ધ્રોલ પંથક મા અધિકારી ઉપર હુમલાનું પ્રકરણ : બ્રીજ કોન્ટ્રાક્ટર પેઢીને ત્રણ વર્ષ માટે બ્લેક લિસ્ટ કરવાનો આદેશ

દેશ દેવી ન્યૂઝ જામનગર તા. ૩ સપ્ટેમ્બર ૨૪, જામનગર જિલ્લા પંચાયત હસ્તકના ધ્રોળ તાલુકામાં ઈંટાળા, રાજપરા, સુમરા રોડ પર માઈનોર બ્રીજ એન્ડ એપ્રોચીસના કામો નો કોન્ટ્રાક્ટ જૂનાગઢ ની કોન્ટ્રાક્ટર પેઢી સ્વસ્તિક કન્સ્ટ્રક્શન કંપનીને આપવામાં આવ્યો હતો.જે પેઢી નાં કર્મચારી દ્વારા જવાબદાર અધિકારી ઉપર હુમલો કરવામાં આવ્યો હતો.જેમાં કોન્ટ્રાક્ટ પેઢી ને ત્રણ વર્ષ માટે બ્લેક લીસ્ટ કરવામાં આવી છે.

આ કામ ચાલુ હતું તે દરમિયાન કોન્ટ્રાક્ટર પેઢીના કર્મચારીને મદદનીશ ઈજનેર એન.પી. બારડે ગુણવત્તાયુક્ત કામગીરી કરવા સૂચના આપતા એજન્સીના કર્મચારી અમિતભાઈ ઝાલા એ ઈજનેર સાથે ગેરવર્તણૂંક કરી, અપશબ્દો બોલી તેમને શારીરિક ઈજાઓ પહોંચાડી હતી. તેમજ જાનથી મારી નાખવાની અને જમીનમાં દાટી દેવાની ધમકી આપી હતી. આ અંગે ધ્રોળ પોલીસ સ્ટેશનમાં ફરિયાદ નોંધાઈ હતી.

સમગ્ર પ્રકરણમાં મા.મ. વિભાગ (પંચાયત) ના કા.પા. ઈજનેર દ્વારા ખુલાસો રજૂ કરવા જણાવાયું હતું જેના જવાબમાં ઈજારદાર દ્વારા રજૂ થયેલા ખુલાસામાં સમગ્ર ઘટનાનો સ્વીકાર કરવામાં આવ્યો હતો. જેથી એજન્સીના કર્મચારીની આ પ્રકારની વર્તણૂંક માટે કોન્ટ્રાક્ટર પેઢી જવાબદાર હોવાનું ઠરાવાયું હતું, અને ઈજારદારનો ખુલાસો અમાન્ય રાખવામાં આવ્યો હતો.

આ બાબતની તપાસ અને ગંભીર વિચારણાના અંતે રાજ્ય સરકારના માર્ગ-મકાન વિભાગના ખાસ ફરજ પરના અધિકારી આર.વી. પટેલે જૂનાગઢ ની સ્વસ્તિક કન્સ્ટ્રક્શન કંપની (જેમના ભાગીદારો જગમલભાઈ મારડિયા, સંધ્યાબેન મારડિયા, રાણાભાઈ મારડિયા) ને રાજ્ય સરકાર સંબંધિત વિભાગ દ્વારા બાંધકામની કામગીરી માટે આપવામાં આવેલા (૧) ક્લાસ એએ, (ર) સ્પે. કેટેગરી-૧ (રોડ), (૩) સ્પે. કેટેગરી-ર (બ્રીજ) ના વર્ગો માટેની નોંધણી ત્રણ વર્ષ માટે સ્થગિત કરવાનો હુકમ કર્યો છે. આ ઈજારદાર પેઢી અને તેમના ભાગીદારો આ સમયગાળામાં કોઈપણ ટેન્ડર ભરી શકશે નહીં કે આ નોંધણીનો ઉપયોગ કરી શકશે નહીં.

