જામનગર ખોડીયાર કોલોનીમાં આવેલા રાધે રેસ્ટોરન્ટમાં વેઈટરનું ગળું દબાવી હત્યા નિપજાવાઈ

• હોટલમાંજ સાથે કામ કરતા રસોઇયાએ મનદુઃખ રાખી ને ગળું દબાવી પતાવી નાખ્યો: આરોપી ની અટકાયત
• ૨સોયાએ હત્યા કર્યાં બાદ માલિકને બોલાવ્યો : પીએમ રીપોટે ભાંડો ફોડી નાંખ્યો

દેશ દેવી ન્યુઝ જામનગર તા ૧૧ નવેમ્બર ૨૩, જામનગર માં ખોડિયાર કોલોની વિસ્તારમાં આવેલી રાધે કાઠિયાવાડી હોટલ માં કામ કરતા ૨૯ વર્ષીય હોટલ બોય નું ગઈ રાત્રે દરમિયાન હોટલમાં રહસ્યમય સંજોગોમાં મૃત્યુ નીપજ્યું હતું. તેનું ગળું દબાવીને હત્યા કરાઇ હોવાનું તારણ નીકળ્યું હતું.પોલીસ દ્વારા સૌ પ્રથમ મૃતદેહનો કબજો સંભાળી જામનગરની સરકારી જી.જી. હોસ્પિટલમાં પોસ્ટ મોર્ટમ કરાવ્યું હતું, જેમાં તેનું ગળું દબાવવાના કારણે શ્વાસ રૂંધાઇ જવાથી મૃત્યુ નીપજ્યું હોવાનું તારણ નીકળ્યું હતું. જેથી મામલો હત્યામાં પલટાયો હતો.જે બનાવ અંગેની જાણ થતાં સીટી સી. ડિવિઝનનો પોલીસ કાગલો ઘટના સ્થળે, તેમજ જી.જી. હોસ્પિટલમાં દોડી ગયો હતો, અને ઊંડાણપૂર્વક તપાસના અંતે હત્યા કેસનો ભેદ ઉકેલી નાખ્યો હતો.હોટલમાં જ રસોઇયા તરીકે કામ કરતા તારુરામ વીરારામ નાગર કે જે હાલ હોટલમાં જ રહે છે, પરંતુ પોતે મૂળ રાજસ્થાન નો વતની છે. જેને હોટલ બોય તરીકે માલિક દ્વારા વિનિત જગદીશ પટેલને હોટલમાં વેઈટર તરીકે રાખ્યો હોવાનું ગમ્યું ન હતું ,તેથી મનદુઃખ રાખીને રાત્રિ દરમિયાન મૃતક વિનીત સાથે ઝપાઝપી કરી ગળું દબાવી તેની હત્યા નીપજાવી હતી.આ બનાવ અંગે પોલીસે હોટલના માલિક નાઘેડીમાં રહેતા દિલીપભાઈ ડૂઆ ની ફરિયાદના આધારે હોટલના રસોઇયા તારુરામ નાગર સામે હત્યા અંગેનો ગુનો નોંધ્યો છે, અને પી.આઇ. એ. આર. ચૌધરી દ્વારા આરોપી રસોઇયાની ધરપકડ કરી લેવામાં આવી છે, અને ઘનિષ્ઠ પૂછપરછ હાથ ધરી છે.પોલીસ દ્વારા રાધે રેસ્ટોરન્ટના સીસીટીવી ના ફૂટે જ નિહાળ્યા હતા, જેમાં સમગ્ર મામલો ઉજાગર થયો હતો તે સીસીટીવી ના ફૂટેજ પોલીસે કબજે કરી તપાસ શરૂ કરી છે.

