કાલાવડ તાલુકા ના આણંદપર ગામના ખેડૂત નાં ઘર મા ખાતર પાડતા તસ્કરો: રૂ ૯૫ લાખ ની માતબર રોકડ ની ચોરી

• ડીવાયએસપી- એલસીબી- સ્થાનિક પોલીસ દ્વારા તપાસ શરૂ કરાઇ: પોલીસ દ્વારા ફરિયાદીની પણ ઉલટ તપાસ

દેશ દેવી ન્યુઝ જામનગર તા.૯ ડીસેમ્બર ૨૩, જામનગર જિલ્લા ના કાલાવડ તાલુકા ના આણંદપર ગામ માં એક ખેડૂત નાં રહેણાંક મકાન માં થી તસ્કરો ધોળા દિવસે રૂ.. ૯૫ લાખ ની મતબાર રોકડ રકમ ની ચોરી કરી લઇ ગયા હતા. આ સમગ્ર ઘટના પછી પોલીસે દોડધામ શરૂ કરી છે. આ ચોરી મામલે પોલીસે થોડી શંકા ઉત્પન્ન કરી છે, અને ફરિયાદી તથા તેના નિકટવર્તીઓની પણ ઉલટ તપાસ કરવામાં આવી રહી છે. નજીકના ભવિષ્યમાં જ આ ચોરીનો ભેદ ઉકેલાઈ જાય તેવો આશાવાદ પોલીસ સેવી રહી છે.મળતી પ્રાથમિક માહિતી મુજબ કાલાવડના આણંદપર ગામના એક ખેડૂતે પોતના ઘરમાંથી રૃા. ૯૫ લાખની રોકડ રકમની ચોરી થવા અંગે પોલીસને જાણ કરતાં જ કાલાવડ ગ્રામ્યના પોલીસ સબ ઇન્સ્પેક્ટર એચ.વી. પટેલ બનાવના સ્થળે પહોંચી ગયા હતા. અને પ્રાથમિક તપાસ નો ધમધમાટ શરૂ કર્યો હતો. આણંદપર ગામ ના ખેડૂત દીપકભાઈ ભીખાભાઈ જેસડીયા એ તાજેતર માં પોતાની સંયુક્ત માલિકી ની ચાર એકર ખેતી ની જમીન નું વેંચાણ કર્યં હતું. જેમાંથી પાર્ટ પેમેન્ટ તરીકે મળેલ રૂ.બે કરોડ ની રકમ છએક માસ થી પોતાના ઘર મા રાખી હતી.કારણ કે એ પૈસા ની અન્ય સ્થળે જમીન ખરીદવા ની હતી .

બે કરોડ માંથી ૨૦ લાખ અન્યોને આપી દીધા પછી વધેલી રકમ માંથી ૯૫ લાખ ની રકમ પોતા નાં રૂમ મા અને ૮૫ લાખ ની રોકડ રકમ પોતાના પિતાના રૂમ મા રાખી હતી.દરમ્યાન ગઇકાલે તેમના પિતા અને બે ભાઈઓ બહારગામ જમીન જોવા ગયા હતા.જ્યારે દીપકભાઈ અને તેમના પત્ની બાળકો એક પ્રસંગ મા હાજરી આપવા રાજકોટ ગયા હતા.લગભગ ચારેક કલાક પછી ગઇકાલે સાંજે પરત ફરેલા દીપકભાઈ ના ઘર ના દરવાજા ખુલ્લા જોવા મળતાં તેઓને ચોરી ની શંકા ગઈ હતી.અને તપાસ કરતાં પોતાના રૂમ માથી ૯૫ લાખ ની રકમ ગાયબ હોવા નું જણાયું હતું.જ્યારે તુરત પિતા નાં રૂમ માં તપાસ કરતાં ત્યાં રૂ.૮૫ લાખ રકમ સલામત હતી આખરે ગઇકાલે જાત તપાસ પછી આજે દીપકભાઈ પોલીસમાં જાણ કરતાં પો.સબ.ઇન્સ પટેલ તપાસ માટે દોડી ગયા હતા.