આ પ્રકરણે જામનગર જિલ્લા પંચાયત વર્તુળોમાં ભારે ચકચાર જગાવી હતી અને રાજ્ય સરકારે જૂનાગઢની આ કોન્ટ્રાક્ટર પેઢી સામે ત્રણ વર્ષ માટે બ્લેક લિસ્ટ કરવાનો હુકમ કર્યો છે.

જામનગરના ઉત્તર વિધાનસભા વિસ્તારના ધારાસભ્ય રીવાબા જાડેજાનાં જન્મદિનની થશે સેવામય ઉજવણી

• શિક્ષણ, આરોગ્ય, રમતગમત તથા સમાજ ઉત્થાન ક્ષેત્રે વિવિધ સેવા પ્રકલ્પનું આયોજન

દેશ દેવી ન્યૂઝ જામનગર તા ૩ ઓગસ્ટ ૨૪, જામનગર ઉત્તર વિધાનસભા મતવિસ્તાર ધારાસભ્ય રીવાબા રવિન્દ્રસિંહ જાડેજાનાં જન્મદિનની સેવામય ઉજવણી નિમિત્તે તા. ૫/૯/૨૦૨૪ને ગુરુવારે સવારે ૧૦ કલાકે વિશ્વકર્મા વાડી, ગાંધીનગર રોડ, જામનગરમાં ભવ્ય કાર્યક્રમનું આયોજન કરવામાં આવ્યું છે.આરોગ્ય, શિક્ષણ, કન્યા કેળવણી તથા સમાજ ઉત્થાન માટે ધારાસભ્ય રીવાબા જાડેજા દ્વારા સ્વખર્ચે, ગ્રાન્ટમાંથી તથા બેંકનાં સૌજન્યથી વિવિધ સેવા પ્રકલ્પો હાથ ધરવામાં આવશે.

જે અંતર્ગત રીવાબા દ્વારા સ્વખર્ચે ૨૧ દિકરીઓનાં સુકન્યા સમૃદ્ધી ખાતામાં રુ. ૧૧,૦૦૦ ની પ્રથમ હપ્તાની ભેટ, સ્વખર્ચે વિદ્યાભારતી સંચાલિત શૈક્ષણિક સંસ્થાનાં તેમનાં મત વિસ્તારનાં બે વિભાગનાં ૧૧૨ બાળકોને એક વર્ષ માટે દત્તક લેવાનો, સ્વખર્ચે ૧૧ નવપરીણીત દિકરીઓને કરીયાવર ભેટ, સ્વખર્ચે ૧૧ રમતવીરોને ક્રિકેટ કિટ અર્પણ તથા સ્વખર્ચે અંત્યોદય શ્રમિક સુરક્ષા યોજના અંતર્ગત બુથ પ્રમુખો અને વોર્ડ પ્રમુખોને રુ. ૧૦ લાખનો વીમો પ્રદાન કરવાનો પ્રકલ્પ સાકાર કરવામાં આવશે.

ઉપરાંત મહિલા ધારાસભ્ય તરીકેની ગ્રાન્ટમાંથી થેલેસેમિયા મેજર જેવા રોગનાં દર્દીઓ માટે રૂ. ૫ લાખનું અનુદાન, એસ.બી.આઇ. નાં સૌજન્યથી ઇમર્જન્સી સ્થિતિ માટે આઇ.સી.યુ. ઓન વ્હીલ અર્પણ કરવામાં આવશે. ધારાસભ્યની ગ્રાન્ટમાંથી વોર્ડનં ૨ માં મચ્છરનગરમાં લાયબ્રેરી- કમ- રીડીંગ રૂમ તથા સિવણ ક્લાસનું ખાતમુહૂર્ત, ધારાસભ્યનાં ગુરૂદ્વારા ચોકડી નજીક આવેલા કાર્યાલય પર આધાર કાર્ડ સમાધાન કેન્દ્રનો આરંભ, એસ.બી.આઇ.નાં સૌજન્યથી વોર્ડ નં ૨ અને ૪ માં આંગણવાડીનાં સમારકામ પછી પુન:લોકાર્પણ, એસ.બી.આઇ. નાં સૌજન્યથી વોર્ડ નં- ૨ સ્થિત શાળા નં ૩૨ માં અત્યાધુનિક કોમ્પ્યુટર ક્લાસરૂમનું ખાતમુહૂર્ત તથા સરકારનાં સ્માર્ટ શાળા પ્રોજેક્ટ અંતર્ગત રૂ. ૨ કરોડનાં ખર્ચે નિર્મિત શાળા નં. ૩૧/૫૭ ખાતે સ્માર્ટ શાળાનું લોકાર્પણ કરવામાં આવશે.

