જામનગરમાં કંપનીનો રૂ. ૭૦ થી ૮૦ લાખનો માલ ગુમ થવાનો મામલો: સ્ટોર મેનેજર સામેની FIR રદ કરવા હાઈકોર્ટમાં કરાયેલી પીટીશન પરત ખેંચાઈ
-
ગુજરાત હાઈકોર્ટે ક્વાશિંગ પીટીશન યોગ્ય ન જણાતાં આરોપી સ્ટોર મેનેજર દિવ્યેશગીરી ગોસ્વામીને પીટીશન વિથ-ડ્રો (પરત) કરવાની ફરજ પડી
-
CCTV તપાસમાં સ્ટોર મેનેજર અને અન્ય બે ઈસમોની સંડોવણી ખુલી
દેશ દેવી ન્યુઝ જામનગર / અમદાવાદ તા. ૧ ઓક્ટોબર ૨૬ જામનગરમાં આવેલી ‘અરજણ પ્રિસીઝન મેટલ પ્રા. લી.’ કંપનીમાં બ્રાસ, કોપર અને સ્ટીલ સહિતના કરોડોના સામગ્રીની ચોરી/ફુલેકુ ફેરવવાના ચર્ચાસપદ બનાવમાં મુખ્ય આરોપી અને સ્ટોર મેનેજરે પોતાની સામે નોંધાયેલી FIR રદ કરાવવા ગુજરાત હાઈકોર્ટના દ્વાર ખટખટાવ્યા હતા. પરંતુ હાઈકોર્ટે અરજી ગ્રાહ્ય રાખવા યોગ્ય ન ગણતાં આરોપીને અંતે પોતાની પીટીશન પરત (વિથ-ડ્રો) ખેંચી લેવી પડી છે. રૂ. ૭૦ થી ૮૦ લાખનો માલ-સમાન ઓછો માલૂમ પડ્યો હતો
કેસની વિગત મુજબ, જામનગરમાં આવેલી મશીન કોમ્પોનેન્ટસ બનાવતી ‘અરજણ પ્રિસીઝન મેટલ પ્રા. લી.’ કંપનીમાં એપ્રિલ-૨૦૨૫ દરમિયાન સ્ટોક મેળવણી હાથ ધરવામાં આવી હતી. જે તપાસ દરમિયાન બ્રાસ, કોપર સ્ટીલ, ચાંદી પ્લેટીંગનો માલ, ટુલ્સ તથા ભંગાર મળી આશરે રૂ. ૭૦ થી ૮૦ લાખની કિંમતનો માલસામાન ઓછો મળી આવ્યો હતો.
CCTV તપાસમાં સ્ટોર મેનેજર અને અન્ય બે ઈસમોની સંડોવણી ખુલી આ મામલે સઘન તપાસ અને સીસીટીવી ફુટેજ ચકાસતા માલૂમ પડ્યું હતું કે, છેલ્લા એક વર્ષથી કંપનીમાં નોકરી કરતા સ્ટોર મેનેજર દિવ્યેશગીરી સુરજગર ગોસ્વામી તથા અન્ય બે ઈસમો દ્વારા કંપનીની પરવાનગી વગર આશરે રૂ. ૭૦ થી ૮૦ લાખની રકમનો માલસામાન બારોબાર લઈ જવામાં આવ્યો હતો.
પોલીસ ફરિયાદ અને હાઈકોર્ટમાં ક્વાશિંગ પીટીશન કંપનીના ડાયરેક્ટર દિલીપભાઈ ટેકચંદભાઈ ચંદનાણી દ્વારા પોલીસ મથકમાં ફરિયાદ નોંધાવવામાં આવી હતી, જેના આધારે પોલીસે આરોપી દિવ્યેશગીરી સુરજગર ગોસ્વામી વિરુદ્ધ FIR રજિસ્ટર કરી હતી. આ FIR રદ (ક્વાશ) કરાવવા આરોપી દિવ્યેશગીરીએ નામદાર ગુજરાત હાઈકોર્ટમાં ક્વાશિંગ પીટીશન દાખલ કરી હતી.
હાઈકોર્ટમાં બંને પક્ષોની રજૂઆત બાદ અરજી પરત ખેંચીનામદાર ગુજરાત હાઈકોર્ટે તપાસ કરનાર અધિકારી દ્વારા રજૂ કરાયેલ અહેવાલ, સાક્ષીઓના નિવેદનો અને બંને પક્ષકારોની રજૂઆતો ધ્યાને લીધી હતી. તમામ પુરાવાઓ અને રજૂઆતો જોતાં હાઈકોર્ટે FIR રદ કરવા માટે યોગ્ય ન હોવાનું જણાતાં આરોપી દિવ્યેશગીરી સુરજગર ગોસ્વામી દ્વારા કરાયેલ ક્વાશિંગ પીટીશન પરત ખેંચવી (વિથ-ડ્રો કરવી) પડી છે. આ કેસમાં મૂળ ફરિયાદી કંપની અરજણ પ્રિસીઝન મેટલ પ્રા. લી. તરફથી જામનગરના જાણીતા સીનિયર ધારાશાસ્ત્રી જયેન્દ્રસિંહ એન. ઝાલા તથા ગુજરાત હાઈકોર્ટના ધારા શાસ્ત્રી નિરલ વી. ઝાલા અને જીતેન્દ્ર ડી. પટેલ રોકાયેલા હતા.