જામનગરના ૭૮- વિધાનસભા વિસ્તારમાં જુદાજુદા કેન્દ્રો પર ધારાસભ્ય રીવાબા જાડેજા દ્વારા શ્રમિક અન્નપૂર્ણા યોજના કેન્દ્રનો કરાયો પ્રારંભ

દેશ દેવી ન્યુઝ જામનગર તા ૧૦ નવેમ્બર ૨૩, ગુજરાત રાજ્ય સરકાર દ્વારા આજે શ્રમિક અન્નપૂર્ણા યોજના અંતર્ગત નવા ૧૫૫ કેન્દ્રો પર ગુજરાત રાજ્યના મુખ્યમંત્રી ભુપેન્દ્રભાઈ પટેલની ઉપસ્થિતિમાં શ્રમિક અન્નપૂર્ણા યોજનાનો પ્રારંભ કરાયો છે, જેની સાથે સાથે જામનગરમાં ૭૮- ઉત્તર વિધાનસભા વિસ્તારમાં ધારાસભ્ય રિવાબા જાડેજા ની ઉપસ્થિતિમાં અલગ અલગ ૧૦ કેન્દ્ર પર થી શ્રમિક અન્નપૂર્ણા યોજનાનો પ્રારંભ કરવામાં આવ્યો છે, અને માત્ર પાંચ રૂપિયામાં શ્રમિક પરિવારજનોને પોસ્ટિક આહાર મળી રહે, તેવી વ્યવસ્થા ગોઠવવામાં આવી છે.

જામનગર માં ૭૮- ઉત્તર વિધાનસભા વિસ્તારના ધારાસભ્ય રીવાબા જાડેજાની ઉપસ્થિતિમાં આજે ધનતેરસના પવિત્ર તહેવારના દિવસે શ્રમિક અન્નપૂર્ણા યોજના કેન્દ્રનો પ્રારંભ કરવામાં આવ્યો હતો. આ વેળાએ તેઓની સાથે સાસકપક્ષના નેતા આશિષ જોષી, કોર્પોરેટર કિશનભાઇ માડમ, સુભાષ જોશી, સરોજબેન વિરાણી, પૂર્વ કોર્પોરેટર ધર્મેન્દ્રસિંહ ઝાલા શહેર ભાજપના મહામંત્રી મેરામણભાઇ ભાટુ ઉપરાંત શહેર ભાજપના અન્ય વોર્ડના કાર્યકરો વગેરેની ઉપસ્થિતિમાં જુદા જુદા કેન્દ્ર પરથી શ્રમિકોને ભોજન પીરસવામાં આવ્યું હતું, જ્યારે સૌપ્રથમ શ્રમિકોની સાથે ધારાસભ્ય રિવાબા જાડેજા કે જેમણે પણ શ્રમિકોની સાથે સાથે ભોજન આરોગ્ય હતું.

જામનગરની એક પરણીતાએ પોતાના પતિ અને મામીજી સાથેના આડા સંબંધ ના કારણે મારકૂટ સહિતના ત્રાસ થી કંટાળી અગ્નિસ્નાન કર્યું

• મામીજી સાથે ના આડા સંબંધ ના કારણે પતિ અને મામીજી તથા તેના બે પુત્રોએ મારકુટ કરી ત્રાસ ગુજાર્યા ની ફરિયાદ નોંધાવાઇ

દેશ દેવી ન્યુઝ જામનગર તા ૧૦ નવેમ્બર ૨૩, જામનગર ના ગુલાબ નગર વિસ્તારમાં રહેતી એક પરણીતાએ પોતાના પતિ અને મામીજી સાથેનાઅનૈતિક સંબંધોના કારણે તેમજ તેઓની મારકુટ સહિત ના ત્રાસ ના કારણે જિંદગીથી તંગ આવી જઈ અગ્નિ સ્નાન કરી લેતાં તેણીને સારવાર માટે હોસ્પિટલમાં ખસેડાઈ છે. પોલીસે તેણીના પતિ- મામીજી અને તેના બે પુત્રો સામે ત્રાસ અંગે ગુન્હો નોંધ્યો છે.આ ચકચારજનક બનાવની વિગત એવી છે કે જામનગરના ગુલાબ નગર વિસ્તારમાં રહેતી વૈશાલીબેન કિશોરભાઈ રાઠોડ નામની ૨૮ વર્ષની પરણીતાએ પોતાના ઘેર કાયા પર કપાસિયા નું તેલ છાંટી અગ્નિસ્નાન કરી લેતાં દાઝી જવાથી તેણીને સારવાર માટે જામનગરની જી.જી. હોસ્પિટલમાં દાખલ કરવામાં આવી છે. જયાં તેણીની સધન સારવાર ચાલી રહી છે.આ બનાવની જાણ થતાં મહિલા પોલીસ સ્ટેશન નો સ્ટાફ જી.જી હોસ્પિટલ દોડી ગયો હતો, અને તેણીનું નિવેદન નોંધ્યું હતું.જેમાં વૈશાલીબેનના જણાવ્યા અનુસાર તેણીના પતિ કિશોરભાઈ રણછોડભાઈ રાઠોડ કે જેને મામીજી સાથે આડા સંબંધો હોવાનો આક્ષેપ કર્યો હતો જે બંને વચ્ચેના સંબંધના કારણે તેણીને પતિ કિશોર મારકુટ કરતો હતો. મામીજીના બે પુત્રો ભરત અને મયંક પણ મારકુટ કરી ત્રાસ આપતા હોવાથી તમામના ત્રાસના કારણે અગ્નિ સ્થાન કરી લીધું હોવાનું જણાવ્યું હતું. જેથી મહિલા પોલીસ સ્ટેશનના PSI આર.એ. ચણિયારા એ વૈશાલીબેનની ફરિયાદ ના આધારે તેણીના પતિ કિશોર રાઠોડ ઉપરાંત મામીજી અને તેના બે પુત્રો ભરત અને મયંક સામે આઈપીસી કલમ ૪૯૮ એ, ૩૨૩ ને ૧૧૪ મુજબ ગુનો નોંધી આગળની તપાસ શરૂ કરી છે.