આમ મહિલા ધારાસભ્ય દ્વારા જન્મદિન નિમિત્તે સમાજ ઉપયોગી તમામ ક્ષેત્રે સેવા પ્રકલ્પો સાકાર કરી જન્મદિનની જનસેવામય ઉજવણીનું પ્રેરક ઉદાહરણ પ્રસ્તુત કરવામાં આવશે.

જામનગર જિલ્લાના આરોગ્યતંત્ર દ્વારા અતિવૃષ્ટિ બાદ રોગચાળો અટકાવવા માટેની સધન કાર્યવાહી હાથ ધરાઈ

• જિલ્લા ભરના ગામોમાં આરોગ્ય તંત્રની ટીમ દ્વારા દવા વિતરણ તેમજ દવા છંટકાવ સહિતની કાર્યવાહી હાથ ધરાઈ

દેશ દેવી ન્યૂઝ જામનગર તા ૨ સપ્ટેમ્બર ૨૪, જામનગર જિલ્લામાં પડેલા ભારે વરસાદના કારણે રોગચાળા ની પરિસ્થિતિ ઉદભવે નહીં તેમજ લોકોનું આરોગ્ય સલામત જળવાઈ રહે તેવા હેતુસર રાજ્ય સરકાર ની સુચના અનુસાર જિલ્લા વિકાસ અધિકારી વિકલ્પ ભારદ્વાજ ના નિર્દેશ મુજબ સમગ્ર જામનગર જિલ્લામાં રોગ અટકાયત કામગીરી સઘન બનાવવામાં આવી છે.

મુખ્ય જિલ્લા આરોગ્ય અધિકારી ડો એચ એચ ભાયા ના માર્ગદર્શન હેઠળ તમામ ૨૫૬ જેટલા પેટા,પ્રાથિમક અને સામુહિક આરોગ્ય કેન્દ્ર ચાલુ રાખવામાં આવેલા હતા, અને આરોગ્ય કમૅચારીઓ ની ૨૦૯ જેટલી ટીમ દ્વારા હાઉસ ટુ હાઉસ સઘન સર્વેલન્સ કરી તાવ ના ૧૨૯, શરદી ઉધરસ ના ૬૦ અને ઝાડા ના ૧૭ જેટલા કેસોને સારવાર આપવામા આવી હતી.
તેમજ ગ્રામ્ય કક્ષાએ થી કરવામાં આવતા ક્લોરીનેશન મોનીટરીંગ ના ૩૬૨ ટેસ્ટ કરીને જરૂરિયાત મુજબ ૧૧૭૬૦ જેટલી કલોરીન ગોળીનું વિતરણ કરવામાં આવ્યું હતું. જેનું સઘન મોનીટરીંગ,સુપરવિઝન અને માર્ગદર્શન તમામ જિલ્લા અધિકારીઓ , તાલુકા હેલ્થ ઓફિસરો તથા જિલ્લા સુપરવાઈઝર વી પી જાડેજા, નીરજ મોદી અને ડીપીસી યજ્ઞેશ ખારેચા દ્વારા કરવામાં આવ્યું હતું.

મુખ્ય જિલ્લા આરોગ્ય અધિકારી ડો એચ એચ ભાયા દ્વારા મોટીખાવડી,પડાણા,મેઘપર, કાનાલુસ વગેરે વિસ્તારોમાં જાત તપાસ કરી ગુણવત્તાયુક્ત કામગીરી માટે નિર્દેશો આપ્યા હતા.

