જામનગરના મેઘપર ગામે કોન્ટ્રાક્ટર ના મકાનમાંથી તસ્કરો ૨૨ લાખનું સોનું ઉઠાવી ગયા

જામનગર નજીક મેઘપર ગામમાં રહેતા એક કોન્ટ્રાક્ટરના રહેણાક મકાનને નિશાન બનાવી તસ્કરો રૂપિયા ૨૨ લાખનું સોનું ઉઠાવી જતાં ભારે ચકચાર

• મેઘપર પોલીસ મથકમાં ચોરીની ફરિયાદ નોંધાવાઈ : બે સગા સંબંધીઓ શંકાના દાયરામાં : એલસીબી દ્વારા તપાસ નો ધમધમાટ

દેશ દેવી ન્યૂઝ જામનગર તા ૧૮, સપ્ટેમ્બર ૨૫ જામનગર જિલ્લાના લાલપુર તાલુકાના મેઘપર ગામમાં રહેતા અને મોટી ખાવડી વિસ્તારમાં એક ખાનગી કંપનીમાં ટ્રેક્ટર ચલાવવાનો કોન્ટ્રાક્ટ રાખતા એક બુઝુર્ગ કે, જેઓ દ્વારા ગઈકાલે મેઘપર પડાણા પોલીસ મથકમાં પોતાના ઘરમાંથી રૂપિયા ૨૨ લાખની કિંમતના ૩૫૦ ગ્રામ સોનાના દાગીનાની ચોરી થઈ ગયા ની ફરિયાદ નોંધાવતાં ભારે ચકચાર જાગી છે. થોડા દિવસ પહેલા જેઓના ઘરમાં જામનગર થી બે મહેમાન આવ્યા હતા, જેઓને ઉપરોક્ત દાગીના બતાવ્યા હોવાથી તેઓએ તેની ચોરી કરી હોવાની શંકા દર્શાવતાં એલસીબીની ટુકડી આ બાબતમાં તપાસમાં કામે લાગી છે, અને નજીકના ભવિષ્યમાં ચોરીનો ભેદ ઉકેલાઈ જાય તે મનાઈ રહ્યું છે.આ બનાવની વિગત એવી છે કે લાલપુર તાલુકાના મેઘપર ગામમાં રહેતા અને ખાનગી કંપનીમાં ટ્રેક્ટર ચલાવવાનો કોન્ટ્રાક્ટર રાખતા કિશોરસિંહ કેશુભા જાડેજા નામના ૬૦ વર્ષના બુઝુર્ગ કે જેઓએ ગઈકાલે મેઘપર પોલીસ મથકમાં ફરિયાદ નોંધાવી જણાવ્યું છે, કે તેઓના પરિવારના ૩૫૦ ગ્રામની કિંમતના સોનાના જુદા જુદા દાગીના કે જેની કિંમત અંદાજે ૨૨ લાખ રૂપિયા જેટલી થાય છે, તે દાગીના તેઓએ પોતાના ઘરના પેટી પલંગમાં એક થેલી માં સંતાડીને રાખ્યા હતા. ત્યાંથી કોઈ તસ્કરો કોઈ પણ સમયે ચોરી કરી લઈ ગયા હોવાનું ધ્યાનમાં આવ્યું હતું.ગઈકાલે એક પ્રસંગમાં જવાનું હોવાથી દાગીના પહેરવા માટે ચેક કરતાં ઉપરોક્ત તમામ ઘરેણા ગાયબ થઈ ગયા હોવાનું ધ્યાનમાં આવ્યું હોવાથી આ મામલે પોલીસ ફરિયાદ નોંધાવાઇ હતી. જે ફરિયાદ બાદ સૌપ્રથમ મેઘપર પોલીસ ની ટિમ દોડતી થઈ હતી, અને ઊંડાણપૂર્વકની તપાસ શરૂ કરી હતી, તેમજ પરિવારના અન્ય સભ્યના નિવેદનો નોંધ્યા હતા. ઉપરોક્ત મસ મોટી ચોરીની ફરિયાદને લઈને જામનગરની લોકલ ક્રાઈમ બ્રાન્ચની ટીમ પણ દોડતી થઈ હતી, અને ફરિયાદી અને તેમના પરિવાર ની પૂછપરછ શરૂ કરતાં આજથી ૧૫ દિવસ પહેલા જામનગર થી બે સગા સબંધીઓ મહેમાન બનીને ફરિયાદીના ઘેર રોકાયાહતા, તેઓને ઉપરોક્ત દાગીના બતાવ્યા હતા. જેથી તે બંને ચોરી કરી ગઈ છે કે કેમ, તે અંગે શંકા દર્શાવાઈ હતી. જેથી એલસીબી ની ટિમ દ્વારા આ બનાવમાં ઊંડાણપૂર્વકની તપાસ શરૂ કરી દેવાઇ છે, અને નજીકના ભવિષ્યમાં જ આ ચોરી નો ભેદ ઉકેલાઈ જાય તેમ મનાઈ રહ્યું છે.