જામનગર નજીક હાપા રેલવે સ્ટેશન પર સુઈ રહેલા યુવાન પર છરી વડે હુમલો કરવાના પ્રકરણમાં દેશી દારૂ કારણભૂત

• ફરિયાદી યુવાન પાસે દારૂ પીવાના પૈસા માંગતાં આપ્યા ન હોવાથી હાપા ના બાવરી શખ્સે હુમલો કર્યાનો ગુન્હો નોંધાયો

દેશ દેવી ન્યુઝ જામનગર તા ૧૦ નવેમ્બર ૨૩  જામનગર નજીક હાપા રેલવે સ્ટેશન પર બાંકડા પર સૂઈ રહેલા એક યુવાન પર છરી વડે હુમલો કરાયો હતો, જે હુમલા પ્રકરણમાં પોલીસે દારૂ પીવાના પૈસા ની માંગણી કરનારને પૈસા નહીં આપતાં ઉશ્કેરાઈ જઇ છરી વડે હુમલો કરવા અંગે ની ફરિયાદ નોંધાવી છે.પોલીસ ફરિયાદમાં જાહેર કરાયા અનુસાર ફરીયાદી કનૈયાલાલ લક્ષ્મણભાઈ ચૌહાણ ભિક્ષાવૃતિ કરીને હાપા બાવરીવાસમાં રહે છે તેણે દારૂ પીવા માટે પૈસા માગ્યા હતા.જેની ના પાડતા જે હાપા ખારી વિસ્તારમાં જ રહેતા રાજેશભાઈ રતનભાઇ સામે પોતાના ઉપર છરી વડે હુમલો કરી ઇજા પહોંચાડયાની ફરિયાદ નોંધાવતાં પોલીસે આઇપીસી કલમ ૩૨૬, તથા જીપીએક્ટ કલમ ૧૩૫ મુજબ ગુનો નોંધ્યો છે, અને આરોપી ને શોધી કાઢવા માટેની કવાયત હાથ ધરી છે.

જામનગર નજીક ની રંગમતી નદી મા માછલા નાં મોત માટે ઝેરી કેમિકલ જવાબદાર હોવા નું પ્રાથમિક તારણ