જામનગરના લાલવાડી વિસ્તારમાં સિક્યુરિટી ગાર્ડ ને વરસાદના ભરાયેલા પાણીની વચ્ચે વીજપોલમાંથી વીજ આંચકો લાગતાં અપમૃત્યુ

દેશ દેવી ન્યૂઝ જામનગર તા ૨ સપ્ટેમ્બર ૨૪ જામનગરમાં લાલવાડી વિસ્તારમાં રહેતા અને જી.જી. હોસ્પિટલમાં સિક્યુરિટી ગાર્ડ તરીકે ફરજ બજાવતા એક યુવાનને પોતાના ઘર પાસે પાણી ભરાયા હોવાથી વરસાદી સિઝનમાં વિજ થાંભલા ને અડી જવાથી વિજ આંચકો લાગ્યો હોવાથી તેનું મૃત્યુ નીપજ્યું છે.

આ બનાવની વિગત એવી છે કે જામનગરના લાલવાડી વિસ્તારમાં શાંતિ વિલા સોસાયટી શેરી નંબર-૧માં રહેતા અને જામનગરની સરકારી જી.જી. હોસ્પિટલમાં સિક્યુરિટી ગાર્ડ તરીકે ફરજ બજાવતા કનકસિંહ રવુભા જાડેજા (ઉંમર વરસ ૪૮) કે તેઓ ગત ૨૮ મી તારીખે વરસાદ ચાલુ હોવાથી પોતાના ઘર પાસે પાણી ભરાયા હતા, ત્યાંથી પગપાળા ચાલીને પાણીમાંથી પસાર થઈ રહ્યા હતા.

તે દરમિયાન એક થાંભલાને અડી જતા તેને વિજ આંચકો લાગ્યો હતો ,અને બેશુદ્ધ બન્યા હતા. આ બનાવ પછી તેના પરિવારજનોએ તાત્કાલિક અસરથી સારવાર માટે જામનગરની સરકારી જી.જી. હોસ્પિટલમાં પહોંચાડયા હતા, પરંતુ ફરજ પરના તબીબે તેનું મૃત્યુ નીપજ્યું હોવાનું જાહેર કર્યું હતું.

આ બનાવ અંગે મૃતક ના સંબંધી મયુરસિંહ પ્રવીણસિંહ જાડેજાએ પોલીસને જાણ કરતાં સીટી એ. ડિવિઝનના પોલીસ હેડ કોન્સ્ટેબલ આર.ડી ગાંભવા બનાવના સ્થળે તેમજ જીજી હોસ્પિટલે દોડી ગયા હતા, અને મૃતદેહનો કબજો સંભાળી પોસ્ટ મોર્ટમ સહિતની કાર્યવાહી હાથ ધરી છે.

કાલાવડ તાલુકાના લલોઈ ગામનો કરુણા જનક કિસ્સો: માતા પુત્ર એ સજોડે ઝેરી દવા પી લઇ આપઘાત કર્યો

• પતિ સાથે જમવા બાબતે ઝઘડો થયા પછી દસ વર્ષના પુત્રને લઈને માતા એ વાડી વિસ્તારમાં જઈ બન્નેએ ઝેર પી લેતાં મૃત્યુ નીપજ્યા

દેશ દેવી ન્યૂઝ જામનગર તા ૨ સપ્ટેમ્બર ૨૪, જામનગર જિલ્લાના કાલાવડ તાલુકાના લલોઈ ગામમાં ભારે કરુણા જનક કિસ્સો બન્યો છે, અને એક દેવીપુજક મહિલાએ પોતાના પતિ સાથે જમવા બાબતે ઝઘડો થતાં દસ વર્ષના પુત્રને સાથે રાખીને ઘેરથી નીકળી ગયા પછી વાડી વિસ્તારમાં માતા પુત્ર એ ઝેરી દવા પી લઈ આત્મહત્યા કરી લેતાં ભારેચાર જાગી છે. સમગ્ર મામલે કાલાવડ ગ્રામ્ય પોલીસ તપાસ ચલાવે છે.

