસંદ કરવામાં આવેલ.જેના આધારે જિલ્લા કલેકટર  બી.એ.શાહ દ્વારા આખરી આદેશ અપાયા બાદ આ બાળકોની દતક વાલીઓને સોંપણી કરવામાં આવેલ.બાળકોને દતક લીધેલ વાલીઓએ આ પ્રસંગે જણાવ્યું હતુ કે અમને સરકારના વિવિધ વિભાગો તેમજ સંસ્થાઓ દ્વારા અકલ્પનિય સહયોગ પ્રાપ્ત થયો. ખુબ જ બારીકાઇ પુર્વક સરકારી તંત્ર દ્વારા તમામ પ્રકારના આયોજનો હાથ ધરવામાં આવ્યા હતા જેના કારણે આજે અમારો પરિવાર પરિપૂર્ણ બન્યો છે.બાળકોના આગમનથી અમારા જીવનમાં અનહદ ખુશીઓ છવાઇ છે.આ માટે અમે કેન્દ્ર તથા રાજ્ય સરકાર, શ્રી કસ્તુરબા સ્ત્રી વિકાસ ગૃહ તેમજ અમને આ પ્રક્રિયામાં મદદરૂપ થનાર તમામનો હ્રદયપુર્વક આભાર વ્યક્ત કરીએ છીએ.ઉલ્લેખનિય છે કે જામનગર સ્થિત શ્રી કસ્તુરબા સ્ત્રી વિકાસ ગૃહને ગુજરાત સરકારના સામાજિક ન્યાય અને અધિકારીતા વિભાગ દ્વારા સ્પેશલાઈઝડ એડોપ્શન એજન્સીની માન્યતા આપવામાં આવેલ છે. તેમજ સમાજ સુરક્ષા ખાતુ ગાંધીનગર દ્વારા બાળ સંભાળ સંસ્થા તરીકેની પણ માન્યતા મળેલ છે. આ સંસ્થા દ્વારા અનાથ, નિરાધાર, ત્યજાયેલા બાળકોને આશ્રય, રક્ષણ તથા શિક્ષણ આપી સમાજમાં પુનઃસ્થાપન કરવાની કામગીરી કરવામાં આવે છે.આ પ્રસંગે અધિક નિવાસી કલેકટર બી.એન.ખેર, બાળ કલ્યાણ સમિતિના સભ્યો જમનભાઈ સોજીત્રા, અશ્વિનભાઈ પંડ્યા, એ.ટી.અત્તરવાલા, જિલ્લા બાળ સુરક્ષા અધિકારી  આર.જે.શિયાર, જિલ્લા સમાજ સુરક્ષા કચેરીના બી.સી.પ્રમાણી, કસ્તુરબા સ્ત્રી વિકાસ ગૃહના પ્રમુખ કરસનભાઈ ડાંગર તથા ખાસ દત્તક સંસ્થાના મેનેજર  ઉર્વીબેન સીતાપરા તથા કર્મચારીગણ વગેરે ઉપસ્થિત રહ્યા હતા.

જામનગરમાં કળિયુગી શ્રવણે સગી જનેતાને માર માર્યા નો મામલો સામે આવતાં ભારે ચકચાર

• પ્રેમલગ્ન કરનાર ભત્રીજી સાથે સંબંધ રાખનાર જનેતાને ઢીકાપાટુનો માર મારી જાનથી મારી નાખવાની ધમકી આપી