દેશ દેવી ન્યુઝ જામનગર તાં. ૧૦ નવેમ્બર ૨૩, જામનગર તાલુકા ના દરેડ – ચેલા માર્ગે રંગમતી નદી ના પાણી માંથી હજારો ની સંખ્યામાં મૃત માછલા નજરે ચડ્યા હતા. જે અંગે પ્રદુષણ નિયંત્રણ બોર્ડ દ્વારા નાદી નાં પાણીના સેમ્પલ લેવામાં આવ્યા હતા. તેમાં પ્રાથમિક કારણ એવું જણાયું હતું કે ઝેરી અને કેમિકલ યુક્ત પાણી ના કારણે માછલા નાં મૃત્યુ થયા હતા. પરિણામે આ વિસ્તારમાં ચાલતા એક કારખાના ને બંધ કરવા પણ આદેશ કરવામાં આવ્યો છે.જામનગર નજીકના દરેડ ગામ પાસે થી પસાર થતી રંગમતી નદી ના પાણી માંથી બે દિવસ પહેલા અસંખ્ય માછલા નાં મૃતદેહ મળી આવ્યા હતા. આથી જામનગર ની પ્રદૂષણ નિયંત્રણ બોર્ડ ની કચેરીના અધિકારી કલ્પનાબેન પરમાર પોતાની ટીમ સાથે તપાસ સાથે દોડી ગયા હતા. અને અલગ અલગ ચાર થી પાંચ જગ્યાએ થી નદીના પાણી માંથી નમુના લઇ પૃથ્થકરણ માટે મોકલ્યા હતા. જેમાં પ્રાથમિક તારણ એવું જાણવા મળ્યું હતું કે કેમિકલ યુક્ત ઝેરી પાણી કારણે આ માછલા ના મૃત્યુ થયા છે.બીજી તરફ નજીક મા ધમધમતા એક બ્રસ્પાર્ટસ યુનિટ માંથી એસીડ વાળું કેમિકલયુક્ત પાણી નદી મા છોડવા માં આવતું હોવા નું ધ્યાનમાં આવતા આ યુનિટ ને બંધ કરવા નો પ્રદૂષણ નિયંત્રણ બોર્ડ ની કચેરી દ્વારા આદેશ આપવા મા આવ્યો છે.

જામનગરના વેપારીઓ તથા આંગડીયા પેઢીના સંચાલકો સાથે સિટી-એ ડિવિઝન પોલીસ સ્ટેશનમાં દિવાળીના તહેવાર નિમિત્તે બેઠક યોજાઇ

દેશ દેવી ન્યુઝ જામનગર તા ૯ નવેમ્બર ૨૩ જામનગરના સિટી-એ ડિવિઝન પોલીસ સ્ટેશનમાં જામનગરના વેપારી એસોસિએશન ના હોદેદારો, જામનગર સોની બજાર ના વેપારીઓ, તેમજ આંગડીયા પેઢીના સંચાલકો સાથે દિવાળી ના તહેવારને ધ્યાને લઇ સિટી-એ ડિવિઝન પોલીસ સ્ટેશનના પીઆઇ નિકુંજ ચાવડાના અધ્યક્ષસ્થાને બેઠક યોજાઇ હતી.આ બેઠકમાં સિટી-એ ડિવિઝન પોલીસ સ્ટેશન ના પી.આઇ. નિકુંજ ચાવડા દ્વારા દિવાળી ના તહેવારો દરમ્યાન વેપારીઓને, અથવાતો ખરીદી કરવા આવનાર લોકોને કોઇ અગવડતાઓ ‘ન’ પડે તે માટે જરૂરી પોલીસ બંદોબસ્ત રાખી તકેદારીના પગલાં લેશે તેવી કટીબદ્ધતા દર્શાવી હતી.ઉપરાંત તહેવાર દરમ્યાન મોટી સંખ્યામાં લોકો ખરીદી કરવા આવતા હોય છે, ત્યારે શહેરની બજારમાં ભીડ એકત્ર થતી હોય છે, તેથી બજારમાં ભીડનો ગેરલાભ લેવા માટે ખિસ્સા કાતરુઓ અને ચિલઝડપ કરનાર તથા ગુનાહીત પ્રવૃતિઓ થતી હોય છે. તેથી લોકો હર્ષોલ્લાસ થી દિવાળીના પર્વની ઉજવણી કરી શકે તેવા હેતુ થી સિટી-એ ડિવિઝન પોલીસ દ્વારા ફુટ પેટ્રોલિંગ કરવામાં આવ્યું હતું. અને સીટી એ. ડિવિઝન પોલીસ સ્ટેશન હેઠળના વિસ્તારમાં માર્ચ પાસ્ટ પણ કરવામાં આવી હતી.