આ બનાવની વિગત એવી છે કે કાલાવડ તાલુકાના લલોઈ ગામમાં રહેતી અને ખેતી કામ કરતી હર્ષિદાબેન મેરૂભાઈ સાડમિયા અને તેનો ૧૦ વર્ષનો પુત્ર મયુર મેરૂભાઈ કે જે બંનેએ ગઈકાલે બપોરે ૪.૦૦ વાગ્યાના અરસામાં વાડી વિસ્તારમાં ઝેરી દવા પી લઈ આત્મહત્યાનો પ્રયાસ કરતાં બંને બેશુદ્ધ અવસ્થામાં મળી આવ્યા હતા. તેઓને કાલાવડની સરકારી હોસ્પિટલમાં લઈ જવાયા હતા. જ્યાં ફરજ પરના તબીબે બન્નેના મૃત્યુ નીપજ્યા હોવાનું જાહેર કર્યું હતું.

આ બનાવ માંમલે પોલીસને જાણ કરાતાં કાલાવડના પોલીસ કોન્સ્ટેબલ એન. કે. છૈયા ઘટના સ્થળે તેમજ કાલાવડ ની સરકારી હોસ્પિટલે દોડી ગયા હતા, અને બંને મૃતદેહોનો કબજો સંભાળ્યા પછી જામનગરની સરકારી જી.જી. હોસ્પિટલમાં પોસ્ટ મોર્ટમ કરાવાયા હતા.

પોલીસની પ્રાથમિક પૂછ પરછ દરમિયાન ગઈકાલે બપોરે ૧૧.૩૦ વાગ્યાના અરસામાં હર્ષિદાબેનને જમવા બાબતે તેના પતિ મેરૂભાઈ સાથે ઝઘડો થયો હતો. તેથી મનમાં લાગી આવતાં તેણી પોતાના પુત્ર સાથે ઘર છોડીને ચાલી ગઈ હતી. ત્યારબાદ વાડી વિસ્તારના રસ્તે ઝેરી દવા પીધેલી હાલતમાં માતા પુત્ર મળી આવ્યા હતા. અને બંનેના મૃત્યુ નીપજ્યા હોવાથી પરિવારમાં ભારે શોકની લાગણી છવાઈ છે.

ગુજરાત પ્રદેશ કોંગ્રેસના પ્રમુખ અને રાજ્યસભાના સાંસદ શક્તિસિંહ ગોહિલે જામનગર શહેરના પૂરગ્રસ્ત વિસ્તારોની મુલાકાત લીધી

દેશ દેવી ન્યૂઝ જામનગર તા ૧ સપ્ટેમ્બર ૨૪, જામનગર શહેર માં પૂરના કારણે અનેક લોકોને ભારે નુકશાની થઈ છે, ત્યારે ગુજરાત પ્રદેશ કોંગ્રેસના પ્રમુખ અને રાજ્યસભાના સાંસદ શક્તિસિંહ ગોહિલ આજે જામનગરની મુલાકાતે આવી પહોંચ્યા હતા, અને તેઓએ શહેરના અલગ અલગ પૂરગ્રસ્ત વિસ્તારોની મુલાકાત લીધી હતી, અને લોકોની સમસ્યા સાંભળી હતી.તેઓની સાથે કોંગ્રેસ અગ્રણી અને પૂર્વ મંત્રી એમ. કે. બ્લોચ, જામનગર જિલ્લાના પૂર્વ સાંસદ વિક્રમભાઈ માડમ, ગુજરાત પ્રદેશના કોંગ્રેસ અગ્રણી ભીખુભાઈ વારોતરીયા, પ્રદેશ મહિલા અગ્રણી સહારા બેન મકવાણા, ચેમ્બર ઓફ કોમર્સના પ્રમુખ અને કોંગ્રેસ અગ્રણી બીપેન્દ્રસિંહ જાડેજા, શહેર કોંગ્રેસ પ્રમુખ દિગુભા જાડેજા, જામનગર મહાનગરપાલિકાના વિરોધ પક્ષના નેતા ધવલભાઇ નંદા, કોંગી મહિલા પ્રમુખ રંજનબેન ગજેરા, એન.એસ.યુ.આઈ ના તોશિફ ખાન પઠાણ, શક્તિસિંહ જાડેજા, વિરોધ પક્ષના પૂર્વ નેતા અલ્તાફભાઈ ખફી, કોર્પોરેટર જેનબબેન ખફી સહિતના સ્થાનિક અગ્રણીઓ જોડાયા હતા.ગુજરાત પ્રદેશ પ્રમુખ શક્તિસિંહ ગોહિલ તેમજ અન્ય અગ્રણીઓ દ્વારા જામનગર મહાનગરપાલિકાના વોર્ડ નંબર ૧,૨,૪, ૧૨ અને ૧૬ ના જુદા જુદા વિસ્તારો, કે જ્યાં પૂરના પાણી ભરાયા હતા, અને તે તમામ વિસ્તાર ની મુલાકાત લીધી હતી, અને પૂર પીડિત નાગરિકોની સમસ્યા પણ સાંભળી હતી, અને તેઓને યોગ્ય ન્યાય અને વળતર મળે તે માટે સરકારમાં ઉગ્ર રજૂઆત કરવાની પણ ખાતરી આપી હતી.