દેશ દેવી ન્યુઝ જામનગર તા. ૩૦ ઓક્ટોબર ૨૩ : આજે દિવસે-દિવસે સામાજીક ક્ષેત્રે એવી ઘટનાઓ ઘટતી જાય છે કે એ ઘટના પ્રત્યે લોકો ફીટકાર અને ધૃણા વરસાવતા હોય છે. સતયુગના શ્રવણે પોતાના અંધ મા-બાપને જાત્રા કરાવી હતી. અને કળિયુગના શ્રવણ પોતાના મા-બાપને માર મારી, જાનથી મારી પણ નાખતા હોય છે. જામનગરમાં આવીજ એક ઘટના ઘટવા પામી છે. જેમાં પુત્રએ તેની પ્રેમલગ્ન કરનાર ભત્રીજી સાથે સંબંધ રાખવા માટે પોતાની સગી જનેતાને માર મારી, જાનથી મારી નાખવાની ધમકી આપ્યાની ફરિયાદ સીટી એ. ડિવિઝન પોલીસ મથકમાં નોંધાવવામાં આવી છે.જામનગર શહેરના યોગેશ્ર્વર નગરમાં રહેતાં મંજુલાબેન દ્વારકાદાસ ગોંડલીયા નામની ૬૨ વર્ષીય વૃદ્ધાએ નોંધાવેલી ફરિયાદ મુજબ તેમના ત્રણ દિકરાઓ દીપક, નિર્ભય અને અજય છે અને તેઓ અજય સાથે રહે છે. તેમના મોટા પુત્ર દિપકની દીકરી આશાની સગાઇ એકાદ વર્ષ પૂર્વે જુનાગઢ ખાતે થયેલ હતી પરંતુ દિપકની આર્થિક પરિસ્થિતી નબળી હોવાથી તેમની પુત્રી આશાબેન એકાદ માસ પૂર્વે રાજીખુશીથી કોર્ટે મેરેજ કર્યા હતા અને તે જુનાગઢ સાસરેથી તેમના દાદી મંજુલાબેન સાથે ફોન પર વાતચીત કરતી જે અજયને પસંદ નહોતું અને અવાર-નવાર તેમને ફોન પર વાત ન કરવા કહેતો અને ગત તા. ૨૮.૧૦ ના રોજ અજયે તેમને કહેલ કે તારે જો મારી સાથે રહેવું હોય તો આશા સાથે સંબંધ રાખવો નહિ કે ફોન ઉપર વાતચીત કરવી નહી જેથી મંજુલાબેને કહેલ કે મે આશાને બાળપણથી જ મોટી કરી છે જેથી હું તો તેની સાથે વાતચીત નો કરીશ તેમ કહેતા ઉશ્કેરાયેલા અજયે ઢીકાપાટુનો માર મારી ડોકના ભાગે નખોડીયા ભરી હવે જો તેની સાથે વાત કરવી હોય તો તેની સાથે જુનાગઢ જતી રહેશે અને જો અહીં મારી સાથે રહીને વાત કરીશ તો હું તને જાનથી મારી નાખીશ ધમકી આપતાં તેણીએ તેમના પુત્રવધુ અલ્પાબેન અજય સાથે સીટી એ ડિવિઝન પોલીસ મથકમાં તેમના પુત્ર અજય વિરૂદ્ધ ફરિયાદ નોંધાવી છે.

જામનગરમાં સિટી-એ. ડિવિઝન પોલીસ સ્ટેશન ના સ્ટાફ દ્વારા ‘નાઇટ ટ્રાફિક ડ્રાઇવ’ યોજાઇ

દેશ દેવી ન્યુઝ જામનગર તા ૩૦ ઓક્ટોબર ૨૩ જામનગર શહેરમાં ટ્રાફિક ના નિયમોનું ઉલ્લંઘન કરનાર વાહન ચાલકો અને પાન ના ગલ્લે બેસીને, તેમજ ચા ની દુકાને બેસીને કારણ વગરના ગપાટા મારતા શખ્સોને કાયદાના પાઠ ભણાવવા માટે જામનગરના સીટી એ ડિવિઝન પોલીસ સ્ટેશન હેઠળના વિસ્તારમાં નાઈટ ડ્રાઈવ રાખવામાં આવી હતી.જામનગર જીલ્લા પોલીસ અધિક્ષક પ્રેમસુખ ડેલુ ના માર્ગદર્શન હેઠળ સિટી-એ ડિવિઝન પોલીસ સ્ટેશન ના પી.આઇ. એન.એ.ચાવડા ની સુચના થી સર્વેલન્સ ટીમ દ્વારા શહેરના પાંચ હાટડી વિસ્તાર, પટણીવાડ વિસ્તાર, કાલાવડ નાકા બહારનો વિસ્તાર, સુમરા ચાલી વિસ્તાર, હવાઇ ચોક, પવનચક્કી વિસ્તાર, સાધના કોલોની વિસ્તાર સહિત અનેક વિસ્તારમાં ‘નાઇટ ટ્રાફિક ડ્રાઇવ’ સાથે ખાસ ઝુંબેશ હાથ ધરવામાં આવી હતી.સિટી-એ ડિવિઝન પોલીસ દ્વારા ખાસ આ ‘નાઇટ ટ્રાફિક ડ્રાઇવ’ ચલાવી વાહન ચાલકો ના લાઇસન્સ, ફોર-વીલોમાં બ્લેક કાચ હટાવવા, બાઇક મા ત્રીપલ સવારી, ધૂમ સ્ટાઇલ થી બાઇક ચલાવવી રોમિયોગીરી કરતા વાહનચાલકો, મોડી રાત્રિ સુધી ચા-પાન ના ગલ્લે બેસીને ગપ્પા મારતા શખ્સો અને ટ્રાફિક નિયમોનો ભંગ કરનારાઓ સામે દંડકીય કાર્યવાહી હાથ ધરવામાં આવી રહી છે. જામનગર સિટી-એ. ડિવિઝન પોલીસ ની આકરી કાર્યવાહીને પગલે ટ્રાફિક નિયમોનું ઉલ્લંઘન કરનારાઓમાં ફફડાટ ફેલાયો છે.