વેપારીઓ સાથેની બેઠકમાં જામનગર વેપારી મહામંડળના પ્રમુખ સુરેશભાઈ તન્ના, ગુજરાત સુવર્ણકાર સુરક્ષા સેતુ જામનગર ના પ્રમુખ સુભાષભાઈ પાલા, ઉપપ્રમુખ ધર્મેશભાઈ વડનગરા, કિશોરભાઈ મોનાણી, રાજુભાઈ વડનગરા, જયકિશનભાઈ પાલા, હર્ષભાઈ થડેશ્વર, જયેશભાઈ માંડલિયા તથા સોની સમાજના આગેવાન કિશોરભાઈ ભૂવા સહિતના આગેવાનો ઉપસ્થિત રહ્યા હતા. આ ઉપરાંત સિટી-એ ડિવિઝન વિસ્તારમાં આવતા આંગળીયા પેઢીના માલિક તથા કર્મચારીઓ પણ ઉપસ્થિત રહ્યા હતા.

જામનગર મા ડ્રગ્સ અને સાયબર ક્રાઈમથી બચવા માટે અવરનેશ કાર્યક્રમ યોજાયો

• એસ ઓ જી પોલીસ દ્વારા કોલેજના વિદ્યાર્થીઓ ને જાગૃત કરાયા

દેશ દેવી ન્યુઝ જામનગર તા. ૭, નવેમ્બર ૨૩   પ્રવર્તમાન સમય મા નશા નું દૂષણ યુવા વર્ગ મા વધતું જાય છે .સાથે જ સાયબર ગુના નું પ્રમાણ પણ વધી રહ્યું છે .ત્યારે જામનગર મા આ.અંગે અવરનેશ માટે એસ ઓ જી પોલીસ દ્વારા જાણ જાગૃતિ કાર્યક્રમ નું આયોજન કરવામાં આવ્યું હતું.ગત તાં. ૬/૧૧/૨૩ ના રોજ જામનગર ની કોમર્સ કોલેજ ,ડી.કે.વી. માં એસ ઓ જી.પોલીસ દ્વારા ગાંજો, ડ્રગ્સ, અન્ય કોઈ નશા કારક વસ્તુ વિશે વિદ્યાર્થીઓ માં જાગૃતી આવે તે માટે અવેરનેશ કાર્યક્રમનું આયોજન કરવામાં આવ્યું હતું. તેમજ સાયબર ક્રાઇમ નાં વિવિધ પ્રકારો વિષે તથા સાયબર ક્રાઇમ થી કઇ રીતે સુરક્ષિત રહેવું તે અંગે માર્ગદર્શન આપી જાગૃત કરવાનો પ્રયાસ કરવામાં આવ્યો હતો.આ ઉપરાંત તાં ૭ નાં રોજ જામનગર.ની કે.પી. શાહ લો કોલેજ મા પણ એસ ઓ જી.પોલીસ દ્વારા (ગાંજો, ડ્રગ્સ, અન્ય કોઈ નશા કારક વસ્તુ વિશે વિધાર્થી ઓ માં જાગૃતી આવે તે માટે અવેરનેશ કાર્યક્રમ નું આયોજન કરવામાં આવ્યું હતું. તેમજ સાયબર ક્રાઇમ.નાં વિવિધ પ્રકારો વિષે તથા સાયબર ક્રાઇમ થી કઇ રીતે સુરક્ષિત રહેવું તે અંગે માર્ગદર્શન આપવામાં આવ્યું હતું.

જામનગર સીટી’સી’ પોલીસ સ્ટેશનના હેડ કોન્સ્ટેબલ વતી રૂ.22 હજારની લાંચ લેનાર હોમગાર્ડ એસીબીના હાથે રંગે હાથ ઝડપાયો

• દારૂના કેસમાં માંગી હતી બાવીસ હજારની લાંચ : ACBના છટકામાં કોન્સટેબલવતી હોમગાર્ડ સપડાયો