જામનગરના બેડીબંદર રોડ પર જોખમી બનેલું સિટી બસ સ્ટોપ એસ્ટેટ શાખાએ દૂર કર્યું

દેશ દેવી ન્યૂઝ જામનગર તા ૩૧ ઓગસ્ટ ૨૪, જામનગરના બેડી બંદર રોડ પર આવેલું એક સીટી બસ માટેનું બસ સ્ટોપ, કે જે ખૂબ જ જર્જરીત અવસ્થામાં અને પડું પડું થાય તેવી સ્થિતિમાં હતું, જેને દૂર કરવાની કાર્યવાહી હાથ ધરવામાં આવી હતી.

જામનગર મહાનગર પાલિકાની એસ્ટેટ શાખાના દબાણ હટાવ અધિકારી સુનિલ ભાનુશાળીની આગેવાનીમાં એક ટુકડી આજે બેડીબંદર રોડ પર પહોંચી હતી, અને જેસીબી ની મદદથી માર્ગ પર લટકી રહેલું અને જોખમી અવસ્થામાં રહેલું સીટી બસ સ્ટોપ કે જેની છાપરી સહિતનો ભાગ જમીનદોસ્ત કરી નાખવામાં આવ્યો હતો.

જામનગર જિલ્લા પંચાયત ની કચેરીમાં ડીડીઓની ચેમ્બર બહાર ચેલાના એક નાગરિકે ફીનાઈલ પી લેતાં ભારે દોડધામ

• ચેલા-૨ ગામનો કોઝ-વે ધોવાયો હોવાની રજૂઆત વેળાએ ચેલા ના નાગરીકે ફીનાઇલ પીધું : પોલીસ અને ૧૦૮ ની ટીમ ની મદદ લેવાઇ

દેશ દેવી ન્યૂઝજામનગર તા ૩૧ ઓગસ્ટ ૨૪,જામનગર તાલુકાના ચેલા ગામે ચેલા-૨ તરીકે ઓળખાતા વિસ્તારમાં પ્રાથમિક સુવિધાના અભાવના મામલે આવેદન આપવા આવેલા ગામલોકો પૈકીના એક નાગરિકે ડીડીઓ ચેમ્બર ની બાજુમાં આવેલી તેના પી.એ.ની ચેમ્બરમાં ફીનાઈલ પી લેતાં ભારે દોડધામ થઈ હતી. અને તાત્કાલિક અસરથી પોલીસને અને ૧૦૮ને જાણ કરતાં ફીનાઇલ પી લેનાર વ્યક્તિને સારવાર માટે જી.જી.હોસ્પિટલમાં ખસેડાયો હતો. ત્યાર બાદ તંત્રએ ગામ લોકોનું આવેદન પત્ર સ્વીકારી લીધું હતું.

