જામનગર નજીક ફલ્લા ગામમાં એક રહેણાક મકાનમાં ચાલતા હાઈ પ્રોફાઈલ જુગાર ધામ પર ગત મોડી રાત્રે એલસીબી નો દરોડો
-
રૂપિયા ૧૧ લાખની રોકડ સહિત સાડા બાર લાખની માલમતા સાથે મકાન માલિક સહિત ફલ્લા-ધ્રોળ-સહિત આઠ પત્તાપ્રેમીઓ પકડાયા
દેશ દેવી ન્યૂઝ જામનગર તા ૨૫, સપ્ટેમ્બર ૨૫ જામનગર નજીક ફલ્લા ગામમાં એક રહેણાક મકાનમાં હાઈ પ્રોફાઈલ જુગારધામ ચાલી રહ્યું છે, અને જામનગર, ફલ્લા ધ્રોલ સહિતના આસપાસના વિસ્તારના કેટલાક અઠંગ જુગારીઓ મોટો દાવ લગાવીને જુગાર રમવા માટે આવ્યા છે, તેવી ચોક્કસ બાતમી જામનગરની લોકલ ક્રાઈમ બ્રાન્ચ ની ટીમને મળી હતી.
જે બાતમી ના આધારે ગઈકાલે મોડી રાત્રે એલસીબીની ટુકડીએ ફલ્લા ગામમાં રહેતા નિતેશ ગણેશભાઈ ધમસાણીયા નામના ખેડૂતના રહેણાક મકાન પર ઓચિંતો દરોડો પાડયો હતોઝ જે દરોડા દરમિયાન આઠ પત્તાપ્રેમીઓ ગંજીપાના વડે હારજીતનો જુગાર રમી રહેલા મળી આવ્યા હતા.
આથી એલસીબીની ટુકડીએ મકાન માલિક મિતેશ ગણેશભાઈ ધમસાણીયા ઉપરાંત મીત કાનજીભાઈ દલસાણીયા, વસંત હરખાભાઈ નાગપરા, બીપીન વીરજીભાઈ અઘેરા, વિનોદ સવજીભાઈ કાનાણી, નિલેશ ભવનભાઈ ભીમાણી, જયસુખ નારણભાઈ ધમસાણીયા, અને અરવિંદ મોહનભાઈ ભીમાણી ની અટકાયત કરી લીધી છે. તેઓ પાસેથી રૂપિયા ૧૧,૦૩,૦૦૦ ની રોકડ રકમ, આઠ નંગ મોબાઈલ ફોન અને એક મોટરસાયકલ સહિત રૂપિયા ૧૨,૩૮,૦૦૦ ની માલમતા કબજે કરી લીધી છે.