આ બનાવની જાણ થતાં જ એફએસએલ અને ડોગ સ્ક્વોડની ટુકડી પણ મદદે પહોંચી છે. તેમજ ડીવાયએસપી, એલસીબી તથા સ્થાનિક પોલીસનો સ્ટાફ તપાસ માટે પહોંચ્યો છે. આ કૃત્ય કોઈ જાણભેદુ નું છે કે કેમ ? તે દિશામાં પણ પોલીસ દ્વારા તપાસ કરવામાં આવી રહી છે, સાથોસાથ આ ચોટી બાબતે પણ પોલીસને શંકા જાગી છે. અને પોલીસ દ્વારા ફરિયાદી તથા તેના પરિવારજનોની પણ ઉલટ તપાસ કરવામાં આવી રહી છે. અને નજીકના ભવિષ્યમાં જ આ ચોરીનો ભેદ ઉકેલાઈ જાય તેવો આશાવાદ પોલીસ સેવી રહી છે.

કાલાવડ તાલુકાના જસાપર ગામની અપરણીત યુવતીનો અગમ્ય કારણસોર ગળા ફાંસા દ્વારા આપઘાત

દેશ દેવી ન્યુઝ જામનગર તા ૯ ડીસેમ્બર ૨૩, જામનગર જિલ્લાના કાલાવડ તાલુકા ના જશાપર ગામમાં રહેતી અપરણીત યુવતીએ કોઈ અગમ્ય કારણસર પોતાના ઘેર ગળાફાંસા દ્વારા આત્મહત્યા કરી લઇ પોતાની જીવન લીલા સંકેલી લીધી છે.આ બનાવની વિગત એવી છે કે કાલાવડ નજીક જસાપર ગામમાં રહેતી રિધ્ધીબેન મનસુખભાઈ કાછડીયા નામની ૨૪ વર્ષીય પટેલ જ્ઞાતિની યુવતીએ ગઈકાલે પોતાના ઘેર પંખા ના હુકમાં દોરડું બાંધી ગળા ફાંસા દ્વારા આપઘાત કરી લીધો હતો.આ બનાવ અંગે મૃતકના પિતા મનસુખભાઈ કાછડીયાએ પોલીસને જાણ કરતાં કાલાવડ ટાઉન પોલીસે ઘટના સ્થળે દોડી જઈ મૃતદેહનો કબજો સંભાળ્યો છે, અને પોસ્ટ મોર્ટમ સહિતની કાર્યવાહી હાથ ધરી છે.

જામનગર નજીક દરેડ-મસીતીયા રોડ પર એક ભાડાની ઓરડીમાંથી ગેરકાયદે રાંધણ ગેસના બાટલામાંથી ગેસ રિફિલિંગ નું કારસ્તાન પકડાયું

• એસ.ઓ.જી.ની ટુકડીએ પાડેલા દરોડામાં પરપ્રાંતિય શખ્સ ગેરકાયદે ગેસ રિફિલિંગ નું કૌભાંડ ચલાવતા રંગે હાથ પકડાયો
• ૧૮ નંગ રાંધણ ગેસ ભરવા માટેના ખાલી અથવા ભરેલા બાટલા: ગેસની નળી- રેગ્યુલેટર- વજન કાંટો સહિતની સામગ્રી કબજે