દેશ દેવી ન્યુઝ જામનગર તા ૬ નવેમ્બર ૨૩ શહેરના સીટી ‘સી’ ડિવિઝન પોલીસ વિસ્તારમાં આવતી ખોડીયાર કોલોની પોલીસ ચોકીના હેડ કોન્સ્ટેબલ કલ્પેશ ગઢવી વતી રૂ.22,000 ની લાંચ લેતા હોમગાર્ડ હરપાલસિંહ જાડેજા રંગેહાથ ઝડપાયો હતો. તેમજ એસીબીની ટીમે હેડ કોન્સ્ટેબલ કલ્પેશ ગઢવીની શોધખોળ હાથ ધરી છે.એક દારૂના કેસ મામલે પોલીસકર્મી કલ્પેશ ગઢવીએ રૂ.30,000ની લાંચની માંગણી કરી હતી. જે દારૂ સાથે દારૂનો ધંધાર્થી ઝડપાયો હતો તેણે અગાઉ 8000 રૂપિયા આપતા લાંચ માગનારે લઈ લીધા હતા. બાકીના રૂપિયા 22,000 લેવા જતા પોલીસકર્મી કલ્પેશ ગઢવી વતી હોમગાર્ડ હરપાલસિંહ જાડેજા એસીબીના હાથે રંગે હાથ ઝડપાય ગયો હતો. હાલ તો જામનગર એસીબી દ્વારા હોમગાર્ડની વધુ પૂછપરછ કરવામાં આવી રહી છે અને હેડ કોન્સ્ટેબલ કલ્પેશ ગઢવીની શોધખોળ હાથ ધરવામાં આવી છે.

જામનગરમાં ટ્રાફીકને અડચણરૂપ બે દિવાળી સિઝન સ્ટોલ પેાલીસની ઝપટે ચડ્યા

દેશ દેવી ન્યુઝ જામનગર તા. ૬ નવેમ્બર ૨૩ જામનગર શહેરમાં જાહેર માર્ગો પર દિવાળીની સિઝનની ચીજ વસ્તુના આડેધડ સ્ટોલ ફુટી નિકળ્યા છે. ત્યારે ગઈકાલે સીટી બી. ડીવીઝન પોલીસે બે દિવાળી સિઝન સ્ટોલ સંચાલક સામેં ગુન્હો નોંધી કાયદેસરની કાર્યવાહી હાથ ધરી છે.સીટી બી. ડીવીઝન પોલીસ મથકના મહિલા કોન્સ્ટેબલ ચંદ્રીકાબેન અશોકકુમાર પંડ્યા અને દશરથસિંહ મોહબતસિંહ પરમાર સહિતના હનુમાન ગેઈટ પોલીસ ચોકી વિસ્તારમાં પેટ્રોલીંગમાં હતા તે દરમિયાન ડીકેવી પાસે જાહેર માર્ગ પર ટ્રાફીકને અવરોધરૂપ દિવાળી સીઝનનો સ્ટોલ ઉભો કરનાર જગદીશભાઈ બહાદુરભાઈ રાણા અને બીજા સ્ટોલ ધારક પરેશભાઈ મધુભાઈ ડોણાસિયા વિરૂદ્ધ ઈ.પી. કો. કલમ ૩૮૩ મુજબનો ગુનો દાખલ કરી નોટિસ આપી મુકત કર્યા હતા.

લાલપુર તાલુકાના કાનાલુસ ગામમાં રહેતી અપરણિત યુવતી લાપતા બની જતાં પોલીસ દ્વારા શોધખોળ

દેશ દેવી ન્યુઝ  જામનગર તા ૬ નવેમ્બર ૨૩ જામનગર જિલ્લાના લાલપુર તાલુકાના કાનાલુસ ગામમાં રહેતી અને બી.એડ. કોલેજ સુધીનો અભ્યાસ કરનારી અપરણિત યુવતી એકાએક લાપતા બની જતાં પોલીસમાં ગુમનોંધ કરાવાઈ છે, જેને પોલીસ શોધી રહી છે.જામનગર જિલ્લાના લાલપુર તાલુકા ના કાનાલુસ ગામમાં રહેતા રવજીભાઈ મેપાભાઇ સોલંકી ની ૩૨ વર્ષીય અપરણિત પુત્રી અરુણાબેન રવજીભાઈ સોલંકી કે જેણે બી.એડ. કોલેજ સુધીનો અભ્યાસ કર્યો છે, અને હાલ નોકરી પણ કરી રહી છે.જે ગઈકાલે પોતાના ઘેરથી એકાએક લાપતા બની ગઈ હતી. પરિવારજનો દ્વારા તેણીની અનેક સ્થળે શોધખોળ કર્યા પછી પણ કોઈ પત્તો નહીં સાંપડતાં આખરે પિતા રવજીભાઈ દ્વારા મેઘપર પડાણા પોલીસ મથકનો સંપર્ક સાધવામાં આવ્યો હતો, અને ગુમનોંધ કરાવાઈ છે. જે ગુમ થનાર અરુણાબેન મેઘપર પોલીસ શોધી રહી છે.