જામનગર મહાનગરપાલિકા ચૂંટણી માટે ભાજપ દ્વારા ગઈકાલે ૧૬ વોર્ડના ૬૪ ઉમેદવારો ની યાદીમાં મોટો ફેરફાર સાથે પ્રસિદ્ધ કરાતાં રાજકીય ભારે ઉથલ પાથલ
-
પૂર્વ મેયર, સ્ટેન્ડિંગ ચેરમેન સહિતના ૩૬ નામો કપાતાં રાજકીય ભૂકંપ : માત્ર ૧૪ પૂર્વ કોર્પોરેટરોને ફરી ટીકીટ અપાઈ : જ્યારે ૩૬ નવા ચહેરાઓને સ્થાન
-
ટિકિટ વેચણી મુદ્દે ચર્ચા તેજ : પરિવાર જોડાણ ધરાવતા ઉમેદવારોને ટિકિટ મળતા રાજકીય ગરમાવો
-
જામનગર વોર્ડ નંબર ૪ માં ભાજપને ઝટકો : ટીકીટ કપાતા બે પૂર્વ કોર્પોરેટરો બસપા માં જોડાયા : ચૂંટણી લડશે
-
શહેર ભાજપ લઘુમતી મોરચાના ઉપપ્રમુખ ઉમર સોઢા અને સોશિયલ મીડિયા કન્વીનર અનવર સંધારે પાર્ટી સાથે છેડો ફાડ્યો
દેશ દેવી ન્યુઝ જામનગર, તા. ૧૧ એપ્રિલ ૨૬,જામનગર મહાનગરપાલિકાની આવનારી ચૂંટણીને ધ્યાનમાં રાખીને ભાજપ દ્વારા ગઈકાલે જાહેર કરાયેલાં ઉમેદવારોની યાદીએ શહેરના રાજકીય વર્તુળોમાં ભારે ચકચાર મચાવી છે. આ વખતે પક્ષે મોટા પાયે ફેરફારો કરીને ગત ટર્મના મોટા ભાગના કોર્પોરેટરોને રીપિટ કર્યા વગર નવા ચહેરાઓને તક આપી છે.
જાહેર થયેલી યાદી મુજબ માત્ર ૧૪ પૂર્વ કોર્પોરેટરોને જ ફરી તક આપવામાં આવી છે, જ્યારે અનેક ગત બોડી ના અનેક સભ્યોના પત્તા કપાતાં રાજકીય ચર્ચાઓ તેજ બની છે. ખાસ કરીને પૂર્વ મેયર વિનોદ ખીમસુરિયા, પૂર્વ સ્ટેન્ડિંગ કમિટી ચેરમેન નિલેશ કગથરા, પૂર્વ ડેપ્યુટી મેયર ક્રિષ્નાબેન સોઢા તેમજ દંડક કેતન નાખવા જેવા અગ્રણીઓને ટિકિટ ન મળતા આશ્ચર્ય અને અસંતોષનો માહોલ સર્જાયો છે.
બીજી તરફ, પાર્ટીએ ૧૪ જેટલા પસંદગીના કોર્પોરેટરો પર વિશ્વાસ જતાવીને તેમને ફરીથી મેદાનમાં ઉતાર્યા છે. જેમાં જયરાજસિંહ જાડેજા, સુભાષ જોશી, જીતેશ શીંગાળા, આશિષ જોશી, જશુબા ઝાલા, તૃપ્તિબેન ખેતિયા, ધર્મિનાબેન સોઢા, ધીરેન્દ્ર મોનાણી, પ્રવિણાબેન રૂપડિયા, બબીતાબેન લાલવાણી, મનીષ કટારિયા, હર્ષાબા જાડેજા અને પાર્થ કોટડીયા જેવા નામોનો સમાવેશ થાય છે.
પાર્ટી દ્વારા નવા ચહેરાઓને પ્રાધાન્ય આપતા આ વખતની ચૂંટણીમાં સ્પર્ધા વધુ રસપ્રદ બનવાની સંભાવના વ્યક્ત કરવામાં આવી રહી છે. જોકે, ટિકિટ ન મળતાં અસંતોષનો સૂર પણ પાર્ટીના આંતરિક વર્તુળોમાં ઉઠી શકે તેવી શક્યતા નકારી શકાય તેમ નથી. ઉમેદવારોની યાદી જાહેર થતા જ શહેરમાં રાજકીય ગરમાવો વધ્યો છે અને હવે તમામ પક્ષો દ્વારા પ્રચાર-પ્રસારની તૈયારીઓ જોરશોરથી શરૂ કરવામાં આવી છે.
ભારતીય જનતા પાર્ટી દ્વારા ગઈકાલે ઉમેદવારોના નામની જાહેરાત કરાતાં ની સાથે જ શહેરમાં ક્યાંક ગમ તો ક્યાંક ખુશી નો માહોલ જોવા મળ્યો હતો. એકી સાથે ૩૬ પૂર્વ કોર્પોરેટર ની બાદબાકી કરાતાં ભાજપે આશ્ચર્યજનક યાદી પ્રસિદ્ધ કરી છે, અને ખાસ કરીને યુવા ચહેરાઓને વધુ તક આપવામાં આવી છે. છ પૂર્વ કોર્પોરેટરો કે તેઓના પરિવારજનોને પણ ભાજપે તક આપીને સાચવી લેવાના પ્રયત્નો કરવામાં આવ્યા છે.