દેશ દેવી ન્યુઝ જામનગર તા ૯ ડીસેમ્બર ૨૩, જામનગર નજીક દરેડ મસીતીયા રોડ પર એક ભાડાની ઓરડીમાં રાંધણ ગેસના બાટલા માંથી ગેસ રીફિલિંગ નું કારસ્તાન ચલાવવામાં આવી રહ્યું હોવાનું અને લોકોના જન આરોગ્ય સાથે ચેડાં કરવામાં આવી રહ્યા નું એસ.ઓ.જી. શાખા ને ધ્યાનમાં આવ્યું હતું.જેથી એસ.ઓ.જી. ની ટુકડીએ દરોડો પાડી એક શખ્સને અટકાયતમાં લીધો છે, અને તેની પાસેથી નાના મોટા ૧૮ નંગ રાંધણ ગેસના ખાલી-ભરેલા બાટલા સહિતની સામગ્રી કબજે કરી છે.આ દરોડાની વિગત એવી છે કે મૂળ ઉત્તર પ્રદેશ નો વતની પરપ્રાંતિય શખ્સ કે જે દરેડ મસીતિયા રોડ પર એક ઓરડી ભાડે રાખીને તેમાં ગેસ રિફિલિંગ નો કારસ્તાન ચલાવી રહ્યો છે, તેવી એસ.ઓ.જી.શાખા ને મળી હતી. જેથી ગઈકાલે સાંજે એસ.ઓ.જી.ની ટુકડીએ ઉપરોક્ત સ્થળે પહોંચી જઇ દરોડો પાડયો હતો.જે દરોડા દરમિયાન એક શખ્સ દ્વારા રાંધણ ગેસના બાટલામાં ઇલેક્ટ્રીક મોટર અને પ્લાસ્ટિકની નળી વગેરે જોઈન્ટ કરીને અન્ય નાના બાટલામાં કૌભાંડ ચલાવવામાં આવતું હોવાનું અને લોકોના જીવ જોખમાય તેવુ કારસ્તાન કરવામાં આવી રહયું હોવાનું ધ્યાનમાં આવ્યું હતું.જેથી એસ.ઓ.જી. ની ટુકડીએ ઓરડી ભાડે રાખનાર શખ્સ નું નામ પૂછતાં તેણે પોતાનું નામ નિશાંત ઉર્ફે જશવંત રામનાથ શ્રીવાસ્ત અને મૂળ ઉત્તર પ્રદેશના બરેલી જિલ્લાના જાગીર ગામનો વતની હોવાનું જણાવ્યું હતું. જે ગેરકાયદે રીતે રાંધણ ગેસના બાટલા માંથી ગેસ રીફીલિંગ કરી તેનું ખાનગીમાં વેચાણ કરતો હોવાનું જણાવ્યું હતું.

એસ.ઓ.જી.વની ટુકડીએ બનાવના સ્થળેથી ખાલી અને ભરેલા નાના-મોટા ૧૮ નંગ રાંધણ ગેસના બાટલા, ઉપરાંત ઈલેક્ટ્રીક મોટર, ગેસના બાટલાનું રેગ્યુલેટર ઇલેક્ટ્રીક વજન કાંટો સહિત ની સામગ્રી કબ્જે કરી લીધી છે, અને પર પ્રાંતિય શખ્સ નિશાંત શ્રીવાસ્તવ ની અટકાયત કરી લઈ તેની સામે પંચકોશી બી. ડિવિઝન પોલીસ મથકમાં ગુનો દાખલ કરાવાયો છે.

જામનગર નજીક દરેડ વિસ્તારમાં બાળમજૂરોને ચેક કરવાના મામલે ચાઈલ્ડ લેબર ટાસ્કફોર્ષ ના ૧૦ કારખાનાઓ ઉપર દરોડા

• એક કારખાના માં ૧૪ વર્ષથી નાની વયની બાળા પાસેથી મજૂરી કામ કરાવાતું હોવાથી કારખાનેદાર સામે લેબર એક્ટનો ગુનો નોંધાયો