ગઈકાલે તા.૩૦ ની સાંજે ચેલા સીમ વિસ્તારમાં આવેલી સોસાયટીના રહીશો અને વિપુલભાઈ ભાંભી નામના સ્થાનિક રહેવાસીએ આપેલા આવેદનમાં સરપંચ સામે આક્ષેપ કરાયો છે. અને તે આવેદનમાં જણાવાયું છે કે, ચેલા-ર તરીકે ઓળખાતા ચેલા ગામના વિસ્તારમાં આવેલી ગોકુલધામ, પ્રણામી દ્વારકેશ, શિવમ વગેરે સોસાયટીઓના રહેવાસીઓ માટે નદીમાંથી ફક્ત એક માત્ર આવવા જવાનો કોઝ-વે હતો. જે હાલના પુરમાં તૂટી ગયો છે તેમજ રસ્તો ધોવાઈ ગયો છે. ઉપરાંત વીજ થાંભલા પડી ગયા હોવાથી આ સોસાયટીઓમાં કોઈ પાયાની સુવિધા નથી.

દર ચોમાસામાં લોકોને ત્રણ-ચાર દિવસ ઘરમાં પુરાઈ રહેવું પડે છે. ચેલા-ર ગામના સરપંચ દ્વારા આ વિસ્તારને સુવિધાઓથી વંચિત રાખવામાં આવે છે.  આથી ત્યાંના લોકોની માંગણી છે. કે, સરપંચ ઉપર પગલા લેવાય, તેમજ પ્રાથમિક સુવિધાઓ પુરી પાડવામાં આવે તેવી માંગણી સાથે સ્થાનિક નાગરિક રજૂઆત કરવા માટે આવ્યા હતા.

જે પૈકીના વિપુલભાઈ ભાભી નામના નાગરિકે ફિનાઈલ પી લેતાં ભારે અફડા તફડી મચી ગઈ હતી, અને ડી.ડી.ઓ ના પીએ વગેરેએ દોડધામ કરી હતી અને તૂરત જ ૧૦૮ ની ટીમ તથા પોલીસ વિભાગને જાણ કરાઈ હતી. જેથી ફીનાઇલ પી લેનાર વિપુલભાઈ ભાંભી નામના વ્યક્તિ ને તાત્કાલિક અસરથી ૧૦૮ નંબરની એમ્બ્યુલન્સમાં સારવાર માટે જામનગરની જી.જી. હોસ્પિટલમાં ખસેડાયા હતા. જોકે તુરત જ સારવાર મળી ગઈ હોવાથી તેને હોસ્પિટલમાંથી રજા આપી દેવાઇ છે.

જામનગરમાં નીચાણવાળા વિસ્તારમાં વરસાદના પાણી ઓસર્યા બાદ ભારે નુકસાન દ્રશ્યો સામે આવ્યા છે.

જામનગર શહેરના આદર્શ સ્મશાનમાં પાણી ભરાઈ જતાં બંને ભઠ્ઠીઓને ભારે નુકસાન: લાકડા થી પણ અગ્નિદાહની પ્રક્રિયા અટકી

• સ્મશાન વ્યવસ્થા કમિટી દ્વારા એકત્ર કરીને રખાયેલું ૧૨૦૦ મણ લાકડું પાણીમાં તણાંઈ ગયું : દસ હજાર નંગ છાણા પલળી ગયા

• સ્મશાન ગૃહમાં બે મૃત ભેંસ અને એક ગાય પણ તણાઈ આવી:લાકડું ટકરવાના કારણે અનેક પ્રતિમાઓને નુકસાન

• જામનગર ના નીચાણવાળા વિસ્તારના લોકોની રેંકડી સહિત ની સામગ્રી તરીને આદર્શ સ્મશાન માં ઘૂસી આવી

દેશ દેવી ન્યૂઝ જામનગર તા ૨૮ ઓગસ્ટ ૨૪, જામનગર ના આદર્શ સ્મશાન ગૃહમાં ભારે વરસાદના કારણે પૂરના પાણી ઘુસ્યા છે, અને અંતિમ ક્રિયા માટેની બંને ભઠ્ઠીઓને ભારે નુકસાની થઈ છે. એટલું જ માત્ર નહીં ૧૨૦૦ મણ લાકડું તણાઈ ગયું છે, અને દસ હજાર નંગ જેટલા છાણા પણ પલળી ગયા છે, સ્મશાન વ્યવસ્થા કમિટી દ્વારા સાફ-સફાઈ કાર્ય હાથ ધરાયું છે.