જામનગરમાં ભીમવાસના ઢાળીયા પાસે રેલવેની જમીન પર દબાણ હટાવવાની કામગીરી સમયે ભારે ઘર્ષણ

• નોટિસ પાઠવ્યા વિના દબાણ દુર કરવાનો પ્રયાસ કરવાથી સ્થાનિકે વાંધા ઉઠાવ્યા: પોલીસની કવાયત

દેશ દેવી ન્યુઝ જામનગર ૨૯ ઓક્ટોબર ૨૩ જામનગરમાં ભીમવાસના ઢાળિયા પાસે રેલવેની જમીન પરનું દબાણ હટાવવા માટેની કામગીરી હાથ ધરવામાં આવી હતી, જે સમયે ભારે ઘર્ષણ થયું હતું, અને રેલ્વે પોલીસે ભારે મથામણ કરવી પડી હતી. જામનગરના ભીમવાસ પાસેના ઢાળીયા નજીકના વિસ્તારમાં રેલવેની જમીન પર કેટલૂંક દબાણ થયું હોવાથી આજે સવારે રેલ્વે તંત્રની ટિમ દ્વારા દબાણ હટાવવાની કામગીરી કરવા માટે પહોંચી હતી, અને ભારે પોલીસ બંદોબસ્ત ગોઠવવામાં આવ્યો હતો.રેલવેની જમીન પર ગેસના ચૂલા રીપેરીંગની એક કેબીન ખડકી દેવામાં આવી હતી, જે કેબીન ને કોઈપણ પ્રકારની નોટિસ આપ્યા વિના ખસેડવાની કામગીરી કરાતાં ભારે રકઝક અને ઘર્ષણ થયું હતું. જોકે રેલવે તંત્રએ મચક આપી ન હતી, અને કેબિનમાંથી ગેસના ચૂલા સહિતનો સામાન જાતે જ બહાર કઢાવીને પોલીસ પ્રોટેક્શન ની વચ્ચે દબાણ દૂર કરવાનું ચાલુ રાખ્યું હતું.

જામનગરના ખોજાવાડ વિસ્તારમાં જૂની અદાવતનો ખાર રાખી પિતા અને બે પુત્રો ઉપર હુમલો : 9 શખસો વિરૂઘ્ધ ફરિયાદ

• આરોપી :- (૧) મોશીન ખફી (૨) અકરમ ઉર્ફે કારો ખફી (૩) મહમદઇકબાલ ઉર્ફે ટકી ખફી (૪) નાજીર ખફી (૫) નાશીર ઉર્ફે કાન કાપલો ખફી (૬) શાહરૂખ ખફી (૭) સદામ બાડો (૮) આબીદ બ્લોચ (૯) નદીમ ખફી રહે. બધા જામનગર

દેશ દેવી ન્યુઝ જામનગર તા ૨૮ ઓક્ટોબર ૨૩: જામનગર શહેરના ખોજાવાડ પીરચોકમાં ટેકરા ઉપર રહેતાં લિયાકત ઉર્ફે લાલો અસગરભાઈ રુંજા (ઉ.વ.૩૦) નામના યુવાનને અગાઉ મહોસીન ખફી નામના શખ્સ સાથે રકઝક થઈ હતી તે અદાવતનો ખાર રાખી શુક્રવારે રાત્રિના સમયે મહોસીન ખફી, અકરમ ઉર્ફે કાળો ખફી, મહમદ ઈકબાલ ઉર્ફે ટકી ખફી, નાઝીર ખફી, નાસીર ઉર્ફે કાન કાપલો ખફી, શાહરૂખ ખફી, સદામ બાડો, આબીદ બ્લોચ, નદીમ ખફી સહિતના નવ શખ્સોએ એકસંપ કરી ધોકા-પાઈપ અને છરી જેવા પ્રાણઘાતક હથિયારો સાથે બાઈકમાં લિયાકતના ઘર પાસે આવી લિયાકત ઉપર હુમલો કર્યો હતો.