દેશ દેવી ન્યુઝ જામનગર તા ૮ ડીસેમ્બર ૨૩, જામનગર ની ચાઈલ્ડ લેબર ટાસ્ક ફોર્ષ ની ટૂકડી દ્વારા ગઈકાલે દરેડ વિસ્તારમાં બાળમજૂરી અંગે ચેક કરવામાં આવ્યું હતું, અને અંદાજે ૧૦ જેટલા કારખાનાઓ ચેક કરાયા હતા. જે પૈકી એક કારખાનામાંથી ૧૪ વર્ષથી નાની વયની એક બાળા પાસે મજૂરી કામ કરાવાતું હોવાનું ધ્યાનમાં આવ્યું હોવાથી કારખાનેદાર સામે ગુનો નોંધવામાં આવ્યો છે. જેને લઈને બાળમજૂરી કરાવતા ઉદ્યોગકારોમાં ફફડાટ મચી ગયો છે જામનગરની ચાઈલ્ડ લેબર ની કચેરી ના ગેજેટેડ ઓફિસર ડો. ડી.ડી. રામીની રાહબરી હેઠળ સમગ્ર ટાસ્કફોર્સ ની ટીમ દ્વારા દરેડ વિસ્તારમાં સરપ્રાઈઝ ચેકિંગ કરવામાં આવ્યું હતું. અને બાળમજૂરી અંગે અંદાજે ૧૦ કારખાનાઓ ચેક કરવામાં આવ્યા હતા.જે પૈકી હિંગળાજ સ્ક્રેપ નામના એક કારખાનામાં ચકાસણી દરમિયાન ૧૪ વર્ષથી નાની વયની એક બાળા મજૂરી કામ કરતાં મળી આવી હતી. જે બાળા પોતાની માતા સાથે કારખાને કામ કરવા આવતી હોવાનું ધ્યાનમાં આવ્યું હતું, તેથી ટાસ્કફોર્સની ટીમ ના કે જે જેમણે ઉદ્યોગકાર સામે ફરિયાદ નોંધાવી છે. મદદનીશ શ્રમ આયુક્ત ની કચેરીના ગેઝેટેડ ઓફિસર ડો. ડી.ડી. રામી જાતે ફરિયાદી બન્યા હતા, અને પંચકોશી બી. ડિવિઝન પોલીસ મથકમાં કારખાનેદાર જીતેન્દ્રભાઈ કાંતિલાલ નંદા સામે ફરિયાદ નોંધાવતાં પોલીસે ધી ચાઈલ્ડ લેબર (પ્રોહીબિશન એન્ડ રેગ્યુલેશન) એમેનડમેન્ટ એક્ટ ૧૯૮૬ ની કલમ ૩ મુજબ ગુન્હો નોંધ્યો છે, અને કારખાનેદાર ની અટકાયત કરવા કાર્યવાહી હાથ ધરી છે.

જામનગરમાં દિગ્વિજય પ્લોટ વિસ્તારમાંથી ડુપ્લીકેટ ઘી બનાવવાનું કારસ્તાન પકડાયું

• ૫૫૫ કિલો નકલી ઘી ના જથ્થા સાથે એસ.ઓ.જી. ની ટિમ દ્વારા મહાજન શખ્સની પૂછપરછ હાથ ધરાઈ

દેશ દેવી ન્યુઝ જામનગર તા ૮ ડીસેમ્બર ૨૩ જામનગરના દિગ્વિજય પ્લોટ વિસ્તારમાં એક શખ્સ દ્વારા પોતાના રહેણાંક મકાનમાં ડુપ્લીકેટ ઘી બનાવવાનું કારસ્તાન ચલાવવામાં આવતું હોવાની બાતમીના આધારે એસ.ઓ.જી. ની ટુકડીએ ફુડ એન્ડ ડ્રગ્સ વિભાગની ટીમને સાથે રાખીને દરોડો પાડી એક મહાજન શખ્સને અટકાયતમાં લઈ તેની પૂછપરછ શરૂ કરી છે અને તેના કબજા માંથી ૫૫૫ કિલો ડુપ્લીકેટ મનાતો ઘી નો જથ્થો કબજે કર્યો છે, અને એફએસએલ મારફતે લેબોરેટરી માં મોકલી આપ્યો છે.આ દરોડા ની વિગત એવી છે કે એસ.ઓ.જી. ની ટુકડીને ચોક્કસ બાતમી મળી હતી કે, જામનગરમાં દિગ્વિજય પ્લોટ શેરી નંબર ૪૯ માં રહેતા ચિરાગ મનસુખલાલ હરિયા નામના મહાજન શખ્સ દ્વારા પોતાના રહેણાંક મકાનની અંદર બનાવટી ઘી તૈયાર કરવાનું અને તેનું ખાનગીમાં વેચાણ કરવાનું કારસ્તાન ચલાવવામાં આવી રહ્યું છે, તેવી ચોક્કસ બાતમી ના આધારે એસ.ઓ.જી. ની ટુકડીએ ફૂડ એન્ડ ડ્રગ્સ વિભાગની ટીમને સાથે રાખીને આજે સવારે ઉપરોક્ત રહેણાંક મકાન પર દરોડો પાડ્યો હતો. તે દરોડા દરમિયાન મકાનમાંથી ૧૫ કિલો, ૧૦ કિલો અને કિટલા સહિત ૫૫૫ કિલો ઘી નો જથ્થો મળી આવ્યો હતો.

