જામનગરના ‘શંકરટેકરીમાં છૂટ થીદારૂ મળેછે’ કહેનાર આરોપીએ સોશિયલ મીડિયામાં માફી માંગી
-
દારૂના નશામાં પોલીસની કામગીરીને પડકારતો વીડિયો વાયરલ કરનારનો સૂર બદલાયો : ૧૩ બોટલ દારૂ સાથે પોલીસે ઝડપી પાડ્યો
દેશ દેવી ન્યુઝ જામનગર તા ૮ સપ્ટેમ્બર ૨૬: જામનગર શહેરમાં દારૂબંધીની અમલવારી અને પોલીસની કામગીરીને પડકારતો વીડિયો વાયરલ કરનારા શખ્સના હવે સૂર બદલાયા છે. અગાઉ શંકરટેકરી વિસ્તારમાં જોઈએ તેટલો દારૂ મળી રહે છે તેવી બફાટભરી વાતો કરતો વીડિયો વાયરલ કર્યા બાદ પોલીસે કાર્યવાહી કરી તેને ૧૩ બોટલ દારૂ સાથે ઝડપી પાડ્યો હતો. કાયદાકીય કાર્યવાહી બાદ આરોપીએ પોતે દારૂના નશામાં હોવાથી આ પ્રકારનો વીડિયો બનાવ્યો હોવાનું કબૂલી પોલીસની માફી માંગી છે.
શહેરના શંકરટેકરી નવી નિશાળ પાસે કરીમભાઈ વેલ્ડિંગવાળાની ગલીમાં રહેતા સદામહુશેન આદમભાઈ ખીરાએ તાજેતરમાં દારૂના નશાની હાલતમાં એક વીડિયો બનાવી સોશિયલ મીડિયામાં વાયરલ કર્યો હતો. વીડિયોમાં તેણે શંકરટેકરી વિસ્તારમાં જોઈએ તેટલો દારૂ મળી રહે છે તેવી વાત કરી દારૂબંધીની અમલવારી સામે સવાલો ઉઠાવ્યા હતા. આ વીડિયો સોશિયલ મીડિયામાં વાયરલ થતાં પોલીસ તંત્ર હરકતમાં આવ્યું હતું.
પોલીસે વીડિયોના આધારે તપાસ હાથ ધરી સદામહુશેન ખીરાના રહેણાંક મકાન ખાતે કાર્યવાહી કરી હતી. તપાસ દરમિયાન તેના કબજામાંથી ભારતીય બનાવટના વિદેશી દારૂની ૧૩ બોટલ મળી આવતાં પોલીસે દારૂનો જથ્થો કબજે કરી આરોપી સામે કાયદેસરની કાર્યવાહી હાથ ધરી હતી.દરમિયાન પોલીસની કાર્યવાહી બાદ આરોપીના સૂર બદલાયા હતા. તેણે ફરી એક વીડિયો બનાવી તેમાં પોતે દારૂના નશામાં હોવાથી અગાઉનો વીડિયો બનાવ્યો હોવાનું કબૂલ્યું હતું અને અગાઉ વાયરલ કરાયેલા વીડિયોમાં કરેલી વાતો બદલ પોલીસની માફી માંગી હતી. માફી માંગતો આ વીડિયો પણ સોશિયલ મીડિયામાં વાયરલ થતાં સમગ્ર મામલો ફરી ચર્ચામાં આવ્યો છે.
એક તરફ દારૂબંધીની અમલવારી સામે ખુલ્લેઆમ બફાટ કરતો વીડિયો અને બીજી તરફ દારૂ સાથે ઝડપાયા બાદ એ જ શખ્સ દ્વારા માફી માંગતો વીડિયો વાયરલ થતાં આ ઘટનાને લઈને શહેરમાં અનેક પ્રકારની ચર્ચાઓ શરૂ થઈ છે.