યુવાન ઉપર હુમલો થતા તેના પિતા અસગરભાઇ અને ભાઈ મુસ્તાક બંને બહાર દોડી આવ્યા હતાં અને વચ્ચે પડતા હુમલો કરવા આવેલા નવ શખ્સોએ પિતા અને ભાઈ પર પણ હુમલો કરી ઈજા પહોંચાડી પિતા અને બે પુત્રો સહિત ત્રણેયને પતાવી દેવાની ધમકી આપી હતી. હુમલાના બનાવમાં ઘવાયેલા પિતા અને બે પુત્રોને સારવાર માટે હોસ્પિટલમાં ખસેડવામાં આવ્યાં હતાં.બનાવની જાણ થતા સીટી – એના PI નિકુલ ચાવડા તથા સ્ટાફે હોસ્પિટલ પહોંચી જઇ ઈજાગ્રસ્ત લિયાકાતના નિવેદનના આધારે નવ શખ્સો વિરૂધ્ધ રાયોટીંગ હુમલો અને ધમકીનો અગે IPC કલમ ૩૨૫, ૩૨૪, ૩૨૩, ૧૪૩, ૧૪૭, ૧૪૮, ૧૪૯, ૫૦૪, ૫૦૬ (૨) તથા જી.પી.એક્ટ કલમ ૧૩૫(૧) મુજબ ગુનો નોંધી ધરપકડ માટે શોધખોળ આરંભી હતી.

જામનગરના જિલ્લા પોલીસ વડાનો નવરાત્રી મહોત્સવ ને લઈને પોલીસ પરિવારના સભ્યો માટે નો નવતર અભિગમ

• નવરાત્રી દરમિયાન પોલીસ ફરજ બજાવનારા તમામ પોલીસ કર્મચારી અને પરિવારજનો માટે એક દિવસના ગરબાનું આયોજન

દેશ દેવી ન્યુઝ જામનગર તા તા ૨૮ ઓક્ટોબર ૨૩ જામનગરના જિલ્લા પોલીસ વડા પોતાના જ પોલીસ પરિવારના કર્મચારીઓ અને તેમના પરિવાર જનો માટે સંવેદનશીલ બન્યા હતા, અને એક નવતર અભિગમો અપનાવ્યો છે. નવરાત્રીના નવ દિવસ દરમિયાન જુદા જુદા વિસ્તારોમાં ફરજ બજાવનારા પોલીસ કર્મચારી ભાઈ- બહેનો કે જેઓ પણ નવરાત્રી મહોત્સવનો આનંદ લઈ શકે, તે માટે સમગ્ર પરિવારની સાથે ના એક દિવસ ના ગરબા નું પોલીસ હેડકવટર્સમાં આયોજન કરવામાં આવ્યું હતું.જામનગરના એસ.પી. પ્રેમસુખ ડેલુ ના સાન્નિધ્યમાં આ એક દિવસ ના ગરબા મહોત્સવ નુઆયોજન કરવામાં આવ્યું હતું, જેમાં તેઓ ઉપસ્થિત રહ્યા હતા, અને માતાજીની આરતી કર્યા પછી ગરબા મહોત્સવ યોજાયો હતો. જેમાં એસ.પી. પ્રેમસુખ ડેલુ એ પણ રાસ લીધા હતા.તેઓની સાથે શહેર અને ગ્રામ્ય વિભાગના ડી.વાય.એસ.પી. પોલીસ હેડ ક્વાર્ટર ના ડી.વાય.એસ.પી. સહિતના અન્ય અધિકારીઓ, જામનગર ના એલસીબી એસઓજી તેમજ શહેરના ત્રણેય પોલીસ મથકના પીઆઇ અને પોલીસ પી.એસ.આઈ વગેરે અધિકારીઓ તેમજ તમામ પોલીસ કર્મચારીઓ પોતાના પરિવાર સાથે એક દિવસીય રાસ ગરબા મહોત્સવમાં જોડાયા હતા, અને ડાંડિયારાસનો મહોત્સવ મનાવ્યો હતો.જામનગરની ઉત્સવ પ્રેમી જનતા કેજેઓ નવરાત્રીનો આનંદ માણી શકે અને તેઓની પૂરેપૂરી સુરક્ષા જળવાયેલી રહે તે હતું તે જામનગરના તમામ પોલીસ કર્મચારીઓ સતત નવ દિવસ સુધી ખડે પગે રહ્યા હતા, અને સુરક્ષા કવચ પૂરું પાડ્યું હતું. જેઓ પણ રાસ ગરબા મહોત્સવમાં જોડાઈને એક દિવસે ગરબા લઈને પોતે પણ નવરાત્રી નો ઉત્સવ ઉજવી શકે તેવી દિશામાં જિલ્લા પોલીસ વડાપ્રધાન દ્વારા પગલું ભરવા આવ્યું હતું. જેથી પોલીસ પરિવારમાં પણ ભારે ખુશીની લહેર પ્રસરી ગઈ હતી ,અને તમામ પરિવારજનો આ ગરબા મહોત્સવ માં જોડાયા હતા.