આથી એસ.ઓ.જી. ની ટુકડીએ કુલ ૨,૬૫,૦૦૦ ની કિંમતનો નકલી ઘી નો જથ્થો કબજે કરી લીધો છે, અને ફૂડ એન્ડ ડ્રગ્સ વિભાગની ટીમ દ્વારા તેના સેમ્પલ મેળવીને પૃથકરણ માટે લેબોરેટરીમાં મોકલી આપ્યા છે, જેનો રિપોર્ટ આવી ગયા પછી મહાજન શખ્સ સામે આગળની કાર્યવાહી હાથ ધરાશે.

જામનગર વસઇ નજીક ટ્રક અને બસ વચ્ચે સર્જાયો ગમખ્વાર અકસ્માત

• હાઇવે પર ચકકાજામના દ્રશ્યોઃ બસમાં ફસાયેલા લોકોને બચાવવા ફાયર અને સિક્કા પોલીસ ખડેપગે
• 108ના તમામ પાયલોટે રંગ રાખ્યો : રીલાયન્સ કંપની ટીમો મદદે દોડી ગઈ

દેશ દેવી ન્યુઝ તા.૭ ડીસેમ્બર ૨૩ જામનગર અભાળીયા ધોરી માર્ગ પર  વસઈ આમરા વચ્ચે ત્રિપલ અકસ્માત સર્જાયો હતો તેમાં પંદરથી વધુ લોકો ઘાયલ થયા હતા જેમાં ખાનગી કંપની બસ રોડ નીચે ઉતરી જઈ ઝાડ સાથે અથડાઈ હતી જેમા દસથી વધુ લોકો ઘાયલ થયા હતા બનાવના પગલે 108, પોલીસ અને ફાયરની ટીમો છૂટી હતી અને તમામને સારવાર માટે હોસ્પિટલમાં ખસેડવામાં આવ્યા હતા

જામજોધપુરના વેપારીનો પરિવારના ટેન્શનમાં ગળાફાંસા દ્વારા આપઘાત

• ૪ મહિના પહેલાં નાના ભાઈએ આપઘાત કરી લીધા પછી તેના વિયોગમાં અને પરિવારના ટેન્શનમાં ભરેલું અંતિમ પગલું

દેશ દેવી ન્યુઝ જામનગર તા ૭ ડીસેમ્બર ૨૩  જામનગર જિલ્લાના જામજોધપુરમાં સ્ટેશન પ્લોટ સોસાયટીમાં રહેતા એક વેપારીએ ગઈકાલે પોતાના ઘેર ગળાફાંસા દ્વારા આપઘાત કરી પોતાની જીવાદોરી ટૂંકાવી છે. પોતાના નાનાભાઈએ ૪ મહિના પહેલા આપઘાત કર્યો હતો, જેના કારણે તેમજ પરિવારના ટેન્શનના કારણે આ પગલું ભરી લીધું હોવાનું પોલીસમાં જાહેર થયું છે.આ બનાવની વિગત એવી છે કે જામજોધપુરના સ્ટેશન પ્લોટ વિસ્તારમાં રહેતા જયેશભાઈ ચંદુલાલ ખાંટ નામના પટેલ વેપારીએ ગઈકાલે પોતાના ઘેર પંખા ના હુકમા ચાદર બાંધી ગળાફાંસા દ્વારા આત્મહત્યા કરી લીધી હતી. આ બનાવ અંગે મૃતકના સંબંધી હિરેનકુમાર ભગવાનજીભાઈ પટેલે પોલીસને જાણ કરતાં જામજોધપુર પોલીસે ઘટના સ્થળે દોડી જઇ મૃતદેહ નોન કબજો સંભાળ્યો છે, અને આ બનાવ અંગે ઊંડાણપૂર્વકની તપાસ હાથ ધરી છે. પોલીસમાં જાહેર કરાયા અનુસાર મૃતકના નાના ભાઈએ આજથી ચાર મહિના પહેલાં ગળાફાંસા દ્વારા આત્મહત્યા કરી લીધી હતી, જે બનાવ પછી મોટાભાઈ જયેશભાઈ ગુમસૂમ રહેતા હતા, તેમ જ પરિવારના ટેન્શન ના કારણે પોતે પણ આપઘાત કરી લીધો હોવાનું પોલીસમાં જાહેર થયું છે. આ બનાવને લઈને મૃતકના પરિવારમાં ભારે કરુણાંતીકા છવાઈ છે.