જામનગર ના માણેકબાઈ સુખધામ આદર્શ સ્મશાન ગ્રહ કે જે નીચાણ વાળા વિસ્તારમાં આવેલું હોવાથી વરસાદના પુરનું સાત ફૂટ જેટલું પાણી ભરાઈ ગયું છે, અને સમગ્ર પરિસર સરોવરમાં ફેરવાઈ ગયું છે.

સ્મશાન ની અંદર આવેલી બંને ભઠ્ઠીઓ કે જેમાં પાણી ભરાઈ ગયું હોવાના કારણે ભઠ્ઠીઓને ભારે નુકસાની થઈ છે. ઈલેક્ટ્રીક પેનલ સહિતની તમામ યંત્ર સામગ્રી પાણીમાં ગરકાવ થયેલી છે. સાથો સાથ લાકડું પણ તણાયું હોવાથી અને પાણી ભરેલા હોવાથી અગ્નિદાહની પ્રક્રિયા છેલ્લા બે દિવસથી અટકી પડી છે.

ચોમાસાની સિઝનને ધ્યાનમાં રાખીને સ્મશાન વ્યવસ્થા કમિટી દ્વારા અંદાજે ૧૨૦૦ મણ લાકડું એકત્ર કરીને સંગ્રહ કરી લેવાયું હતું, પરંતુ પાણીના પ્રવાહમાં લાકડું તણાઈ ગયું છે. જેથી પણ ભારે નુકસાની થઈ છે. આ ઉપરાંત ૧૦,૦૦૦ નંગ છાણા એકત્ર કરીને એક રૂમમાં રખાયા હતા, પરંતુ તે તમામ છાણા પણ પલળી ગયા છે, જેથી હાલ લાકડા થી પણ અગ્નિદાહની પ્રક્રિયા અશક્ય બની છે.આદર્શ સ્મશાન વ્યવસ્થાપક કમિટી ના સેક્રેટરી દર્શનભાઈ ઠક્કર અને તેઓની સમગ્ર ટીમ સ્મશાનમાંથી પાણી બહાર કાઢવા માટે તેમજ જરૂરી સાફ સફાઈ માટેની વ્યવસ્થા કાર્યમાં જોડાયા છે.

જામનગરના સ્મશાન ગૃહ ના આસપાસના વિસ્તારની સોસાયટીમાંથી પાણીનો ધસમસ્તો પ્રવાહ સ્મશાન ગૃહ પરિસરમાં આવ્યો હોવાથી સ્થાનિક નાગરિકોના પ્લાસ્ટિકના ડોલ ડબલા તથા અન્ય ઘરવખરી સહિતની સામગ્રી વગેરે તરીને સ્મશાન પરિસરમાં આવી ગઇ છે, અને દિવાલને અટવાઈને સામગ્રી જમા થયેલી જોવા મળી છે. ઉપરાંત એક લાકડાની રેકડી પણ તરીને સ્મશાન ગ્રહ ની અંદર આવીને અટવાઈ પડી છે, તે તમામને પણ હટાવવા માટેની કાર્યવાહી સ્મશાન વ્યવસ્થા કમિટી દ્વારા કરવામાં આવી રહી છે.

જામનગરના આદર્શ સ્મશાન ગૃહમાં દેવી દેવતાઓ ઉપરાંત મહાનુભાવો સહિતની પ્રતિમાઓ આવેલી છે, જે પ્રતિમા સાથે લાકડું ટકરાતાં પ્રતિમાઓને પણ નુકસાની થઈ છે.જામનગરના આદર્શ સ્મશાન ગૃહમાં રેકડી તથા અન્ય કેટલીક સામગ્રી તણાઈને આવી છે, તેની સાથે સાથે એક મૃત ગાય તેમ જ બે મૃત ભેંસ પણ તણાઈ ને આવી છે, જેનો પણ નિકાલ કરવા માટે સ્મશાન વ્યવસ્થા કમિટી પ્રયત્ન કરી રહી છે.