જામનગરમાં ગુલાબનગર નજીક પુર ઝડપે આવી રહેલી એક કાર પૂલ પરથી નીચે ખાબકી: ચાલકનો બચાવ

દેશ દેવી ન્યુઝ જામનગર તા ૭ ડીસેમ્બર ૨૩, જામનગરમાં ગુલાબ નગર નજીક એક કાર પુર ઝડપે આવીને રોડથી નીચે ઉતરી ગઈ હતી. સદભાગ્યે તેમાં બેઠેલા ચાલક ને કોઈ ઇજા થઇ ન હતી, અને આસપાસના લોકોએ તેને કારમાંથી બહાર કાઢી લીધો હતો. સમગ્ર મામલે પોલીસ વધુ તપાસ ચલાવે છે.આ અકસ્માતના બનાવની વિગત એવી છે જામનગરમાં ગુલાબનગર પોલીસ ચોકીની નજીકના પુલ પાસેથી પૂરપાટ ઝડપે આવી રહેલી એક વાઈટ કલરની હોન્ડા સિટી કાર, કે જે ઓવર સ્પીડ ના કારણે બેકાબુ બની ગઈ હતી અને પુલ પરથી નીચે ખાબકી ગઈ હતી. જે અકસ્માતમાં કારનું પડીકું વળી ગયું હતું. પરંતુ તેના ચાલકને કોઈ ઈજા થઈ ન હતી. આસપાસના વિસ્તારના લોકોનું ટોળું એકત્ર થઈ ગયું હતું, અને કારની અંદર બેઠેલા કારચાલકને સહી સલામત રીતે બહાર કાઢી લીધો હતો.આ બનાવની જાણ થતાં ગુલાબ નગર પોલીસ ચોકી નો સ્ટાફ બનાવના સ્થળે દોડી ગયો હતો, અને સમગ્ર અકસ્માત મામલે તપાસ શરૂ કરી છે.

જામનગર નજીક ખંભાળિયા બાયપાસ પાસેથી એક શખ્સ એસ.ઓ.જી.ના હાથે દેશી તમંચા સાથે પકડાયો: સપ્લાયર નું નામ ખુલ્યું

• SOG ના PSI જયદીપસિંહ પરમારના રાહબરી હેઠળ સ્ટાફના અનિરૂદ્ધસિંહ ઝાલા, વિરેન્દ્રસિંહ જાડેજા, ચંદ્રસિંહ જાડેજા તથા હર્ષદ ડોરીયાની ખાનગી બાતમી

દેશ દેવી ન્યુઝ જામનગર તા ૬ ડીસેમ્બર ૨૩   જામનગર ની એસ.ઓ.જી. શાખાની ટુકડીએ ખંભાળિયા બાયપાસ પાસે વોચ ગોઠવી એક શખ્સને દેશી બનાવટ ના તમંચા સાથે ઝડપી લીધો છે, જ્યારે તેને તમંચો સપ્લાય કરનાર હિન્દી ભાષી શખ્સ ને ફરારી જાહેર કરાયો છે.આ દરોડાની વિગત એવી છે કે જામનગરમાં ભીમવાસ વિસ્તારમાં રહેતો દિલીપ ભરતભાઈ વાઘેલા, કે જે જામનગર-ખંભાળિયા બાયપાસ રોડ પરથી ગેરકાયદે હથિયાર લઈને પસાર થઈ રહ્યો છે, તેવી ચોક્કસ બાતમીના આધારે એસ.ઓ.જી. ની ટુકડીએ વોચ ગોઠવી દિલીપ વાઘેલાને ઝડપી લીધો હતો.

જેની તલાસી દરમિયાન તેના કબજા માંથી રૂપિયા ૫,૦૦૦ ની કિંમત નો દેશી હાથ બનાવટનો તમંચો મળી આવ્યો હતો. જેથી પોલીસે તમંચો કબ્જે કરી લઇ આરોપી દિલીપ વાઘેલા સામે પંચકોશી બી. ડિવિઝન પોલીસ મથકમાં હથીયાર ધારા ભંગ અંગે ગુનો દાખલ કરાવ્યો છે. પોલીસની પૂછપરછ દરમિયાન આ હથિયાર દરેડ વિસ્તારમાં રહેતા એક હિન્દીભાષી શખ્સ પાસેથી મેળવ્યું હોવાનું કબૂલ્યું હોવાથી પોલીસે તેને ફરારી જાહેર કરી શોધખોળ હાથ ધરી છે.

જામનગરમાં રણજીત સાગર રોડ પર ગોકુલ દર્શન સોસાયટીમાં એક રહેણાંક મકાનમાં મહિલા સંચાલિત જુગારધામ પકડાયું

• એલસીબી એ પાડેલા દરોડામાં ગંજીપાના વડે જુગાર રમી રહેલી સાત મહિલાઓ પકડાઈ: જુગારનું સાહિત્ય કબજે

દેશ દેવી ન્યુઝ જામનગર તા ૫ ડીસેમ્બર ૨૩ જામનગરમાં રણજીત સાગર રોડ પર ગોકુલ દર્શન સોસાયટીમાં એક મહિલા સંચાલિત જુગારધામ પકડાયું છે. એલસીબી ની ટુકડીએ દરોડો પાડી જુગાર રમાડી રહેતી મહિલા સહિત કુલ સાત મહિલાઓની અટકાયત કરી લઈ તેઓ પાસેથી રોકડ રકમ અને જુગારનું સાહિત્ય કબજે કર્યું છે.

જામનગરની લોકલ ક્રાઈમ બ્રાન્ચ ની ટીમ ને ચોક્કસ બાતમી મળી હતી, કે જામનગરમાં રણજીત સાગર રોડ પર ગોકુલ દર્શન સોસાયટી પ્લોટ નંબર ૧૩/૬ શેરી નંબર -૨ માં રહેતા જશવંતીબેન પરસોત્તમભાઈ રાબડીયા નામની મહિલા દ્વારા પોતાના રહેણાક મકાનમાં જુગારધામ ચલાવવામાં આવી રહયું છે, અને શહેરની આસપાસની સોસાયટીમાંથી કેટલીક મહિલાઓએ એકત્ર થઈને જુગાર રમવા માટે આવી રહી છે. જે ચોક્કસ બાતમીના આધારે ગઈકાલે મોડી સાંજે ઉપરોક્ત રહેણાક મકાન પર એલસીબી ની ટુકડીએ દરોડો પાડયો હતો.

જે દરોડા દરમિયાન મકાન માલિક મહીલા સહિતની કુલ સાત મહિલાઓ ગંજી પાના વડે જુગાર રમી રહેલી નજરે પડી હતી. જેથી એલસીબી ની ટીમે મકાન માલિક જસવંતીબેન પરષોત્તમભાઈ રાબડીયા ઉપરાંત પ્રભાબેન ઉર્ફે હંસાબેન મંગાભાઈ ચાવડા, જયશ્રીબેન પ્રવીણભાઈ પાણખાણીયા, શીતલબેન રમેશભાઈ જાડેજા, ચેતનાબેન વિજયભાઈ ગજ્જર, મંજુબેન હસમુખભાઈ ટાંક તેમજ શાંતિબેન રાજુભાઈ વિસાવડીયા ની અટકાયત કરી લઇ તેઓ પાસેથી રૂપિયા ૬૮,૨૦૦ ની રોકડ રકમ અને જુગારનું સાહિત્ય કબ્જે કર્યું છે.

જુગાર અંગે નો બીજો દરોડો મોટી ખાવડી વિસ્તારમાં પાડવામાં આવ્યો હતો. જયાંથી જાહેરમાં ગંજીપાના વડે હારજીત નો જુગાર રમી રહેલા ધીરુભાઈ મનજીભાઈ સોલંકી તેમજ જસરાજભાઈ ગેલાભાઈ માતંગની પોલીસે અટકાયત કરી લઇ તેઓ પાસેથી રૂપિયા થોડા ૧૬,૪૭૦ ની રોકડ રકમ અને જુગારનું સાહિત્ય કબજે કર્યું છે.